NIMAKERE ku lembila ma Yesu uewo iwi kajik ceng’, Jumulembe pa Yehova gibetimo tic mi rweyo lembanyong’a “cil i tung ng’om.” (Tic. 1:8; Mat. 24:14) Pieno, gimiiri ku berocwinygi pi nitio ku saa man kero migi pi ninyutho lembe mi tipo ni dhanu. Calu gibetimo tic karacelo ku Yehova, giketho genogen nia ebipong’o yeny migi man gibemediri niketho Ker pare i kabedo ma kwong’a i kwo migi. (Mat. 6:25-34; 1 Kor. 3:5-9) Adwogi ma beco ma gibenwang’u ubenyutho kamaleng’ nia tije ubenyayu anyong’a i Yehova man ebepoko mugisa i wie.

² Kinde ma dhanu moko gibeneno kite ma warweyo ko lembanyong’a man ginwang’u nia kara wabed wamio Biblia man girasoma m’ukoro i Biblia mananu ni dhanu, gipenjo kumae: “Sente mi timo lembe maeno zoo beai kani?” Andha tic mi wodho Biblia karacelo ku girasoma m’ukoro ie camu sente ma lee. Bende nigiero man nigwoko udi mi Bethel pi ju ma gitimo tic mi wodho girasoma ku macini, ma gineno wi tic mi lembanyong’a man ma gitimo tic mange pi niketho lembanyong’a ucidh i wang’e, camu bende sente ma lee. M’umedo maeno, jumio bende kony moko ni juliew mi twodiri, ju m’ubetimo tic mi misioner, juyab yo ma segi man jumange ma gibetimo tic ma segi mi saa ceke kara gimediri ku tic migi.  Ma jiji mbe, tic mi lembanyong’a m’ubetimere tin eni i kabedo mwa man i wang’ ng’om zoo camu sente ma lee dit. Dong’, sente maeno zoo beai kani?

³ Dhanu dupa ma gifoyo tic ma Jumulembe pa Yehova gibetimo pi niponjo dhanu ku Biblia i wang’ ng’om zoo, gimio giramia ku berocwinygi. Ento, ku kwong’a ju ma gibetielo ticne tie Jumulembe gin gigi, jumoko m’i kindgi gibed gioro giramia ma ku berocwiny i biro mi filial mi ng’om ma gitie i ie. Gitie ku pidoic m’urombo ku mi dhanu ma gitimo ni Mungu i rundi ma con ma gibed gimiiri pi nitielo tic mi giero kabedo mi timo thier ni Yehova. (Ai 35:20-29; 1 Kei. 29:9) Jumoko gibed gimio jamcing’gi ma lee ni mutuma ni dilo pa Yehova, re giramiane mange bejokere nya thindho thindho niai i bang’ dhanu ma tung’ tung’, kunoke i cokiri man i twodiri. Ka jucoko dhu giramia maeno zoo, e giwodho sente ma ketho tic mi lembanyong’a cidho i wang’e.

⁴ Jumulembe pa Yehova gineno nia etie rwom ma dit nitio ku sente migi man jamcing’gi pi niketho tic mi lembanyong’a ucidh i wang’e. Yesu karacelo ku julub pare gibino kud usau ma gibed gigwoko i ie sente pi nipong’o yeny migi. (Yoh. 13:29) Biblia unyutho iwa nia jumamon moko gibed gikonyo Yesu karacelo ku julubne. (Mk. 15:40, 41; Lk. 8:3) Jakwenda Paulo ujolo ku mutoro piny ma jubed jumio ire ku berocwiny m’uai i bang’ dhanu m’umaru tic mi lembanyong’a ucidh i wang’e man ma gibemito bende gidikiri i tije. (Flp. 4:14-16; 1 Tes. 2:9) Jumulembe pa Yehova gibemediri nilubo lapor maeno mi dhanu ma con ma gibino weg amora man ma gibed  gimio piny ku berocwiny. Eno uketho dhanu mi kabedo ceke ma gibeyenyo lemandha ku cwinygi zoo gibenwang’u ‘pii mi kwo’ ma nanu.​—Nyu. 22:17.

⁵ Jutio bende ku giramia ma ku berocwiny pi nipong’o yeny mi cokiri. Bolo thier bebedo mbe, jung’olo de ngo wend sente ma ng’atuman ucikere nimio man jujoko ngo sente i bang’ dhanu. Ento sanduku mi giramia bebedo nuti kaka ma jutimo i ie coko kara ng’atuman m’umaru, copo mio “calu ekeco ku i adundene.”​—2 Kor. 9:7.

