KUBANG’ oro, dhanu elufu ma lee bemondo i ot pa Yehova pi nitimo ire thier ma leng’, man eno ubepong’o lembila mi Biblia. (Mik. 4:1, 2) Watie kud anyong’a ma yawe mbe nijologi i “cokiri pa Mungu”! (Tic. 20:28, NWT) Gitie ku mutoro nitimo ni Yehova karacelo kudwa man gitie kud anyong’a nikwo kaka ma cilo mbe i ie, man m’akwiyacwiny ni ie i paradiso mwa mi tipo. Tipo maleng’ pa Mungu man juk mi rieko ma nwang’ere i Lembe pare konyowa nibedo ku kwiocwiny man nigwoko cokiri ubed ma leng’.​—Zab. 119:105; Zek. 4:6.

² Nitio ku cik mir ukungu mi Biblia konyowa nironyo “ng’atu ma nyen.” (Kol. 3:10) Eno ketho wakwanu ngo ku nyithi teliri ma tijgi mbe kadi ng’ico mi jumange. Calu ma watie ku nen ma rom ku pa Yehova iwi lembe ceke, waweko ngo lembe ma tung’ tung’ ma bepoko kind dhanu i ng’om maeni upok kindwa. I ng’om zoo watie umego ku nyimego man wabetimo i acel.​—Tic. 10:34, 35.

³ Kadok kumeno de, saa moko teliri bewok man ecopo nyotho kwiocwiny man bedo i acel mi cokiri. Re girang’o ma kelo telirine? Wang’ ma pol teliri bewok nwang’u jubetio cuu ngo ku juk mi Biblia. Bende wabenyego anyega ku kosobedoleng’. Wan ceke watimo dubo. (1 Yoh. 1:10) Pieno, ng’atu moko copo mondo i timo ma rac ma romo royo timo m’ucido i cokiri kunoke copo nyotho  leng’o mi cokiri. Waromo kiero ng’atu moko ku wec kunoke timo mwa ma cuu ngo kunoke waromo kier ni kum lembe moko ma ng’atini timo kunoke uyero. (Rum. 3:23) Ka lembe ma kumeno uwok, wacopo timo ang’o pi niyiko lembene?

⁴ Ku mer, Yehova umaku yub pi niyiko lembe maeno ceke. Lembe pare Biblia utie ku juk ma romo konyowa niyiko kindwa ka teliri uwok. Jukwac ma gitie ku mer, niwacu judong cokiri, gicopo mio kony ni ng’atu acel acel m’i kindwa. Tekene wabetio ku juk m’ucungo iwi Lembagora ma gibemio iwa, wacopo yiko lembe m’unyothere i kindwa man wacopo medara nibedo ku winjiri ma cuu ku Yehova. Ka wanwang’u twiny kunoke juk pi lembe moko ma rac ma watimo, kwayu wang’ei nia twiny maeno tie ayi ma Wegwa mi polo nyutho ko iwa mer pare.​—Rie. 3:11, 12; Ebr. 12:6.

⁵ Saa moko thubiri kunoke teliri moko iwi lembe ma thindho thindho romo wok i kind dhanu mi cokiri. Jucikiri niyiko lembene pio pio i mer mir umego. (Ef. 4:26; Flp. 2:2-4; Kol. 3:12-14) Ma jiji mbe, icopo daru nyithi teliri ma bewok i kindwu kud umego ku nyimego i cokiri kan ibetio ku juk ma jakwenda Petro umio, m’uyero kumae: “Ma sagu gin ceke wumeru i kindwu kud amora; kum mer umo udul dubo.” (1 Pet. 4:8) Biblia uyero kumae: “I gin dupa wan ceke wakier.” (Yak. 3:2) Etie ber nia watim ni jumange gin ceke ma wayenyo jutim iwa, eno biketho wabitimo kisa man wabikadhu kud iwi nyithi kosa mi jumange.​—Mat. 6:14, 15; 7:12.

