WIC MIR 16
Bedo i acel mir umego mi ng’om zoo
PI ORO ma romo 1 500, nyithindho mir Israel gibino thek m’ulwong’ere ku nying’ Yehova. I ng’eye, Yehova ‘liewo thekdhanumange ku kwong’a kara ewodh dhanu moko kud i kindgi pi nyinge.’ (Tic. 15:14) Pieno, dhanu ma gilwong’iri ku nying’ Yehova gicikiri nibedo Jumulembe pare, bende gicikiri nibedo i acel i paru man i timo migi i kabedo ceke ma gibekwo i ie i wang’ ng’om. Tic ma Yesu umio ni julub pare re ma bicoko dhu dhanu ma gilwong’iri ku nying’ Mungu kara gibed i acel. Yesu uyero kumae: ‘Wucidh wuketh [dhanu m’i kind] thek ceke dok julub, wumi igi babutisi ku nying’ Wego ku Wod man tipo maleng’: wuponjgi ya giwor gin ceke m’ang’olo iwu.’—Mat. 28:19, 20.
Itie i kind Jukristu ma gin umego ku nyimego i ng’om zoo ma gibekwo i acel man ma giyio ngo lembe mi thek, mi suru kunoke lonyo kadi can upok kindgi
2 Kinde m’ithiero kwo peri ni Yehova man ilimo batizo, igam idoko jalub pa Yesu Kristu. Itie i kind Jukristu ma gin umego ku nyimego i ng’om zoo ma gibekwo i acel man ma giyio ngo lembe mi thek, mi suru kunoke lonyo kadi can upok kindgi. (Zab. 133:1) Eno uketho imaru Jukristu wedu ma wutie wukugi i cokiri man iworogi. Jumoko m’i kindgi, rangi man thek migi ukoc ku peri, bende gisomo man jupidhogi ngo ve in, man pi thelembe maeno nwang’u con icopo maru ngo idikiri kugi. Gin m’udiko kindwu utie mer, ma en e jamtwic ma tek m’usagu lembe mange ceke ma romo diko kindjo, nik ebed thek, dini kunoke juruot mi rimo acel.—Mk. 10:29, 30; Kol. 3:14; 1 Pet. 1:22.
WALOKU PARU MWA
3 Tekene jumoko gibenwang’u nia etie tek nivoyo akoyakoya mi rangi, mi lembgamba man mi thek kunoke kit akoyakoyane mange m’udaru nyang’ i igi, kwayu gipar pi Jukristu mi rundi ma kwong’a ma gibino Juyahudi. Kum ugam ukwayere nia giwek cen akoyakoya mi dini ma gibino ko i kum dhanu mi thek mange ceke. Kinde ma jung’olo ni Petro nia ecidh i ot pa Kornelio ma jadit mir askari mi Roma, ku mer, Yehova ular uyiko paru pa Petro pi tic maeno m’emio ire.—Tic mi Jukwenda, thek 10.
4 I ginmawokiwang’ moko, juyero ni Petro nia eneg man ecam lei ma calku suru mi Juyahudi ubino piny m’ucido. Kinde ma Petro ujai, dwal moko uai i polo uyero ire kumae: “Gin ma Mungu lonyo kud idwoke ni gin [m’ucido].” (Tic. 10:15) Pieno, ugam ukwayu Mungu umond en i lembene kara Petro uyik paru pare pi tic m’ebecidho nimio ire, niwacu, liewo ng’atu mi thek mange. Petro ugam uworo telowic pa Yehova, e eyero ni dhanu m’ucokiri kumae: ‘Wun de wung’eyo giwu nia cik uyio ngo ya ng’atu ma Jayahudi ribre kadi ubin ba ng’atu ma thekdhanumange; ento Mungu nyutho ira nia kud alwong’ ng’atu moko nia dhanu ma swa kadi m’ucido de: kum kumeno abino ku piem ungo ka julwong’a.’ (Tic. 10:28, 29) I ng’eye, Petro uneno kamaleng’ lembe m’ubenyutho andha nia Yehova uyio Kornelio ku juode.
5 Ugam ukwayu Saul ma Jatarso m’ubino Jafarisayo m’uponjere lee mandha ujwigere man udikere ku dhanu ma nwang’u con ecopo maru ngo edikere kugi. Bende, ugam ukwayere nia enwang’ telowic niai kud i bang’gi. (Tic. 4:13; Gal. 1:13-20; Flp. 3:4-11) Wakepar bende pir alokaloka m’ugam ukwayu dhanu moko gitim i paru migi, jumoko m’i kindgi ubino Sergio Paulo, Dionusio, Damari, Filemon, Onesimo ku jumange dupa ma gijolo lembanyong’a man gidoko julub pa Yesu Kristu.—Tic. 13:6-12; 17:22, 33, 34; Flm. 8-20.
