Zaburi 109:1-31
Ni jatel wi wer. Wer pa Daudi.
109 E Mungu m’abepaku, kud ibed ling’.
2 Kum jutimrac man juvupo giyabu dhoggi i kuma.
Gibecwayu vupo i wiya.
3 Gitwoda tingili ku wec mir adegi,Man gitugo ali i wiya mananu.
4 Kawang’ mer para gibekelo adote i wiya;Ento abemedara nirwo.
5 Giculo ira racu kawang’ beroMan adegi kawang’ mer.
6 Keth jatimrac iwi jadegina;Dong’ jajai* ucung i cinge ma yor acwic.
7 Kinde ma jubepoko lembe i wiye, dong’ junwang’ nia etie jakosa,*Man kadok rwo pare de junen ni dubo.
8 Dong’ nindo pare ujwiki;Dong’ ng’atu mange umak tic pare mi liew.
9 Dong’ awiya pare* gidok nyithikic,Man dhaku pare udok dhatho.
10 Dong’ awiya pare* giwoth swa ma gibekwayu piny,Ma gibesayu cam bor kud uvuru udi migi.
11 Dong’ ng’atu m’umiyo ire banja umak piny pare ceke,Man jawirok uyak piny pare.
12 Dong’ ng’atu moko acel de kud unyuth ire mer ma lokere ngo,Man dong’ ng’atu moko acel de kud utim bero ni awiya pare ma gi nyithikic.
13 Dong’ jukab nyikwaye cen;Man dong’ nying’gi urwiny i kind dhanu m’utuk acel.
14 Dong’ Yehova upoy i kum kosa mi kwaru pare,Man dong’ dubo pa min kud urucere.
15 Dong’ Yehova uketh wiye saa ceke i kum gin ma gitimo;Man dong’ ekab poy migi cen kud i ng’om.
16 Kum epoy ungo ninyutho mer ma lokere ngo,Ento emedere niriemo tok ng’atu ma jubesendo, ma jacan,Man m’adundene tur pi ninege cen.
17 Egam emaru nikwong’o kwong’, e de kwong’ re m’udwogo i wiye;Egam emaru ngo nipoko mugisa, e en de enwang’u ngo mugisa.
18 Egam eronjere ku kwong’ calu bongu.
Man gimol i kume calu pii,Gimol i cogone calu mo.
19 Dong’ kwong’ pare udok calu bongu m’ebed ekendoMan calu mukaba m’ekendo saa ceke.
20 Eni tie cul ma Yehova biculo ni ng’atu m’ubejai i kumaMan ni ju ma gibeyero lembe ma reco i kuma.*
21 Ento in, Yehova ma tie Rwoth Ubimo ma Malu ngbir,Tim ira bero nikum nyingi
Bodha pilembe mer peri ma lokere ngo e ber.
22 Kum jakonyna mbe man a jacan,Man junyayu ret i adundena.
23 Abekadhu cen calu tipopiny m’ubemwony;Juyenga cen calu bonyo.
24 Conga ubemiel nikum kwirocam;Amok man abethum.*
25 Adoko igi ni jamcac.
Ka ginena, giyengo wigi.
26 Konya, E Yehova Mungu para;Bodha nikum mer peri ma lokere ngo.
27 Dong’ ging’ey nia eno tie nikum cingi;Nia in, E Yehova re m’itimo lembe maeni.
28 Wek gilam alam, ento dong’ in, mii mugisa.
Dong’ lewic umakgi kinde ma giai i kuma,Ento dong’ anyong’a uneg jatic peri.
29 Lewic udhurere iwi ju ma gibejai ira;Man gironyiri kud acidi calu koti.*
30 Dhoga bipaku Yehova ku cwinya ceke;Abipake i wang’ dhanu dupa.
31 Kum ebicungo i cing’ mir acwic pa jacanPi nibodhe kud i cing’ ju m’upoko lembe rac i wiye.*
Korolembe mi There
^ Kunoke “jadot.”
^ Kunoke “ng’atu ma rac.”
^ I dhu Juebrania: “wote.”
^ I dhu Juebrania: “wote.”
^ Kunoke “i kum ng’eyong’ec para.”
^ I dhu Juebrania: “Ring’ kuma umok man embe ku miyo.”
^ Kunoke “koti ma bote mbe.”
^ Kunoke “iwi ng’eyong’ec pare.”
