YEHOVA umio iwa Wode Yesu Kristu ni lapor ma ber mandha ma wacikara nilubo. (1 Pet. 2:21) Dhanu ceke m’udoko julub pa Yesu, girweyo lembanyong’a calu jutic pa Mungu. Pi ninyutho nia eno tie tic ma yomo cwiny, Yesu uyero kumae: ‘Wubin i bang’a, kewu ceke ma wumulu ku tic ma ter ma pek unurowu, man abimio iwu yom. Wuting’ mberembere para i wiwu, wumak ponji de i bang’a; kum an a ming’ a mol de i adunde: e wubinwang’u yom i ng’eyong’ec mwu.’ (Mat. 11:28, 29) Lembang’ola parene upong’o kakare kakare ni dhanu ceke m’ujolo lwong’o maeno!

² Calu Yesu re ma tie jatic ma dit pa Mungu, egam elwong’o dhanu moko gidok julub pare. (Mat. 9:9; Yoh. 1:43) Eponjogi ku rweyo lembanyong’a man eorogi i tic maeno ma en de ebed etimo. (Mat. 10:1–11:1; 20:28; Lk. 4:43) I ng’eye, edok eoro dhanu 70 mange gicidh girwei bende lembanyong’a mi Ker pa Mungu. (Lk. 10:1, 8-11) Kinde ma Yesu ubeoro julub pare i lembanyong’a, eyero igi kumae: “Ng’atu m’uwinjowu nwang’u ewinjo an; ng’atu m’ukwerowu nwang’u ekwero an; man ng’atu m’ukwero an nwang’u ekwero ng’atu m’uora.” (Lk. 10:16) Ku wec maeno, Yesu unyutho kamaleng’ nia tic m’eketho i kor julub pare tie tic mi tuko ngo. Gicikiri nitime kaka Yesu en gire man kaka Mungu ma malu ngbir! Etie lembe ma rom tin bende ni dhanu ceke ma gijolo lwong’o ma e pa Yesu: “Bin, ilub ng’eya.”  (Lk. 18:22; 2 Kor. 2:17) Ju ceke ma gijolo lwong’o maeno, Mungu uketho tic mi rweyo lembanyong’a mi Ker man mi ketho dhanu gidok julub i korgi.​—Mat. 24:14; 28:19, 20.

³ Calu ma wayio nilubo tok Yesu, wanwang’u mugisa pilembe watuc ‘ning’eyo’ Yehova Mungu man Yesu Kristu. (Yoh. 17:3) Waponjo ning’eyo yo pa Yehova man ekonyowa kara watuc nidwoko pidoiwa nyen, warony ng’atu ma nyen, man waketh kura mwa uromb ku cik pare ma pwe. (Rum. 12:1, 2; Ef. 4:22-24; Kol. 3:9, 10) Foyofoc ma lee ma watie ko i adundewa ucwaluwa nithiero kwo mwa ni Yehova man ninyutho thieriri mwane nikadhu i batizo mi pii. Niai ma walimo batizo ci, wadoko jutic m’anzilo ma Mungu uyio en gire.

⁴ Wiwa ucikere ngo niwil nyanok de nia Mungu ubekwayu watim ire ma cingwa leng’ man m’adunde mwa de leng’. (Zab. 24:3, 4; Isa. 52:11; 2 Kor. 6:14–7:1) Ni kum yioyic mwa i Yesu Kristu, watie ku pidocwiny ma leng’. (Ebr. 10:19-23, 35, 36; Nyu. 7:9, 10, 14) Jakwenda Paulo ukwayu Jukristu nia gitim gin ceke pi dwong’ pa Mungu kara kud gikier dhanu mange. Jakwenda Petro ke unyutho kamaleng’ nia pire tie tek nibedo ku kura ma ber kara ju ma gijuic ungo gituc niloko cwinygi man gijol lemandha. (1 Kor. 10:31, 33; 1 Pet. 3:1) Wacopo konyo ng’atini nenedi kara etuc niromo man edok bende jatic mi lembanyong’a calu wan?