⁶ Jubed jutio ku sente mi giramia ku kwong’a pi yeny m’ukwayere i Ot Ker man nigwoke ebed ma ber. Guriri mi judong cokiri romo ng’io nia kwayu juor sente moko i biro mi filial mi Jumulembe pa Yehova ma neno wi tic i ng’om ma gitie i ie pi tic mange m’ubetimere i ng’om zoo. Gicungo iwi wend sente moko ma cokiri bibeoro kubang’ dwi, e giketho wend sente ma gicungo i wiene i wang’ cokiri i wang’ niore. I ayi maeno, cokiri ma dupa beoro giramia migi nja pi tic m’ubetimere i ng’om zoo. Kan umego ku nyimego ging’eyo pi yeny ma bewok nja i cokiri, jucopo bemio ngo atwong’a saa ceke iwi lembe m’uneno giramia.

⁷ I ng’ei cokoman, umego ario giwodho sente ceke ma juketho i sanduku mi giramia man gikiewo wende. (2 Ub. 12:9, 10; 2 Kor. 8:20) Guriri mi judong cokiri maku yub m’ukwayere pi nigwoko sentene ma ber nitundo ma  jubiore i biro mi filial kunoke ma jubitio kude pi nipong’o yeny mi cokiri. Umego ma neno lembe pa sente mi cokiri kiewo rapor mi sente kubang’ dwi pi ninyutho ni cokiri man kubang’ dwi adek ke, jatel wi tic mi guriri mi judong cokiri maku yub kara junen ayi ma jutio ko ku sente mi cokiri.

⁸ Sente ma jubed jutio ko pi coko ma dit mi twodiri man pi pong’o yeny mange mi twodiri, beai i bang’ Jumulembe ma gitie i twodirine. Sanduku mi giramia bebedo nuti kaka ma jubetimo i ie coko ma dit kara ju ma gimaru, giketh giramia migi ma ku berocwiny i ie pi nitielo twodiri. M’umedo maeno, pi nipong’o yeny ma bewok man ma kwayu sente i twodiri, cokiri copo oro giramia i saa mange bende.

⁹ Etie ber nia twodiriman upong’ en gire yeny ceke mi sente mi twodiri, man ka donge udong’ ke, jubiore pi nitielo tic mi Ker i ng’om zoo. Tekene sente umbe i kakanpiny mi twodiri pi nipong’o yeny m’ukwayere pi coko ma dit mi twodiri kunoke pi nipong’o yeny pi coko mange m’ubelubo, calu ve sente ma jucopo lar mio pi nipangu kabedo ma jubitimo i ie coko, jaliew mi twodiri bikwayu junyuth ni cokiri nia gitie ku rwom mi mio giramia. Guriri mi judong cokiri ceke biweco iwi lembene man gibineno ka nyo cokiri romo bedo ku copo mi mio sente ma rukani pi twodiri. I ng’eye, gibiketho wend sente ma gicungo i wie i wang’ cokiri i wang’ niore.

¹⁰ Ka yeny moko mi sente uwok m’ubekwayu nia judong cokiri ceke mi twodiri ginen i lembene, gibitimo  coko mi judong cokiri mi twodiri i nindo mi coko ma dit mi twodiri. Yub ceke ma jubemaku pi tio ku sente mi twodiri pi lembe mange m’uweko lembe m’uneno twodiri, jucikiri nilar ketho lembene i wang’ judong cokiri. Jubigoro wend sentene ma tap man saa ceke ma jubemito tio ku sente mi twodiri, jubilar kethe i wang’ judong cokiri.

¹¹ Kwayu i ng’ei nindo moko, jubed jumak yub pi nineno kite ma jutio ko ku sente mi twodiri.

¹² Thelembe acel m’uketho Yesu karacelo ku julub pare gibedo kud usau sente ubino pi nikonyo jucan. (Mk. 14:3-5; Yoh. 13:29) Tic maeno mi Jukristu ubemedere nitundo tin eni, kum Yesu uyero kumae: “Wubedo ku jucan thiri thiri i beng’wu.” (Mk. 14:7) Jumulembe pa Yehova gikonyo jucan nenedi tin eni?