 ⁶ Kan inyang’ nia wec kunoke timo peri ukiero ng’atu moko, icikiri nimaku yub m’umbe galu kara wudwok kwiocwiny i kindwu. Poi nia lembuno copo nyotho winjiri peri ku Yehova bende. Yesu ukonyo julub pare ku juk ma e: “Ka kumeno tek ibethiero giramia peri dhu pemblam, ipoi kakeca nia lembe moko ni i umeru i kumi, wek giramia peri keca wang’ pemblam, icidhi, wular wupot kindwu wukud umeru, e kan ilund ibin ithier giramia peri.” (Mat. 5:23, 24) Saa moko teliri copo wok i kindjo. Ka teliri wok, yab yo ubed thwolo pi wec. Tekene umego ku nyimego ceke mi cokiri giweco ma ber i kindgi, eno copo konyo pi nicero kosowinjiri man niyiko lembe ma bewok ni kum kosobedoleng’ mwa wa dhanu.

⁷ Saa moko, juliew gicopo nwang’u nia ukwayu gimii juk ni umego kunoke ni nyamego moko pi nitiro paru pare iwi lembe moko. Wang’ ma pol etie lembe ma yot ungo. Jakwenda Paulo ukiewo ni Jukristu mi Galatia kumae: “Umego, tek junwang’u ng’atu moko i kier moko, [wu ju ma tipo pa Mungu ubetelo wiwu], wulok ng’atu ma kumeni ku cwiny mi bedoyo.”​—Gal. 6:1.

⁸ Tekene jukwac gibekwayu rombe ma ber, gicopo gwoko cokiri i kum ariti dupa i thenge mi tipo man gicopo cero dubo ma pek kud uwok i cokiri. Judong cokiri gitimo kero niketho tic migi i cokiri uromb ku lembe ma Yehova ung’olo nikadhu kud i bang’ jabila Isaya: ‘[Ng’atuman] bibedo ni kapondo ni yamu, kapondo de ni avuvu, calu kulo mi pii i ka m’uthwo, calu tipo mi cana ma dit i ng’om mi olo.’​—Isa. 32:2.

⁹ Jakwenda Paulo upoyo cokiri pi jumoko ma giromo royo timo ma reco i cokirine. Eyero kumae: ‘Wang’olo iwu, umego . . . ya wukoyuru giwu ni umego kubang’gi nzu ma giwotho ariri swa, man gilubo ponji ma gijolo i bang’wa ngo.’ Edok ekoro i lembe m’eyerone kumae: “Tek ng’atu moko woro lembe mwa ma i waraga nini ngo, wunen (wukog wi) ng’atuca, kara kud wuribru wukugi, kara lewic unege. Ento kud wukwane calu jadegi, endre wujuke calu en e umego.”​—2 Tes. 3:6, 14, 15.

¹⁰ Saa moko ng’atini romo timo ngo dubo ma pek ma romo kwayu nia jukoye kud i cokiri, re lembe m’ebetimo ubenyutho cac ma ngbeng’ i kum cik mir ukungu m’ubetelo wi Jukristu. Timone copo ketho i ie nibedo ng’atu ma janyap akeca, jacac ma lee, ng’atu ma dieng’ ungo pi leng’o mi kum kunoke jasasa. Ecopo bedo ng’atu ma “jathubganda,” niwacu eroyo dhoge i lembe m’uneno en ungo. (2 Tes. 3:11) Kunoke etie ng’atu ma betio ku rieko ma rac pi nicamu i kum juwagi kadi eroyere i galuwang’ moko m’ubenen kamaleng’ nia umaku piny ungo. Kit timo ma kumeno tie rac dit, giromo cido nying’ cokiri man giromo mew i kind umego ku nyimego mange.

