KINDE ma saa uromo ma Yesu uor ko julub pare calu jurwei lembanyong’a mi Ker, eyero igi kumae: “Mwoka bedo dit andha ere jutic gi lam.” Tic ubino lee dit, uketho emedo nia, “wukwai Rwoth mi mwoka, ya eor jutic i mwoka pare.” (Mat. 9:37, 38) Yesu unyutho ni julub pare kite ma gitim ko ticne. Wec m’eyero unyutho nia kwayu tije utimere pio pio, eyero kumae: “Wubikadhu ku i adhura pa Israel ungo, ka fodi Wod dhanu kubino ngo.”​—Mat. 10:23.

² Tin bende lembe tie dit m’ubekwayu jutim i tic mi lembanyong’a. Jucikiri nirweyo lembanyong’a mi Ker ma fodi ajiki utundo ngo, kum nindo dong’ nyanok! (Mk. 13:10) Calu ma kaka ma waberweyo i ie utie ng’om, wanwang’ara ku lembe m’uyenyo rombo ku ma Yesu karacelo ku julub pare de ginwang’iri ko, ento kaka ma warweyo i ie utie lac nisagu migi. Wendwa de tie nok ka juporowa ku miliar mi dhanu ma nwang’ere iwi ng’om, re wang’eyo andha nia Yehova bikonyowa. Lembanyong’a mi Ker jubirweyo i ng’om zoo, man i saa ma Yehova uketho, e ajiki bitundo. Nyo wabiketho Ker pa Mungu i kabedo ma kwong’a i kwo mwa kara watim tic mi lembanyong’a cuu? Waromo ketho lembakeca ma kani mi tipo kara watim tije ma ber?

³ Pi ninyutho lembe ma Yehova ubekwayu i bang’ jutic pare ma githiero kwo migi ire, Yesu uyero kumae:  ‘Mar [Yehova] Mungu peri kud adundeni ceke, ku ng’eyong’ec peri ceke de, ku pidoii ceke de, man ku tegoni ceke de.’ (Mk. 12:30) Ukwayu watim tic pa Mungu kud adunde mwa ceke. Niwacu, wanyuth nia wamoko kikiki i kum Mungu man wathierara ire ku cwinywa zoo pi nitimo tic pare kud amora. (2 Tim. 2:15) Ng’atuman m’i kindwa utie ku kaka mi timo tic lee nimakere ku lembe mi kwo pare man copo pare. Dong’ kenen ticne moko ma tung’ tung’ man ing’ii lembakeca mi tipo m’icopo ketho pi tic peri mi lembanyong’a.

⁴ Dhanu ceke ma gimondo i lemandha, gitie ku rwom mi rweyo lembanyong’a. Eno tie tic ma pire tek ma Yesu umio ni julub pare ya gitim. (Mat. 24:14; 28:19, 20) Jalub pa Yesu Kristu caku weco ku jumange iwi lemandha niai m’ewinje ci. Andrea, Filipo, Kornelio, ku jumange de gitimo kumeno. (Yoh. 1:40, 41, 43-45; Tic. 10:1, 2, 24; 16:14, 15, 25-34) Nyo eno nyutho nia ng’atini copo caku koro lemandha ni jumange kadok fodi elimo ngo batizo? Eyo! Ndhu ndhu kinde ma ng’atini upong’o lembe m’ukwayere pi nidoko jarwei ma fodi ulimo ngo batizo i cokiri ci, ecopo caku dikere pi nirweyo lembanyong’a ot kubang’ ot. Bende, nimakere ku copo pare man lembe mi kwo pare, eromo dikere i ayi mange de mi rweyo lembanyong’a.

⁵ I ng’ei ma jarwei udaru limo batizo, ma jiji mbe eromo maru nitimo lembe ceke m’ecopo pi nikonyo jumange giwinj lembanyong’a. Co ku mon ceke gitie ku rwom mi timo tic mi lembanyong’a. Wanwang’u mugisa kadok  wabetimo lembe ma nok pi niketho tic mi Ker ucidh i wang’e. Ka ng’atini tie ku copo mi medo tic pare mi lembanyong’a pi ninwang’u rwom mange i tije, ebibedo kud anyong’a.

