Yob 6:1-30
6 E Yob ugam udwoko kumae:
2 “Ka nwang’u ndhu jupimo peko para ceke,man jukethogi karacelo ku can para iwi kilo ba!
3 Kum kawoni e pek nisagu kwiyo mi dhu nam,eno re m’uketho aweco swa.*
4 Kum athero pa Jategokpo ucoba,man tipona ubemadhu kwir migi;ndiri m’uai i bang’ Mungu urieyo i kuma.
5 Nyo kana mi lum biwak kinde ma lum utie ire,kunoke thwon dhiang’ biwak kinde m’etie ku cami?
6 Nyo jucopo camu cam ma tang’ m’umbe kadu,kunoke nyo anyong’a moko nuti de i bilo pii yen ma midone mbe?
7 Akwero* nimulo kum piny maeno.
Gitie calu tho i cam para.
8 Ah, ka nwang’u jucopo miyo ira gin m’akwayu!
Man ka nwang’u Mungu copo miyo ira yeny mir adundena!
9 Ka nwang’u Mungu copo bedo ayika nirungo iya,man ka nwang’u ecopo rieyo cinge man edara cen!
10 Kum nwang’u maeno ci de ubejuko cwinya;nwang’u apor malu kud anyong’a kadok nwang’u an’i litho ma yerere ngo,kum akwero ngo wec pa Ng’atu ma leng’.
11 Nyo atie asu ku kero m’acopo medara ko nikuro?
Lembang’o ma ber m’ubekura, ma nia amedara asu nikwo?*
12 Nyo tego para calu tego pa cana?
Kunoke nyo jucwiyo ring’ kuma ku mola?
13 Acopo konyara nenedima judaru maya ku yore ceke mi kony e?
14 Ng’atu moko ci m’ukwero ninyutho mer ma lokere ngo ni dhanu wadi,biweko nilworo Jategokpo.
15 Umego para ma buu gidoko weg abombi calu kulo mi saa pa koyo,calu pii m’i kulo mi saa pa koyo, ma dwono.
16 Gidoko col nikum lungu pei,man pei m’ubeloy pondo i igi.
17 Ento i ng’ey kare, pii thum kud i igi man gitundo i ajiki migi;kinde ma piny udoko lieth, gidwono.
18 Juwiro wi pii m’ubemol i igi;gimol i langa, man girwinyo.
19 Jukuloka mi Thema giyenyogi;juruwoth ma giai i Ceba* gikurogi.
20 Lewic negogi pilembe giketho genogen migi iwi gin m’umbe;gibino nitundo keca, ento ginwang’u gin moko ngo.
21 Kum wudoko ira kumeno;wuneno ndiri mi can para, e lworo umakuwu.
22 Nyo ayero de nia, ‘wumii ira piny moko,’kunoke nyo akwayuwu nia wumii ira kum lonyo mwu moko?
23 Nyo akwayu de nia julara kud i cing’ jadegi,kadi ke nia jubodha* kud i cing’ ju ma gibesenda?
24 Wuponja, e abiling’.
Wukonya anyang’ i kosa para.
25 Wec m’atira miyo ngo litho!
Ento bero ang’o ma copo nwang’ere i juk mwu?
26 Nyo wubecamu gamba pi nijuka pi wec para,ma en e wec pa ng’atu ma cwinye tur ma yamu leko ceni?
27 Wuromo goyo bende gagi iwi nyathikic,man wulworo jarimo mwu ma buu.
28 Pieno, kawoni wulokuru man wunen bang’a,kum acopo wondowu ngo i weng’wu.
29 Akwayuwu, wukeng’ii i lembuni kendo, kud wupok lembe rac i wiya,eyo, wukeng’ii i lembuni kendo, kum fodi bedopwe para tie kubang’e.
30 Nyo leba ubeyero lem gondiri?
Nyo danda copo ng’iyo ngo nia gin moko tie raci?
Korolembe mi There
^ Kunoke “m’umbe niparu; vur vur.”
^ Kunoke “ng’eyong’ec para kwero.”
^ Kunoke “ma nia amed ko kwo (ng’eyong’ec) para.”
^ Kunoke “udul juruwoth ma gi Jusabea.”
^ I dhu Juebrania: “juwara.”
