Yob 32:1-22
32 E dhanu adek maeno gigam giweko nidwoko lembe ni Yob, pilembe enwang’u nia e pwe.*
2 Ento ng’eicwiny ma dit umaku Elihu ma wod Barakel ma Jabuzi mi ot pa Ram. Kwinyo uopo i iye i kum Yob kum ebino mito enyuthere nia e* pwe ma sagu Mungu.
3 Ng’eicwiny unege bende lee i kum jurimb Yob adek pilembe ginwang’u ngo dwokowang’ lembe, ento giyero nia Mungu tie jatimrac.
4 Elihu ubino kuro nidwoko lembe ni Yob, pilembe gibino judongo ire.
5 Kinde ma Elihu uneno nia dhanu adek maeno gimbe ku lembe ma gidwoki, ng’eicwiny uopo i iye.
6 E Elihu ma wod Barakel ma Jabuzi ucaku wec, ewacu kumae:
“An atie aradu,ento wun wu judongo.
Pieno acerara cen ku woro,man ang’ap ungo niyero iwu lembe m’ang’eyo.
7 Aparu kumae: ‘Wek oro* uweci,man wek udul oro gitwong’ rieko.’
8 Ento tie tipo ma n’i dhanu,yuyo pa Jategokpo re ma miyo igi nyang’ i lembe.
9 Oro kende ngo* ma ketho ng’atini bedo riek,kadi tie ngo dhanu m’utii kendgi re ma ginyang’ i lembe m’atira.
10 Pieno awacu kumae: ‘Wukewinja,e an de abikoro iwu lembe m’ang’eyo.’
11 Nen! akuro wec mwu;amedara niwinjo kite ma wuluro ko i lembekinde ma wubeyenyo gin ma wuyer.
12 Aketho wiya kilili i beng’wu,ento ng’atu acel de mbe m’i kindwu m’ubino ku copo mi nyutho nia Yob utimo rac*kadi m’udwoko wang’ wec pare.
13 Dong’ kud wuwac kumae: ‘Wanwang’u rieko;Mungu re ma copo yero nia Yob utie ku kosa, dhanu ngo.’
14 Etiro ngo an ku wec pare,pieno abidwoko ngo ire lembe ve wun.
15 Lworo umakugi, lembe ma gidwoki uthum;gikoso lembe ma giyer.
16 Akuro, ento gimediri ngo ku wec;gicungo acunga kende keca m’umbe nidwoko lembe mange.
17 Pieno, an de abidwoko lembe;an de abiyero gin m’ang’eyo.
18 Kum wec upong’ i iya;tipo ma n’i iya ubecwala.
19 Iya calu pigulok ma dhoge m’ewok ko mbe,calu usau pigulok ma nyen m’udhingo moc.
20 Wek aweci kara anwang’ yom!
Abiyabu dend dhoga man abidwoko lembe.
21 Abinyutho ngo akoyakoya ni ng’atu moko,kadi abiyungo ngo* ng’atu moko ci,
22 kum ang’eyo yungo yung ungo;tek atimo kumeno, Ng’atu m’ucwiya bidara pio mandha.
Korolembe mi There
^ Kunoke “pilembe ebino pwe i wang’e gire.”
^ Kunoke “ng’eyong’ec pare.”
^ I dhu Juebrania: “nindo.”
^ Kunoke “Nindo dupa kende ngo.”
^ Kunoke “m’ujuko Yob.”
^ Kunoke “abimiyo ngo dito ni.”
