JALUB ma nyinge Yakobo ugoro kumae: “Cor i vut Mungu, man ebicoro i vutwu.” (Yak. 4:8) Ku lemandha, Yehova ni malu hai ungo man eni bor akeca de ngo ma nia ecopo winjo ngo rwo mwa, kadok nwang’u watie dhanu ma wakoso bedoleng’ de. (Tic. 17:27) Waromo coro ceng’ini i vut Mungu nenedi? Waromo coro i vut Yehova nwang’u wabeketho winjiri mwa ubed ceng’ini kude, eno uketho i ie nirwo i bang’e ku cwinywa ceke. (Zab. 39:12) Bende, waromo bedo ku winjiri ma ceng’ini ku Mungu nwang’u wabeponjo Lembe pare Biblia kubang’ ceng’. Ka watimo kumeno, wabituc ning’eyo Yehova Mungu, lembakeca pare man gin m’eyenyo watim. (2 Tim. 3:16, 17) Eno biketho wabimare man wabibedo ku lworo m’umaku piny kara kud watim lembe m’edagu.​—Zab. 25:14.

² Jucopo bedo ku winjiri ma ceng’ini ku Yehova nikadhu kud i bang’ Wode ma Yesu kende. (Yoh. 17:3; Rum. 5:10) M’uweko Yesu, ng’atu mange mbe ma romo konyowa ma ber kara wang’ei paru pa Yehova. Eng’eyo Won cuu mandha, uketho eyero kumae: “Ng’atu moko mbe de m’ung’eyo nia Wod en e ng’a, ndhu Wego kende; kadi m’ung’eyo nia Wego de en e ng’a, ndhu Wod kende, ku ng’atu ma Wod uyenyo enyuthe ire.” (Lk. 10:22) Pieno, kinde ma wabeponjo buku mir Injili pi ning’eyo kite ma Yesu ubed uparu ko lembe man ebed ewinjere ko, nwang’u wabeng’eyo paru man kite ma Yehova winjere ko.  Ng’eyong’ec maeno bikonyowa wacor ceng’ini ku Mungu mwa.

³ Kara wabed i the telowic pa Wod Mungu man wabed ku mer ma ceng’ini ku Yehova, kwayu wamedara nibedo ceng’ini ku thenge ma nen mi dilo pare; kum dilone ubekonyowa niponjo kite mi timo yeny pa Mungu. Calu ma jular juyero i Matayo 24:45-47, Rwoth, niwacu, Yesu Kristu uketho ‘jamiru mandha man ma riek’ pi nimio ‘cemo i nindone’ ni juot mi yioyic. Tin eni, jamiru mandha ubemio iwa cemo mi tipo lee dit. Nikadhu kud i dilo maeni, Yehova ubekwayuwa nia wabed wasom Lembe pare kubang’ ceng’, wabed wacidh nja i coko mwa mi Jukristu man wadikara kud amora i tic mi rweyo “lembanyong’a mi Ker.” (Mat. 24:14; 28:19, 20; Yoc. 1:8; Zab. 1:1-3) Pieno, kwayu ngo wabed ku nen pa dhanu iwi jamiru mandha man ma riek. Ento wacikara nitimo kero nibedo ceng’ini mandha ku thenge ma nen mi dilo pa Yehova man nilubo telowic m’ubeai kud i dilone. Lembe maeni biketho kindwa bibedo ceng’ini magwei ku Yehova Mungu mwa man bimio iwa tego mi cungo ma tek, bende bigwokowa kadok wabenwang’ara kud amulaic.

⁴ Saa moko nyo i daru timo oro m’ulwar i lemandha. Ka kumeno, i ng’eyo ma ber dit amulaic ma wanwang’ara ko pi bedopwe mwa. Ento kadok nwang’u fodi nindo ung’adu ngo niai m’ing’eyo Yehova man icaku dikiri ku dhanu pare de, ing’eyo ma ber nia Sitani Wonabali nyayu ragedo i kum ng’atu moko ci m’ubejwigere i the dito ma malu ngbir pa Yehova. (2 Tim. 3:12) Pieno, kadok idaru nweng’iri kud amulaic ma nok kunoke ma lee, kwayu ngo iwek  nyanok de lworo umeki kunoke cwinyi utur. Yehova ung’olo nia ebimio iri tego man sukulia, bende ebibodhi man ebimio iri kwo i nindo m’ubino.​—Ebr. 13:5, 6; Nyu. 2:10.

