Zaburi 78:1-72
-
Lembe ma ber ma Mungu utimo man gin m’unyutho nia Israel ukoso yiyoyic
Maskil* p’Asaf.
78 Wu dhanu para, wuwinj cik para;*Wucik ithwu pi niwinjo lembe mi dhoga.
2 Abiyabu dhoga ku lembabola.
Abibolo koy ma yang’ con.
3 Lembe ma wawinjo man ma wang’eyo,Ma wegwa gikoro iwa,
4 Wabikanugi ngo ni nyikwaygi;Wabikoro lembe m’uromo ku pak ma Yehova utimo man tego pareNi dhanu m’utuk ma bibino,Man lembe ma wang’u ijo m’etimo.
5 Eketho poyowic i kind wot YakoboMan cik i Israel;Eng’olo ni kwaruwaNia giketh wotgi ging’ey lembe maeni,
6 Kara dhanu m’utuk ma bibino,Niwacu awiya ma jubinyolo, ging’eygi.
Kara gin de gikorgi ni nyithindho migi.
7 E ju maeni gibiketho genogen migi i Mungu.
Wigi biwil ungo i kum tic pa Mungu,Ento gibiworo lembang’ola pare.
8 E gibibedo ngo calu kwarugi,Ma gibino dhanu m’utuk ma wigi tek man ma jujai,Dhanu m’utuk m’adundegi ubino lokere alokaMan ma pidoigi ucungo ngo i andha i kum Mungu.
9 Juefraim gibino kud athero,Ento giloko ku ng’eygi i nindo mi lwiny.
10 Giworo ngo lembariba pa MunguMan gikwero nilubo cik pare.
11 Bende wigi uwil i kum gin m’etimo,Ma en e tic pare ma wang’u ijo m’enyutho igi.
12 Etimo lembe ma wang’u ijo i wang’ kwarugi,I Zoan ma en e ng’om mi Misiri.
13 Epoko i nam kara gikadh kud i iye,Man eketho pii cungo calu thuthu.*
14 Etelo wigi kud afuru ku dieceng’Man ku der mi mac diewor traka.
15 Ekaku i cana i langa,Edaru rieu migi calu ve ku pii ma dit.
16 Eketho pii uthwogere kud i canaMan eketho pii umol calu kulo ma dit.
17 Ento gimediri nidubo ireMa gijai ko i kum Ng’atu ma Malu ngbir i langa;
18 Giketho Mungu i amulaic i adundegiMa gikwayu ko cam m’awanyane ubino negogi lee.*
19 Pieno giweco rac i kum Mungu,Ma giwacu kumae: “Nyo andha Mungu copo ketho meza i wang’wa i die langa?”
20 Nen! egoyo canaUketho pii uwok man kulo udhenyere.
“Nyo ecopo miyo iwa bende mukathi,Kunoke ecopo miyo ring’o ni dhanu pare?”
21 Kinde ma Yehova uwinjogi, e ng’eicwiny umake;Mac ugam uliel i kum Yakobo,Man kwinyo pare uopo i kum Israel
22 Pilembe giyiyo ngo Mungu;Gigeno ngo copo pare mi bodhogi.
23 Pieno eng’olo lembe ni afuru mi kor polo,Man eyabu dhugola mi polo.
24 Eketho mana ucwii igi kara gicam;Emiyo igi cam mi polo.
25 Dhanu gicamu cam mi jurukara;*Emiye igi lee pi niyeng’ogi.
26 Eketho yamu ma yo nyangu ukoto i kor poloMan nikum tego pare, eketho yamu ma yo piny ukoto.
27 Man eketho ring’o ucwii i wigi calu utur,Winyo, calu kwiyo m’i dhu nam.
28 Eketho gipodho i die kagonjo pare,I ng’et hema mi thier pare tingili.
29 E gicamu man giyeng’ thur;Emiyo igi gin ma gibino yenyo.
30 Ento ma fodi gipong’o ngo awanya migi ceke,Ma fodi cam migine n’i dhoggi,
31 Kwinyo pa Mungu uopo i kumgi.
Enego dhanu ma tek migi;Enego jumaco m’aradu mir Israel.
32 Re kadok kumeno de, gidubo dong’ nisaguMan gibino mbe ku yiyoyic i tic pare ma wang’u ijo.
33 Pieno eketho nindo migi ujik calu lietho,Man ejigo oro migi ku ndiri ma rek.
34 Ento wang’ ma pol kan ebenegogi, gibed gisayu kakare;Gilokiri man giyenyo kaka Mungu,
35 Gipoy nia Mungu ubino Cana migiMan nia Mungu ma Malu ngbir ubino Jawar* migi.
36 Ento gipimo nibombe ku dhoggiMan niwonde ku lebgi.
37 Adundegi ucungo ngo nging’ nging’ yor i bang’e;Man giworo ngo lembariba pare.
38 Ento kisa ubed unege;Ebed eweko* igi kosa migi man enyothogi ngo.
Wang’ ma pol ebed ecero ng’eicwiny pareKakare ma nia ewek kwinyo pare ceke uopi.
