Wang’ ma pol jubed julimo batizo i coko ma dongo mi Jumulembe pa Yehova. I ajiki mi korolembe mi batizo, jakorlembene bikwayu ju m’ubecilimo batizo nia giai malu man gidwok wang’ penji ario m’ulubo e ku dwandgi ma terere:

1. Nyo iyewo dubo peri, ithiero kwo peri ni Yehova, man iyio yojboth ma Yehova umio nikadhu i bang’ Yesu Kristu?

2. Nyo ibenyang’ de nia batizo m’ibecilimo ubedwoki ni Jamulembe pa Yehova man nia batizone uberoyi i dilo pa Yehova?

Dwokowang’ penji maeno ma ju m’ubecilimo batizo gidwoko nia eyo, utie ‘tucolembe ma kamaleng’’ ma nyutho nia gidaru ketho yioyic migi i jamgony man gidaru thieriri gin gigi ku cwinygi zoo ni Yehova. (Rum. 10:9, 10) Kwayu ju m’ubecilimo batizo gilar girwo iwi penji maeno i wang’e, kara kinde ma gibedwoko wang’ penjine, ng’atuman udwoke nimakere ku lembe m’eyio niai kud i adundene.

 Nyo idaru thieriri in giri ni Yehova nikadhu kud i rwo, ing’olo nia ibiworo en kende man ibiketho yeny pare i kabedo ma kwong’a i kwo peri?

Nyo kawoni iyio andhandha nia iromo nilimo batizo i kind nindo ma ceng’ini eni?

Bongu ma nenedi m’ukwayere pi batizo? (1 Tim. 2:9, 10; Yoh. 15:19; Flp. 1:10)

Wacikara nikendara ku kendi m’umaku piny pi ninyutho nia wamoko kikiki i kum Mungu. Pieno, ju ma gibecilimo batizo gicikiri ngo nikendo kendi m’uridogi ting’ ting’ kunoke ma jukiewo wec mi yungo lembe moko i kume. Gicikiri nikendiri i ayi ma cuu, bongu m’ucido ngo, m’umaku piny, man m’uromo pi lembe maeno.

Ng’atu m’ubecilimo batizo ucikere nibedo ku timo ma nenedi kinde m’ebelimo batizo? (Lk. 3:21, 22)

Batizo ma Yesu ulimo utie lapor ma ber ni Jukristu ma gibelimo batizo tin. Enyang’ nia nilimo batizo utie lembe ma pire tek lee, man lembene ubed unyuthere kamaleng’ i paru man i timo pare. Pieno, kaka ma julimo batizo i ie ucikere ngo nibedo kaka mi sembo sosi, mi tuko, mi kwang’ kunoke mi kit timo moko ma romo jwigo yung mi lembe maeno ma pire tek; bende Jakristu m’uai ulimone ucikere ngo nitimere ve dong’ edaru nwang’u aloci moko ma dit. Kadok nwang’u batizo utie lembe mir anyong’a de, re jucikiri ninyutho anyong’ane i ayi ma ber.

Nicidho nja i coko man nidikiri kud umego ku nyimego bi- konyi nenedi kara ikwo nimakere ku thieriri peri ni Yehova?

I ng’ei batizo peri, pirang’o pire tek iri nia imediri nibedo ku program ma ber mi ponji peri ma segi man mi bedikiri wang’ ma pol i tic mi lembanyong’a?

 TELOWIC NI JUDONG COKIRI

Kinde ma jarwei ma fodi ulimo ngo unyutho nia emito elim batizo, jucikiri nitielo cwinye kara enyam cuu i “Penji ma tung’ tung’ pi ju ma gibemito limo batizo,” ma nwang’ere i mbaya 185-207 mi buku maeni. Jubinyutho ire nia esom thenge m’uwacu nia “Waraga ni jarwei ma fodi ulimo ngo batizo” ma nwang’ere i acaki mi mbaya 182, m’ukoro kite m’ecopo yikere ko pi niweco ku judong cokiri. Calu ma junyutho i waragane, ng’atu m’ubecilimo batizo copo tio ku lembe moko m’ekiewo man ecopo weko buku maeni ubed ayaba kinde ma gibeweco ku judong cokiri. Pieno, ukwayu ngo ng’atu moko mange ular unyam kude i penji maeno i wang’ weco ku judong cokiri.