¹¹ Mi kwong’o judong cokiri gibitimo kero nitio ku juk m’ujengere iwi Biblia pi nikonyo ng’atu m’ubetimere swa. Ento tek ebemedere asu ku timo parene i ng’ei ma jumio ire juk wang’ dupa, judong cokiri gicopo ng’io nia kwayu jumii ponji mi kogo wi timone i cokiri. Gibiluro i lembene cuu pi ning’io ka nyo lembene tie rac akeca man ebebadhu cwiny jumange, m’eromo kwayu andha nia jumii korolembe mi kogowic. Jakorlembe bimio juk m’ukwayere  iwi timo ma rac maeno, ento ebilwong’o ngo nying’ ng’atu m’ubetimere swane. Eno biketho dhanu m’ung’eyo lembe ma korolembene uweco i wie gibigwokiri kara kud ginyebiri ku ng’atune, ento gibimediri nidikiri kude i lembe mi tipo man ‘nijuke calu en umego.’

¹² Tekene andha umego ku nyimego gibenyebiri ngo i kum ng’atu m’ubetimere swa, genogen utie nia lembuno biketho lewic umake i kum timo pare man bicwale kara elokere kud i timone. Kan ubenen kamaleng’ nia ng’atu m’ubino timere swa udaru weko timo pare, pire tie tek ungo ninene asu calu ng’atu ma jukogo wie.

¹³ Nikadhu kud iwi kosa ma jutimo iwa kunoke niweko lembe, nyutho ngo nia wakwanu ngo ku kosa kunoke wacwake. Jucopo loko ngo kosa ceke iwi dubalaga man etie bende lembe ma cuu ngo niumo wi kosa ma dongo. (Law. 19:17; Zab. 141:5) Lembariba mi Cik unyutho nia dubo moko tie pek lee nisagu mange; etie bende kumeno i cokiri mi Jukristu.​—1 Yoh. 5:16, 17.

¹⁴ Yesu umio telowic m’atira ma jucikiri nilubo pi niyiko lembe ma pek ma copo wok i kind Jukristu. Lembe ma jucikiri nilubone gini e: “Tek umeru dubo iri, [1] cidh, inyuth ire dubo pare i kindwu wukude kendwu: tek ewinjoi, nwang’u wuripo kindwu wukud umeru. Ento tek  ewinjoi ngo, [2] gam ng’atu acel kadi ario mange wuci kugi, kara lembe ceke cung i jumulembe ario kadi adek. Man tek ekwero winjogi, [3] yere ni [cokiri]: tek ekwero winjo [cokiri] bende, wek ebed iri calu thekdhanumange ku won ajok bende.”​—Mat. 18:15-17.

¹⁵ Nimakere ku lapor ma Yesu udok umio, ma nwang’ere i Matayo 18:23-35, ubenen nia dubo ma juweco pire i Matayo 18:15-17, uneno lembe pa sente kunoke ng’om man jamcing’. Ecopo bedo nikwero culo banja kunoke nitio kud awondi pi nigamu piny moko kud i the cing’ ng’atini; ecopo bedo bende yeronying’ ma jucido ko nying’ ng’atini ku rac.

¹⁶ Kan andha ng’atu moko mi cokiri utimo iri dubo ma kumeno, kud iring pio pio i bang’ judong cokiri pi nikwayugi ya gikonyi. Calu ma Yesu uyero, lembe mi kwong’o m’ukwayu itim, utie niweco ku ng’atu m’utimo iri lembe ma rac. Ketim kero niyiko lembene wun ario wukude m’umbe niroyo ng’atu mange i ie. Poi nia Yesu uyero ngo nia ‘cidh wang’ acel kende, inyuth dubo pare.’ Pieno, ka ng’atune uyio ngo kosa pare man ekwayu ngo kisa, ecopo bedo ber nidok kendo ma cen i bang’e pi niweco kude. Ka lembene copo yikere ku yore maeni, ku lemandha ng’atu m’udubo iri bifoyo dit pilembe inyutho ngo pi dubo pare ni jumange man inyotho ngo nyinge i cokiri. Eno nwang’u “wuripo kindwu wukud umeru.”

