BIBLIA ung’olo ni jutic mandha pa Yehova nia gibed gicokiri karacelo pi ninwang’u telowic man pi nitielo cwinygi i kindgi. (Ebr. 10:23-25) Kabedo ma kwong’a ma dhanu pa Yehova, niyero nyithindho mir Israel gibed gitimo i ie thier ubino “hema mi cokiri.” (Ai 39:32, 40) I ng’eye, Suleman ma wod Daudi ugiero ot ma julwong’o hekalu pi niyungo Mungu. (1 Ub. 9:3) Kinde ma junyotho hekalune i oro 607 W.R.M., Juyahudi gicaku cokiri i kabedo ma julwong’o sinagog pi niworo Mungu. I ng’ei oro moko, judok jugiero hekalu man jucaku timo thier mandha i ie kendo. Yesu ubed uponjo i sinagog man bende i hekalu. (Lk. 4:16; Yoh. 18:20) Eponjo kadok iwi got.​—Mat. 5:1–7:29.

² I ng’ei tho pa Yesu, Jukristu gibed gicokiri i kabedo ma lac ma lwak dhanu becokiri i ie man i udi mir umego pi niponjo Lembagora man pi nidikiri karacelo ku juyic wagi. (Tic. 19:8, 9; Rum. 16:3, 5; Kol. 4:15; Flm. 2) Saa moko ubed ukwayere nia Jukristu mi rundi ma kwong’a gicokiri kaka m’upondo kara ju m’unyayu ragedo kud unwang’gi. Eno nyutho nia jutic mandha pa Mungu gibed gimaru lee dit nibecokiri kaka mi thier wek kara ‘Yehova ponjgi.’​—Isa. 54:13.

³ Tin bende, Jukristu gitimo coko migi i kabedo m’udul dhanu becokiri i ie man i udi mir umego. Wang’ ma pol udi mir umego konyo bende pi coko mi lembanyong’a. Ju ma bemio udi migi pi coko ma kumeno gineno lembene  ni rwom. Ju ma pol ginyutho pi bero ma ginwang’u i thenge mi tipo pilembe giyio coko ubed ukadh i ot migi.

⁴ Kabedo m’anzilo ma Jumulembe pa Yehova gitimo i ie coko tie Ot Ker. Wang’ ma pol jung’iewo parsel man jugiero Ot Ker ma nyen i ie kunoke juyiko ot ma nwang’u ubino nuti i ie pi nidoko ni Ot Ker. Pi nigwoko sente man pi nitio ku Ot Kerne lee, cokiri dupa copo tio ku Ot Ker ma rom ka copere. I kabedo moko bekwayere nia jupang ot apanga. Pi Udi Ker ma jugiero ma nyen ku ma juyiko kendo ma re tije bino lee, pire tek nia jutim progam mi thierogi ni Yehova. Ento, ka tic mi yiko Ot Ker m’ular ubedo nuti, ubino lee ngo, pire tek ungo nia jutim program mi thiere ni Yehova.

⁵ Ot Ker ucikere ngo nibedo giedo moko ma juruko akeca pi nitalu i dhanu. Kadok nwang’u ayi giedone bekoc nimakere ku kabedoman de, re gikonyo pi thelembe ma rom. (Tic. 17:24) Nimakere ku lembe mi kabedoman, ecikere nibedo ot ma cuu man m’uromo pi nitimo coko mi Jukristu.

⁶ Cokiri ceke mi Jumulembe pa Yehova gimio giramia pi nikonyo tic mi gwoko man mi yiko Ot Ker ma gicokiri i ie. Juketho ngo bola kadok thier de jubolo ngo. Ento sanduku mi giramia bebedo tie wek kara ju m’ubino i coko giromo ketho i ie giramia migi ma ku berocwiny, pi nipong’o yeny m’ukwayere pi Ot Ker. Gimio giramiane ku berocwinygi calu m’adundegi keco.​—2 Kor. 9:7.

⁷ Dhanu ceke mi cokiri gineno nia etie rwom ma dit ka gibetielo tic mi yiko Ot Ker ku sente migi man gibemiiri  pi nigwoke ebed ma leng’ saa ceke. Wang’ ma pol jubed juketho jadit cokiri kunoke jakony tic ubed unen wi tije. Jubed jupangu ungu mi lembanyong’a i program mi ketho leng’o, man umego ma neno wi ungune kunoke jakony pare re ma telo wi ticne. Kadok ebed yo woko kunoke yor i ie, Ot Ker ucikere nimio yung ni Yehova man ni dilo pare.

