Zaburi 22:1-31
Ni jatel wi wer; ma juciko iwi “Ruda mi dhu mombwa.”* Wer pa Daudi.
22 Munguna, Munguna, ikuna pirang’o?
Pirang’o ibebino ngo nibodha,Pirang’o ibewinjo ngo wak mi can para?
2 Mungu para, abelwong’o kpe ku dieceng’, ento ibedwoko ngo lembe;Man abeling’ ungo ku diewor.
3 Ento in i leng’,Pak mir Israel utwodi* tingili.
4 Wegwa giketho genogen migi i wii;Gigeni man ibed ilarugi.
5 Giwak i beng’i man giboth;Gigeni man lewic unyay ungo i wigi.
6 Ento an atie ukoko, atie dhanu ngo,Adoko jamcac ni dhanu man gicenja.
7 Dhanu ceke ma gibenena gibeng’iera;Gibenzera man gibeyengo wigi ku cac ma gibewacu kumae:
8 “Ewekere i cing’ Yehova, dong’ elare ya!
Dong’ ebodhe, pilembe pire tie tek lee dit i iye!”
9 In i Ng’atu m’uwodha kud i ic,Ng’atu m’uketho awinjara museme i dhu thuno maa.
10 Juweka i cingi kara igwoka* niai ma junyola;Niai ma an’i maa, in i Mungu para.
11 Kud ibed bor kuda pilembe peko ni ceng’iniMan ambe ku jakony mange.
12 Nyithi thwoni dhieng’ dupa utwoda;Thwoni dhieng’ ma tek mi Bacan gitieka tingili.
13 Giyabu dhoggi ma lac i kuma,Calu umvor m’uberundo m’ubeyeco i cam pare thindho thindho.
14 Jukonja calu pii;Cogona ceke ulokiri kud i ujonj.
Adundena udoko calu udok;Ebeleny i iya.
15 Tegona uthwo kaw calu adekle;Leba umoko i kum ring’ laka;Ibelora piny i utur mi tho.
16 Kum gwogi utieka tingili;Gibecoro i kuma calu udul mi jutimrac,Calu umvor, gikayu cinga ku tienda.
17 Acopo kwanu cogona ceke.
Gibenena man gitono wang’gi tunu i kuma.
18 Gipoko i kendi para i kindgi,Man gigoyo bongu para ku gagi.
19 Ento in, E Yehova, kud ibed bor.
Itie tego para; bin pio pi nikonya.
20 Bodha* ni palamularu,Bodh kwo para* ma pire tek kud i tiend* gwogi.
21 Bodha kud i dhug umvor, man kud i kum tung thwoni dhieng’ mi lum;Dwok ira lembe man bodha.
22 Abinyutho nyingi ni umego para;Man abipeki i kind cokiri.
23 Wun ma wulworo Yehova, wupake!
Wu nyikway* Yakobo ceke, wumii dwong’ ire!
Wucungi ma kumwu ubemiel i wang’e, wu nyikway* Israel ceke.
24 Kum ecayu ngo kadi ecenjo de ngo masendi pa ng’atu ma jubesendo;Ekanu ngo ire wang’e.
Kinde m’ewak i bang’e pi nikwayu kony, ewinjo.
25 Abipeki i cokiri ma dit;Abipong’o lembang’ola para ma ku kwong’ i wang’ dhanu ma gilwori.
26 Ju ma mol gibicamu man gibiyeng’;Ju ma gibeyenyo Yehova gibipake.
Dong’ wukwo* kud anyong’a rondo ku rondo.
27 Gund ng’om ceke bipoy pi Yehova man gibidwogo i bang’e.
Suru ceke mi thek birum piny i weng’i.
28 Pilembe ker utie pa Yehova;Ebebimo iwi thek.
29 Julonyo* ceke mi ng’om gibicamu man gibirum piny;Ju ceke ma gibeloro piny i utur gibirumo cong’gi i wang’e;Ng’atu moko acel de mbe m’i kindgi ma copo bodho kwo* migi.
30 Nyikwaygi* bitimo ire;Jubiyero pi Yehova ni dhanu m’utuk m’ubino.
31 Gibibino man gibiyero pi bedopwe pare.
Gibinyutho lembe m’etimo ni dhanu ma fodi jubinyolo anyola.
Korolembe mi There
^ Copere eno tie wer kunoke ayi moko mi goyo wer.
^ Kunoke “Ibedo i kind (iwi) pak mir Israel.”
^ I dhu Juebrania: “Jubaya i wii.”
^ Kunoke “Bodh ng’eyong’ec para.”
^ I dhu Juebrania: “para ma kulong’,” eno ubenyutho ng’eyong’ec pare kunoke kwo pare.
^ I dhu Juebrania: “cing’.”
^ I dhu Juebrania: “kodhi pa.”
^ I dhu Juebrania: “kodhi pa.”
^ I dhu Juebrania: “Dong’ adundewu ukwo.”
^ I dhu Juebrania: “Ju m’ucwey.”
^ Kunoke “ng’eyong’ec.”
^ I dhu Juebrania: “Kodhi migi.”