Barua pa Yuda 1:1-25
1 Niai kud i bang’ Yuda ma jamiru pa Yesu Kristu man m’umin Yakobo, ni ju ma julwong’ogi, ma Mungu ma Wego umaru man ma jugwokogi pi Yesu Kristu:
2 Kisa ku kwiyocwiny man mer umedere ameda iwu.
3 Jumer, kadok nwang’u abino ii ku kero para ceke pi nikiewo iwu pi both ma wan ceke watie ko, anwang’u nia pire tie tek ya akiew iwu pi nikwayuwu ya wunyeg ma tek pi yiyoyic m’umiyere ni jumaleng’ wang’ acel pi nja.
4 Thelembe m’uketho akiewo iwu utie nia dhanu moko ma yang’ Lembagora ular unyutho pi pokolembe ma gibinwang’u, gimondo i kindwu nyalwe; gitie dhanu ma giworo ngo Mungu man giloko bero ma yawe mbe pa Mungu mwa udoko igi ni thelembe mi bedo ku timo mir acidi man mi thwon,* man gibekwero jadit mwa m’acel kende man ma Rwoth Yesu Kristu.
5 Kadok nwang’u wung’eyo lembe maeni ceke cuu de, re abemito apoy wiwu nia Yehova ugam ubodho dhanu pare kud i ng’om Misiri, ento i ng’eye enyotho ju m’unyutho ngo yiyoyic.
6 Man jumalaika ma gigwoko ngo kaka migi mi dwong’ ma kwong’a ento giweko kabedo migi ma dhe, egwokogi i mudho ma col bii ma gibedo atwiya ku nyoro ma rondo ku rondo pi pokolembe i ceng’ ma dit.
7 Kumeno bende, Sodoma ku Gomora man adhura mange m’i ng’etgi bende, gigam gimiyiri ku rac i lembsasa mi tarwang’;* man gilubo tok awanya mi kum i ayi m’atira ngo, uketho ginwang’u pokolembe mi mac ma rondo ku rondo kara ubed iwa ni lapor mi cimowang’.
8 Kadok kumeno de, joni bende gibemiyiri i lek, gibecido kum, gibecayu dito, man gibeweco rac ku nying’ ju ma gitie ku dwong’.
9 Ma ke kadok Mikael ma jadit mi jumalaika, kinde ma giteliri giku Wonabali man giloko dhoggi iwi avuj Musa, epimo ngo apima de nipoko lembe i wiye ku dhoge ma rac, ento eyero kumae: “Dong’ Yehova ujuki.”
10 Ento joni gibeweco rac i kum piny ceke ma ke i andha gibenyang’ de ngo i igi. Man lembe ceke ma gibenyang’ i igi ku kum, ve lei ma rieko migi mbe, i lembe maeno re ma gibemediri ninyothiri.
11 Can i wigi, kum gilubo ba tiend Kain man gikonjiri vur i gengi mi kier pa Balam pi ninwang’u cul. Bende, gilubo tok wec mi jai pa Kora, man pi thelembe maeno gin de gibinyothiri calu en!
12 Joni gi calu cana m’upondo i the pii i foc mwu mi mer kinde ma gibetimo foc karacelo kudwu; gi jukwac ma tungiri gigi ma lworo mbe i the wang’gi; afuru ma pii mbe i iye ma yamu leko kun ku kun; yen mi tok oro ma cego ngo nyinggi, m’utho wang’ ario* man ma judaru fudho woko kud ulage;
13 gi mujanga ma reco mi nam ma gibethwogo lewic migi calu voyo; gi nyikaluku ma gimbe ku gengi migi ma tap, ma jugwoko igi mudho ma col bii pi rondo ku rondo.
14 Eyo, Enok m’ubino ng’atu mir abiro niai i kum Adamu de ugam uewo pigi kinde m’ewacu kumae: “Nen! Yehova ubino karacelo kud udul jumaleng’ pare
15 pi nipoko lembe iwi dhanu ceke man pi nimiyo matira ni judubo ceke pi lembe ma reco ma gitimo, man pi lembe ceke ma reco ma judubo m’ayi Mungu mbe i kumgi giyero ku nyinge.”
16 Joni gitie dhanu ma ging’ur man giwagiri pi kwo migi, ma gibelubo ko tok awanya migi gigi, man giluliri ku dhoggi gigi nikadhu mukero man gipaku jumange* pi ninwang’u piny moko i bang’gi.
17 Ento wun jumer, wupoy i kum lembe ma yang’ jukwenda pa Rwoth mwa Yesu Kristu gigam giyero;*
18 gibed giyero iwu kumae: “I saa mi kajik, jucac biwok man gibilubo tok awanya migi ma reco mi timo lembe ma foyo ngo i Mungu.”
19 Joni gi dhanu ma nyayu pokiri, gitimiri ve yedi,* man gitie ngo dhanu mi tipo.*
20 Ento wun jumer, wugomuru giwu iwi yiyoyic mwu ma leng’ nisagu, man wurwo nimakere ku tipo ma leng’
21 kara wumeduru nibedo i mer pa Mungu, ma nwang’u wubekuro kisa pa Rwoth mwa Yesu Kristu ma terojo i kwo ma rondo ku rondo.
22 Bende, wumeduru ninyutho kisa ni jumoko ma gitie ku jiji;
23 wulargi ma wuyudh kogi kud i mac. Ento wumeduru ninyutho kisa ni jumange bende, re wutime ku lworo ma wudag ko cil kendi ma kum ucido.
24 Dong’ ni ng’atu m’utie ku copo mi gwokowu kara kud wukier man ma copo ketho wucung ma cilo mbe i kumwu i wang’ dwong’ pare kud anyong’a ma dit,
25 ma en kende re m’e Mungu ma Jalar mwa nikadhu kud i bang’ Rwoth mwa Yesu Kristu, yung, dwong’, tego man dito ubed ire niai naka ku naka, kawoni, man pi rondo ku rondo. Amen.
Korolembe mi There
^ Kunoke “timo mi lewic.” Ku dhu Jugiriki wecne tie aselgeia. Nen Thelembe mi wec.
^ Nen Thelembe mi wec.
^ Kunoke “m’utho magwei.”
^ Kunoke “giyungo jumange pi dito.”
^ Kunoke “gilar giewo.”
^ Kunoke “gi dhanu mi kum.”
^ I dhu Jugiriki: “gimbe ku tipo.”
