Calu m’itie janyodo, ibemito ikony awiya peri mir amara wek kara gimar Yehova man githieriri ire. Icopo timo nenedi pi nikonyogi kara giyikiri pi nilimo batizo? Girang’o ma binyutho nia gitie ayika pi lembe maeni ma pire tek?

Yesu ung’olo ni julub pare kumae: ‘Wuketh [dhanu m’i kind] thek ceke dok julub, wumi igi babutisi.’ (Mat. 28:19) Nimakere ku giragora maeno, gin ma kwong’a m’ukwayere kara ng’atini ulim batizo utie nibedo jalub, niwacu etie ngo kende kende nibedo ng’atu m’unyang’ i ponji mi Jukristu man m’uyio ponjine, ento bende ng’atu m’ubekwo nimakere ku ponjine. Kadok nyathin ma fodi tie m’uromo de copo timo lembe maeni.

Bed lapor ma ber ni awiya peri man ponjgi ku cik pa Yehova. (Poi. 6:6-9) Kwayu bende itii ku lembe ma nwang’ere i buku Icopo kwo kud anyong’a rondo ku rondo! pi niponjogi ku lemandha mir ukungu mi Biblia man nikonyogi kara ging’ei nitio ku cik mir ukungu mi Biblia man nikwo nimakere ku cikne. Kony awiya peri ging’ei ayi ma giromo tio ko ku wec migi gigi pi nikoro pi yioyic migi. (1 Pet. 3:15) Ng’eyong’ec man tielocwiny ma gibenwang’u i beng’i, i ponji migi ma segi, i thier mi juruot, i coko man i bang’ jurimo ma beco bikonyogi kara gimediri nitundo i batizo  man yor i ng’eye bende. Mediri nikonyo awiya peri gibed ku lembakeca mi tipo.

Lembrieko 20:11 uyero kumae: “Cil nyathin ketho jung’eye ni tic pare, tek tic pare leng’, man tek en e atira.” Pieno, lembe ma kani ma romo nyutho nia nyathin ma nico kunoke ma nyaku udoko jalub pa Yesu Kristu man etie ayika pi nilimo batizo?

Nyathin m’ubetimo mediri pi nilimo batizo ucikere niworo junyodo pare. (Tic. 5:29; Kol. 3:20) Kinde ma Yesu ubino ku oro 12, Biblia uyero kumae: ‘Eworo [junyodo pare].’ (Lk. 2:51) I andha, kwayu ngo ikekur nia nyathin peri udok ng’atu ma pwe. Ento nyathin m’umito limo batizo bitimo tego pi nilubo lapor pa Yesu man ecikere nibedo wor ni junyodo pare.

Kwayu unen bende kamaleng’ nia emaru niponjo lemandha mi Biblia. (Lk. 2:46) Nyo nyathin peri bemaru nicidho i coko man nidikere i ie? (Zab. 122:1) Nyo ebed emaru nisomo Biblia kubang’ ceng’ man nitimo ponji pare ma segi?​—Mat. 4:4.

Nyathin m’ubemedere pi nilimo batizo timo tego niketho lembe mi Ker i kabedo ma kwong’a. (Mat. 6:33) Eng’eyo cuu nia etie ku tic mi koro pi yioyic pare ni jumange. Edikere i ayi ma tung’ tung’ mi rweyo lembanyong’a man lewic nege ngo ninyutho ni juponji pare man ni awiya wagi mi somo nia etie Jamulembe pa Yehova. Emaku ku tuko ngo thengponji ma jumio ire i coko mi Kwo man tic.

Ecikere bende nitimo kero nibedo leng’ i kurajo man nikoc i kum jurimo ma reco. (Rie. 13:20; 1 Kor. 15:33)  Lembe maeno binyuthere kamaleng’ nikadhu kud i gin m’emaru, calu ve mizik, filme, program mi televizio, tuko mi video man ayi mi tio kud Internet.

Awiya ma dupa gituc nijolo lemandha ni kum kero ma junyodo migi utimo pi nikonyogi, uketho gilimo batizo ma nwang’u fodi githindho. Dong’ Yehova umii mugisa iwi kero m’ibetimo pi nikonyo awiya peri gitund i kum lembe maeno ma pire tek akeca i winjiri migi ku Yehova.

Etie rwom ma dit nitimo karacelo ku cokiri calu jarwei ma fodi ulimo ngo batizo. Iromo ku foyofoc pi mediri m’itimo i thenge mi tipo. Lembe pa Mungu m’iponjo utuc nikonyi kara ing’ei Yehova man ibed ku yioyic i lembang’ola pare.​—Yoh. 17:3; Ebr. 11:6.

I wang’ nicaku ponjo Biblia ku Jumulembe pa Yehova, copere ibed idikiri i ayi moko i dini ma tung’ tung’ kunoke ibino mbe i dini moko ci. Saa moko nyo ibed itimo lembe m’urombo ngo ku cik mi Biblia. Kawoni dong’ idaru nyutho yioyic ni kum iyewo dubo peri, niwacu ibedo ku can i adundeni pi lembe ma rac m’itimo con; bende ilokiri, thelembene iweko timo moko ci ma rac man ikeco nitimo lembe m’atira i wang’ Mungu.​—Tic. 3:19.

