“KU KWONG’A Mungu cwio polo ku ng’om,” man piny ceke m’ecwio ubino “ber dit.” (Tha. 1:1, 31) Yehova ucwio dhanu ku genogen ma cuu mandha pir anyim migi. Ento, jai m’uwok i Eden unyotho pi nindo moko anyong’a ma dhanu ubino ko. Re asu, lembakeca pa Yehova pi ng’om man pi dhanu ulokere ngo. Mungu ung’olo nia ebigonyo nyikwai Adamu ma giwor. Thier mandha bigam dok kendo kakare, man Mungu binyotho Sitani karacelo ku tic pare ceke ma reco. (Tha. 3:15) E lembe bidoko kendo “ber dit” calu ma kwong’a. Yehova bitimo lembuno nikadhu kud i bang’ Wode ma Yesu Kristu. (1 Yoh. 3:8) Pieno, pire tie tek magwei nia wang’ei rwom pa Kristu i lembakeca pa Mungu.​—Tic. 4:12; Flp. 2:9, 11.

² Yesu Kristu utie ku rwom dupa i lembakeca pa Mungu. Etie Jawar mi dhanu, Jalam ma dit, Wic mi cokiri mi Jukristu, man kawoni etie Rwoth mi Ker pa Mungu. Niparu cuu pi rwom pare eno medo foyofoc ma watie ko pi lembakeca pa Mungu man ketho mer ma wamaru ko Kristu Yesu medere. Biblia ukoro pi rwom parene moko.

³ Kinde ma Kristu Yesu ubino i ng’om keni, ugam unen ngbeng’ nia En re m’ebibedo ng’atu ma biripo kind dhanu  ma wor karacelo ku Mungu. (Yoh. 14:6) Calu Yesu tie Jawar, eyio nithiero kwo pare ubed ni jamgony pi dhanu dupa. (Mat. 20:28) Pieno Yesu uweko ngo kende kende lapor mi timo lembe ma nyayu anyong’a i Mungu. Etie bende ng’atu ma pire tek akeca kara lembakeca pa Yehova pi dhanu ubin upong’ kakare. Ni kume kende re ma kindwa copo ripo ku Mungu. (Tic. 5:31; 2 Kor. 5:18, 19) Tho man cer pa Yesu umio kaka mi nwang’u mugisa ma rondo ku rondo ni dhanu ma wor i the bimobim mi Ker mi polo pa Mungu.

⁴ I rwom pare m’etie ko Jalam ma dit, Yesu tie ku copo mi kethere kakawa pi “ng’ic ma wa ng’ic ko,” man mi ripo kind julub pare ma gigwoko bedoleng’ migi ku Mungu. Jakwenda Paulo ukoro kumae: “Wakubedo ku jalam ma dit ungo ma can kunege ngo kum ng’ic ma wa ng’ic ko; endre ng’atu ma jubidhe kum gin ceke ma calu jubidho kowa, ere ma dubo mbe.” I ng’eye, Paulo ukwayu dhanu ma giketho yioyic migi i Yesu Kristu, nia gitim kero ninwang’u kony lee i yub maeno mi ripo kind dhanu ku Mungu. Eyero kumae: “Ka kumeno dong’ wacoru ceng’ni [i kum] kom mi bero ku tegocwiny, kara wajol kisa, man wanwang’ bero m’ukonywa i nindo ma can ni i kumwa.”​—Ebr. 4:14-16; 1 Yoh. 2:2.

⁵ Yesu tie bende Wic mi cokiri mi Jukristu. Calu i saa mi julub pare mi rundi ma kwong’a, tin bende wambe ku yeny pa jatelwic ma dhanu. Yesu ubemio telowic nikadhu kud i tipo maleng’ man nikadhu i bang’ jukwac ma gini the loc pare, niwacu judong cokiri, ma gibiwodho wel i wang’e man i wang’ Won mi polo iwi  kite ma gibegwoko ko udul rombe pa Mungu. (Ebr. 13:17; 1 Pet. 5:2, 3) Yehova ular uewo pi Yesu kumae: ‘Nen, amie ni jamulembe ni kodhidhanu, jatelwic man jego ni kodhidhanu.’ (Isa. 55:4) Yesu unyutho nia lembila maeno upong’o, kinde m’eyero ni julub pare kumae: ‘Kud julwong’wu [jutelwic]: kum ng’atu acel e ma [jatelwic] mwu, en e Kristu.’​—Mat. 23:10.

⁶ Yesu unyutho nia etie ku pidoic ma ber man etie ayika nikonyowa. Pieno, ebekwayuwa kumae: ‘Wubin i bang’a, kewu ceke ma wumulu ku tic ma ter ma pek unurowu, man abimio iwu yom. Wuting’ mberembere para i wiwu, wumak ponji de i bang’a; kum an a ming’ a mol de i adunde: e wubinwang’u yom i ng’eyong’ec mwu. Kum mberembere para e yot, ter para de foka foka.’ (Mat. 11:28-30) Kristu ubetelo wi cokiri ku molo man i kite ma yomo cwinyjo. I ayi maeno, ebenyuthere nia etie “jakwac ma ber,” m’ebelubo ko lapor pa Won mi polo, Yehova Mungu.​—Yoh. 10:11; Isa. 40:11.