WAGWOKU BEDO I ACEL MWA MIR UMEGO MI NG’OM ZOO
6 Ma jiji mbe, mer m’umego ku nyimego gitie ko i cokiri ukonyi kara icor ceng’ini ku Yehova man ku dilo pare. Idaru neno kit mer ma segi ma jung’io ko julub mandha pa Yesu Kristu, calu ma en gire egam eyero kumae: “Amio iwu cik ma nyen, ya wumeru; cil calu amaruwu, nia wun bende wumeru. Kum kumeni dhanu ceke bing’eyo nia wu julubna tek wumeru.” (Yoh. 13:34, 35) Kinde m’inyang’ nia mer ma tie i cokiri utie kit mer m’utie i kind umego ku nyimego mi ng’om zoo, lembe maeno uketho ituc nimaru Yehova man dilo pare lee dit. Lembila mi Biblia uyero nia i nindo mi kajik ceng’ dhanu gibicokiri karacelo pi nitimo thier ni Yehova i kwiocwiny man i acel, m’umbe jiji ibeneno lembuno ku weng’i.—Mik. 4:1-5.
7 Calku lembe m’upong’ ma poko kind dhanu tin eni, ng’a dhe ma nwang’u romo paru nia ecicopere nidiko kind dhanu “m’uai kud i thek ceke kubang’gi nzu man kud i suru ceke man kodhidhanu ku dhok”? (Nyu. 7:9) Kenen tung’ tung’ ma tie i kind dhanu ma gibekwo i ng’om ma juyero nia udongo ku dhanu ma gibekwo i ng’om ma jubelubo i ie suru ma con. Kenen bende apokapoka mi dini m’utie i kind dhanu mi rangi ma rom man mi ng’om de ma rom. Bende, dhanu udaru royo mer mi ng’om thugijo lee dit i igi, uketho lembgamba de ubepoko kind dhanu nisagu zoo. Pieno, kan ibeneno tung’ tung’ m’unuti i kind julonyo ku jucan man lembe mange dupa ma kwanere ngo ma copo poko kind dhanu, nidiko dhanu mi thek ceke, mi dhok ma tung’ tung’ man mi kwonde kpo kara gibed ku mer mandha man ku kwiocwiny i kindgi, utie udu ma Mungu ma Jategokpo kende re ma romo timo.—Zek. 4:6.
8 Bedo i acel maeno ubenen andha. Pieno, kinde m’ithiero kwo peri ni Yehova man ilimo batizo pi nidoko Jamulembe pa Yehova, in de imondo i bedo i acelne. Dong’ kara inwang’ bero mi bedo i acel maeni, in de itie ku tic mi gwoke. Gin ma copo konyi utie nilubo juk ma jakwenda Paulo ugoro, ma nwang’ere i Jugalatia 6:10, m’uyero kumae: “Kum kumeno, ka fodi kakare nuti iwa, dong’ watim ber ni dhanu ceke, endre ma dhene re ni juot mi yioyic.” Walubo bende juk m’uyore nia: ‘Kud wutim gin moko kud ali kadok ku kulula mananu, ento ku pidoic ma mol wek ng’atuman ie pid ya wadi ber ma sagu en; ma wun kubeng’wu kubeng’wu ng’atuman ie ku pido kum piny pare kende ngo, ento ng’atuman ie pid kum piny mi juwadi bende.’ (Flp. 2:3, 4) Tekene wabetimo kero nineno umego ku nyimego mwa calu ma Yehova neno kogi, ento ungo kite ma gibenen ko yo woko, wabimedara nikwo kugi ku kwiocwiny man wabibedo ku winjiri ma ber kugi.—Ef. 4:23, 24.
NG’ATUMAN UDIENG’ PI WADI
9 Jakwenda Paulo utio ku lapor mi watkum kinde m’ebeweco pi cokiri man enyutho nia kwayu ngo epokere, ento ng’atuman mi ie udieng’ pi wadi. (1 Kor. 12:14-26) Kindwa romo bedo bor kud umego ku nyimego mwa moko, re wadieng’ bende pi bero migi. Tekene jubenyayu ragedo i kum jumoko, wan ceke can ma lee mondo i cwinywa. Ka jumoko gitie ku yeny mi kony kunoke peko ma wok rek unwang’ugi, bende lwiny man thubiri m’i kind thek uroyogi i peko, jumange ceke gibedo kud ava mi mio igi kony i thenge mi tipo man bende i thenge mi kum.—2 Kor. 1:8-11.