Tung’ ku maeno, saa moko nyo ‘ugambre ma fodi i mukere ing’eyo Lembagora ma leng’.’ Eno utuc nigwoki kara kud imond i timo m’uromo ngo ku Jukristu man kud ipodh i dubo ma pek. (2 Tim. 3:15) Iponjo kite mi ceriri i kum lembe ma reco m’awiya wedu gibecweli i ie man i kum gin ma romo cweli nitimo lembe ma tie rac i wang’ Yehova. Idaru nyutho yioyic pilembe imoko i kum thier mandha man ikoro pi yioyic peri ni jumange. Bende ing’iyo ma ber i tic mi lembanyong’a. Kawoni dong’ ing’io in giri nitimo ni Yehova calu jarwei ma fodi ulimo ngo batizo.

 Pieno, kadok nwang’u ing’eyo Yehova niai m’itie nyathin kunoke ma nwang’u dong’ iteng’ini, kawoni icopo maru itim lembe mange ario pi mediri peri i thenge mi tipo, niwacu nithiero kwo peri ni Yehova man nilimo batizo. Nithieriri ni Yehova, thelembene tie ninyutho ire nikadhu kud irwo peri in giri nia idaru ng’io nimiiri kud adundeni zoo ni Mungu pi nja ku nja. (Mat. 16:24) Batizo m’ibilimo i pii re ma binyutho kamaleng’ nia idaru thiero kwo peri ni Yehova. (Mat. 28:19, 20) Thieriri peri man batizo re ma binyutho nia idoko jatic m’anzilo pa Yehova Mungu. Eno tie rwom ma ber mire ma!

Ento calu m’iponjo i Biblia, icopo nweng’iri ku peko ma tung’ tung’. Poi nia nyanok i ng’ei batizo pa Yesu, ‘tipo lund utelo wie malu i yamba kara Wonabali mul ie.’ (Mat. 4:1) Pieno, ng’ei nia icopo nweng’iri kud amulaic ma tung’ tung’ kinde m’ibilimo batizo pi nidoko jalub pa Kristu. (Yoh. 15:20) Amulaicne biwok i kwonde ma tung’ tung’; moko copo ai i bang’ juruot peri. (Mat. 10:36) Saa moko awiya wedu mi somo, jutic wedu man jurimbi ma con bende gicopo nyweri. Saa ceke bed ipoi i kum wec ma Yesu uyero ma nwang’ere i buku pa Marko 10:29, 30: “Andha awacu iri, ng’atu moko mbe m’uweko ot, kadi umego, kadi nyimego, kadi mego, kadi wego, kadi nyithindho, kadi pothi, pira, ku pi lembanyong’a ma juboth ko de, ma k’ebinwang’u acel bang’ dak ungo kawono i nindo maeni, udi, kud umego, ku nyimego, ku mego, ku nyithindho, ku pothi, karacelo ku ragedo; man i ng’om ma bibino kwo ma rondo ku rondo.” Dong’ mediri nitimo ma tek kara ibed ceng’ini ku Yehova man nikwo nimakere ku cik pare ma pwe.

 Tekene ibemito limo batizo, nyuth lembene ni jatel wi tic mi guriri mi judong cokiri. Penji ma tung’ tung’ m’ubelubo waraga maeni, tie ukungu mi gin ma wubiweco iwie ku judong cokiri pi ning’eyo ka nyo andha iromo nilimo batizo. Icopo caku ng’io i penjinegi con con in giri i saa mi program ma nja mi ponji peri ma segi.

Kara iyikiri ma ber pi wecne, nwang’ saa mi somo man mi nyamu i giragora ma junyutho. Kan imaru icopo kiewo lembe moko piri giri i buku maeni kunoke kaka mange. Icopo tio ku lembe m’ikiewone man icopo weko buku peri ubed ayaba kinde ma wubeweco ku judong cokiri. Tekene ibenwang’u nia nyang’ i penjine moko tie tek, lworo kud unegi nikwayu kony i bang’ ng’atu m’ubeponjo kudi Biblia kunoke i bang’ judong cokiri.

Kinde ma wubeweco ku judong cokiri, kud ipar nia kwayu imii dwokowang’ penji ma bor kunoke ma wang’u ijo. Dwokowang’ penji ma cek man ma terere bibedo ber magwei. Pi penji ma pol, etie bende ber nia ibed iwec iwi giragora moko acel kunoke ario m’ubenyutho nia dwokowang’ penji peri ujengere iwi Biblia.

Tekene fodi inwang’u ngo ng’eyong’ec m’uromo iwi ponji mir ukungu mi Biblia, judong cokiri gibimaku yub kara jukonyi ibed ku copo mi tio ku wec peri giri pi nikoro cuu kite m’inyang’ ko i Lembagora man kara i ng’ei nindo moko, icopo romo nilimo batizo.

[Telowic ni judong cokiri: Telowic ma jutio ko pi niweco ku ju m’ubemito limo batizo nwang’ere i mbaya mi 208-212.]