⁸ Ka cokiri dupa gitio ku Ot Ker ma rom, judong cokirine ging’io umego moko pi nitimo i Komite mi gwoko Ot Ker. Komitene re ma neno wi lembe ceke m’umulo kum Ot Ker ku parselne. Guriri mi judong cokiri mi cokirine ceke ging’io umego acel pi nibedo jatel wi tic mi komite maeno. Komitene timo i the telowic mi guriri mi judong cokiri man eneno wi tic mi ketho leng’o; eneno cuu nia jugwoko Ot Ker ma ber man jamtic ma tung’ tung’ ma jutio ko utie i mukero m’uromo pire. Kara lembene uwoth ma ber, kwayu cokiri ceke gidik cing’gi adika.

⁹ Tekene cokiri ma tung’ tung’ tio ku Ot Ker acel, jucopo bewilo saa mi timo coko awila. Ukwayu judong cokiri gidieng’ pi bero mi jumange man ginyuth mer mir umego kinde ma gibewilo saa mi coko. (Flp. 2:2-4; 1 Pet. 3:8) Cokiri moko mbe m’ucikere nimaku yub kaka cokiri mange. Kinde ma jaliew mi twodiri ubeliewo cokiri acel m’i kind cokiri ma tio ku Ot Ker ma rom, copo kwayu jumange giwil saa ma gitimo i ie coko i kind yenga maeca.

¹⁰ Jucopo tio ku Ot Ker pi ponji mi nyom man mi kuny, tekene Komite mi tic mi cokiri uyio. Judong cokiri maeno ging’io i kwac ma kumeno ku riekowang’, man gimaku yub nimakere ku telowic m’uai kud i biro mi filial.

 ¹¹ Ju ma juyio igi ya gitii ku Ot Ker pi lembe ma kumeno, kwayu gitim lembe ma nyutho nia gitie Jukristu mandha. Jucikiri ngo nitimo lembe moko nyanok de i Ot Ker ma romo kiero cokiri kunoke ma romo kelo acidi iwi nying’ Yehova man iwi cokiri. (Flp. 2:14, 15) I the telowic mi biro mi filial, juromo tio ku Ot Ker pi lembe mange bende mi tipo, calu ve Somo mi tic mi Ker man Somo mi juyab yo.

¹² Saa ceke, kwayu timo mir umego ku nyimego unyuth nia giworo kaka ma jutimo i ie coko. Kendi, ruko man timo migi ucikere ninyutho woro m’uromo ku thier pa Yehova. (Ekl. 5:1; 1 Tim. 2:9, 10) Ka wabetio ku juk maeno, wanyutho nia wabeneno kabedo ma watimo i ie coko mwa mi Jukristu ni gin ma pire tek.

¹³ Pire tie tek niketho coko ukadh m’umbe yakini. Kwayu awiya gibed i ng’et junyodo migi. Jucopo kwayu junyodo ma gitie kud awiya ma thindho gibed kud awiya migine kaka ma giromo sendo ngo wi dhanu i ie, kara tekene ukwayere, giwok kugi woko pi nimio igi twiny kunoke nipong’o yeny migi mange.

¹⁴ Jung’io umego ma giromo pi nijolo dhanu i coko i Ot Ker. Gicikiri nibedo nger, nibedo dhanu ma vonjo man ma ng’io i lembe cuu. Tic migi utie nimotho dhanu m’ubino ma nyen man nijologi ma ber; bende nikonyo ju m’utundo tokcen ginwang’ kabedo, nikwanu wend dhanu m’ubino i coko man nineno nia jamtic mi piedho yamu ubetimo ma ber i Ot Ker. Kan ukwayere, umego ma gijolo dhanu i coko, ginyutho ni junyodo nia ginen wii awiya migi cuu kara kud giring swa  i Ot Ker i wang’ coko kunoke i ng’ei coko man kud gituk iwi bop. Ku woro man ku riekowang’, umego m’ujolo dhanu bikwayu janyodo uwodh nyathin m’utimo fujo kara kud ebar wii dhanu. Tic m’umego ma gijolo dhanu i coko gitimo, konyo lee dit kara ng’atuman ulub coko ma ber. Etie ber nitio ku judong cokiri man jukony tic pi nijolo dhanu i coko.

¹⁵ I rundi ma kwong’a, Jukristu moko jamcing’gi bino lee nisagu mi jumange, uketho Paulo ukiewo kumae: ‘Kara lembe bed rom rom: sagri mi piny mwu ukoukei can m’i kumgi nindo maeni, kara sagri mi piny migi bende ubin ukei can m’i kumwu; kara lembe ubed rom rom.’ (2 Kor. 8:14) Tin bende, lembe betimbere “rom rom” kumeno. Sente mi giramia ma cokiri bemio pi tic mi ng’om zoo, jucoko dhoge pi nikonyo tic mi giero man mi yiko Udi Ker. Giramia ma ku berocwiny m’umego ku nyimego mwa gimio i wang’ ng’om zoo, pire tek dit ni dilo pa Yehova man ni cokiri m’ubenwang’u kony ni kum giramiane.