¹⁷ Tekene ng’atu m’utimo iri dubo uyio kosa pare, ekwayu ya iwek ire, man emaku yub mi yiko lembe ma rac m’etimo, pire tie tek ungo nia idheth ku lembene. Kadok nwang’u dubone ubino pek de, kit kosa ma  kumeno romo thum i kind ju ma lembene umulo kumgi.

¹⁸ Tekene ecopere ngo iri niripo kindwu wukud umeru kinde m’icidh inyutho dubo pare “i kindwu wukude kendwu,” icopo timo calu ma Yesu uyero: “Gam ng’atu acel kadi ario mange wuci kugi,” man wec kendo kud umeru. Ju m’iting’o kara wucidh kugi, gicikiri bende nibedo ku lembakeca mi ripo kindwu wukud umeru. Ecibedo ber nia ju m’iting’one gibed dhanu ma gigam gineno lembe ma rac m’utimerene, ento tek ju ma gigam gineno lembene ku wang’gi gimbe, iromo ng’io ng’atu acel kunoke dhanu ario kara gicidh giwinjwu. Kwayu gibed ju ma gitie ku ng’eyong’ec mi lembe ma kumeca kunoke ma giromo bedo ku copo mi ng’io ka nyo lembe m’utimerene tie kosa andha. Kan iting’o judong cokiri kara gicidh giwinjwu, gibicidho ngo ku nying’ cokiri, pilembe tie ngo guriri mi judong cokiri re m’uorogi athothi nia gitim kumeno.

¹⁹ Tekene wutundo ngo niripo kindwu i ng’ei m’itimo kero wang’ dupa, niwacu, wuweco wukude wun ario kendwu man idok i bang’e ku ng’atu acel kunoke dhanu ario mange, ento ibenwang’u nia iromo ling’ ungo iwi lembene, dong’ kwayu inyuth ni juliew mi cokiri. Poi nia lembakeca migi utie nigwoko kwiocwiny man leng’o mi cokiri. Kan idaru nyutho ni judong cokiri, bikwayu iwek lembene i cing’gi man iketh genogen peri iwi Yehova. Pieno, kud iwek nyanok de timo pa ng’atu moko uketh ikier kunoke udar mutoro peri i tic pa Yehova.​—Zab. 119:165.

 ²⁰ Jukwai rombe gibiyaru i lembe maeno cuu. Kan unwang’ere nia andha ng’atune utimo iri dubo ma pek man ebeyewo ngo dubo pare, bende ebemito ngo eyik lembe m’unyotherene i mukero m’ukwayere, pire copo bedo tek nia komite mi juliew ukoye cen kud i cokiri. I ayi maeno re ma gigwoko rombe man leng’o mi cokiri.​—Mat. 18:17.

²¹ Ka ng’atu moko timo dubo ma pek, calu ve lembsasa mi tarwang’, timo gier, ribiri i kind co ku co man mon ku mon, jai i kum yioyic, rwo ni ayi gin m’acwia man dubo mange ma pek, lembene jik ungo kende kende ku kisa ma ng’atu ma judubo ire romo timo. (1 Kor. 6:9, 10; Gal. 5:19-21) Kit dubo maeno jucikiri nidwoko pigi ni judong cokiri kara giyar ie gin, pilembe dubo ma kumeno ginyotho leng’o mi tipo man mi kurajo i cokiri. (1 Kor. 5:6; Yak. 5:14, 15) Jumoko romo cidho i bang’ judong cokiri pi nituco dubo migi gigi kunoke pi ninyutho lembe ma ging’eyo pi dubo mi jumange. (Law. 5:1; Yak. 5:16) Kinde ma judong cokiri giwinjo, kadok i yo ma kani, nia Jamulembe moko m’ulimo batizo utimo dubo ma pek, gibilar oro judong cokiri ario ucidh ulur i lembene cuu. Kan unwang’ere nia lembe ma judwoko igi utie andha kumeca man gin moko nuti m’unyutho thwolo thwolo nia andha dubo ma pek utimere, guriri mi judong cokiri biketho komite mi pokolembe pi niyiko lembene. Komitene bibedo ku judong cokiri adek kunoke nikadhu.

