WIC MIR 6
Jukony tic gibetimo tic ma pire tek
JAKWENDA Paulo ugoro wec ma e ni cokiri mi Filipi: ‘Paulo ku Timoteo, jumiru pa Kristu Yesu, ni jumaleng’ ceke i Kristu Yesu ma gini i Filipi, ku juliew man jukony.’ (Flp. 1:1) Paulo ukwanu jukony tic bende; eno ubenyutho nia umego maeno gibed gitimo tic ma pigi tek pi nikonyo judong cokiri i saa maeca. Etie bende kumeno i nindo ma tin. Jukony tic gibetimo tic ma tung’ tung’ i cokiri pi nikonyo juliew kara lembe uwoth kakare kakare.
2 Nyo ing’eyo jukony tic ma gitie i cokiri peri? Nyo ing’eyo tic ma tung’ tung’ ma gibetimo pi bero peri man pi bero mi cokiri ceke? M’umbe jiji, Yehova ubefoyo lee dit, tic ma tek ma jumaco maeno gibetimo. Jakwenda Paulo ugoro kumae: “Ju ma gitimo tic mi jukony [cuu] ginwang’u kacungo migi gigi ma gicungo ko ber, ku tegocwiny ma dit i yioyic ma ni i Kristu Yesu.”—1 Tim. 3:13.
LEMBE MA BIBLIA UBEKWAYU PI JUKONY TIC
3 Ubekwayu jukony tic ginyuth i kwo migi saa ceke nia gitie Jukristu mandha, gibed dhanu ma jucopo genogi man ma gitimo tic ma jumio igi cuu. Lembuno ubenen kamaleng’ nimakere ku wec ma jakwenda Paulo ukiewo ni Timoteo iwi lembe ma Biblia ubekwayu nia jukony tic gipong’. Egoro kumae: ‘Jukony bende kumeno gikogibed be umbe lele, ma dhoggi ario de ngo, ma madhu pigulok hai ngo, ma ava kuloka ma rac timogi hai ngo; ma gwoko amung’ mi yioyic ku pidocwiny ma leng’. Maku joni bende jular juponjgi; tek gibedo umbe adote, wuwek gibed jukony. Dong’ jukony gibed cog mon acel acel, ma gibimo wi nyithindhgi ku udigi bende ber.’ (1 Tim. 3:8-10, 12) Kinde ma judong cokiri gibeneno nia umego moko copo romo nibedo jakony tic, gicikiri ning’io cuu ka nyo epong’o andha lembe ma Biblia ubekwayu. Eno romo gwoko cokiri i kum adote ma jucopo kelo iwi umego ma jumio igi rwom.
4 Jukony tic girweyo kud amora kubang’ dwi, kadok gitie aradu kunoke gidaru teng’ini de. Gibedo kud amora i tic mi lembanyong’a calu Yesu. Kumeno re ma ginyutho nia gitie ku pidoic pa Yehova m’ubemito dhanu ubothi.—1 Tim. 2:4.
5 Jumaco ma gitie jukony tic, gitie bende lapor ma cuu i lembe m’uneno kendi, ruko, wec, paru, man timo migi. Gitie dhanu ma pidoigi nger; eno re ma ketho jumange tuc nimio igi woro. M’umedo maeno, gineno winjiri migi ku Yehova man rwom migi i cokiri ni lembe mi tuko ngo.—Tit. 2:2, 6-8.
6 Jumaco maeno judaru ‘ponjogi,’ niwacu jupimogi ka nyo giromo. Kadok i wang’ ninwang’u rwom, gidaru nyuthiri nia gitie dhanu ma gimiiri ku cwinygi zoo ni Mungu. Ginyutho bende nia giketho lembe mi Ker i kabedo ma kwong’a i kwo migi man gibetimo kero ninwang’u rwom mange ma giromo tundo i ie. Gitie andhandha lapor ma cuu ni umego ku nyimego mange mi cokiri.—1 Tim. 3:10.
TIC MIGI I COKIRI
7 Jukony tic gibetimo tic ma tung’ tung’ ma pigi tek pi bero mir umego ku nyimego. Tic ma gibetimone konyo judong cokiri nibedo ku saa mi dieng’ asagane pi tic mi ponji man mi kwac. Kinde ma guriri mi judong cokiri ubemio tic ma tung’ tung’ ni jukony tic, kwayu ging’ei copo pa ng’atuman man yeny mi cokiri.
Jukony tic gibetimo tic ma tung’ tung’ ma pigi tek, m’ubekonyo judong cokiri nibedo ku saa mi dieng’ asagane pi tic mi ponji man mi kwac
8 Tic ma tung’ tung’ ma gitimone moko ni e: Jucopo ketho jakony tic acel ubed unen wi girasoma kara ng’atuman m’i kindwa unwang’ m’ecopo tio ko en gire man pi tic mi lembanyong’a. Mange lundo jucopo mio ire tic mi tio iwi karatasi ma tung’ tung’ mi lemb sente kunoke mi teritwar mi cokiri. Jumoko ke juromo mio igi tic mi neno lembe pa mikro, mi tio ku jamkoko dwal, mi jolo dhanu, man mi konyo judong cokiri i yo mange ma tung’ tung’. Tic ma lee bekwayere pi niyiko man nigwoko Ot Ker ubed leng’ saa ceke; pieno wang’ ma pol jubed jukwayu jukony tic gitim tic maeno.
