Zaburi 65:1-13
Ni jatel wi wer. Wer pa Daudi.
65 Pak ubekuri i Sayuni, E Mungu;Wabipong’o lembang’ola ma ku kwong’ ma watimo iri.
2 E in m’i Jawinj rwo, dhanu mi kwonde ceke* bibino i beng’i.
3 Kosa para unura,Ento iumo wi dubo mwa.
4 Jamutoro tie ng’atu m’ing’iyo man m’ikelo ceng’iniKara ubed i lela peri.
Wabiyeng’ ku bero m’i ot peri,Hekalu peri ma leng’.
5 Ibidwoko iwa lembe ku tic ma wang’u ijo mi bedopwe,E Mungu mi both mwa;In i Genogen mi gund ng’om zooMan mi ju ma gin’i bor loka nam.
6 Iketho* gudi ucungo nging’ nging’ ku tego peri;Ironyiri* ku tego.
7 Ikwiyo* wi nam m’utang’,Mujanga migi m’ubedhongo man yakini mi thek.
8 Dhanu m’i kabedo ma bor igi biwang’ lii pi giranyutha peri;Ibiketho ju ma niai i wok pa ceng’ nitundo i mwony pa ceng’ gibikok kud anyong’a.
9 Ibedieng’ pi ng’om,Ibeketho ecego piny lee* man e miyo akeca.
Pii upong’ bik i kulo m’uai i bang’ Mungu;Imiyo nying’ cam ni dhanu,Kum kumeno re m’iyiko ng’om.
10 Ikwoyo pii i sayune man ipoto ng’ombe ma jufuro;*Iyome ku koth; imiyo mugisa iwi piny m’utwii i iye.
11 Iruko oro ku bero peri;Yo peri pong’ bik ku piny dupa.*
12 Luba mi langa ubedhir adhira* ku piny,Man ungulu gudi* uronyiri kud anyong’a.
13 Udul lim upong’o luba bim,Nying cam uromo poga* ceke.
Gibekok ku kok mir aloci, eyo gibewer.
Korolembe mi There
^ I dhu Juebrania: “kum ceke.”
^ I dhu Juebrania: “Eketho.”
^ I dhu Juebrania: “Eronyere.”
^ I dhu Juebrania: “Ekwiyo.”
^ I dhu Juebrania: “Iketho edhir.”
^ Kunoke “thungulu ng’omne.”
^ I dhu Juebrania: “Miyo ubemol i yo peri.”
^ I dhu Juebrania: “ubemol amola.”
^ Kunoke “nyithi gudi.”
^ Kunoke “pambu mi poga.”