²² Judong cokiri gineno wi udul rombe cuu mandha pi nigwokogi i kum lembe moko ci ma romo nyotho mer  migi ku Yehova. Bende, gitimo kero nitio ma ber mandha ku Lembe pa Mungu pi nitwinyo ju ceke m’ukier man nikeyo kumgi i thenge mi tipo. (Yud. 21-23) Lembuno urombo ku telowic ma jakwenda Paulo umio ni Timoteo. Egoro ire kumae: “Ang’olo iri i wang’ Mungu, giku Kristu Yesu, m’ebipoko lembe mi ju ma kwo ku mi ju m’utho, . . . Twiny twiny, juk juk, thok thok de, ku mwonyo lembe ceke ma jumwonyo hai man ku ponji de.” (2 Tim. 4:1, 2) Nitimo lembe maeno romo camu saa lee, ento etie thenge acel mi tic ma tek mi judong cokiri. Cokiri nyutho foyofoc pi tic migi ma tek man gineno nia “giromo ku yung ma juyungo kojo wang’ ario.”​—1 Tim. 5:17.

²³ Saa ceke ma junwang’u nia andha dubo moko ma pek utimere, lembe mi kwong’o ma juliew gicikiri nitimo utie niyiko winjiri pa jadubone ku Yehova. Tekene eyewo dubo pare ku cwinye ceke man eromo jolo kony, juliew gibimio ire juk i amung’ kunoke i wang’ jumulembe ma gituco lembe i saa mi pokolembe pare, kara utwinye man lworo mak ju m’ung’eyo lembene. (2 Sam. 12:13; 1 Tim. 5:20) I ng’ei ma komite mi pokolembe umio juk ni ng’atini ci, jucikiri niketho macero moko ni ng’atune. Eno copo konyo jadubo kara edwok yo pare udok “atira.” (Ebr. 12:13) I ng’ei nindo m’ukwayere, jubikabu macero ma juketho ni ng’atune nok nok kan ebetimo lembe m’unyutho nia thenge pare mi tipo ubedok kakare.

²⁴ Ka komite mi pokolembe uneno nia ng’atu m’udubo uyewo dubo pare, re ginwang’u nia lembe m’egam etimone romo dok ng’eyere i cokiri man i kind pacu,  kunoke ka gineno nia kwayu umego ku nyimego mi cokiri gibed ku wang’gi i kum ng’atune, jubimio i adundo atwong’a moko i saa mi Coko mi kwo man tic. Jucikiri nisome kumae: “[Nying’ ng’atune] unwang’u juk.”

²⁵ Saa moko copere nia jadubo udaru mondo lee i timo pare mi dubo man ecopo tuc ungo nijolo kony ma jubeii nimio ire. Copore nia i saa ma komite mi pokolembe ubeneno i lembe pa ng’atune, egam enyutho ngo ‘tic m’uromo ku lokocwiny.’ (Tic. 26:20) Dong’ juromo timo ang’o? I saa maeno, kwayu jukoi jadubone cen kud i cokiri pi nicere kud emedere nidikere ku dhanu ma leng’ pa Yehova. Eno konyo pi nikabu timo ma rac pa jadubo kara kud umew i cokiri, man ketho jugwoko cokiri ubed leng’ i thenge mi tipo ku mi kurajo kara nyinge kud ucidere. (Poi. 21:20, 21; 22:23, 24) Kinde ma jakwenda Paulo uwinjo pi timo mi lewic pa ng’atu moko mi cokiri mi Korinto, ekwayu judong cokiri nia ‘gimii ng’atune ni [Sitani] . . . , kara tipo [mi cokiri] ubothi.’ (1 Kor. 5:5, 11-13) Paulo ukoro bende pi jumange ma jukoyo kud i cokiri i rundi ma kwong’a pilembe gijai i kum lemandha.​—1 Tim. 1:20.