9 I cokiri moko, jucopo mio tic acel ni jakony ticman. I cokiri mange ke, jakony tic acel copo bedo ku tic ma kadhu acel. Saa moko lundo jucopo mio tic acel ni jukony tic dupa. Ka wend jukony tic utie nok, guriri mi judong cokiri copo mio ticne moko ni umego ma gilimo batizo man ma gitie lapor ma cuu. Eno bikonyo umegonegi kara ging’ii ma ber ku ticne man ebibedo ku kony igi kinde ma gibiromo nidoko jukony tic. Kan umego mbe, jucopo kwayu nyamego moko ma tie lapor ma cuu ukony i lembene moko, kadok i andha jubikethe ngo ni jakony tic de. Umego kunoke nyamego ma tie lapor ma cuu tie ng’atu ma jucopo kwanyu koth timo pare man kite m’eworo ko Mungu. Etie lapor ma cuu ni jumange i lembe ma e: cidho i coko, rweyo lembanyong’a, kwo mi ot, ng’io galuwang’, kendi ku ruko man i lembe mange bende.
10 I cokiri ma wend judong cokiri utie nok i ie, jucopo kwayu jakony tic moko m’uromo kara eng’ii i penji m’uweco iwi lembe ma yioyic mwa ucungo i wigi karacelo ku ng’atu m’ubemito limo batizo. Penjine ginwang’iri i thenge mi 1 ma jumedo mi buku maeni; thiwi penjine tie “Yioyic mi Jukristu.” Ento, calu ma thenge mir 2 ma thiwie tie “Kwo mi Jukristu” uweco iwi lembe ma dongo mi kwo pa ng’atini en gire, jadit cokiri re m’ucikere ning’io ie karacelo ku ng’atu m’ubemito limo batizo.
11 Ka thelembe moko ma cuu tie, guriri mi judong cokiri copo nwang’u nia saa moko etie ber nibewilo tic ma tung’ tung’ mi jukony tic. Re etie ber dit nia umego m’ubetimo tic moko utim tije pi nindo ma nya lee, kara etuc ning’iyo ma ber man enwang’ bodho i ie.
12 Nimakere ku yeny mi cokiri, jucopo mio tic mange bende ni jukony tic ma mediri migi ubenyuthere kamaleng’ i wang’ “dhanu ceke.” (1 Tim. 4:15) Kaka ma wend judong cokiri tie ngo dupa i ie, jucopo kwayu jukony tic gibed jung’ei junen wi ungu mi lembanyong’a, kunoke saa moko gitim calu jukony mir ungu mi lembanyong’a, re gitimo tije zoo i the telowic mi judong cokiri. Jucopo mio ni jukony tic thengponji moko mi coko mi Kwo man tic, uketho i ie nitelo wi ponji mi Biblia mi cokiri ka yenyne tie, man nimio korolembe mi dhanu ceke. Jucopo medo rwom mange bende ni jukony tic ka yeny moko ma segi utie man ka gipong’o lembe m’ubekwayere pi rwomne. (1 Pet. 4:10) Jukony tic gicikiri nimiiri ku berocwinygi pi nikonyo judong cokiri i tic ma tung’ tung’.
13 Kadok nwang’u tic migi ukoc ku mi judong cokiri de, etie bende thenge ma zoo mi tic ma leng’ ni Mungu man pire tie tek kara lembe uwoth ma ber i cokiri. I ng’ei nindo moko, ka jukony tic gibetimo tic migi ma ber man giromo cuu pi nibedo jukwac man juponji, jucopo kethogi gidok judong cokiri.
14 Kan itie umego m’aradu kunoke ma fodi ulimo batizo i kind nindo ma ceng’ini eni, nyo ibetimo kero nipong’o lembe ma Biblia ubekwayu pi nidoko jakony tic? (1 Tim. 3:1) Dhanu dupa dit gibemondo i lemandha kubang’ oro, pieno cokiri tie ku yeny mi jumaco ma giromo man ma giteng’ini i tipo pi nitimo tic ma tung’ tung’. Icopo nyutho nia ibetimo kero nwang’u ibecego ava mi konyo jumange. Yo acel mi timo kumeno utie nilubo lapor pa Yesu. (Mat. 20:28; Yoh. 4:6, 7; 13:4, 5) Ava maeno bimedere i kumi kinde m’ibenwang’u anyong’a ma ng’atini bedo ko kan ebekonyo jumange. (Tic. 20:35) Pieno, bed imiiri pi nikonyo jumange, bed idikiri i tic mi gwoko Ot Ker man mi yiko kume, kunoke mi timo thengponji moko i coko mi Kwo man tic kaka ng’atu moko m’umbe. Nitimo kero ninwang’u rwom uketho i ie bende nibedo ku ng’iyo mi timo ponji peri ma segi ma bikonyi nicego nying’ tipo i kwo peri. (Zab. 1:1, 2; Gal. 5:22, 23) M’umedo maeno, umego m’ubetimo kero ninwang’u rwom nyutho nia etie dhanu ma jugeno man m’atira kinde ma jumio ire tic moko i cokiri.—1 Kor. 4:2.
15 Tipo maleng’ re ma ketho jukony tic pi bero mi cokiri. Dhanu ceke mi cokiri gicopo nyutho nia gibefoyo tic ma tek ma jukony tic gibetimo, nwang’u gibediko cing’gi kugi. Ka gibetimo kumeno, gibinyutho nia gitie ku foyofoc pi yub maeno ma Yehova umaku kara lembe uwoth kakare kakare i kind juot pa Mungu.—Gal. 6:10.