⁵ Niai m’icaku telo wi ponji mi Biblia ku ng’atu m’ujolo ponji mwa ci, mii amora i kume ebed ekor lembe  m’ebeponjone ni dhanu mange de. Ecopo koro lembene ni wedi pare, ni jurimbe, ni jutic wadi, kunoke ni dhanu mange tekene kaka unen ire. Eno tie acel m’i kind lembe ma pigi tek ma wacikara nitimo pi nikonyo ju ma nyen gidok julub pa Yesu Kristu man jutic mi lembanyong’a. (Mat. 9:9; Lk. 6:40) Ka ng’atu ma nyen ubemedere i thenge mi tipo man ebenwang’u bodho i rweyo lembanyong’a mi saa ma jupangu ngo, m’umbe jiji ebinwang’u ava mi kwayu nia edok jarwei lembanyong’a.

⁶ I wang’ nikwayu nia ng’atini ucidh wang’ ma kwong’a i lembanyong’a ot kubang’ ot, jucikiri nineno cuu ka nyo epong’o lembe ma tung’ tung’ m’ubekwayere pi nidoko jarwei. Ka ng’atu moko ubewok kudwa i tic mi lembanyong’a, nwang’u ebenyuthere kamaleng’ nia etie bende Jamulembe pa Yehova. Pieno, kwayu ning’eyo cuu nia ebekwo nimakere ku cik ma pwe pa Yehova man nia ecopo doko jarwei ma fodi ulimo ngo batizo.

⁷ Calu ibeponjo ku ng’atini man ibeng’io kude i cik mir ukungu mi Biblia, m’umbe jiji ing’eyo lembe ma tung’ tung’ mi kwo pare. Copere ituc nineno nia ebetio ku gin m’ebeponjo. Ento lembe moko tie mi kwo pare ma judong cokiri gibimito giwec i wie karacelo kude i vuti.

⁸ Jatel wi tic mi guriri mi judong cokiri bimaku yub kara judong cokiri ario (m’acel m’i kindgi tie i komite mi tic mi cokiri) giwec iwi lembenegi karacelo ku ng’atu m’iponjo kude Biblia man in bende. I cokiri ma wend judong cokiri tie nok magwei i ie, jadit cokiri giku jakony tic moko m’uromo, gicopo ng’io i lembe maeno. Umego ma jung’io  pi wec maeno gicikiri niweco iwi lembene m’umbe galu. Pieno, ka giwinjo nia ng’atu m’iponjo kude Biblia ubemito edok jarwei kinde ma gitie i coko, ecicopere nia giwec kudwu ndhu ndhu i ng’ei cokone. Wecne ucikere ngo ninyayu lworo i japonj Biblia. Ento i wang’ niyio nia japonj Biblia udok jarwei ma fodi ulimo ngo batizo, jucikiri nineno cuu ka nyo andha epong’o lembe m’ulubo e:

1.  (1) Eyio nia Biblia tie Lembe pa Mungu m’eyuyo i wie ku tipo pare.​—2 Tim. 3:16.

2.  (2) Eng’eyo man eyio ponji mir ukungu mi Biblia, ma ka jupenje, eromo dwoko nimakere ku Biblia ento ungo nimakere ku ponji mi dini mi vupo kunoke paru pare gire.​—Mat. 7:21-23; 2 Tim. 2:15.

3.  (3) Ebeworo cik mi Biblia m’uyero nia kwayu nicokiri karacelo ku dhanu pa Yehova i coko ma tung’ tung’ kan embe ku macero ma lee.​—Zab. 122:1; Ebr. 10:24, 25.

4.  (4) Eng’eyo cuu gin ma Biblia ubeponjo iwi lembsasa mi tarwang’, uketho i ie timo gier, gamu kunoke giero adhura, ribiri i kind co ku co kunoke mon ku mon, man ebekwo nimakere ku ponjine. Kan etie nico ma tie ku dhaku kunoke dhaku m’utie ku nico, kwayu gibed ma gigamiri nimakere ku cik.​—Mat. 19:9; 1 Kor. 6:9, 10; 1 Tim. 3:2, 12; Ebr. 13:4.