⁶ Copere nyo judaru rweyo lee dit i kabedo ma cokiri peri berweyo i ie man judaru mio lembatuca cuu. Ka kumeno, icopo nwang’u nia kwayu imed tic peri man idok i kabedo mange ma yeny utie lee i ie. (Tic. 16:9) Pieno, ka kawoni itie jadit cokiri kunoke jakony tic, cokiri moko romo bedo ku yeny mi kony peri. Jaliew mi twodiri peri copo mio paru m’iromo tio ko kara icidh ikony cokiri mange mi twodiri peri. Kan ibemito konyo i kabedo mange mi ng’om thu, biro mi filial copo mio telowic ma romo konyi.

⁷ Nyo imaru icidh ikony i ng’om mange? Ka kumeno, kwayu ipar i lembene cuu mandha. Eber nia iwec ku judong cokiri iwi lembene. Pilembe nidok i ng’om mange bibedo kokoro ku matoke i wii man iwi ng’atu moko ci ma wubidok kude. (Lk. 14:28) Ento kan ipangu nia ibigalu ngo kuca, eromo bedo ber masagu kan itimo i kabedo mi ng’om thu.

⁸ I ng’om moko, umego ma jutio kugi calu jutelwic gitie ju ma fodi urio ngo akeca i lemandha. Umegone gijwigiri man gitie ayika niweko judong cokiri m’ung’eyo lembe lee ma gidwogo i bang’gi utel wi lembe ma tung’ tung’. Kan itie jadit cokiri man ibemito idok i ng’om ma kumeno, poi nia lembakeca peri tie ngo nitimo kakar umego ma kuca ento nitimo karacelo kugi. Konygi kara  gipong’ lembe m’ukwayere pi ninwang’u rwom man nijolo tic i cokiri. (1 Tim. 3:1) Bed ku cirocir tekene lembe moko ubetimere ngo calu ma betimere i ng’om thu. Tim ku ng’eyong’ec m’itie ko calu jadit cokiri pi nimio kony m’ukwayere ni umego. I ng’eye, ka nindo biromo ma bikwayu nia iwekgi man idok kaka m’iai i ie, judong cokiri ma keca bibedo ku copo ma giromo gwoko ko cokiri ma ber.

⁹ I wang’ ma fodi biro mi filial unyutho ngo iri nying’ cokiri m’icopo cidho konyo, komite mi tic mi cokiri peri bioro barua mi nyutho pi rwom peri ni filial. Baruane pire tek kadok nwang’u itie jadit cokiri, jakony tic, jayab yo kunoke jarwei. Komite mi tic mi cokiri bioro barua mi nyutho pi rwom karacelo ku kwac peri atira atira ni biro mi filial mi ng’om m’ibemito icidh ikony i ie.

¹⁰ Pi nimedo tic peri mi lembanyong’a, icopo nwang’u nia kwayu iponj dhok mange, uketho i ie dhok mi buba. Kan itie ku lembakeca mi ponjo dhok mange pi nirweyo lembanyong’a, pire tie tek nia iwec ku judong cokiri man jaliew. Gicopo mio iri paru man tielocwiny m’ukwayere. I the telowic mi biro mi filial, juliew moko ucaku the somo mi ponjo dhok pi nikonyo jurwei ma gitie ku copo man juyab yo kara girwei i dhok mange.

¹¹ Jurwei ceke umaku ging’ei lembe m’ukwayere pi nibedo jayab yo ma jakony, jayab yo ma nja, jayab yo ma segi man ging’ei bende lembe iwi kit tic mange mi saa  ceke. Jayab yo ucikere nibedo Jakristu m’ulimo batizo man ma tie lapor ma ber; m’ecopere ire nipong’o wend saa m’ukwayere i tic mi lembanyong’a. Komite mi tic mi cokiri ng’io i karatasi mi kwayu tic pa jayab yo ma jakony man jayab yo ma nja, ento juyab yo ma segi biro mi filial re ma ng’iogi.