10 Wan ceke wacikara nirwo pir umego mwa kubang’ ceng’. Jumoko gibenyego kud abidhe mi timo lembe ma reco. Jumange ke gibeciro peko m’ubenen ngbeng’ i wang’ dhanu zoo. Jukurucel ke gibenwang’iri ku jai m’ubeai i bang’ jutic wagi man i bang’ juruot migi ma gitie ngo juyic, peko migine copere nia jumange ung’eyo ngo pire. (Mat. 10:35, 36; 1 Tes. 2:14) Peko ma gibecirone dieng’o cwinywa wan ceke, pilembe watie umego ku nyimego i wang’ ng’om zoo. (1 Pet. 5:9) Kud i kindwa jumoko gibetimo tic ma tek i dilo pa Yehova, calu ve nitelo wi tic mi lembanyong’a man mi cokiri. Jumange ke gibeneno wi tic m’ubetimere i wang’ ng’om zoo. Kwayu warwo pigi gin ceke; kum ka waberwo pigi, eno nyutho nia wamarugi man wabedieng’ pigi andha kadok nwang’u wacopo bedo mbe ku piny moko ma waromo konyo kogi wan giwa.—Ef. 1:16; 1 Tes. 1:2, 3; 5:25.
11 Ni kum anyobanyoba m’ugwaku ng’om i nindo maeni mi kajik ceng’, kwayu dhanu pa Yehova giponj kite ma gibed gikonyiri ko i kindgi. I saa mi peko ma wok rek, calu ve digidi man pii ma pong’o ng’om, kwayu jutim kero ma lee pi nimio kony m’ukwayere man jumak yub pi nitero piny ma yenyne nuti ni dhanu ma pekone mulo kumgi. Jukristu mi rundi ma kwong’a giweko iwa lapor ma ber mandha iwi lembe maeni. Kinde ma Jukristu mir Antiokia gipoi i kum juk pa Yesu, gigam gioro giramia ni umego mi Yahudi kud anyong’a. (Tic. 11:27-30; 20:35) I ng’eye, jakwenda Paulo utielo cwiny Jukristu mi Korinto nia gidik cing’gi i kum yub ma jumaku pi nikonyo umego kara lembene woth kakare. (2 Kor. 9:1-15) I nindo ma tin bende, ka peko moko uwok iwi umego ku nyimego m’ubekwayu nia jumii igi kony, dilo pa Yehova man Jukristu ceke gitimo pio pio pi nimio igi kony m’ukwayere.
WATIE AKOYA PI NITIMO YENY PA YEHOVA
12 Wadikara i acel kud umego ku nyimego mwa i ng’om zoo pi nitimo yeny pa Yehova. I nindo ma tin eni, yeny pa Yehova utie nia tic mi lembanyong’a mi Ker pare utimere cil i tung ng’om ni lembatuca ni thek ceke. (Mat. 24:14) Kinde ma wabetimo tic maeni, Yehova ubemito bende nia wakwo nimakere ku cik pare ma pwe iwi lembe m’uneno kurajo. (1 Pet. 1:14-16) Wan ceke wacikara nibedo ayika ninyutho jwigiri i kindwa man wamiara kara tic mi lembanyong’a ucidh i wang’e. (Ef. 5:21) Pieno, eni tie ngo saa m’ukwayu wayeny bero mwa giwa, ento ubekwayu waketh Ker pa Mungu i kabedo ma kwong’a i kwo mwa. (Mat. 6:33) Tekene watie ku paru maeni i wiwa kinde ma wabetimo tic mi lembanyong’a karacelo, wabibedo kud anyong’a tin eni man i nindo m’ubino ke wabinwang’u mugisa ma rondo ku rondo.
13 Wan ma watie Jumulembe pa Yehova, jukoyowa segi kud i kind thek dhanu; watie leng’ man wabetimo ni Mungu mwa kud amora. (Tit. 2:14) Thier ma wabetimo ni Yehova re m’uketho watie tung’ ku dhanu mange. Watimo tic gok ku gok kud umego mwa i wang’ ng’om zoo, bende waweco dhok acel mi lemandha man wakwo nimakere ku lemandha ma wabewecone. Yehova ular uewo lembe maeni nikadhu kud i bang’ jabila pare Zefania, eyero kumae: “Abiloko dhok ma leng’ ni kodhidhanu, kara gin ceke gilwong’ nying’ Yehova, kara gitim ire ku cwinygi acel.”—Zef. 3:9.
14 I ng’eye, Yehova udok utelo wi Zefania ku tipo maleng’ pi nikoro bedo i acel mir umego ku nyimego mi ng’om zoo ma tin ubenen kamaleng’, ewacu kumae: “Dong Israel bidubo ngo, kadi ndra de gibiyero ngo; kadi leb mir abombi de binwangre i dhoggi ngo; kum gibicamu man gibivuto piny, man ng’atu moko mbe ma binyayu lworo i igi.” (Zef. 3:13) Ninyang’ i lemandha ma Yehova ubeponjo kowa, uketho waloko paru mwa man wabekwo nimakere ku cik pare, man eno ubekonyowa kara watim tic i acel. Wabetimo lembe ma dhanu copo neno ve nia copere ngo. M’umbe jiji, wakoc bor ku dhanu mange, niwacu watie dhanu pa Mungu, ma gibemio yung ire i wang’ ng’om zoo.—Mik. 2:12.