PIRE tie tek nia wabed wor ni Yehova Mungu ma tie Ubimo mi polo ku mi ng’om zoo, tek wabemito wabed i dilo m’ebetio ko pi nitimo yeny pare. Kwayu niyio dito pa Wode iwi cokiri mi Jukristu man bende niworo dito i lembe ceke mi kwo mwa. Ka wabeworo telowic mi theokrasi i ayi ma kumeno, wan ceke wanwang’u berone.

² Paru mi woro dito utundo i bang’ dhanu wang’ ma kwong’a i podho mir Eden. Parune unyuthere i cik ma Mungu umio ma nwang’ere i Thangambere 1:28 man 2:16, 17. Giracwia mange ceke mi ng’om ucikere nibedo i the telowic mi dhanu man Adamu giku Eva ke gicikiri niworo dito pa Mungu man nitimo yeny pare. Ka nwang’u gibedo wor i the dito pa Mungu, nwang’u gikwo ku kwiocwiny man lembe ceke ubewotho ma ber. I ng’eye, judok juketho nwoc iwi lembe m’uneno dito i 1 Jukorinto 11:3. Jakwenda Paulo ugoro kumae: “Ayenyo wung’ei, nia wi co ceke kubang’gi kubang’gi en e Kristu; man wi dhaku en e ng’atu ma nico; wi Kristu ke en e Mungu.” Lembe maeni m’upangere pi dito, ubenyutho nia ng’atu moko ci ucikere niworo dito, ento Yehova kende re m’umbe i the dito pa ng’atu moko.

³ Tin eni, dhanu ma pol giyio ngo man gimaru de ngo giwor dito. Pirang’o? Pilembe peko mi woro dito ucaku i podho mir Eden kinde ma kwaruwa ging’io akakaka  nikwero dito pa Mungu m’usagu zoo. (Tha. 3:4, 5) Jai migine umio ngo igi bedagonya ma lee. Ento gimondo i the telowic pa Sitani Wonabali. Pieno, jai ma kwong’a eno uketho kind dhanu upokere ku Mungu. (Kol. 1:21) Matoke ma rac mi jai maeno, uketho tin eni dhanu ma pol gitie i the tego pa ng’atu ma rac.​—1 Yoh. 5:19.

⁴ Kinde ma waponjo lemandha ma nwang’ere i Lembe pa Mungu man wacaku kwo nimakere ku lembene, wagam wawok kud i the telowic pa Sitani. Calu ma watie Jumulembe m’uthiero kwo migi ni Yehova man m’ulimo batizo, wajolo nia Yehova re m’ubed Ubimo ma dit i kwo mwa. Watie ku paru m’urombo ku p’ubimo Daudi m’utuc niyio nia Yehova tie “wic mi gin ceke.” (1 Kei. 29:11) Andha, wan bende ku jwigiri watuco kamaleng’ kumae: “Wung’ei nia Yehova, en e Mungu: en e en m’etimowa, man wa pare; wan wa dhanu pare, man rombe mi kwac pare.” (Zab. 100:3) Pieno, wang’eyo nia Yehova tie Mungu ma dwong’ man eromo wamii ire woro ku cwinywa zoo pilembe en re m’ecwio piny ceke. (Nyu. 4:11) Calu ma watie jutic pa Mungu mandha, wabelubo batiend Yesu Kristu, ni kum eweko iwa lapor ma ber mandha mi bedo wor ni Mungu i lembe zoo.

⁵ Yesu ugam uponjo lembang’o ni kum masendi m’enwang’ere ko kinde m’ebino i ng’om? Juebrania 5:8 udwoko wang’ penji maeno kumae: “Kadok en e Wod, ento egamu ng’eyo woro ni kum gin m’esendre kudo.” Ku gwokobedoleng’, Yesu umedere niworo Won mi polo kadok kinde m’enwang’ere i wang’ peko ma dit. M’umedo maeno, Yesu utimo ngo gin moko nyanok de ku paru pare gire, ebed eyero de ngo lembe m’uai i bang’e man  eyenyo ngo dwong’ pare gire. (Yoh. 5:19, 30; 6:38; 7:16-18) Kinde ma Yesu ubino timo tic pare iwi ng’om keni, ebedo kud anyong’a nitimo yeny pa Won kadok nwang’u nitimo kumeno ubed ukelo jai man ragedo i kume de. (Yoh. 15:20) Yesu unyutho woro ni Mungu i lembe ceke man “ejwigre gire” kadok nitundo i ‘tho iwi yen [mi can].’ Woro pare ni Yehova i lembe ceke ukelo both ma rondo ku rondo ni kwond dhanu zoo, uketho en gire de judode man woro parene uyungo bende nying’ Won.​—Flp. 2:5-11; Ebr. 5:9.