5.  (5) Ebeworo cik mi Biblia m’ukwero nimer ku kong’o, man ebetio ngo ku yath ceke ma merojo kunoke ma nyotho rieko mijo, ka fodi munganga ung’olo en ungo ire.​—2 Kor. 7:1; Ef. 5:18; 1 Pet. 4:3, 4.

6.  (6) Eng’eyo cuu nia pire tie tek nikoc i kum jurimo ma reco.​—1 Kor. 15:33.

7.   (7) Edaru koyere magwei ku dini ceke mi vupo ma nwang’u ebino i ie. Eweko nicidho i kanisa kunoke i misa migi man nidikere kunoke nidiko cinge i lembe migi moko ci.​—2 Kor. 6:14-18; Nyu. 18:4.

8.  (8) Ebedikere ngo i lembgamba ceke mi ng’om maeni.​—Yoh. 6:15; 15:19; Yak. 1:27.

9.  (9) Eyio man ebekwo nimakere ku giragora pa Isaya 2:4 m’uweco iwi lembe m’i kind thek ma tung’ tung’.

10.  (10) Ebemaru andhandha nidoko Jamulembe pa Yehova.​—Zab. 110:3.

⁹ Ka judong cokiri gibetundo ngo ninyang’ cuu iwi paru pa japonj Biblia iwi lembe moko i kind ma jukwanu, gicopo tio ku giragora ma tung’ tung’ ma junyutho pi nipenje ekor paru pare. Pire tie tek nia japonj Biblia unyang’ ma ber ya ju m’ubedikiri i tic mi lembanyong’a karacelo ku Jumulembe pa Yehova gicikiri nikwo nimakere ku lembe maeno ma Biblia ubekwayu. Lembe m’ebiyero bikonyo judong cokiri nineno ka nyo eng’eyo gin m’ubekwayere i bang’e man nyo eromo i mukero moko ma ber pi nicaku rweyo lembanyong’a.

¹⁰ Judong cokiri gicikiri ninyutho ire ndhu ndhu kan eromo. Gicopo nyutho ire i thum pa wec migine. Ka gineno nia eromo, gibijole ku yaw yaw calu jarwei ma nyen. (Rum. 15:7) Gibikwaye nia ecak rweyo lembanyong’a ndhu ndhu kan ecopere, man i thum pa dwi ke, edwok rapor pare mi tije. Judong cokiri gicopo koro ire nia tek ng’atini udoko jarwei ma nyen man edwoko rapor pare wang’ ma kwong’a, juyiko karatasi ma julwong’o Fic mi tic pa jarwei ku nyinge man jugwoke i kind  jamtic ma tung’ tung’ mi cokiri. Judong cokiri gicoko dhu lembe m’uneno kwo pa jarwei pi nikonyo dilo pa Yehova nineno ma ber kite ma tic mi Jumulembe pa Yehova ubewotho ko i ng’om zoo, man kara jarwei romo bedikere i lembe ma tung’ tung’ mi tipo man ninwang’u kony mi tipo. M’umedo maeno, judong cokiri copo poyo wi jurwei nia lembe ceke m’uneno ng’atini en gire, jutio i wie nimakere ku Cik mi Jumulembe pa Yehova i ng’om zoo iwi ayi mi gwoko amung’ mi kwo pa ng’atini. Cikne nwang’ere i jw.org.

¹¹ Ka wabetimo kero ning’iyo ma ber ku jarwei ma nyen man wabedieng’ andha i kum gin m’ebetimo, lembuno copo bedo kud adwogi ma ber i kwo pare. Eno copo bende nicwale kara ebed edwok rapor pare mi lembanyong’a kubang’ dwi man etim mediri mange lee i tic pa Yehova.​—Flp. 2:4; Ebr. 13:2.

¹² I ng’ei ma judong cokiri ginwang’u nia japonj Biblia uromo nicaku tic mi lembanyong’a, gibimio ire buku maeni, Dilo m’ubetimo yeny pa Yehova. Kan edwoko rapor pare wang’ ma kwong’a, jubimio atwong’a moko m’adundo i cokiri pi ninyutho nia edaru doko jarwei ma nyen ma fodi ulimo ngo batizo.