Ka ng’atu moko umito limo batizo, kwayu enyuth lembene ni jatel wi tic mi guriri mi judong cokiri. Tek edaru somo “Penji ma tung’ tung’ pi ju ma gibemito limo batizo,” jatel wi tic mi guriri mi judong cokiri bipenje ka nyo edaru thierere ni Yehova nikadhu kud i rwo pi nitimo yeny pare. Tekene ng’atune udaru thiero kwo pare ni Yehova, e jatel wi tic mi guriri mi judong cokiri bimaku yub kara judong cokiri ario giwec ku ng’atune iwi “Penji ma tung’ tung’ pi ju ma gibemito limo batizo.” Jucikiri nimio thenge ario maeno ni judong cokiri ma tung’ tung’ kara ging’ii ie ku ng’atune. Pire tie tek ungo nikuro nia jutwong’ pi coko ma dongo ka jung’ii i penjine.

Jucopo betimo thenge ario maeni wang’ ario man thengeman copo ting’o saa ma romo acel, re kan ukwayere  jucopo timo saa m’ukadhu maeno de. Wecne ucikere nicaku ku rwo man nithum de ku rwo. Judong cokiri kunoke ng’atu m’ubecilimo gicikiri ngo nikadhu malu malu iwi penji ma tung’ tung’ ma gibeng’io ie. Kwayu judong cokiri ma jumio igi nia ging’ii i thengeman gitim kero niketho lembene ni gin ma pire tek i program migi.

Wang’ ma pol, etie ber ya jung’ii i penji maeno ku ng’atuman acel acel ento kud judik dhanu ceke karacelo. I ng’ei ma judong cokiri giwinjo ayi ma ng’atu m’ubecilimo batizo udwoko ko wang’ penji ma tung’ tung’, gibinyang’ ma ber ka nyo eng’eyo lemandha mi Biblia i kadhiri ma rukani man gibinyang’ nia etie ayika pi limo batizo. M’umedo maeno, ng’atu m’ubekwayu nia elim batizo romo weco yot yot kan etie kende. Nico ku dhaku pare gicopo bedo karacelo kinde ma jubeng’io i thenge maeno kugi.

Ka ng’atu m’ubecilimo batizo utie nyamego, jucikiri ning’io i penjine karacelo kude kaka ma juromo nenogi i ie ento kud jumange uwinj wecne. Kan ukwayu nia ng’atu mange ubed unuti, ng’atune ucikere nibedo jadit cokiri kunoke jakony tic nimakere ku thenge ma jubiweco i wie, calu m’udukuwec m’ubelubo unyutho.

I cokiri ma wend judong cokiri utie nok magwei i ie, jukony tic ma giromo man ma gitie ku copo mi nyang’ man mi luro i lembe cuu gicopo weco karacelo ku ju m’ubemito limo batizo iwi “Thenge mi 1: Yioyic mi Jukristu.” Judong cokiri re ma gicikiri ning’io i “Thenge mir 2: Kwo mi Jukristu.” Ka wend umego m’uromo utie nok i cokiri, jucopo nyutho lembene ni jaliew mi twodiri  kara enen ka nyo jadit cokiri moko mi cokiri ma ceng’ini copo bino konyo.

Ka ng’atu m’ubecilimo batizo utie nyathin, janyodo kunoke junyodo pare ma gitie Jumulembe gicikiri nibedo nuti i saa ma jung’io i thengeman. Ento ka janyodo kunoke junyodo romo bedo mbe, judong cokiri ario (kunoke jadit cokiri acel giku jakony tic, nimakere ku thenge ma jubing’ione) gicikiri nibedo nuti kinde ma jubeng’io i thengeman.

Judong cokiri gibineno cuu ka nyo ng’atu m’ubemito limo batizo unyang’ i kadhiri m’ukwayere i ponji mir ukungu mi Biblia. M’umedo maeno, kwayu ginen cuu ka nyo ebeneno lemandha mi Biblia ni gin ma pire tek lee man ebenyutho woro mandha i kum dilo pa Yehova. Ka ng’atune unyang’ ungo i ponji mir ukungu mi Biblia, judong cokiri bimaku yub kara enwang’ kony man epong’ lembe m’ukwayere pi nilimo batizo i nindo m’ubino; pilembe jumoko kwayu juwek saa ukadh igi kara ginyuth ko nia gineno tic mi lembanyong’a man woro yub mi dilo pa Yehova ni gin ma pire tek. Judong cokiri gicikiri nineno ayi ma ber ma gibitio ko ku saa ma romo acel pi ning’io i thengeman, kara ginyang’ cuu ka nyo ng’atune utie ayika pi nilimo batizo. Kadok nwang’u juromo timo saa ma lee iwi penji moko man mange ke juromo timo saa ma nok de, re jucikiri ning’io i penjine ceke.