⁵ Wan ceke wacopo nwang’ara kud amulaic i dong’ nindo mi ng’om ma rac maeni pa Sitani. Niai ma Ker pa Mungu ucaku bimo i oro 1914, juyio ngo Sitani umond i polo kaka ma Yehova ni i ie. Jubole piny i ng’om; kaka ma en karacelo ku jumalaika pare ma reco gibenwang’iri i ie niai eca. Masendi ma tin ugwaku ng’om man ragedo ma jubenyayu akeca i kum jutic pa Yehova ma githiero kwo migi ire, ubeai i kwinyo pa Sitani man eno ubenyutho andha nia wabekwo i nindo ma tokcen mi bimobim pare ma rac iwi dhanu.​—Nyu. 12:1-12.

⁶ Sitani tie ku kwinyo pilembe jurieme kud i polo man eng’eyo nia nindo pare dong’ nyanok kende. Pieno, en karacelo ku pajogi pare, gibetimo kero migi ceke kara gicer tic mi lembanyong’a mi Ker man ginyoth bedo i acel mi jutic pa Yehova. Lembuni uketho watie i dhu lwiny ma ger mi tipo ma jukoro pire kumae: “Anyego mwa en e kum ring’kum ku rimo de ngo, endre kum ker, kum tego, kum jubim mi mudho mi ng’om maeni, kum udul tipo mi dubo i ka mi polo.” Ka wabemito wanwang’ aloci man wabed i thenge pa Yehova, wacikara nikiedo asu m’umbe niweko man nimaku ma tek jamlwiny mwa ceke mi tipo. Wacikara bende ‘nicungo ki ni rieko’ pa Wonabali. (Ef. 6:10-17) Lembe maeni ubekwayu wanyuth cirocir ma lee dit.

⁷ Cirocir tie copo mi nyego ku lembe ma tek kunoke peko. Nimakere ku Biblia, cirocir nyutho copo mi cungo ma tek pi nitimo gin m’atira i wang’ peko, jai, ragedo  kunoke lembe mange ceke ma romo cerowa kara kud wamedara nigwoko bedopwe mwa ni Mungu. Jukristu gicikiri nicego cirocir acega, ento eting’o kare. Copo mwa mi ciro peko medere nwang’u wabeteng’ini i tipo. Nicaku ciro nyithi peko ma thindho thindho ma wanwang’ara ko niai ma wadoko Jukristu, ketho wadoko tek man wanwang’u copo mi ciro amulaic ma lee ma romo wok i nindo m’ubino. (Lk. 16:10) Kwayu ngo wakekur nia amulaic ma pek uwoki, ka dong’ wamak yub mi cungo ma tek i yioyic. Ento wacikara nimaku yub mi cungo ma tek nwang’u fodi amulaic uwok ungo. Jakwenda Petro unyutho nia jucikiri nicego cirocir karacelo ku kite mange pa Mungu, ekiewo kumae: ‘Wumed yor i beng’wu amora ceke, i yioyic mwu wumed bero; man i bero mwu ng’eyong’ec; i ng’eyong’ec mwu ke kwerigijo; i kwerigijo mwu ke twiocwiny; i twiocwiny mwu ke bedo ma ayi Mungu ni i kume; i bedo ma ayi Mungu ni i kume ke mer mi juwadijo; man i mer mi juwadijo ke mer.’​—2 Pet. 1:5-7; 1 Tim. 6:11.

⁸ I waraga ma Yakobo ugoro, enyutho iwa cuu nia pire tie tek nicego cirocir, egoro kumae: ‘Umego, tek wupodho i udul abidhe, wukwane ceke ni mutoro; ma wung’ei ko ya mulo yioyic mwu nyayu twiocwiny. Man wek twiocwiny ubed ku tic pare ma ndhu cuu, kara wubed ndhu cuu man dho de, ma wurem i gin moko ngo.’ (Yak. 1:2-4) Yakobo uyero nia Jukristu gicikiri nijolo amulaic man nibedo ku mutoro pir amulaicne, pilembe ekonyowa nibedo ku cirocir. Nyo in de itie ku paru ma kumeno? I ng’eye, edok enyutho nia cirocir utie ku tic pare, niwacu, ekonyowa kara wayik kite mwa mi Jukristu pi ninyayu anyong’a i Mungu. Ma jiji mbe, cirocir mwa bemedere kubang’ ceng’ ka wabenyego kud amulaic ma tung’ tung’ man wabevoyogi.  Cirocir ketho wacego bende kite mange ma beco ma watie ku yenyne.