¹³ Awiya ma thindho bende gicopo romo nidoko jurwei lembanyong’a. Yesu ujolo awiya ma thindho man epoko mugisa i wigi. (Mat. 19:13-15; 21:15, 16) Kadok tic mi ponjo awiya utie ku kwong’a lembe mi junyodo de, jumange bende i cokiri gicopo maru nikonyo awiya m’adundegi  ubecwalugi nicaku tic mi lembanyong’a. Tekene itie janyodo, amora peri i tic mi lembanyong’a bikonyo awiya peri lee mandha kara gibed bende weg amora i tic pa Mungu. Ka nyathin ma kura pare cuu ubemito kud adundene ceke nia ecak koro pi yioyic pare ni jumange, juromo mio ire kony mange ma kani?

¹⁴ Ecopo bedo ber nia janyodo pare ucidh i bang’ jadit cokiri acel ma tie i Komite mi tic mi cokiri pi ninyang’ ka nyo ecicopere nyathin pare udok jarwei. Jatel wi tic mi guriri mi judong cokiri bimaku yub kara judong cokiri ario (m’acel m’i kindgi tie i komite mi tic mi cokiri) giwec karacelo ku nyathin ne i vut janyodo pare kunoke ng’atu m’ubetunge ma re utie Jamulembe. Ka nyathin ne utie ku ng’eyong’ec moko iwi lemandha mir ukungu mi Biblia man ebemito andha nicaku rweyo lembanyong’a, eno nyutho nia ebemedere ma ber. I ng’ei neno lembuno man lembe mange m’ubekwayere bende i bang’ ju m’uteng’ini, judong cokiri arione gicopo nyang’ ka nyo nyathin maeno romo doko jarwei ma fodi ulimo ngo batizo. (Lk. 6:45; Rum. 10:10) Kinde ma judong cokiri gibeweco ku nyathin, pire tie tek ungo nia giwec iwi lembe moko m’ubenen kamaleng’ nia kwayu juwec i wigi ku ng’atu ma wang’e teng’ini ento ku nyathin ungo.

¹⁵ I saa mi wec maeno, judong cokiri gibifoyo nyathin pi mediri m’ebetimo man gibitielo cwinye kara eketh lembakeca pi nilimo batizo. M’umbe jiji, junyodo pare gituc nitimo kero lee pi nipidho lemandha i adunde nyathin migi; pieno gin bende giromo ku foyofoc. Kara gimediri nikonyo nyathin migi, judong cokiri binyutho ni  junyodo maeno thiwiwec m’uyero: “Waraga ni junyodo ma Jukristu” i mbaya mi 179-181.

¹⁶ Calu m’idaru ng’eyo Yehova man imare, ituc nipong’o lembe ma tung’ tung’ m’ubekwayere man idoko jarwei lembanyong’a. Dong’ kwayu itim kero niketho mer peri ku Yehova umedere nibedo ma tek. Nenedi? Kwayu ithier kwo peri ire nikadhu i rwo, man ilim batizo i pii pi ninyutho thieriri perine.​—Mat. 28:19, 20.

¹⁷ Nithieriri tie nikoyiri segi pi nitimo tic pa Mungu. Nithieriri ni Mungu thelembene tie ning’olo athothi ire i rwo nia ibitio ku kwo peri zoo pi nitimo ire man niwotho i yo pare. Etie nimiiri kud adundeni zoo ni Mungu ke pi nja ku nja. (Poi. 5:9) Eno tie lembe m’uneno ng’atini en gire giku Mungu. Ng’atu moko mbe ma copo thiero kwo pare kaka ng’atu mange.

