Zaburi 30:1-12
-
Wak udoko ni anyong’a
-
Nwang’u bero pa Mungu en e mi kwo zoo (5)
-
Wer mi yabu dhu ot. Wer pa Daudi.
30 E Yehova, abipeki, kum iting’a* malu;Iweko ngo anyong’a neg judegina i kuma.
2 E Yehova Mungu para, awak i beng’i pi nikwayu kony, e ikeyo kuma.
3 E Yehova, iting’a* malu kud i Liel.*
Igwoka abedo kwo; icera kara kud amwony i vur ma lieng’.*
4 Wuwer wer mi pak* ni Yehova, wu ju ma wugwoko bedoleng’ mwu ire,Wupak nyinge* ma leng’;
5 Kum nibedo the kwinyo pare en e mi nindo moko kende,Ento ninwang’u bero pare en e mi kwo zoo.
Wak copo bino dhu uthieno, ento kugweno kok mir anyong’a bedo nuti.
6 Kinde ma lembe ubino ira miero, awacu kumae:
“Gin moko acel de mbe ma biyengo kuma.”
7 E Yehova, kinde ma nwang’u abino ku bero i weng’i, iketho adoko tek calu got.
Ento kinde m’ikanu weng’i, lworo unega.
8 Amedara nilwong’o in, E Yehova,Man amedara nikwayu nia anwang’ bero i weng’i Yehova.
9 Berone ang’o i rimba,* kan aloro i vur ma lieng’i?*
Nyo utur bipeki? Nyo ebikoro pi bedoleng’ peri?
10 Winja, E Yehova, man nyuth ira bero.
E Yehova, dok jakonyna.
11 Iloko wak para ni miel;Ikabu kendi para mi saki kud i kuma, man ironya kud anyong’a,
12 Kara awer* pak peri man kud abed ling’.
E Yehova Mungu para, abipeki pi nja.
Korolembe mi There
^ Kunoke “ipeya.”
^ Kunoke “iting’o ng’eyong’ec para.”
^ Kunoke “Ceol,” niwacu liel mi dhanu ceke. Nen Thelembe mi wec.
^ Kunoke “liel.”
^ Kunoke “Wugoy mizik.”
^ I dhu Juebrania: “poy pare.”
^ Kunoke “kan atho.”
^ Kunoke “liel.”
^ Kunoke “dwong’ para uwer.”