⁹ Cirocir mwa nyayu anyong’a i Yehova; ka wanyutho cirocir ebimio iwa sukulia mi kwo ma rondo ku rondo. Yakobo udok umedo kumae: “Ng’atu m’uciro abidhe mugisa kwanye; kum ka judaru mulo ie, ebinwang’u jamkermiwic mi kwo, ma Rwoth ung’olo ni ju m’umare.” (Yak. 1:12) Eyo, waciro amulaic ni kum wang’eyo nia wabinwang’u kwo ma rondo ku rondo. M’umbe cirocir, waromo bedo ngo i lemandha. Pieno, ka waweko lembe ma reco mi ng’om maeni uvoyowa, wabidok kendo ku ng’eiwa i ng’om. Ka wambe ku cirocir, wabimedara ngo nibedo ku tipo pa Yehova man bende nicego nying’ tipone i kwo mwa.

¹⁰ Kara wamedara niciro amulaic i nindo ma rac maeni, kwayu wabed ku paru ma cuu iwi amulaicne calu ma watie Jukristu. Poi nia Yakobo ugoro kumae: “Wukwane ceke ni mutoro.” Etie yot ungo nibedo ku paru maeno, kum saa moko amulaic ma wanwang’ara ko mulo kumwa kunoke ng’abu cwinywa. Ento poi nia anyim peri ucungo iwi cirocir m’ibenyutho. Lembe ma jukwenda ginwang’iri ko, ubekonyowa ninyang’ nia wan de wacopo bedo ku mutoro i saa mi masendi. Lembene nwang’ere i buku mi Tic mi Jukwenda, jukoro kumae: “Gilwong’o jukwenda i bang’gi, gidong’ gifodogi afoda man ging’olo igi ya ku giyer ku nying’ Yesu, e giwekogi gicidho. E ka kumeno giai kud i dilo, ma anyong’a negogi kum jukwanu ya giromo  sendri ma jujwigo kogi kum Nying’ maeni.” (Tic. 5:40, 41) Jukwenda gituc ninyang’ nia masendi migi unyutho kamaleng’ nia gibino woro lembe ma Yesu ung’olo man ginwang’u bero i wang’ Yehova. Oro ma dupa i ng’eye, kinde ma tipo maleng’ utelo wi Petro pi nigoro waraga pare ma kwong’a, enyutho nia etie ber dit nisendiri pi bedopwe.​—1 Pet. 4:12-16.

¹¹ Lembe mange uwok i kum Paulo giku Sila. Kinde ma gibino timo tic migi mi misioner i Filipi, judotogi ya gibenyayu yakini i adhura man gibemewo ponji ma cik uyio ngo. Lembuno uketho jufodogi ku rac man jubologi i kol. Kinde ma fodi gini i kol man ma rem mi kumgi de ukei ungo, Biblia unyutho iwa kumae: “Ma piny udoko diewor ma ling’, nwang’u Paulo giku Sila giberwo gibewero wer de ni Mungu, jukol de gibewinjogi.” (Tic. 16:16-25) Paulo giku jawodhe gineno andha nia masendi migi pi Kristu ubino ngo kende kende lanyuth mi bedopwe migi i wang’ Mungu man i wang’ dhanu, ento ginene calu yo mange mi mio lembatuca ni ju ma giromo bedo ayika niwinjo lembanyong’a. Lembe ma gitimo utuc nibodho jumange de. I diewor nica, jakur odkol karacelo ku juode giwinjo lembanyong’a man gidoko julub. (Tic. 16:26-34) Paulo giku Sila giketho genogen migi iwi Yehova man i tego pare, giyio bende nia etie ayika nikonyogi i masendi migi. Cwinygi utur ungo.

¹² Tin bende, Yehova mio iwa piny ceke ma watie ku yenyne pi nikonyowa i saa ma wabenwang’ara kud amulaic, pilembe ebemito nia wacir. Emio iwa Lembe pare ma tipo maleng’ uyuyo i wie kara wanwang’ ng’eyong’ec ma tap iwi lembakeca pare, eno ubetielo yioyic mwa lee dit. Watie bende ku kaka ma wadikara ko ku juyic wadwa pi nitimo  ire tic ma leng’. Bende, watie ku rwom mi bedo ku winjiri ma ceng’ini ku Yehova en gire nikadhu kud i rwo. Ewinjo pak ma wabepake ko man kwac ma wabekwaye ko ku cwinywa ceke nia ekonywa wamedara nibedo leng’ i wang’e saa ceke. (Flp. 4:13) Kwayu ngo wiwa uwil bende i kum tego ma wacopo nwang’u, tekene wabeparu pi genogen ma juketho i wang’wa.​—Mat. 24:13; Ebr. 6:18; Nyu. 21:1-4.