¹⁸ Re kwayu ngo kende kende ijik niyero ire i rwo peri ma kendi nia imiiri in zoo ire. Kwayu inyuth bende ni jumange nia idaru thiero kwo peri ni Mungu. Ibinyutho igi nwang’u ilimo batizo i pii, calu Yesu. (1 Pet. 2:21; 3:21) Icopo timo ang’o kan idaru keco kud adundeni zoo nia ibitimo ni Yehova man ibemito ilim batizo? Icikiri kawoni ninyutho lembene ni jatel wi tic mi guriri mi judong cokiri. E ebimaku yub kara judong cokiri ma tung’ tung’ giwec kudi pi nineno cuu ka nyo ipong’o lembe m’ubekwayere pi nilimo batizo. Pi ning’eyo lembe mange, wakwayu isom thiwiwec, “Waraga ni jarwei ma fodi ulimo ngo batizo,” ma nwang’ere i mbaya mi 182-184 mi buku maeni, man thiwiwec, “ ,” ma nwang’ere i mbaya mi 182-184 mi buku maeni, man thiwiwec, “ ,” ma nwang’ere i mbaya mi 182-184 mi buku  maeni, man thiwiwec, “Penji ma tung’ tung’ pi ju ma gibemito limo batizo,” i mbaya mi 185-207.

¹⁹ Niai con, rapor m’ubewok iwi kite ma thier ma leng’ ubemedere ko i wang’ ng’om, ubemio tielocwiny lee ni dhanu pa Yehova. Niai ma Yesu Kristu uyero ni julubne nia jubirweyo lembanyong’a i ng’om zoo, Jukristu mandha gidieng’ lee ning’eyo kite ma ticne romo timere ko.​—Mat. 28:19, 20; Mk. 13:10; Tic. 1:8.

²⁰ Julub ma kwong’a pa Yesu gibino kud anyong’a i ng’ei winjo nia tic mi lembanyong’a uwotho ma ber. (Mk. 6:30) Buku mi Tic mi Jukwenda unyutho nia dhanu 120 kumeni gibino nuti kinde ma tipo maleng’ ukonjere iwi julub i Pentekoste mi oro 33 R.M. Ndhu ndhu i ng’eye, wend julub ugam umedere udoko 3 000 kumeni, man i ng’eye ke kago 5 000. Rapor ugam unyutho nia ‘[Yehova uwotho] medo igi ju m’uboth ku ba rupiny ku ba rupiny’ man nia, ‘udul julam de [gicaku] woro yic nini.’ (Tic. 1:15; 2:5-11, 41, 47; 4:4; 6:7) M’umbe jiji, mediri maeno ugam utielo cwiny julub lee dit! Andhandha, rapor maeno mir anyong’a ucwalugi kara gimediri i wang’gi ku tic ma Mungu uketho i korgi, kadok gibino kadhu kud i ragedo ma kwar mi judong dini mi Juyahudi.

²¹ I kind oro 60-61 R.M., Paulo unyutho i waraga m’egoro ni Jukolosai nia lembanyong’a ubino ‘cego nyinge i ng’om ceke’ man nia, ‘juyere i giracwia pa Mungu ceke ma the polo.’ (Kol. 1:5, 6, 23) Jukristu mi rundi ma kwong’a gibed giworo Lembe pa Mungu, man tipo maleng’  umio igi copo mi timo tic ma lee mi rweyo lembanyong’a i wang’ nyoth mi Yerusalem i oro mi 70 R.M. Ebino tielocwiny ma yawe mbe ni Jukristu maeno ma weg bedopwe niwinjo rapor mi tic maeno m’ubino timere!

²² Tin bende, dilo pa Yehova mi rundi mwa ubetimo kero nikiewo rapor mi tic m’ubetimere man m’ubepong’o giragora pa Matayo 24:14, m’uyero kumae: “Lembanyong’a maeni mi Ker jubiyero i ng’om ngung’ ni lembatuca ni thek ceke; e kajik bilund wok.” Calu wa jutic ma wamiara ni Mungu, watie ku tic ma wacikara nitimo pio pio. Pieno, ng’atuman m’i kindwa ucikere nimiere nitimo ticne mii ma fodi ajiki utundo ngo eni. Yehova bitimo kero pare ceke niketho tije utimere nituc i ajikine, man ka wan de wadiko cingwa, anyong’a binege i kumwa.​—Eze. 3:18-21.