⁶ Tekene wabeworo Mungu man wabetimo yeny pare, wabiuro adieng’acwiny man peko ma tung’ tung’ ma ju ma gikwero niworo dito pa Yehova gibed ginwang’iri ko. Jakwor mwa Wonabali ubeyenyo saa ceke ecamwa. Wabiboth kud i the cing ng’atu ma rac eno, tekene wajai magwei ire man wajwigara wan giwa i wang’ Yehova pi niwore kud adunde mwa ceke.​—Mat. 6:10, 13; 1 Pet. 5:6-9.

⁷ Wan ma watie i cokiri mi Jukristu, wayio telowic pa Kristu man dito m’emio ni ‘jamiru mandha man ma riek.’ Lembe maeni cwaluwa nibedo ku nen ma cuu iwi jumange man nikwo kugi ma ber. Niworo dito ma Mungu uketho i cokiri ucikere nicwaluwa niworo Lembe pare i gin ceke m’uneno thier ma watimo ire. Wanyutho woro maeno nwang’u wabetimo tic mi rweyo lembanyong’a,  wacidho i coko man wadikara i ie, waworo judong cokiri man wadiko cinggwa i kum yub ceke mi dilo pa Yehova.​—Mat. 24:45-47; 28:19, 20; Ebr. 10:24, 25; 13:7, 17.

⁸ Woro ma wabenyutho ni Mungu, ketho cokiri mi Jukristu bedo ku kwiocwiny man bedomoth, eketho bende lembe ceke wotho kakare kakare. Dhanu ma gibeworo Mungu ginyutho kite pare kamaleng’. (1 Kor. 14:33, 40) Lembe ma wabeneno wan giwa i dilo pa Yehova cwaluwa ninyutho kite ma wawinjara ko calu m’ubimo Daudi de uwinjere ko. I ng’ei m’eneno tung’ tung’ m’unuti i kind ju m’ubetimo ni Yehova ku jutimrac, Daudi ukok ku mutoro kumae: “Dhanu ma Mungu migi en e Yehova gi jumutoro!”​—Zab. 144:15.

⁹ I yub m’umakere i gamiri man i ot, “wi dhaku en e ng’atu ma nico.” Nico lundo ucikere nibedo wor i the telowic pa Kristu man Kristu ke utie i the telowic pa Mungu. (1 Kor. 11:3) Jumamon gicikiri nibedo wor i the telowic pa coggi man awiya ke gicikiri nibedo wor i the telowic mi junyodo migi. (Ef. 5:22-24; 6:1) Pieno, ka ng’atuman m’i kind juruot ubelubo telowic m’ukethere pi dito, akwiacwiny bedo nuti.

¹⁰ Nico ucikere nitio ku dito pare ku mer, calu Kristu. (Ef. 5:25-29) Kan ebetio ngo rac ku dito pare kunoke ebemwony ungo i kum ditone, dhaku pare man nyithindhe gibibedo kud anyong’a niwore. Dhaku tie jakony pa cware. (Tha. 2:18) Kinde ma dhaku ubediko cinge ku cirocir man ebeworo cware, eno nyayu anyong’a i cware man mio yung ni Mungu. (1 Pet. 3:1-4) Tekene nico ku min ot pare gibeworo juk mi Biblia iwi dito, giweko  lapor ma ber ni awiya migi kara gin de ginyuth woro ni Mungu.

¹¹ Woro ma wabenyutho ni Mungu cwaluwa nibedo wor i ‘the tego ma ni i wiwa’ kum “Mungu kethogi en.” (Rum. 13:1-7) Calu ma Jukristu giworo cik mi ng’om ma gikwo i ie, giculo ajok pi ninyutho nia gimio “ni Kaisari gin pa Kaisari; ni Mungu de gin ma pa Mungu.” (Mat. 22:21) M’umedo maeno, ubekwayu niworo cik ma gavmenti uketho pi nigwoko umung’ mi dhanu kinde ma juberweyo i teritwar moko. Nibedo wor ni judongo pa gavmenti i lembe ceke m’uturo ngo cik ma pwe pa Yehova, uketho watie agonya pi nitimo tic mi lembanyong’a ku copo man tego mwa zoo.​—Mk. 13:10; Tic. 5:29.

¹² Ukwayu wawor telowic mi theokrasi i lembe ceke mi kwo mwa. Ku wang’ mi yioyic, wabeneno ceng’ ma dhanu ceke bibedo i ie wor ni Yehova Mungu kende. (1 Kor. 15:27, 28) Ju ma giyio man gibeworo dito ma malu ngbir pa Yehova gibinwang’u mugisa man bero i wang’e, kinde ma gibemediri niwore rondo ku rondo!