¹³ Amulaic ma wabenwang’ara ko tin eni, urombo lee dit ku ma julub ma kwong’a pa Yesu Kristu ginwang’iri ko. I nindo ma tin de, Jumulembe pa Yehova gibenwang’iri kud amulaic ma tung’ tung’; amulaicne moko tie anywar kunoke fwodo m’ubeai i bang’ judhogwa ma judwoko igi lembe m’atira ngo i wiwa. Tap calu m’ubino i rundi mi jukwenda, masendi ma pol beai i bang’ ju ma gicwaku dini ma Lembe pa Mungu utuco wi ponji migi mi vupo man timo migi kamaleng’. (Tic. 17:5-9, 13) Saa moko dhanu pa Yehova ginwang’u akwiacwiny, kinde ma gikwayu nia juwor twero migi calku cik ma gavmenti uketho. (Tic. 22:25; 25:11) Ento, saa mange jubim mi ng’om giwodho cik pi nicero tic mwa man gitimo kero nijigo the tic mwa mi Jukristu. (Zab. 2:1-3) I saa ma kumeno, walubo lapor mi tegocwiny mi jukwenda ma gibino weg bedopwe. Gigam giwacu kumae: “Wakoworo Mungu be ma sagu woro dhanu.”​—Tic. 5:29.

¹⁴ Calu ma pidoic mi maru ng’om tugijo ubemere ameda i ng’om zoo, jubecego mac ma lee i kum jurwei nia giwek cen tic mi rweyo lembanyong’a ma Mungu mio igi. Jutic pa Mungu ceke ginyang’ cuu mandha i cimowang’  ma nwang’ere Lembanyutha 14:9-12, m’ukwero nia kud warwo ni “yedi kud ayine de.” Wanyang’ ma ber i wec ma e ma pire tek ma Yohana uyero: “Keni en e twiocwiny mi jumaleng’, gi ju ma giworo lembang’ola pa Mungu, ku yioyic pa Yesu.”

¹⁵ Amulaic ma tung’ tung’ ma bewok i saa mi lwiny, i saa ma ker ubelokere ku yakini man i saa mi ragedo ma tek kunoke kinde ma gavmenti uwodho cik pi nicero tic mwa, romo ketho ebedo iri tek nitimo thier mi Jukristu kamaleng’. Eromo copere ngo nia wucokuru karacelo kud umego ku nyimego pi nitimo coko man yore mi weco ku Bethel de romo bedo mbe. Jaliew mi twodiri de copo jigo niliewowu man girasoma de copo caku tundo ngo. Dong’ ka lembe moko kud i kind maeni uwok, iromo timo ang’o?

¹⁶ I adundo, tim gin ceke ma copere iri ku copo peri ceke i saa maeno. Iromo mediri asu nitimo ponji peri ma segi. Umego ku nyimego giromo becokiri wang’ ma pol i ungu ma thindho thindho pi nitimo coko i udi mir umego. Juromo betio ku girasoma m’uwok con man Biblia kende kende pi nitimo coko. Lworo kud umeki man ndiri de kud unegi. Wang’ ma pol, Guriri m’utelowic bituc nitimo kero pio pio pi ninwang’u yo moko mi beweco kud umego ma gibetelo wi tic.

¹⁷ Kadok inweng’iri kendi kaka m’umego ku nyimego peri ceke ma Jukristu gimbe i ie de, ng’ei nia itie ngo kendi, Yehova giku Wode ma Yesu Kristu gitie karacelo kudi. Icopo mediri nibedo ku genogen ma tek. Yehova copo medere niwinjo rwo peri man ecopo mio iri tego nikadhu kud i tipo maleng’. Kwaye kara etel wii. Poi nia itie jatic pa Yehova man jalub pa Yesu Kristu. Pieno, tii ma ber ku  kaka ceke m’ubenen iri pi nimio lembatuca. Yehova bimio mugisa iwi kero m’ibetimo man i ng’ei nindo moko dhanu mange de copo dikiri kudi i thier mandha.​—Tic. 4:13-31; 5:27-42; Flp. 1:27-30; 4:6, 7; 2 Tim. 4:16-18.