¹⁶ Nimakere ku kabedo ma cokiri nwang’ere i ie, biro mi filial nyutho Ot Ker ma cokiriman bibetimo coko i ie. Birone neno bende nia awene man i kabedo ma kani m’ukwayu  jugier i ie Ot Ker ma nyen kunoke juyik ot m’ular ubedo nuti udok ni Ot Ker i kabedo ma filialne neno wie. Ka peko ma rek uwok, jumaku yub m’ukwayere pi niyiko Udi Ker m’unyothere, man saa moko niyiko bende udi mir umego.

¹⁷ Biro mi filial telo wi umego m’uwodhiri pi nikonyo tic mi ng’iewo parsel, kubo cal (plan) mi Ot Ker ma jubigiero, mi nwang’u karatasi pa gavmenti, mi giero man mi gwoko Ot Ker. Calu ma yeny mi Udi Ker utie lee i ng’om ma pol, yeny mi ju m’uwodhiri de tie lee. Jurwei ceke ma gilimo batizo man m’upong’o lembe m’ukwayere ma gitie bende kud ava mi konyo tic mi giedo, gicopo pong’o karatasi mi kwayu tic man giromo mie i bang’ Komite mi tic mi cokiri migi. Kadok jurwei ma fodi gilimo ngo de giromo dikiri pi nikonyo tic mi giedo kunoke mi yiko Ot Ker migi.

¹⁸ Jukristu mi rundi ma kwong’a gibed gicokiri wang’ ma pol i ungu ma thindho thindho. Ento saa moko gibed gicokiri bende udul “dhanu dupa.” (Tic. 11:26) Tin bende, dhanu pa Yehova gicokiri i udul ma lee i coko ma dongo mi twodiri man mir adhura. Wang’ ma pol jubed jupangu kabedo apanga pi coko ma dongo, re ka kabedone maku piny ungo kunoke embe, juromo ng’iewo kunoke jugiero kabedo ma julwong’o Ot coko ma dit pi nitimo thier.

¹⁹ Saa moko jung’iewo ot man juyike kara jucak tio kude ni Ot coko ma dit. Re wang’ ma pol jung’iewo parsel man jugiero ot ma nyen i ie. Udi mi coko ma dongo  bebedo rom rom ungo nimakere ku yeny mi kabedoman. I wang’ maku yub mi ng’iewo kunoke mi giero udi maeno, biro mi filial lar neno cuu wend sente m’eromo camu man kadhiri ma jubitio ko kude.

²⁰ Biro mi filial ng’io umego pi nineno wi Udi mi coko ma dongo man pi nigwoke. Jubed jumaku yub kara twodiri ubed uketh leng’o thirithiri i ie, uketh leng’o ma dit i ie kubang’ dwi abusiel man jutim tic mange m’ubekwayere i kume. Umego ginwang’u bero ma lee ka gibewodhiri pi nitimo tic maeno. Pieno, pire tie tek nia umego ku nyimego gidik cing’gi i kum yub maeno kud adundegi ceke.​—Zab. 110:3; Mal. 1:10.

²¹ Saa mange juromo tio bende ku Ot coko ma dongo pi lembe mange mi theokrasi, calu ve Somo ma tung’ tung’ mi Biblia man coko ma segi mi juliew kunoke mi judong cokiri mi twodiri. Ot coko ma dit de tie kabedo ma juthiero pi nitimo i ie thier ni Yehova, calu ve Ot Ker. Timo, kendi man ruko mwa saa ma wacokara i Ot coko ma dit, ucikere ninyutho woro ma rom ku ma wabed wanyutho ka watie i coko mwa i Ot Ker.

²² Dhanu dupa ma nyen gibemondo i dilo pa Mungu i dong’ nindo maeni mi kajik ceng’. Lembuno ubenyutho ngbeng’ nia Yehova ubemio musiga iwi tic pare. (Isa. 60:8, 10, 11, 22) Pieno, kwayu wadik cingwa i kum yub mi nwang’u kabedo mi timo thier man mi gwoke ebed ma leng’. Tek watimo kumeno, nwang’u wabenyutho nia kabedo ma watimo i ie thier pire tie tek i iwa, ni kum ekonyowa watiel cwinywa i kindwa, asagane ka wabeneno nia ceng’ pa Yehova udhingo.