39 Kum ebed epoy nia gitie ring’kum,Gitie yamu ma kadhu man dwogo ngo.*
40 Gijai ire wang’ ma pol i langaMan ginyayu can i adundene i ng’om ngele!
41 Giketho Mungu i amulaic kendo kendo,Man ginyayu can i Ng’atu ma leng’ mir Israel.
42 Gipoy ungo i kum tego pare,*I kum nindo m’ebodhogi* i iye kud i cing’ jadegi,
43 Kite m’enyutho ko giranyutha pare i MisiriMan udu pare i ng’om mi Zoan,
44 Man kite m’eloko ko kulo Nil ni rimoUketho ecopere ngo igi nimadhu pii mi kulo migi.
45 Eoro udul umiyo pi nicamugiMan ungwal pi ninyothogi.
46 Emiyo cam migi ni bonyo ma mvoro piny,Man adwogi mi tic ma tek migi ni udul bonyo.
47 Enyotho ulok migi ku peiMan yend duru migi ku lungu pei.
48 Enego lei migi ku peiMan eketho lukoth ugoyo lim migi.
49 Ecoro ng’eicwiny pare ma lake tek i wigi,Ng’eicwiny, kwinyo man peko,Eoro udul jumalaika gikelo nyoth.
50 Eyiko yo ni ng’eicwiny pare.
Ecerogi* ngo ni tho;Man emiyogi* ni thong’om.
51 Tokcenne enego kayu ceke mi Misiri,Ma gitie acaki mi tego migi mi nyodo i hema pa Ham.
52 I ng’eye ewodho dhanu pare woko calu dwolMan etelo wigi i langa calu udul lim.
53 Etelo wigi museme,Man lworo unegogi ngo;Nam uumo wi judegi migi.
54 Man eterogi i ng’om pare ma leng’,Ng’om gudi maeni m’emaku ku cinge mir acwic.
55 Eriemo thek kud i wang’gi;Epoko igi giralaga ku thol mi pimo piny;Eketho suru mir Israel gibedo i udi migi.
56 Ento gimediri niketho Mungu ma Malu ngbir i amulaic man gijai i kume;Giketho ngo wigi i kum poyowic pare.
57 Gilokiri cen man gibino weg abombi calu kwarugi.
Gibino dhanu ma jugeno ngo calu athero ma wiye ucungo atira ngo.
58 Gimediri nitime rac ku kaka ma malu migi,Man ginyayu ng’eicwiny* i iye kud ayi gin m’acwiya m’ang’ika migi.
59 Mungu uwinjo man kwinyo umake,E eweko Israel magwei.
60 Tokcenne ewenjo hema mi thier mi Cilo,Ma tie hema m’ebed ebedo i iye i kind dhanu.
61 Eweko lanyuth mi tego pare ucidho i ng’eca;Dwong’ pare ucidho i ng’om pa jakwor.
62 Emiyo dhanu pare ni palamularuMan kwinyo umake i kum giralaga pare.
63 Mac uwang’u aradu pare ma co,Man juwero ngo wer mi nyom* ni sumba pare.
64 Julam pare gipodho ku lak palamularu,Man montho migi ma dhe giwak ungo.
65 I ng’eye Yehova ugam ucew ve ku wang’ nindo,Calu ng’atu ma jarukara m’ucew i ng’ey m’emadhu pigulok lee.
66 Man eriemo judegi pare ku ng’eygi;Enyayu lewic i wigi pi nja.
67 Eweko hema pa Yozefu;Eng’iyo ngo suru pa Efraim.
68 Ento eng’iyo suru pa Yuda,Got Sayuni m’emaru.
69 Eketho hekalu pare ubed mi nja calu polo,*Calu ng’om m’eketho ucungo pi rondo ku rondo.
70 Eng’iyo Daudi ma jatic pareMan egame kud i dwol mi rombe,
71 Ku kaka m’ebino gwoko i iye megi rombe ma tie ku nyithindhgi;Eketho ebed jakwac iwi Yakobo ma dhanu pare,Man iwi Israel ma giralaga pare.
72 Ekwayugi kud adunde m’atira,Man etelo wigi ku cing’ mi bodho.
Korolembe mi There
^ Nen Thelembe mi wec.
^ Kunoke “ponji.”
^ Kunoke “gang’.”
^ Kunoke “cam pi ng’eyong’ec migi.”
^ Kunoke “mi jumalaika.”
^ Kunoke “Jaculkwor.”
^ I dhu Juebrania: “Ebed eumo wi.”
^ Kunoke nyo “Nia tipo cidho man edwogo ngo.”
^ I dhu Juebrania: “cinge.”
^ I dhu Juebrania: “m’ewarugi.”
^ Kunoke “Ecero ng’eyong’ec migi.”
^ I dhu Juebrania: “emiyo kwo migi.”
^ Kunoke “nyeko.”
^ I dhu Juebrania: “Man jupaku ngo sumba pare.”
^ I dhu Juebrania: “Egiero hekalu pare uidho malu.”
