Zaburi 118:1-29
118 Wudwok foyofoc ni Yehova, pilembe e ber;Mer pare ma lokere ngo bedo rondo ku rondo.
2 Dong’ kawoni Israel giwac kumae:
“Mer pare ma lokere ngo bedo rondo ku rondo.”
3 Dong’ kawoni juruot p’Arun giwac kumae:
“Mer pare ma lokere ngo bedo rondo ku rondo.”
4 Dong’ kawoni ju ma gibelworo Yehova giwac kumae:
“Mer pare ma lokere ngo bedo rondo ku rondo.”
5 Akwayu Yah* i can para;Yah udwoko ira lembe man ekela kaka ma museme.*
6 Yehova n’i ng’ete para, lworo binega ngo.
Dhanu copo timo ang’o i kuma?
7 Yehova n’i ng’ete para calu jakonyna;*Abineno ju m’udaga ku wang’ mir aloci.
8 E ber dit nipondo i bang’ YehovaKakare nigeno dhanu.
9 E ber dit nipondo i bang’ YehovaKakare nigeno judongo ma wijo.
10 Thek ceke gidhoka tingili,Ento i nying’ Yehova,Alalugi cen.
11 Gitieka tingili, eyo, gitieka tingili mandha,Ento i nying’ Yehova,Alalugi cen.
12 Gitieka tingili calu kic,Ento githo nyapio pio calu mac mir ukudho.
I nying’ Yehova,Alalugi cen.
13 Jucwala ma tek mandha* kara apodhi,Ento Yehova ukonya.
14 Yah en e kapondo para man tego para,Man edoko ni both para.
15 Dwal mir anyong’a man mi both*N’i hema mi weg bedopwe.
Cing’ Yehova mir acwic ubenyutho tego pare.
16 Cing’ Yehova mir acwic udodere malu;Cing’ Yehova mir acwic ubenyutho tego pare.
17 Abitho ngo, ungo, abibedo kwo,Kara atuc pi tic pa Yah.
18 Yah utwinya m’umbe kisa,Ento emiya ngo ni tho.
19 Wuyab ira dhugola mi bedopwe;Abimondo kud i igi man abipaku Yah.
20 Eni tie dhugola pa Yehova.
Weg bedopwe gibimondo kud i iye.
21 Abipeki pilembe idwoko ira lembeMan idoko both para.
22 Kidi ma jugier ot gikweroRe m’udoko ni kidi ma dit m’i wi gul.*
23 Maeni uai i bang’ Yehova;Man etie gin ma wang’u ijo iwa.
24 Eni tie ceng’ ma Yehova uketho;Wabibedo kud anyong’a man ku mutoro i iye.
25 Yehova, wakweyi, timba bodhwa!
Yehova, wakweyi, mii iwa aloci!
26 Mugisa ni ng’atu m’ubebino i nying’ Yehova;Wabemiyo iwu mugisa kud i ot pa Yehova.
27 Yehova en e Mungu;Emiyo iwa der.
Wudikuru i piro m’ubetimo foc ku jang yen i cingwu,Nitundo i kum tung pemlam.
28 Itie Mungu para man abipeki,Mungu para abiyungi.
29 Wudwok foyofoc ni Yehova, pilembe e ber;Mer pare ma lokere ngo bedo rondo ku rondo.
Korolembe mi There
^ “Yah” utie nying’ ma Yehova i adundo.
^ Kunoke “kaka ma lac.”
^ Kunoke nyo “i kind ju m’ubekonya.”
^ Kunoke nyo “Icwala ma tek mandha.”
^ Kunoke “mir aloci.”
^ I dhu Juebrania: “m’udoko ni wi gul.”
