Zaburi 31:1-24
Ni jatel wi wer. Wer pa Daudi.
31 Apondo i beng’i, E Yehova.
Dong’ lewic kud unyay i wiya ki.
Bodha nikum bedopwe peri.
2 Cik ithi* i bang’a.
Bin ilara pio.
Bed ira ni got ma museme calu kaka ma tek,Kabedo ma tek pi nibodha.
3 Kum in i cana para man kaka ma tek para;Pi nyingi ibipeya man ibitelo wiya.
4 Ibigonya kud i voi ma juciko ira i amung’,Pilembe in i ot ma tek para.
5 Amiyo tipona i cingi.
Iwara, E Yehova, in m’i Mungu mi lemandha.*
6 Adagu ju ma giworo ayi gin m’acwiya ma swa ma tijgi mbe,Ento an, aketho genogen para i Yehova.
7 Anyong’a binega lee dit pi mer peri ma lokere ngo,Kum ineno masendi para;Ing’eyo cuu can para ma dit.*
8 Imiya ngo i cing’ jadegi,Ento iketho acungo i kaka ma museme.*
9 Nyuth ira bero, E Yehova, kum an’i can.
Adieng’a udaru tego mi wang’a, man mi kuma zoo.*
10 Kwo para ubethum ku canMan oro para ku cur.
Tego para ubejwik nikum kosa para,Man tego mi cogona ubethum.
11 Judegina ceke gibecaya,Asagane judhugola para.
Man ju ma wang’eyara kugi gibelwora;Ka ginena i kind dhanu giringa.
12 Gikaba cen kud i adundegi* man giwil kuda calu ve dong’ atho;Atie ve agulu m’ung’eny.
13 Awinjo rwonglembe dupa ma reco mi vupo;E lworo utieka tingili.
Kinde ma gicokiri karacelo ni acel i kuma,Gicamu gamba kara gikab kwo* para cen.
14 Ento an ageno in, E Yehova.
Awacu kumae: “In i Mungu para.”
15 Nindo* para gini cingi.
Bodha kud i cing’ judegina man kud i cing’ ju ma gibenyayu ragedo i kuma.
16 Keth weng’i urieny iwi jatic peri,Bodha ku mer peri ma lokere ngo.
17 E Yehova, timba lewic kud unyay i wiya kinde m’abelwong’i.
Wek lewic unyay iwi jutimrac;Dong’ jumii dhoggi i Liel.*
18 Dong’ dendhok ma cwayu vupo udok ajuba,Dendhok ma weco ku ting’iri, ku kuyunga man cac i kum won bedopwe.
19 Bero peri dit mire maa!
Ikane ni ju ma gilwori,Man inyuthe i wang’ dhanu ceke pi ju ma gibepondo i beng’i.
20 Ibigwokogi i kaka m’upondo m’i vutiNi gamba mi dhanu;Ibikanugi i hema periNi piem mi leb.
21 Dong’ Yehova unwang’ pak,Kum i ayi ma wang’u ijo, enyutho ira mer pare ma lokere ngo i adhura ma jutieko.
22 Kum nwang’u ndiri umaka man awacu kumae:
“Abitho kud i weng’i.”
Ento iwinjo kwac para m’akwayu ko kony kinde m’awak i beng’i.
23 Wumar Yehova, wu ju ceke ma wubegwoko bedoleng’ mwu ire!
Yehova gwoko ju m’ugwoko bedoleng’ migi.
Ento emiyo matira ku rac ni ng’atu moko ci ma jakuyunga.
24 Cwinywu bed tek man wubed tek,*Wu ju ceke ma wubekuro Yehova.
Korolembe mi There
^ Kunoke “Kul kori man iwinji.”
^ Kunoke “Mungu ma jugeno.”
^ Kunoke “can m’unego ng’eyong’ec para.”
^ Kunoke “kaka ma lac.”
^ Kunoke “ng’eyong’ec para man iya.”
^ Kunoke “paru migi.”
^ Kunoke “ng’eyong’ec.”
^ I dhu Juebrania: “Saa.”
^ Kunoke “Ceol,” niwacu liel mi dhanu ceke. Nen Thelembe mi wec.
^ Kunoke “wuwek adundewu ucung nging’ nging’.”