²⁶ Ka komite mi pokolembe umaku yub mi koyo jadubo m’ukwero niyewo dubo pare kud i cokiri, komitene ucikere ninyutho ire yub ma gimaku, man nikoro ire thwolo thwolo thelembe m’ucungo iwi Lembagora m’uketho jubekoye. Kinde ma gibenyutho ire pi yubne, komite mi pokolembe ucikere niyero ire nia kan ebenwang’u nia pokolembe pare uwotho atira ngo man ebemito nia komite  mange unen i lembe pare kendo, ecikere nikiewo lembene akiewa i barua. I baruane ecikere nikoro terere thelembe m’ubecwale nikwayu ya judok junen i lembe pare kendo. Niai saa ma komite unyutho ire nia jubekoye kud i cokiri, jubimio ire nindo abiro pi lembuno. Ka judong cokiri ginwang’u barua pare, gibinyutho ni jaliew mi twodiri man jaliew bilund ng’io judong cokiri ma giromo, pi nibedo i Komite mir ario mi pokolembe. Umego ma gini komite mir arionde gibitimo kero migi ceke niweco ku jadubone i kind yenga acel m’ulubo nindo ma barua pare utundo i ie. Ka ng’atini ukwayu nia komite mir ario mi pokolembe udok ung’ii i lembe pare kendo, jubikemio ngo atwong’a mi koye kud i cokiri. I kind nindo maeno, jubicero ng’atune ku dwoko wang’ penji man ku rwo i coko; jubicere bende ku rwom mange ma segi.

²⁷ Yub ma jumaku pi komite mir ario mi pokolembe utie pi ninyutho bero ni ng’atu m’utimo dubo man ekonyo kara judok juwinj kendo adieng’acwiny pa ng’atune. Pieno, ka jadubone ubino ngo akakaka i nindo ma komite mir arionde umaku pi nineno i lembe pare, jubimio atwong’a mi koye kud i cokiri i ng’ei ma jutimo kero i kadhiri m’ukwayere pi nirombo kude.

²⁸ Tekene jadubone ubemito ngo nikwayu nia komite mir arionde udok ung’ii i lembe pare, komite mi pokolembe bikoro ire gin m’ukwayu edok etim pi ninyutho nia edaru yewo dubo pare man lembe mange m’eromo timo pi nidwogo i cokiri i ng’ei nindo moko. Ukwayu giwec kude i ayi ma ber kara umii ire kony, man gicikiri niweco kude ku genogen ma nia ebilokere kud i yo pare man  ebipong’o lembe m’ukwayere pi nidwogo i dilo pa Yehova.​—2 Kor. 2:6, 7.

²⁹ Kan ubekwayere nia jukoi jadubo m’ukwero niyewo dubo pare kud i cokiri, jubikiewo atwong’a moko m’adundo man jubisome kumae: “[Nying’ ng’atune] utie ngo dong’ Jamulembe pa Yehova.” Eno bipoyo jumange mi cokiri m’ugwoko bedoleng’ migi kara giwek nidikiri ku ng’atu maeno.​—1 Kor. 5:11.

³⁰ Wec ma nia “nikoyiri gijo kud i cokiri,” jutio ko pi niweco pi Jamulembe m’udaru limo batizo ento ekwero en gire mi tek nia dong’ etie ngo Jakristu man eyero nia ebemito ngo emedere nibedo Jamulembe pa Yehova. Kunoke ng’atini copo nyutho nikadhu i timo pare nia ewok kud i cokiri mi Jukristu; timone moko copo bedo nimondo i dilo moko m’ubelubo lembe m’ukoc ku ma Biblia ubeponjo man m’utie dong’ i the pokolembe pa Yehova Mungu.​—Isa. 2:4; Nyu. 19:17-21.

