Yob 42:1-17
42 E Yob udwoko ni Yehova kumae:
2 “Kawoni ang’eyo nia itie ku copo mi timo lembe cekeman nia gin moko mbe m’ibeparu nitimo ma copere ngo iri.
3 Iwacu kumae: ‘Eni tie ng’a m’ubenyotho juk para m’umbe ng’eyong’ec e?’
Pieno aweco, ento m’umbe ninyang’i lembe ma giwang’u iya dit, ma nwang’u ang’eyo ngo.
4 Iyero kumae: ‘Akweyi, kewinji man abiweco.
Abipenji ku penji man in ibinyutho ira.’
5 Nwang’u abed awinjo piri awinja ku itha,ento kawoni dong’ abeneni ku wang’a.
6 Pieno, can ubenega i kum lembe ceke m’ayero,man ayewo dubo para i utur man i vuru.”
7 I ng’ey ma Yehova uyero lembe maeni ni Yob, Yehova uyero ni Elifaz ma Jatheman kumae:
“Ng’eicwiny para uopo i kumi man i kum juwodhi ario, kum wuyero lemandha ngo pira calu ma jatic para ma Yob uyero.
8 Kawoni wuting’ thwoni dhieng’ abiro ku nyogi rombe abiro man wucidh i bang’ jatic para ma Yob, e wuthier lam m’awang’a piwu. Jatic para ma Yob birwo piwu. Abijolo kwac pare kende,* e abitimo ngo lembe iwu nimakere kud abelu mwu, kum wuyero ngo lemandha pira calu ma jatic para ma Yob uyero.”
9 Pieno, Elifaz ma Jatheman, Bildad ma Jacuwa, man Zofar ma Janaamathi gicidho man gitimo lembe ma Yehova uwacu igi gitim. E Yehova ujolo rwo pa Yob.
10 I ng’ey ma Yob urwo pi juwodhe, Yehova ugam udaru masendi pa Yob man edwoko ire lonyo* pare. Yehova umiyo ire gin ceke m’elar ebino ko wang’ ario.
11 Umego ku nyimego pare ceke man jurimbe ceke ma con gibino i bang’e man gicamu karacelo kude i ot pare. Giwage man gijuko cwinye pi can ceke ma Yehova uweko ubino i wiye. Ng’atuman m’i kindgi umiyo ire sente man lagith mi mola ma kwar.
12 Pieno Yehova umiyo mugisa iwi ng’et kwo pa Yob ma tokcen nisagu mir acakine, man Yob ubino ku rombe elufu apar ang’wen (14 000), ngamia elufu abusiel (6 000), dhieng’ ma gin ario ario elufu acel (1 000), man megi kana elufu acel (1 000).
13 Edok enyolo bende awiya ma co mange abiro man awiya ma nyir mange adek.
14 Ecaku nying’ nyakune ma kwong’a Yemima, mir arionde Kezia, man mir adege Keren-hapuk.
15 I ng’om maeca ceke, mon moko mbe ma gibino leng’ ve jumanyir pa Yob, man weggi umiyo igi giralaga karacelo kud umego migi.
16 I ng’ey lembe maeni, Yob ukwo oro dak acel ku pier ang’wen, man eneno awiya pare ku nyikwaye nitundo i dhanu m’utuk mir ang’wende.
17 Tokcenne, Yob ugam utho i ng’ey m’etii man m’epong’ ku nindo.
Korolembe mi There
^ I dhu Juebrania: “Abiting’o wang’e malu andha.”
^ I dhu Juebrania: “Yehova uloko ng’eca pa Yob.”
