Yob 33:1-33
33 “Ento kawoni Yob, akweyi, winj wec para;winj lembe ceke m’abeyero.
2 Ka copere cik ithi! Ukwayu ayab dhoga;ukwayu leba* uweci.
3 Wec para ubenyutho bedo atira mir adundena,man leba ubeyero lembe m’ang’eyo m’umbe abombi.
4 Tipo pa Mungu re m’ucwiya,man yuyo pa Jategokpo re m’umiyo ira kwo.
5 Dwok ira lembe tek icopo;nyuth ira wec m’icero ko beng’i; cung ma tek.
6 Nen! an a calu in i wang’ Mungu mandha;an de jucwiya kud ulobo.
7 Lworo para kud unyay ndiri i ii,man lembe m’abiyero kud unuri.
8 Ento iyero i itha,eyo, amedara niwinjo wec ma e:
9 ‘An a leng’ m’umbe kier;a leng’ m’umbe kosa.
10 Re Mungu ubenwang’u thelembe mi ai i kuma;ebenena ni jadegi pare.
11 Eroyo tienda i kongo,ebeng’iyo i yo para ceke.’
12 Ento i lembe maeni iyero lembe m’atira ngo,pieno abedwoko iri lembe ma e:
Mungu en e dwong’ nisagu dhanu ma tho.
13 Pirang’o ibewak i wiye?
Nyo pilembe edwoko ngo wang’ lembe peri ceke?
14 Kum Mungu weco wang’ mi kwong’o man wang’ mir ario,ento ng’atu moko mbe m’uciko ithe,
15 i lek i gin ma wok i wang’ mi diewor,kinde ma nindo ma pek upodho iwi dhanukinde ma ginindo iwi kavuto migi.
16 E eyabu ithgiman ecung’o* telowic pare i wigi,
17 pi niloko ng’atini cen kud i kum timo ma racman nigwoko ng’atini kud i kum kuhaya.
18 Mungu gwoko ng’eyong’ec* pare kud i vur,*man kwo pare kud i nyoth mi palamularu.
19 Ng’atini nwang’u bende twiny nikum remo iwi kavuto pareman nikum adieng’acwiny m’uweko cogone ngo,
20 kara kwo pare* udag mukathi,man ekwer* kadok cam ma ber.
21 Ring’ kume unyothere ma dong’ ubenen ungo,man cogone ma naka upondo kawoni ubenen njer.*
22 Ng’eyong’ec* pare ucoro ceng’ini i dhu vur;*kwo pare ni ceng’ini ku ju ma kelo tho.
23 Tek jakwenda* moko unuti ire,jacer bang’jo acel kud i kind elufu,pi niyero lembe m’atira ni dhanu,
24 e Mungu nyutho ire bero man ewacu kumae:
‘Cere kara kud elor piny i vur!*
Anwang’u jamgony!
25 Wek ring’ kume udok nyen* nisagu ma nwang’u fodi en aradu;wek edwog i nindo mi tego mir aradu pare.’
26 Ebikwayu Mungu, man ebijole,man ebineno wang’ Mungu ku kok mir anyong’a,man Mungu bidwoko bedopwe pare ni dhanu ma tho.
27 Ng’atuno bituco* ni juwadi kumae:
‘Adubo man awiro wi lembe m’atira,ento anwang’u ngo gin m’uromo kuda.*
28 Ewaru ng’eyong’ec* para kara kud ucidh i vur,*man kwo para bineno der.’
29 Eyo, Mungu timo lembuno ceke,wang’ ario, wang’ adek pi dhanu,
30 pi niwodhe* kud i vur,*kara der mi kwo ucare.
31 Yob, cik ithi, winja!
Bed ling’, e abimedara niweco.
32 Tek itie ku lembe moko m’iyero, dwok ira.
Weci, kum abemito nyutho nia iyero lemandha.
33 Tek lembe m’ibeyero mbe ke, dong’ ukwayu iwinja;bed ling’ man abiponji ku rieko.”
Korolembe mi There
^ I dhu Juebrania: “leba ku danda.”
^ I dhu Juebrania: “eketho ayi iwi.”
^ Kunoke “kwo.”
^ Kunoke “liel.”
^ I dhu Juebrania: “en zoo.”
^ Kunoke “ng’eyong’ec pare ukwer.”
^ Kunoke “ma nying’.”
^ Kunoke “liel.”
^ Kunoke “kwo.”
^ Kunoke “malaika.”
^ Kunoke “liel.”
^ Kunoke “udok leng’.”
^ I dhu Juebrania: “biwer.”
^ Kunoke nyo “man ekonya ngo.”
^ Kunoke “kwo.”
^ Kunoke “liel.”
^ Kunoke “niwodho ng’eyong’ec pare.”
^ Kunoke “liel.”