²³ Wabed wadwoko rapor mir ang’o i andha? Iwi karatasi ma julwong’o Fic mi tic pa jarwei, junyutho gin m’ukwayu wakiew. Re lembe ma dongo dongo ma junyutho piny e copo konyi.

²⁴ I leni mi “Girasoma m’imio (mi karatasi kunoke mir elektronik),” kiew wend girasoma ceke mi karatasi kunoke mir elektronik m’imio kunoke m’ioro ni dhanu ma fodi gilimo ngo batizo. I leni mi “Video m’inyutho,” kiew wend video m’inyutho ni dhanu.

²⁵ I leni mi “Liew” ke, kiew nia idok wang’ adi pi nimedo tok lembe ma wular wuweco i wie i wang’e ku ng’atu m’ufoyo ku ponji mwa ma re fodi ulimo ngo batizo. Icopo kwanu liew nwang’u icidho yo pa ng’atini, ikiewo  ire barua, ilwong’e i telefon, ioro ire mesaj, e-mail, kunoke imio ire girasoma moko. Bende, icopo kwanu liew acel kubang’ nindo m’ibetelo i ie wi ponji mi Biblia pa ng’atini. Janyodo copo kwanu liew acel kende kubang’ yenga kinde m’ebetelo wi thier mi juruot ma nyathin moko ma fodi ulimo ngo batizo ni i ie.

²⁶ Kadok wabed watelo wi ponji mi Biblia ku ng’atini kubang’ yenga de, wacikara nikwane ni ponji acel kubang’ dwi. I leni mi Ponji mi Biblia, jurwei gicikiri nikiewo wend dhanu ma tung’ tung’ ma giponjo kugi Biblia i kind dwi. Dhanu ma wacopo kwanu ni Ponji mi Biblia tie ju ceke ma wabeponjo kugi, ma fodi githieriri ngo ni Yehova man gilimo ngo batizo. Wacopo bende nikwanu umego kunoke nyimego m’ukwio i tipo m’umego moko mi Komite mi tic mi cokiri ukwayu nia waponj kugi, kunoke bende nikwanu ng’atu m’ulimo ma nyen ma nwang’u fodi edaru ngo niponjo buku Icopo kwo kud anyong’a rondo ku rondo!

²⁷ Pire tie tek nia wadwok wend “Saa” ma tap. Eno tie wend saa ma watimo kinde ma waberweyo ni dhanu ma gitie ngo Jumulembe man ma gilimo ngo batizo. Ecopo bedo lembanyong’a ma ot kubang’ ot, liew, ponji mi Biblia, kunoke lembanyong’a mi kite moko mange i saa ma jupangu kunoke i saa ma jupangu ngo. Ka jurwei ario giberweyo karacelo, gin ario zoo gibikwanu wend saa ma gitimo, ento ng’atu acel kende re ma bikwanu wend liew ma gitimo kunoke wend Ponji mi Biblia ma gitelo wie.  Junyodo ario ceke gicopo kwanu saa acel acel kende kubang’ yenga kinde ma gibeponjo karacelo awiya migi i thier mi juruot. Umego gicopo kwanu bende saa ma gitimo kinde ma gibemio korolembe mi dhanu ceke. Ng’atu m’ubeloko korolembene i dhok mange copo kwanu bende saa maeno. Ento lembe mange nuti ma pigi tek ma re wakwanu ngo saane, calu ve saa ma wayikara ko pi nicidho i coko mi lembanyong’a, saa ma watimo i cokone, kunoke saa ma watimo i lembe mange.

²⁸ Jarweiman ucikere nitio ku pidocwiny pare ma Biblia uponjo pi nikwanu cuu mandha wend saa ma tap m’etimo i tic mi lembanyong’a. Umego ku nyimego moko gibed girweyo kaka ma dhanu tie lee i ie, ento jumange girweyo i kabedo ma dhanu nok i ie, pieno kwayu giwoth wotho ma lee pi ninwang’u dhanu. Calu kabedo mi rweyo lembanyong’a urombo ngo, jurwei de gitie kud ayi ma tung’ tung’ mi rweyo lembanyong’a. Guriri m’utelowic ubediyo ngo cokiri mi ng’om zoo nia gilubi pidocwiny pare iwi ayi ma gicikiri nikwanu ko saa ma gitimo i lembanyong’a, man ng’atu moko mbe m’ucikere niketho cik iwi lembe maeno.​—Mat. 6:1; 7:1; 1 Tim. 1:5.

