Zaburi 89:1-52
Maskil* pa Ethan ma Jaezrahi.
89 Abiwero pi mer ma lokere ngo pa Yehova rondo ku rondo.
Abituco pi bedoleng’ peri ku dhoga ni dhanu m’utuk ceke.
2 Kum awacu kumae: “Mer ma lokere ngo bigalu rondo ku rondo,Man iketho bedoleng’ peri ucungo nging’ nging’ i polo.”
3 “Atimo lembariba ku ng’atu m’ang’iyo;Akwong’o ni Daudi ma jatic para kumae:
4 ‘Abiketho nyikweyi* bicungo nging’ nging’ rondo ku rondo,Man abiketho komker peri bicungo ma tek i kind dhanu m’utuk ceke.’” (Sela)
5 Polo ubepeki pi tic peri ma wang’u ijo, E Yehova,Eyo, pi bedoleng’ peri i cokiri mi ju ma leng’.
6 Kum ng’a m’i polo ma jucopo poro ku Yehova?
I kind wot Mungu ng’a ma calu Yehova?
7 Juworo Mungu lee i cokiri mi ju ma leng’;Etie dit man eng’oyo ndiri i ju ceke m’utieke gbur.
8 E Yehova Mungu mir udul,Ng’a ma tek calu in, E Yah?
Bedoleng’ peri utieki gbur.
9 Ibimo wi nam m’utang’;Kinde ma mujangane udongo, ikwiyo wigi.
10 Irungo i Rahab calu ng’atu ma junego.
Ilalu judegini ku boti ma tek.
11 Polo gi peri man ng’om de tie peri;Ng’om ma cego piny ku piny m’upong’ i iye, in re m’iketho kathere migi.
12 In re m’icwiyo yo malu man yo piny;Tabor ku Hermon gibepaku nyingi ku mutoro.
13 Boti tek;Cingi tie ku kero;Cingi mir acwic udodere malu.
14 Bedopwe man bedatira tie kathere ma komker peri ucungo i wiye;Mer ma lokere ngo man bedoleng’ ucungo i weng’i.
15 Jumutoro gi ju ma gibepeki kud anyong’a.
E Yehova, giwotho i der ma n’i weng’i.
16 Anyong’a negogi dieceng’ duu nikum nyingi,Man gidodiri malu nikum bedopwe peri.
17 Kum in itie dwong’ mi tego migi,Man calu m’anyong’a unegi i kumwa, tego* mwa ubemedere.
18 Kum ban mwa en e pa Yehova,Ubimo mwa en e pa Ng’atu ma leng’ mir Israel.
19 I nindo maeca iweco i bang’ ju ma leng’ peri nikadhu kud i gin ma wok i wang’, iwacu kumae:
“Amiyo tego ni ng’atu ma tek;Adodo ng’atu ma jung’iyo kud i kind dhanu.
20 Anwang’u Daudi ma jatic para;Awire ku mo para ma leng’.
21 Cinga bitiele,Man bota bimiyo ire tego.
22 Jadegi moko mbe ma bing’olo ajok i wiye,Man won gondiri moko mbe ma bisende.
23 Abirungo i jukwor pare nziki nziki kud i wang’eMan abinego ju m’udage.
24 Bedoleng’ para man mer para ma lokere ngo ni karacelo kude,Man tego* pare bimedere ameda nikum nyinga.
25 Abiketho cinge* iwi namMan cinge ma yor acwic iwi kulo.
26 Ebiyero ira ku dwal ma tek kumae: ‘In i Vwa,Mungu para man Cana mi both para.’
27 Man abikethe calu kayu,Calu jabim ma dit i kind jubim mi ng’om.
28 Abigwoko ire mer para ma lokere ngo rondo ku rondo,Man lembariba m’atimo kude bitur ungo.
29 Abiketho nyikwaye* bicungo nging’ nging’ rondo ku rondoMan abiketho komker pare ugal calu polo.
30 Tek wote giweko cik paraMan giwotho ngo calku lembapoka para,
31 Tek gikadhu kud iwi cik paraMan giworo ngo lembang’ola para,
32 E abimiyo igi matira kud uluth pi koso woro* migiMan ku del pi kosa migi.
33 Ento abiweko ngo nyanok de ninyutho mer para ma lokere ngo ireKadi abikoso ngo nitimo lembe m’ang’olo.*
34 Abituro ngo lembariba paraKadi abiwilo ngo lembe ma dend dhoga udaru yero.
35 I leng’o para, akwong’o wang’ acel mi magwei;Abicwayu ndra ngo ni Daudi.
36 Nyikwaye* gibibedo rondo ku rondo;Komker pare bibedo nja calu ceng’ i wang’a.
37 Calu dwi, ebicungo nging’ nging’ rondo ku rondoCalu jamulembe mandha i kor polo.” (Sela)
38 Ento ibaye cen in giri man iwenje;Kwinyo umeki i kum ng’atu m’iwiro.
39 Ikwero ku cac lembariba m’itimo ku jatic peri;Idwoko jamker mi wic pare ni gin m’ucido m’ibaye ko i ng’om.
40 Irwombo gang’kidi* pare ceke;Idwoko ka ma tek pare ni uvuru.
41 Dhanu ceke m’ubekadhu ku keca giyake;Etie jamng’iero ni judhugola pare.
42 Iketho jukwor pare ginwang’u aloci;*Inyayu anyong’a i judegine ceke.
43 Idwoko bende palamularu pare ku ng’eye,Man iketho eloyo ngo lwiny.
44 Idaru leng’o pareMan ibayu komker pare i ng’om.
45 Ijwigo nindo mir aradu pare;Ironye ku lewic. (Sela)
46 E Yehova, ibipondo nitundo awene? Nyo pi nja?
Nyo ng’eicwiny peri bimedere asu niliel calu maci?
47 Poy kite ma kwo para adundo ko!
Nyo icwiyo dhanu e ceke mi mananu?
48 Ng’a ma copo kwo man etho ngo?
Nyo ecopo bodhere gire* kud i tego mi Lieli?* (Sela)
49 Tic mi mer peri ma lokere ngo ma con gini kani, E Yehova,M’ikwong’o pire ni Daudi calku bedoleng’ peri?
50 E Yehova, poy pi cac ma jubecayu ko jutic peri;Kite m’acikara niciro ko* cac mi dhanu ceke;
51 E Yehova, kite ma judegi peri gicayu ko;Kite ma gicayu ko dagutielo ceke pa ng’atu peri ma juwiro.
52 Dong’ pak ubed ni Yehova rondo ku rondo. Amen man amen.
Korolembe mi There
^ Nen Thelembe mi wec.
^ I dhu Juebrania: “kodhini.”
^ I dhu Juebrania: “tung’.”
^ I dhu Juebrania: “tung’.”
^ Kunoke “dito pare.”
^ I dhu Juebrania: “kodhine.”
^ Kunoke “jai.”
^ I dhu Juebrania: “abiweko ngo bedoleng’ para.”
^ I dhu Juebrania: “Kodhine.”
^ Kunoke “kapondo.”
^ I dhu Juebrania: “Iting’o cing’ judegine mir acwic.”
^ Kunoke “bodho ng’eyong’ec pare.”
^ I dhu Juebrania: “kud i cing’ Ceol,” niwacu liel mi dhanu ceke. Nen Thelembe mi wec.
^ I dhu Juebrania: “niyeyo i dhu kora.”