¹³ Saa moko umego kunoke nyimego m’ugwoko bedoleng’ migi i cokiri gicopo bedo ku yeny mi kony ni kum tio, goro kunoke peko moko ma lee m’uwok i wigi. Juruot kunoke wedi migi man jumange m’ung’eyo pi peko migi gicopo nwang’u nia kwayu gikonygi. Lembe maeno urombo ku wec ma jakwenda Yohana uyero: “Ento ng’atu m’ubedo ku piny m’i ng’om, man eneno can piny  unego umin, man ecero ngisi pare ire, mer pa Mungu bedo i ie nenedi? Nyithindho para ma thindho, ku wamar ku lembe, kadok ku dhok; endre ku tic man lemandha.” (1 Yoh. 3:17, 18; 2 Tes. 3:6-12) Thier mandha uketho i ie nigwoko ju ma gibetimo ni Yehova ku bedopwe ma gicopo bedo ku yeny mi kony.​—Yak. 1:27; 2:14-17.

¹⁴ I waraga ma kwong’a ma jakwenda Paulo ugoro ni Timoteo, ekoro ayi ma jucopo mio ko kony ni ju ma giromo ku kony. Icopo somo juk m’emione i 1 Timoteo 5:3-21. Ng’atu ma kwong’a m’utie ku rwom mi gwoko juruot pare, utie Jakristu en gire. Bende, awiya ku nyikwayu kunoke wedi mange ma ceng’ini gicikiri nikonyo wedi migi m’utii kunoke ma goro. Saa moko ka gavmenti kunoke dilo moko ma bemio kony gitie ku yub mi konyo dhanu ma kumeno, wedi migi kunoke dhanu mange copo konyogi wek kara ginwang’ konyne. Re lembe moko copo wok ma kwayu nia cokiri zoo umii kony ni umego kunoke ni nyimego moko ma gitimo ni Yehova ku bedopwe pi oro m’ulwar man ma gitie ku yeny mi kony. Tekene juruot kunoke wedi pare ma copo konye mbe man kony ma copo ai i bang’ gavmenti de mbe, guriri mi judong cokiri copo neno gin m’ukwayu jutim pi nimio kony moko. Jukristu gineno nia etie rwom nimio jamcing’gi pi nikonyo ju ma gitie ku yeny mi kony.

¹⁵ Umego ku nyimego dupa gicopo bedo ku yeny mi kony ni kum ragedo, lwiny, digidi, pii ma pong’o ng’om, kec kunoke peko moko mange ma bewok i nindo maeni ma rac. (Mat. 24:7-9) Cokiri mi kabedone copo bedo mbe ku piny ma gikony ko jumange, pieno Guriri m’utelowic maku yub pi nitelo wi umego mi kabedo ma  tung’ tung’ pi nimio kony m’ukwayere. Lembe maeni urombo ku ma Jukristu mir Asia ma nok gitimo pi nimio cam ni umego mi Yahudi i saa ma kec ugam upodho. (1 Kor. 16:1-4; 2 Kor. 9:1-5) Tekene wabelubo lapor migi, eno nwang’u wabenyutho nia wamaru umego mwa man wabenyutho nia watie julub mandha pa Yesu Kristu.​—Yoh. 13:35.

¹⁶ Biblia man girasoma ma tung’ tung’ m’ukoro ie pigi tek lee pi nimewo lemkwenda mi Ker. Wang’ ma pol guriri mi judong cokiri ketho jakony tic pi nineno wi girasoma. Umego ma juketho gitim tic maeno gimaku lembene ku tuko ngo. Gitimo kero ning’eyo cuu wend girasoma kara cokiri kud ukos girasoma ma gitie ku yenyne.

¹⁷ Calu ma watie Jukristu ma wathiero kwo mwa ni Yehova, wang’eyo nia saa mwa, rieko man copo mwa, bodho man jamcingwa, kadok bende kwo mwa gitie giramia m’uai i bang’ Mungu man ukwayu watii kugi i tic pare. (Lk. 17:10; 1 Kor. 4:7) Ka wabetio ma ber ku piny ceke ma watie ko, eno nyutho nia wamaru Yehova ku cwinywa zoo. Wabemito wayung Yehova ku piny mwa ma pigi tek, pilembe wang’eyo nia anyong’a nege i kum giramia moko ci ma jumio ku cwinyjo ceke. (Rie. 3:9; Mk. 14:3-9; Lk. 21:1-4; Kol. 3:23, 24) Yesu uyero kumae: ‘Wumaku [mananu], dong’ wumi de [mananu].’ (Mat. 10:8) Tekene wamiyara wan giwa man wamio jamcingwa pi tic pa Yehova, wabinwang’u bende mutoro ma lee.​—Tic. 20:35.