³¹ Jakwenda Yohana uweco pi jumoko mi rundi pare ma gigam gikwero yioyic migi mi Jukristu. Ekiewo pigi kumae: “Giai i kindwa, ento gi mwa ngo; kum tek gi mwa, kuno di gidong’ i bang’wa.”​—1 Yoh. 2:19.

³² Ka ng’atu moko ukoyere gire kud i cokiri, lembe pare i wang’ Yehova ukoc bor ku pa Jakristu m’ukwio akwia i thenge mi tipo, niwacu m’uweko nidikere i tic mi lembanyong’a. Ng’atini romo kwio i thenge mi tipo pilembe dong’ ebeponjo ngo Lembe pa Mungu kubang’  ceng’. Copo bedo bende nyo peko kadi ragedo m’ebekadhu kud i ie re m’uketho amora pare uthum i tic pa Yehova. Judong cokiri man bende umego ku nyimego mange i cokiri gibimediri nimio kony m’ukwayere i thenge mi tipo ni Jakristu m’ukwio.​—Rum. 15:1; 1 Tes. 5:14; Ebr. 12:12.

³³ Ento ka Jakristu moko ung’io nikoyere gire kud i cokiri, jubikiewo atwong’a moko m’adundo pi ninyutho ni cokiri. Jubisome kumae: “[Nying’ ng’atune] utie ngo dong’ Jamulembe pa Yehova.” Jubikwo ku ng’atune i ayi ma rom ku ng’atu ma jukoyo kud i cokiri.

³⁴ Juromo dwogo ng’atu ma jukoyo kud i cokiri kunoke m’ukoyere gire tekene enyutho kamaleng’ nia edaru yewo dubo pare man pi nindo moko m’uromo, etuc ninyutho ngbeng’ nia eweko timo pare mi dubo. Bende, ebenyutho nia ebemito edwok kendo winjiri pare ceng’ini ku Yehova. Judong cokiri gibibedo ku wang’gi pi niweko nindo m’ulwar ukeukadhi, ecopo bedo dwi dupa, oro acel kunoke nikadhu, nimakere ku lembe pa ng’atune, kara etuc ninyutho nia andha eyewo dubo pare. Kinde ma guriri mi judong cokiri unwang’u barua ma ng’atini ukiewo pi nikwayu judwoge i cokiri, komite mi dwogo ng’atini biweco ku ng’atune. Komite maeno biluro i lembe cuu pi nineno ka nyo ng’atune unyutho ‘tic m’uromo ku lokocwiny’ man ning’io ka nyo juromo dwoge i cokiri saa maeno kunoke ngo.​—Tic. 26:20.

³⁵ Ka jugam jukoyo ng’atu moko kud i cokiri mange man ebekwayu nia judwoge i cokiri, jubiketho komite mi  dwogo ng’atini, i cokiri m’ebenwang’ere i ie saa nica pi nirombo kude man ning’io i kwac pare. Ka komite ma jukethone ubeparu nia jucikiri nidwoge i cokiri, gibioro paru migine ni guriri mi judong cokiri m’ugam utito lembe pa ng’atune. Komite ario eno zoo gibiweco i kindgi pi nineno nia gicoko dhu lembe ceke m’ukwayere kara jutund nimaku yub m’atira. Ento komite mi dwogo ng’atini ma juketho i cokiri m’ugam utito lembe pa ng’atune re ma bimaku yub mi dwoge i cokiri.