⁷ I barua ma kwong’a m’egoro ni Jukristu mi Korinto, jakwenda Paulo ukoro pi rwom mange ma Yesu Kristu tie ko, egoro kumae: “Ebikocamu ker be, cil [ma Mungu] biketho ko jukwoje ceke the tiende. Man ka judwoko gin ceke bed wor ire, e Wod nini bende bilund doko wor ire en e ng’atu m’edwoko gin ceke bed wor ire, kara Mungu bed ceke i ceke.” (1 Kor. 15:25, 28) Calu m’etie kayu mi giracwia, Yesu ubino “jabodho ma  dit” pa Mungu, i wang’ nibino i ng’om. (Rie. 8:22-31) Kinde ma Mungu uore i ng’om keni, Yesu utimo yeny pa Won saa ceke. Eciro masendi ma lee dit man egwoko bedoleng’ pare ni Won cil i tho. (Yoh. 4:34; 15:10) Calu m’etimo kumeno, Mungu uketho ecer, eidho i polo, man emio ire twero mi bedo Rwoth mi Ker mi polo. (Tic. 2:32-36) I rwom pare maeno, Kristu tie ku tic ma yawe mbe ma Mungu umio ire mi telo wi udul mony ma lee mi jumalaika, pi nikabu cen bimobim mi dhanu man lembe ma reco ceke kud iwi ng’om. (Rie. 2:21, 22; 2 Tes. 1:6-9; Nyu. 19:11-21; 20:1-3) I ng’eye, Ker pa Mungu kende, ma Kristu tie Rwothne, re ma bibimo wi ng’om zoo.​—Nyu. 11:15.

⁸ Yesu Kristu ma en e Lapor mwa, etie ng’atu ma leng’. Jumio ire tic mi gwokowa. Re kara wanwang’ bero i kum gwok m’ebemio iwa ku mer, ubekwayu wamedara nigwoko bedoleng’ mwa ni Yehova man wawoth rom rom ku dilo pare m’ubecidho i wang’e.

⁹ I rundi ma kwong’a, julub pa Yesu gigam ginyutho nia ging’eyo cuu mandha rwom pa Kristu i lembakeca pa Mungu. Ginyuthe ni kum tic ma gibed gitimo karacelo i the loc pa Kristu, gijwigiri i the telowic pare, man giyio telowic pa tipo maleng’. (Tic. 15:12-21) Jakwenda Paulo uweco pi bedo i acel mi cokiri mi Jukristu ma juwiro ku tipo kinde m’ekiewo kumae: ‘Ma wubeweco lemandha i mer, wucopo dongo i gin ceke i ie, ma en e wic, ndhu Kristu; kud i bang’e kum zoo umoko karacelo man eribre ber ni kum maeno ma ujonje ceke kelo  calku timo mi mukero mi wathkum kubang’gi kubang’gi, uketho kum unyai ni gomogom gire i mer.’​—Ef. 4:15, 16.

¹⁰ Ka ng’atuman mi cokiri ubediko cinge ku jumange man dhanu ceke ubetimo i acel i the telowic pa Kristu, mediri man mer mandhandha ma tie “jamtwic ma leng’ mi bedo i acel” bedo nuti i cokiri.​—Yoh. 10:16; Kol. 3:14, NWT; 1 Kor. 12:14-26.

¹¹ Lembe m’ubetimere i ng’om ubepong’o lembila mi Biblia man ubenyutho kamaleng’ nia niai i oro 1914, Ker pa Mungu utie i cing’ Yesu Kristu. Kawoni ebebimo i kind judegi pare. (Zab. 2:1-12; 110:1, 2) Lembuno tie kud adwogi ma kani iwi dhanu m’ubekwo iwi ng’om? Ceng’ini eni Yesu bitio ku rwom pare m’etie ko Ubimo mir ubimo man Rwoth mi rwodhi pi nikelo pokolembe pa Mungu iwi judegi pare. (Nyu. 11:15; 12:10; 19:16) E Yehova bigam gonyo dhanu ceke ma gini yo ku cing’ Kristu ma yor acwic man ma ginwang’u bero i wang’e, calu m’elar eng’olo niai ma dhanu gijai ire. (Mat. 25:34) Watie ku mutoro ma yawe mbe pilembe wang’eyo rwom pa Kristu i lembakeca pa Mungu! Dong’ wamedara nibedo i acel pi nitimo tic pa Mungu i ng’om zoo i the telowic pa Kristu i nindo maeni mi kajik ceng’.