Judong cokiri ma jung’io kara giwec iwi penji ma tung’ tung’ ku ng’atu m’ubecilimo batizo, gibirombo i ng’ei daru thenge mir ario pi nineno ka nyo ng’atune ucikere nilimo batizo kunoke ngo. Judong cokiri bineno lembe  ma ng’atune ukadhu kud i ie i kwo pare, copo pare, man lembe mange ma ng’atuman ubenwang’ere ko. Lembe ma judong cokiri gibeyenyo ging’ei utie ninyang’ ka nyo ng’atune utie ku winjiri ma ceng’ini ku Yehova man enyang’ i ponji mir ukungu mi Biblia. Tekene judong cokiri ginyutho mer pi nikonyo ju m’ubecilimo batizo, eno biketho gibiyikiri ma ber pi nitimo tic migi ma pire tek, niwacu nibedo jutic mi lembanyong’a.

I ng’eye, jadit cokiri acel kunoke gin ario zoo ma jung’iogi pi niweco ku ng’atu m’ucilimo batizo, gicikiri nirombo kude pi ninyutho ire ka nyo eromo nilimo batizo kunoke ngo. Ka ng’atune uromo, judong cokiri gicikiri niweco kude iwi thenge m’uwacu: “ Dolo dhu wec ma karacelo ku ju m’ubecilimo batizo” ma nwang’ere i mbaya mi 206-207. Ka fodi ng’atune udaru ngo niponjo buku Icopo kwo kud anyong’a rondo ku rondo!, judong cokiri gicikiri nitielo cwinye nia edar ponjine i ng’ei batizo. Kwayu ginyuth ni ng’atu m’ubecilimo batizo nia jubikiewo nindo mi batizo pare iwi karatasi ma julwong’o Fic mi tic pa jarwei ma juyiko ku nyinge. Judong cokiri gibipoyo wie nia gibed gigamu lembe m’uneno ng’atini kud i bang’e gire, pi nikonyo dilo pa Yehova nineno ma ber kite ma tic mi Jumulembe ubewotho ko i ng’om zoo, man kara eromo bedikere i lembe ma tung’ tung’ mi cokiri man eromo benwang’u tielocwiny ku telowic i bang’ judong cokiri. M’umedo maeno, judong cokiri copo poyo wi jurwei ma nyen nia lembe ceke m’uneno ng’atini en gire, jutio i wie nimakere ku Cik mi Jumulembe pa Yehova i ng’om zoo iwi ayi mi gwoko lembe  pa ng’atini. Cikne nwang’ere i jw.org. Wec maeno ucikere ngo nikadhu dakika apar.

Tek oro acel ukadhu niai ma jarwei ulimo batizo, judong cokiri ario gicikiri nirombo kude pi nimio ire tielocwiny man paru moko ma romo konye. Acel m’i kind judong cokirine ucikere nibedo janen wi ungu pa ng’atune. Tekene ng’atu m’ulimo ma nyen ne tie nyathin, janyodo kunoke junyodo pare ma gitie Jumulembe gicikiri nibedo nuti. Wecne ucikere nibedo ma ber man ma tielo cwinyjo. Judong cokiri gibiweco kude iwi mediri m’etimo i thenge mi tipo man gibimio ire paru m’ukwayu etii ko kara emedere nibedo ku ng’iyo ma ber pi ponji pare ma segi, som pare mi Biblia ma kubang’ ceng’, thier mi juruot ma kubang’ yenga, cidho i coko ceke man dikiri i cokone, bende rweyo lembanyong’a kubang’ yenga. (Ef. 5:15, 16) Tek fodi edaru ngo ponjo buku Biblia beponjowa man Nibedo i mer pa Mungu, judong cokiri bimaku yub kara ng’atu moko uponj kude. Gicikiri nifoye ku cwinygi zoo. Etie ber nia giwec kude iwi juk man gimii ire paru moko iwi lembe acel kunoke ario kende.