Zaburi 34:1-22
Pa Daudi, kinde m’eranju kite i wang’ Abimelek m’ugam urieme, e ecidho.
א [Alef]
34 Abipaku Yehova saa ceke;Pak pare bibedo iwi dend dhoga thiri thiri.
ב [Beth]
2 Abilulara* nikum Yehova;Ju ma mol biwinjo man anyong’a binegogi.
ג [Gimel]
3 Wuyung Yehova karacelo kuda;Wek wadod nyinge karacelo.
ד [Daleth]
4 Apenjo Yehova, man edwoko ira lembe.
Elara kud i lworo para ceke.
ה [He]
5 Ju m’uneno bang’e wang’gi rieny kud anyong’a;Lewic nego wang’gi ki ngo.
ז [Zayin]
6 Ng’atu maeni ma ka kite mbe ulwong’o, e Yehova uwinjo.
Ebodhe kud i can pare ceke.
ח [Heth]
7 Malaika pa Yehova ketho kagonjo gbur i ng’et ju m’ulwore,Man elarugi.
ט [Teth]
8 Wubil man wunen nia Yehova e ber;Jamutoro tie ng’atu m’upondo i bang’e.
י [Yod]
9 Wulwor Yehova, wu ju ma leng’ pare ceke,Kum ju ma gilwore gikoso ngo gin moko.
כ [Kaf]
10 Kadok nyithindh umvor* ma gi tek de kec unegogi,Ento ju m’ubeyenyo Yehova gibikoso ngo gin moko ma ber.
ל [Lamed]
11 Wubin, wota, wuwinja;Abiponjowu ku lworo pa Yehova.
מ [Mem]
12 Ng’a m’i kindwu m’ubemito ekwo ku mutoroMan ekwo kud anyong’a pi nindo ma dupa?
נ [Nun]
13 Dong’ gwok lebi kud i kum gin ma rac,Man dend dhogi kud i kum cwayu vupo.
ס [Samekh]
14 Lokiri cen kud i kum lembe ma rac man tim lembe ma ber;Yeny kwiyocwiny man riem toke.
ע [Ayin]
15 Wang’ Yehova n’i wi weg bedopwe,Man ithe winjo wak migi ma gibekwayu ko kony.
פ [Pe]
16 Ento wang’ Yehova n’i kum ju ma gibetimo lembe ma rac,Pi niruco poy ceke ma pigi ku wi ng’om.
צ [Tsade]
17 Weg bedopwe giwak, e Yehova uwinjo;Elarugi kud i can migi ceke.
ק [Kof]
18 Yehova ni ceng’ini ku ju m’adundegi tur;Ebodho ju ma cwinygi tur.*
ר [Rec]
19 Masendi* pa won bedopwe gi dupa,Ento Yehova lare kud i igi ceke.
ש [Cin]
20 Ebegwoko cogone ceke;Acel de mbe m’i kindgi m’utur.
ת [Taw]
21 Peko ma dit bikelo tho iwi jatimrac;Jubing’olo kosa iwi ju ma gidagu won bedopwe.
22 Yehova waru kwo mi jutic pare;Ng’atu moko acel de mbe m’i kind ju m’upondo i bang’e ma jubing’olo kosa i wiye.
Korolembe mi There
^ Kunoke “Ng’eyong’ec para bilulere.”
^ Kunoke “nyithindh umvor ma ng’utgi jumuzuga.”
^ I dhu Juebrania: “ju ma tipogi rungere.”
^ Kunoke “Peko.”