¹² Jayab yo ma jakony copo maku tije pi dwi acel, pi dwi dupa kunoke nimedere asu asu ku tije nimakere ku copo pare. Jurwei ma pol bemaru gitim tic pa jayab yo ma jakony i nindo ma segi, calu ve i dwi mi Poi pi tho pa Yesu, kunoke i dwi ma jaliew mi twodiri ubeliewo ie cokiri migi. Jumoko ke ging’io dwi ma giyom i ie. Jurwei ma gisomo ma gilimo batizo, gicopo maru gitim tic pa jayab yo ma jakony saa ma gitie i yom. Jurwei copo ng’io nibedo juyab yo ma jukony i kind dwi ma jujwigo i ie wend saa ma juyab yo ma jukony gitimo; niwacu dwi mir adek ku mir ang’wen man i dwi ma jaliew ubeliewo i ie cokiri. Tekene ecopere iri man itie ku kura ma ber, bende icopo pong’o saa m’ukwayere man inwang’u nia icopo timo dwi acel kunoke dwi dupa calu jayab yo ma jakony, judong cokiri gibifoyo ning’io i karatasi peri pi rwom mi timo tic maeni.

¹³ Jayab yo ma nja ucikere nibedo ku copo mi pong’o wend saa ma jukwayu i bange kubang’ oro. Tekene itie jayab yo ma nja, icikiri nitimo tic karacelo ku cokiri peri. Juyab yo ma weg amora gitie mugisa ni cokiri, pilembe giketho yaw yaw mi lembanyong’a medere man gimio amora i kum jumange de gimak tic pa jayab yo. I wang’ nipong’o karatasi mi kwayu tic pa jayab yo ma nja, icikiri  nibedo jarwei ma tie lapor ma ber man m’ulimo batizo dwi udaru kadhu abusiel.

¹⁴ Juyab yo ma segi ke wang’ ma pol jung’iogi kud i kind juyab yo ma nja ma gibetimo tic mi lembanyong’a cuu. Gicikiri nibedo ayika nicitimo kaka moko ci ma biro mi filial ung’io niorogi i ie. Wang’ ma pol juorogi i kabedo ma bor kaka ma gicopo nwang’u i ie dhanu ma bijolo ponji mwa man gicaku the cokiri ma nyen. Saa moko juoro juyab yo ma segi i cokiri ma tie ku yeny mi kony, pi nitimo tic mi lembanyong’a i kabedo ceke ma girweyo i ie. Jumoko ma gitie juyab yo ma segi ma gijudong cokiri, juorogi nikonyo cokiri ma thindho thindho, kadok nwang’u cokirine umbe ku yeny ma segi mi jurwei lembanyong’a de. Jukonyogi ku sente moko m’uromo, kara gibed gipong’ ko yeny migi ma pire tek. Jumoko ma gitie juyab yo ma segi, jung’iogi pi nindo moko kende.

¹⁵ Komite mi tic mi lembanyong’a, ma tie acel m’i kind Komite mi Guriri m’utelowic, re ma ng’io ju ma timo tic mi misioner. I ng’eye, Komite mi filial orogi i kaka ma wend dhanu tie lee i ie. Gikonyo akeca pi nitielo tic mi lembanyong’a man niketho cokiri ucung nging’ nging’. Wang’ ma pol, ju ma juorogi i tic mi misioner gitie ju m’usomo Somo mi jurwei Injili mi Ker. Junwang’u igi kabedo man jubed jumio igi sente moko kara gibed gipong’ ko yeny migi ma pire tek.

¹⁶ Ju ma Guriri m’utelowic ng’iogi nibedo juliew mi twodiri ginwang’u ponji man kara ging’ii ma ber ku tije,  jular jukethogi calu juliew ma jukony. Umego maeno gimaru tic mi lembanyong’a man gimaru umego migi. Girweyo lembanyong’a kud amora, giponjo Biblia akethacwinygi, man gitie juponji ma beco. Ginyutho kamaleng’ nia gitie ku nying tipo i kwo migi man timo migi de nyutho nia gitie dhanu ma rido ngo i lembe, man ma ng’io i lembe. Tekene etie umego m’ugamu, dhaku pare ucikere nibedo jayab yo ma tie lapor ma ber i timo pare man i kite m’ekwo ko ku jumange. Ecikere nibedo jarwei ma won amora. Bende, kwayu ebed dhaku ma Jakristu ma jwigere ni cware, ma weco ngo kaka cware man ma weco ngo kwa en. Juliew mi twodiri ku mon migi gitie ku tic dupa, pieno ju m’umito gitim tic maeno gicikiri nibedo ku leng’kum ma cuu. Juyab yo gipong’o ngo karatasi pi nidoko juliew mi twodiri. Ento, gicopo nyutho ava mi timo tije ni jaliew mi twodiri migi kara ekonygi ku paru.

