Zaburi 74:1-23
Maskil* p’Asaf.
74 Pirang’o E Mungu, iwekowa magwei?
Pirang’o ng’eicwiny peri uopo* i kum udul lim mi luba peri?
2 Poy pi dhanu* m’ing’iewo yang’ con,Pi thek m’iwaru kara ubed giralaga peri.
Poy pi Got Sayuni, kaka m’igam ibedo i iye.
3 Cidh i kabedo m’udong’ ni uvuru mi magwei.
Jadegi unyotho piny ceke mi kabedo ma leng’.
4 Judegi peri giberundo i ka cokiri peri.
Giguro hema migi keca calu giranyutha.
5 Gibino calu dhanu ma gibetong’o yen m’ujiyere i luli ku ley.
6 Girungo piny ceke ma jung’iko i kume ku ley man ku jamtic mi cuma.
7 Giwang’u hekalu peri ku mac.
Gicido hema mi thier ma nyingi ulwong’ere i kume, girwombe i ng’om.
8 Gin man nyikwaygi giwacu i adundegi kumae:
“Jucikiri niwang’u kabedo ceke mi thier pa Mungu* mi ng’ombuni.”
9 Giranyutha moko acel de mbe ma wabeneno;Jabila de dong’ umbe,Man ng’atu moko acel de mbe m’ung’eyo nia lembuni bimedere nitundo awene.
10 E Mungu, jakwor bimedere niroki nitundo awene?
Jadegi bicayu nyingi pi nja?
11 Pirang’o ibecero cingi, ma en e cingi ma yor acwici?
Rieye niai kud i kori* man ijig wigi cen.
12 Ento Mungu tie Ubimo para niai con,En m’e ng’atu ma timo tic mi both iwi ng’om.
13 Itugo i nam ku tego peri;Ing’enyo wi lei ma dongo mi nam i pii.
14 Irungo wi Leviathan;*Imiye ni cam ni dhanu, ni ju ma bedo i langa.
15 Iyabu gengi ni pii man ni kulo;Idwono pii ma dwono ngo.
16 Dieceng’ utie peri, man diewor bende.
Icwiyo der* man ceng’.
17 Iketho kieu ceke mi ng’om;Icwiyo cir* man oro.
18 Poy pi kite ma judegi giberoki ko, E Yehova,Kite ma thek ma jakasegu ubecayu ko nyingi.
19 Kud icib kwo* p’akuru peri mi lum ni yedi mi lum.
Wii kud uwil pi nja i kum kwo pa dhanu peri ma jubesendo.
20 Poy i kum lembariba,Kum kaka ma col mi ng’om upong’ ku kabedo mi dhanu ma giweg rop.
21 Dong’ ng’atu ma jubesendo kud ulok ku ng’eye ma cwinye utur;Dong’ ng’atu ma ka kite mbe man jacan upak nyingi.
22 Ai malu, E Mungu, man cer beng’i.
Poy pi kite ma jakasegu uberoki ko dieceng’ duu.
23 Wii kud uwil i kum lembe ma judegi peri gibeyero.
Woy mi dhanu ma gibejai iri ubeidho saa ceke.
Korolembe mi There
^ Nen Thelembe mi wec.
^ I dhu Juebrania: “uliel.”
^ I dhu Juebrania: “cokiri peri.”
^ Kunoke “kabedo ceke ma juworo Mungu i iye.”
^ Kunoke “kud i dhu bongu peri.”
^ Nen Thelembe mi wec.
^ Kunoke “giracwiya ma miyo der.”
^ Kunoke “saa pa koth.”
^ Kunoke “ng’eyong’ec.”