³⁶ Tekene komite mi dwogo ng’atini unwang’u nia andha ng’atu ma jukoyo kud i cokiri kunoke m’ukoyere gire udaru yewo dubo pare ku cwinye ceke, man nia kwayu judwoge i cokiri, jubimio atwong’a i cokiri m’ugam utito lembe pare. Ka ng’atune nwang’ere saa nica i cokiri mange, jubimio atwong’ane i cokiri maeca bende. Jubisomo atwong’ane i adundo kumae: “[Nying’ ng’atune] udoko kendo Jamulembe pa Yehova.”

³⁷ Tekene nyathin m’ulimo batizo utimo dubo ma pek, jucikiri ninyutho lembene ni judong cokiri. Kinde ma judong cokiri gibeng’io i lembe mi dubo ma pek ma nyathin re m’utimo, etie ber nia lembene ukadh i vut junyodo pare m’ulimo batizo. Bikwayere nia gidik cing’gi ku komite mi pokolembe, kakare nigoyo gang’ i kum nyathin migi kara kud unwang’ twiny m’ukwayere pi gin m’etimo. Tap calu ma jubed jutimo ka ng’atu ma wang’e teng’ini utimo dubo, komite mi pokolembe timo kero nimio  juk ni jadubone man niyiko winjiri pare ku Yehova. Re, ka nyathin ne ukwero niyewo dubo pare, jubimaku yub mi koye kud i cokiri.

³⁸ Jucikiri nitimo ang’o tekene jarwei ma fodi ulimo ngo batizo utimo dubo ma pek? Calu ma fodi etie ngo Jamulembe m’ulimo batizo, jucopo yero ngo nia jubekoye kud i cokiri. Saa moko, copere nia enyang’ cuu ngo i cik mir ukungu mi Biblia, pieno jucopo mio ire juk moko ma ber pi nikonye kara etim “yo ma atira” ni tiende.​—Ebr. 12:13.

³⁹ Tekene jarwei ma fodi ulimo ngo batizo utimo dubo, ento ekwero niyewo dubo pare i ng’ei ma judong cokiri ario urombo kude man gitimo kero pi nikonye, etie ber nia kwayu junyuth ni cokiri. Jubikiewo atwong’a m’adundo man jubisome kumae: “[Nying’ ng’atune] utie ngo dong’ jarwei ma fodi ulimo ngo batizo.” Umego ku nyimego mi cokiri gibineno jadubone calu dhanu mi ng’om. Kadok nwang’u jukoye ngo kud i cokiri de, Jukristu gibibedo ku wang’gi kara kud gitwii mer kude. (1 Kor. 15:33) Jucikiri ngo nijolo rapor pare mi lembanyong’a.

⁴⁰ Saa moko, ng’atu m’ubino jarwei ma fodi ulimo ngo batizo romo maru nia edok kendo jarwei. I saa maeno, judong cokiri ario copo rombo kude man ning’io ka nyo etimo mediri i thenge mi tipo. Tekene ginwang’u nia eromo, jubimio atwong’a moko m’adundo i cokiri, man jubisome kumae: “[Nying’ ng’atune] udoko kendo jarwei ma fodi ulimo ngo batizo.”

⁴¹ Dhanu ceke ma gibedikiri ku cokiri pa Mungu tin gicopo bedo kud anyong’a i paradiso mi tipo ma Yehova umio ni dhanu pare. Wapong’ ku cam mi tipo man watie ku pii mi lemandha lee dit ma yomo cwinyjo. Bende, Yehova ubegwokowa nikadhu kud i dilo pare mi theokrasi ma tie i the telowic pa Kristu. (Zab. 23; Isa. 32:1, 2) Nibedo i paradiso mi tipo i kajik ceng’ maeni m’upong’ ku peko uketho wabenwang’ara nia watie museme.

⁴² Tekene wabegwoko kwiocwiny man leng’o mi cokiri, wabimedara niketho der mwa mi lemandha mi Ker urieny. (Mat. 5:16; Yak. 3:18) Ku kony pa Mungu, wabibedo ku mutoro nineno nia dhanu mange dupa gibetuc ning’eyo Yehova man nitimo yeny pare karacelo kudwa.