²⁹ Ka wabedwoko wend saa ma watimo i tic mi lembanyong’a, wacikara nidwoko saa ma zoo, m’umbe dakika i wie. Ento, jucopo yio nia jarwei udwok dakika moko kende kende kan etie ku macero ma lee ni kum tio, twoyo m’ugonje pi nindo ma lee, egonjo ma zoo i ot ma jubegwoko ju m’utii i ie kunoke i odiyath, kunoke nyo etie ku macero moko mange ma lee m’uketho ecopere ngo ire nidwoko saa ma zoo. Jarwei m’ubenwang’ere i lembe maeno copo dwoko dakika 15, dakika 30, kunoke dakika 45.  Kadok erweyo pi dakika 15 kende i dwine de, ebidwoke kumeca. Jucikiri nikwane i kind jurwei ma dwoko rapor kubang’ dwi. Yub maeno tie bende pi jurwei ma gitie ku macero moko ma lee; ku lapor, nyo ecopere ngo igi niwotho pi dwi moko kunoke gitie ku twoyo kadi ret moko ma lee. Yubne tie kende kende pi jurwei ma gitie ku peko m’ucerogi magwei nirweyo lee. Komite mi tic mi cokiri re ma bineno nia jarwei ma kani m’uromo ku yub maeno.

³⁰ Jubed jukiewo rapor mi tic mi lembanyong’a m’ibed idwoko kubang’ dwi iwi karatasi ma julwong’o Fic mi tic pa jarwei. Karatasi maeno tie mi cokiri. Kan ibedok i cokiri mange, kwayu inyuth ni judong cokiri peri. Jagor bitimo kero ceke nioro karatasine i cokiri peri ma nyen. Eno bikonyo judong cokiri nijoli ma ber man nimio iri kony i thenge mi tipo. Kan ibibedo mbe i cokiri peri pi dwi m’utundo ngo adek, kwayu imediri asu nioro rapor peri mi tic mi lembanyong’a i cokiri perine.

³¹ Nyo wii bewil saa moko nidwoko rapor peri mi tic mi lembanyong’a? M’umbe jiji, saa moko wan ceke wabed wabedo ku yeny mi poyowic. Ento ka watie ku nen m’atira iwi dwoko rapor man wanyang’ nia pire tie tek nitimo kumeno, ecopo bedo yot magwei iwa nidwoko rapor mwa mi lembanyong’a.

³² Dhanu moko gipenjiri kumae: “Pirang’o acikara nidwoko rapor para i cokiri ma ke Yehova ung’eyo ma ber  gin m’abetimo i tic pare?” Eyo, Yehova ung’eyo andha gin ma wabetimo, man eng’eyo ka nyo wabetimo ire nimakere ku copo mwa ceke kunoke ngo. Ento, poi nia i rundi ma con, Yehova ugam uketho jukiewo wend nindo ma Noa utimo i avur man wend oro ma nyithindho mir Israel gitimo i langa. Mungu ugwoko bende wend dhanu ma gigwoko bedoleng’ migi ire man wend ju m’ujai. Eketho jukiewo pir aloci ma tung’ tung’ ma nyithindho mir Israel giwotho nwang’u pi nimaku ng’om mi Kanan, man lembe ma tung’ tung’ ma jupoklembe mir Israel gitimo. M’umbe jiji, eketho jukiewo lembe dupa iwi tic ma jutic pare gitimo. Etelo wi dhanu m’ugoro lembe maeno ceke ku tipo pare; eno ubekonyowa ning’eyo paru pa Mungu iwi kiewo rapor ma tap.