¹⁸ Ento tekene ibenweng’iri i wang’ masendi mi tho calu ma jukwenda ku jumange de ginwang’iri ko, dong’ keth genogen peri i ‘Mungu ma ting’o ju m’utho.’ (2 Kor. 1:8-10) Yioyic peri i lembang’ola mi cer ma Mungu ung’olo, copo konyi niciro kadok ragedo ma tek rukani. (Lk. 21:19) Kristu Yesu utie iwa lapor mi cirocir; eng’eyo nia gwoko bedoleng’ pare i saa mir amulaic copo mio kero ni jumange kara gicir. Tek iciro amulaic, ibikonyo umego ku nyimego mange kara gin bende ginwang’ tego mi ciro.​—Yoh. 16:33; Ebr. 12:2, 3; 1 Pet. 2:21.

¹⁹ M’uweko ragedo man jai ma wabenwang’ara ko, copere wabeciro bende lembe mange ma pek. Ku lapor, jumoko cwinygi tur pilembe dhanu mi kabedo ma girweyo i ie gijolo ngo lembanyong’a. Jumange ke gibenyego ku remokum, adieng’acwiny man peko ma kosobedoleng’ ukelo i kum dhanu. Jakwenda Paulo bende ubed unyego ku kit peko moko m’ubed usende i tic pare man saa moko ubed udwoko ire lembe tek. (2 Kor. 12:7) Epafrodito m’ubino Jakristu moko mi rundi ma kwong’a i cokiri mi Filipi de, “cwinye dieng’ dit, kum [jurimbe] winjo nia kume lith.” (Flp. 2:25-27) Kosobedoleng’ mwa man mi jumange de copo kelo peko ma ciro romo bedo tek magwei. Saa moko kosowinjiri copo wok i kindwa ku Jukristu wadwa kunoke kadok i kind juruot acel. Ento ka wabetio ku juk ma nwang’ere i Lembe pa Yehova, wacopo ciro peko maeno ceke cuu mandha man wavoyogi.​—Eze. 2:3-5; 1 Kor. 9:27; 13:8; Kol. 3:12-14; 1 Pet. 4:8.

²⁰ Wacikara nimoko kikiki i kum ng’atu ma Yehova uketho ubed Wic mi cokiri, Yesu Kristu. (Kol. 2:18, 19) Ukwayere nia watim tic karacelo ku ‘jamiru mandha man ma riek’ man ku ju ma jukethogi ni juliew. (Ebr. 13:7, 17) Tek wabemoko kikiki i kum telowic mi theokrasi man wabediko cingwa ku ju ma gibetelo wiwa, wabibedo i dilo ma Yehova ubetio ko pi nitimo yeny pare. Pire tek nia watii ku rwom ma Mungu umio iwa mi weco i bange nikadhu i rwo. Poi nia kadok juroyowa i odkol kunoke i kusikane ma watie i ie kendwa de, eno copo ngo nipoko kindwa niweco ku Wegwa mi polo ma jamer, kadi nilalu bedo i acel mwa ku Jukristu wadwa.

²¹ Watimu tego mwa ceke man wanyuth cirocir i tic mi lembanyong’a. Wamedara nitimo tic ma Yesu Kristu umio ni julub pare i ng’ei m’ecer, ewacu kumae: ‘Ka kumeno wucidhi, wuketh [dhanu m’i kind] thek ceke dok julub, wumi igi babutisi ku nying’ Wego ku Wod man tipo maleng’: wuponjgi ya giwor gin ceke m’ang’olo iwu.’ (Mat. 28:19, 20) Dong’ wan ceke waciru calu Yesu. Wamedara niketho wang’wa i kum genogen mi Ker man mi kwo ma rondo ku rondo. (Ebr. 12:2) Calu ma wadaru limo batizo man wadoko julub pa Kristu, watie ku rwom mi dikara i tic m’ubepong’o lembila ma Yesu uewo pi nindo mi ‘kajik mi ng’om.’ Eyero kumae: ‘Lembanyong’a maeni mi Ker jubiyero i ng’om ngung’ ni lembatuca ni thek ceke; e kajik bilund wok.’ (Mat. 24:3, 14) Tekene wabemiyara ku cwinywa ceke i tic mi lembanyong’a i nindo ma tin eni, wabibedo ku mutoro nikwo rondo ku rondo i ng’om ma nyen pa Yehova ma bedopwe bibedo i ie!