¹⁷ Somo mi Jurwei Injili mi Ker: Yeny mi jurwei Injili mi Ker utie lee pi nitimo tic kaka ma fodi jurweyo ngo i ie akeca man nitielo cokiri i thenge mi tipo. Pieno, umego ku nyimego ma jumusuma man m’ugamiri, gicopo pong’o karatasi pi ninwang’u ponji i Somo mi jurwei Injili mi Ker. Kinde ma gidaru somone, juorogi calu juyab yo ma nja kaka ma yeny utie lee i ie i ng’om ma gikwo i ie. Ento, ju ma gitie ayika jucopo mio igi tic mange i ng’om thugi kunoke i ng’om mange. Ju ma nok re ma juorogi calu juyab yo ma segi pi nindo moko kunoke pi nja. Juyab yo m’umito gisom somo maeni, gicopo  ng’eyo lembe m’ukwayere i coko ma juyiko pi somone i coko ma dit mir adhura.

¹⁸ Somo mi Gilead: Umego ku nyimego ma jumusuma man m’ugamiri ma juromo ng’iogi pi somo maeni, gitie ju m’ung’eyo weco Anglais man ma gibetimo tic ma segi mi saa ceke. Gitie ku copo mi tielo man mi ketho tic mi lembanyong’a kunoke mi filial ucung ma tek. Gidaru nyutho nia gitie kud ava mi konyo umego migi man mi konyo jumange i ayi ma ber kara giponj man gimok ki i kum telowic mi Biblia man mi theokrasi. Komite mi filial kwayu ju m’umito somo somone nia gipong’ karatasi. Juoro ju m’udaru somo maeni i tic mi lembanyong’a kunoke i biro mi filial i ng’om mange kunoke i ng’om thugi.

¹⁹ Nitimo tic i Bethel utie rwom ma segi. Nying’ ma nia Bethel thelembene “Ot pa Mungu,” man ni kum tic m’utimere i ie, lwong’one umaku piny. Umego ku nyimego ma gitimo i Bethel gikonyo tic ma pire tek mi wodho girasoma, mi loke man mi poke kaka ma tung’ tung’. Tic migine pire tek ni Guriri m’utelowic m’ubeneno man m’ubemio telowic ni cokiri i ng’om zoo. Ju ma dupa ma timo tic i Bethel ma gitie julok dhok gikwo man gitimo tije i kabedo ma juweco i ie dhokne i ng’om ma filial migi neno wie. Eno konyogi niwinjo dhok ma gibeloko kubang’ ceng’. Giromo neno ku wang’gi gigi ka nyo dhanu ubenyang’ i wec mi girasoma ma gibelokone.

²⁰ Tic ma pol ma jutimo i Bethel kwayu kero. Pieno, ju ma julwong’o i Bethel gitie asagane umego m’aradu  ma githiero kwo migi man ma gidaru limo batizo. Kwayu gibed ku leng’kum ma cuu man gibed ku tego. Tekene yeny utie i filial m’ubeneno wi ng’om mwu man ibemito itim i Bethel, icopo weco ku judong cokiri mi beng’wu pi ning’eyo lembe m’ukwayere.

²¹ Tic mi giero kabedo ma watimo i ie lembe mi theokrasi utie tic ma leng’, rom rom ku tic ma Suleman ugiero ko hekalu. (1 Ub. 8:13-18) Umego ku nyimego dupa ginyutho amora ma dit pi niwodho saa migi man jamcing’gi wek kara gidikiri i tije.

