Yob 7:1-21
7 “Nyo kwo pa dhanu iwi ng’om tie ngo ve tic ma tek mir adici,man nyo nindo pare tie ngo ve pa jatic ma juculo acula?
2 Calu ng’eca, elarere alara i the tipo,man calu jatic ma juculo acula, ekuro cul pare.
3 Kumeno bende, jumiyo ira dwi dupa mi gin ma iye nanu,man jung’olo ira can pi diewor dupa.
4 Kinde m’abevuto, apenjara kumae: ‘Abiai awene?’
Man calu ma piny ukwero uberuu de ngo, asendara ma yom umbe nitundo i dhu mombwa.
5 Ukoko romo kuma ceke man ng’om ung’inere i kuma;dend kuma pong’ ku rem man ebecwiro tuc.
6 Nindo para ubekadhu pio ma sagu athuthe* pa jacwii bongu,man gibethum ma genogen umbe.
7 Poy nia kwo para tie yamu,man nia wang’a bineno ngo mutoro* kendo nyanok de.
8 Wang’ m’ubenena kawoni binena kendo ngo;weng’i bisayu kakara, ento abibedo mbe.
9 Calu afuru ma duny man erwinyo,ng’atu m’uloro piny i Liel* de dwogo ngo.
10 Ebidwogo ngo kendo i ot pare,man jubiwil pire kaka m’ebino i iye.
11 Pieno abicero ngo dhoga.
Abiweco nikum litho mir adundena,*man abiwagara nikum can para ma dit!*
12 Nyo an a nam kadi yedi ma dit mi nam,ma nia ikur ko wiya akura e?
13 Kinde m’awacu kumae: ‘Kavuto para bijuko cwinya,man pem para bikwiyo lak can para,’
14 e ilund inyayu ndiri i iya ku lekman imielo kuma ku gin ma wok i wang’,
15 uketho ang’iyo* nia athung’ cen,eyo, ang’iyo tho kakare nikwo kumeni.*
16 Adagu kwo para ku rac, abemito ngo amedara nikwo.
Wek abed gira, kum nindo para gi calu yuyo.
17 Dhanu ma tho e tie ang’o, ma nia iketh wii zoo i kume,man iketh adundeni i kume e?
18 Pirang’o ibeliewe nja kugwenoman ibemulo iye saa ceke?
19 Icopo loko ngo weng’i kud i bang’a,man iweka kenda nyangbaa m’amwony ko ndhu lau e ci?
20 Tek adubo, acopo timi rac nenedi in m’i Janen wi dhanu?
Pirang’o iketho weng’i i kuma?
Nyo adoko iri ni teri?
21 Pirang’o ibeweko ngo dubo paraman ibetimo ngo ira kisa pi kier para?
Kum ceng’ini eni abivuto piny i utur,ibisayu kakara, ento abibedo mbe.”
Korolembe mi There
^ Eno tie jamtic ma juriwo thol i wie pi nicwiyo piny.
^ I dhu Juebrania: “bineno ngo gin ma ber.”
^ Kunoke “Ceol,” niwacu liel mi dhanu ceke. Nen Thelembe mi wec.
^ I dhu Juebrania: “tipona.”
^ Kunoke “nikum ng’eyong’ec para ma kec.”
^ Kunoke “ng’eyong’ec para ng’iyo.”
^ I dhu Juebrania: “kakare ning’iyo cogona.”
