Yob 35:1-16
35 Elihu umedere ku dwokolembe kumae:
2 “Nyo fodi asu iyiyo nia ibeyero lembe ma kakare kinde m’iwacu nia,‘an a pwe ma sagu Mungu’?
3 Kum iwacu kumae: ‘Konyne ang’o iri?*
Nyo kwo para ber ma sagu ma ka nwang’u adubo?’
4 Abidwoko lembe iriman ni jurimbi ma gini karacelo kudi.
5 Ng’ay weng’i malu i polo man inen,nen cuu afuru ma gini malu lir i wii.
6 Tek idubo, itime rac nenedi?
Tek kier peri ubemedere, itimo ang’o i kume?
7 Tek i won bedopwe, imiyo ang’o ire;ebenwang’u ang’o i beng’i?
8 Racu peri mulo kende kende kum dhanu ma calu in,man bedopwe peri mulo kum wod dhanu.
9 Dhanu wak ka gin’i the loc mir adici ma tek;gikwayu nia julargi kud i the bimobim* mi weg tego.
10 Ento ng’atu moko mbe m’uwacu nia,‘Mungu ni kani, en m’e Jacwic* para Ma dit,ng’atu ma ketho wer werere ku diewori?’
11 Eponjowa nisagu yedi mi ng’om,man ecwiyowa riek nisagu winyo mi kor polo.
12 Dhanu ubekok, ento ebedwoko ngo,pi kuhaya mi judubo.
13 Andha Mungu winjo ngo kok ma iye nanu;*Jategokpo ketho ngo wiye i kume.
14 Dong’ ebiwinji ngo rukani kinde m’ibewegiri nia ibenene ngo!
Lemkesi peri n’i wang’e, dong’ kure ma kumi bemiel.
15 Kum ekwayu ngo ku ng’eicwiny nia iwodh wel;kadi edieng’ de ngo i kum tegowic peri m’ukadhu mukero.
16 Yob ubeyabu dhoge ma lac mananu;ebeweco lee m’umbe ng’eyong’ec.”
Korolembe mi There
^ Copere nia ni Mungu.
^ I dhu Juebrania: “bot.”
^ I dhu Juebrania: “Ng’atu m’utima.”
^ Kunoke “vupo.”