²² Nyo ecopere iri nicitimo tic mi giedo? Kan itie jarwei m’ulimo man itie ayika nitimo tic mi giedo, umego ma gibeneno wi tic mi giedo i kabedo m’inweng’iri ie gibifoyo kony peri man gibibedo ayika niponji kadok itie ku bodho m’uromo. Ebibedo ber kan inyutho lembene ni judong cokiri mwu nia itie ayika pi nikonyo. Jurwei moko m’ulimo batizo ma gitie ku copo, gituc niwodhiri pi nidikiri i giedo mi udi mwa mi tic mi theokrasi kadok i ng’om mange.

²³ Kite ma juromo dikiri ko i tic mi giedo utie dupa. Jurwei ma kura migi ber man ma giweg bodho moko, gicopo konyo ticne kud i kabedo ma ceng’ini kugi, pieno gitimo calu ju m’uwodhiri pi tic mi giedo. Jumoko gitie  ku copo mi konyo tic mi giedo i kabedo ma bor pi nindo moko kende. Filial re ma kethogi calu Ju m’uwodhiri pi nikonyo tic mi giedo pi yenga ario nitundo dwi adek. Ju ma jukethogi pi nitimo pi nindo m’ulwar ke julwong’ogi Jutic mi giedo. Jatic mi giedo ma juoro i ng’om mange lundo julwong’e Jatic mi giedo i ng’om ma woko. Ungu mi giedo diko jutic mi giedo ku ju m’uwodhiri pi nikonyo tic mi giedo man gin re ma gitelo wi tic. Ju m’uwodhiri pi tic mi giedo man umego ku nyimego mi cokiri de bino konyo tije. Ungu mi giedo giwotho i kaka ma tung’ tung’ pi nitimo tic mi giedo i kabedo ma filial migi neno wie.

²⁴ Kan idaru thiero kwo peri ni Yehova, ma jiji mbe ibemito itim ire nja ku nja. Dong’ iketho lembakeca ma kani mi tipo i kwo peri? Nibedo ku lembakeca mi tipo bikonyi nitio ku kero man jamcing’gi ku rieko. (1 Kor. 9:26) Ebikonyi bende kara iteng’ini i tipo man iketh wii i kum lembe ma pigi tek.​—Flp. 1:10; 1 Tim. 4:15, 16.

²⁵ Jakwenda Paulo uweko iwa lapor ma ber ma wacopo lubo pi nitimo tic pa Mungu. (1 Kor. 11:1) Paulo uwodhore ku kero pare zoo pi nitimo tic pa Yehova. Enyang’ nia Yehova umio ire kaka dupa mi timo tic, uketho egoro ni umego mi Korinto kumae: “Kum Mungu daru yabu ira dhugola ma dit mi kuloka ma dit.” Nyo iwa de dhugolane uyabere? Eyo, wan de watie ku kaka dupa ma wacopo timo ko ni Yehova karacelo ku cokiri, asagane pi nirweyo lembanyong’a mi Ker. Ento calu Paulo, nimondo kud i “dhugola ma dit” copo ketho wanwang’ara ku  ‘judegi dupa.’ (1 Kor. 16:9) Paulo ubedo ayika nitwonere gire. Kenen lembe ma e m’eyero: “Afodo kuma, man adwoke ni ng’eca.” (1 Kor. 9:24-27) Nyo wan de watie ku pidoic ma kumeno?

²⁶ Ng’atuman m’i kindwa copo ketho lembakeca mi tipo nimakere ku copo pare. Ju ma dupa ma gitie i kit tic moko mi saa ceke tin eni, gilar giketho lembakeca mi tipo con i kwo migi. Kinde ma fodi githindho, junyodo migi kunoke dhanu mange ubed utielo cwinygi gitim kumeno. Eno uketho ginwang’u mutoro ma lee dit i tic pa Yehova man ang’eyang’o mbe nyanok de i igi. (Rie. 10:22) Lembakeca mange ma pigi tek ma waromo ketho utie nirweyo lembanyong’a kubang’ yenga, nicaku man nitelo wi ponji mi Biblia kunoke niyiko coko mii mandha. Lembe ma pire tek utie nia wamedara nicungo ma tek man watim tic mwa akethacwinywa. Tek watimo kumeno, wabimio yung ni Yehova man wabitundo i kum lembekaca mwa ma dit mi timo ire rondo ku rondo.​—Lk. 13:24; 1 Tim. 4:7b, 8.