³³ Lembe m’ubed utimere i rundi ma con ma jugoro pigi i Biblia ubenyutho nia rapor man lembe ma dhanu pa Yehova gikiewo utie tap. Nwang’u ecopo bedo tek ninyang’ cuu i lembe dupa ma Biblia ukoro ka nwang’u jubed jukiewo ngo kwan ma tap. Ku lapor, kesom verse m’ulubo e: Thangambere 46:27; Ai 12:37; Jupoklembe 7:7; 2 Ubimo 19:35; 2 Lemkei 14:9-13; Yohana 6:10; 21:11; Tic mi Jukwenda 2:41; 19:19.

³⁴ Kadok rapor ma wabed wadwoko benyutho ngo lembe ceke ma watimo i thier mwa ni Yehova de, pigi tie tek dit i dilo pa Yehova. I rundi ma kwong’a, kinde ma jukwenda gidwogo kud i lembanyong’a, ginyutho ni Yesu pi “gin ceke ma gitimo, ku gin ceke ma giponjo de.” (Mk. 6:30) Saa moko, rapor ma tung’ tung’ copo nyutho nia thenge moko mi tic mwa ubekwayu juketh wijo kilili i  kume. Ku lapor, rapor copo nyutho nia mediri unen i thenge moko mi tic mwa, ento thenge mange calu ve wend jurwei, ulund ujwik. Eno copo nyutho nia ubekwayu jumii amora i kum umego ku nyimego kunoke jutim kero niyiko thenge m’ubewotho ngo cuu. Umego ma gitie jutelwic gicopo ng’io i rapor ma tung’ tung’ man nitimo kero niyiko lembe moko ci ma romo cero mediri mi dhanu kunoke mi cokiri.

³⁵ Rapor mwa konyo bende dilo pa Yehova nineno nia yeny mi jurwei utie kakani dhe. Nyo mediri ubenen i kabedo ma kani? Kabedo ma kani ma mediri utie nok i ie? Girasoma ma kani ma yenyne tie pi nikonyo dhanu giponj lemandha? Rapor mwa konyo bende dilo ning’eyo girasoma ma yeny migi bibedo nuti pi tic mi lembanyong’a i ng’om ma tung’ tung’ man niyikiri ma ber pi nipong’o yenyne.

³⁶ M’umbe jiji, rapor ma wabed wawinjo benyayu mutoro i iwa. Anyong’a benegowa lee ka wabewinjo pi tic mi lembanyong’a m’umego ku nyimego mwa gibetimo i ng’om zoo. Rapor mi mediri konyowa ning’eyo kite ma dilo pa Yehova ubecidho ko i wang’e i ng’om zoo. Lembe m’umego ku nyimego ginwang’iri ko tielo cwinywa, medo amora mwa, man cwaluwa nidikara lee i tic mi lembanyong’a. (Tic. 15:3) Pire tie tek nia wabed wadik cingwa man wabed wadwok rapor mwa mi lembanyong’a, kum eno nyutho nia wabedieng’ pir umego mwa i wang’ ng’om zoo. I lembe maeno ma nok, wanyutho woro mwa ma thuth pi yub ma dilo pa Yehova umaku.​—Lk. 16:10; Ebr. 13:17.

³⁷ Wacikara ngo niporo tic mwa mi lembanyong’a ku mi jumange. (Gal. 5:26; 6:4) Lembe ma ng’atuman ubekadhu i ie tie rom ungo. Kakare niporo tic mwa ku mi jumange, wacopo nwang’u bero lee ka waketho lembakeca ma waromo tundo i ie pi ning’eyo kite ma tic mwa mi lembanyong’a ubemedere ko. Ka watundo i kum lembakeca ma waketho, wabibedo kud anyong’a.

³⁸ Wabeneno ngbeng’ nia Yehova ubedhulo tic mi coko dhu dhanu m’ebigwoko i saa mi “masendi ma dit.” Wabekwo i nindo ma lembila ma e pa Isaya ubepong’o i ie: “Ng’atu ma nok bidoko rubanga, man ng’atu ma nyathigi bidoko thek ma tek: an, a Yehova, abidhulo maeni i nindone.” (Nyu. 7:9, 14; Isa. 60:22) Etie rwom ma dit iwa nibedo jutic mi lembanyong’a i dong nindo maeni ma tokcen!​—Mat. 24:14.