JAKWENDA Paulo uyero i Juebrania 13:7 kumae: “Wupoi pi ju m’ubimo (m’ubetelo) wiwu.” Niai i Pentekoste mi oro 33 R.M., jukwenda ma pwe pa Rwoth Yesu Kristu re ma gibino ku rwom maeno; gitimo calu guriri m’utelowic man gibed gimio telowic ni cokiri mi Jukristu ma nwang’u fodi ucaku acaka. (Tic. 6:2-4) Ceng’ini i kum oro 49 R.M., dhanu moko ma gibino ngo jukwenda pa Yesu bende gigam gimedo wend umego mi guriri m’utelowic. Kinde ma guriri maeno ubewodho telowic iwi timo yaa, nwang’u dong’ guririne utie ku “jukwenda [man] judongo” mi Yerusalem bende. (Tic. 15:1, 2) Gin re ma gibino ku rwom mi luro i lembe ma tung’ tung’ m’ubemulo kum Jukristu kaka moko ci. Gibed gioro barua man telowic pi nitielo cokiri man niketho julub gimediri nibedo i acel i paru man i timo. Cokiri ceke ubed uworo man ubed ulubo cuu mandha lembe ceke m’uai i guriri m’utelowic, uketho ginwang’u mugisa pa Yehova man gimediri.​—Tic. 8:1, 14, 15; 15:22-31; 16:4, 5; Ebr. 13:17.

² I ng’ei tho mi jukwenda, jai ma dit ugam umondo i cokiri mi Jukristu. (2 Tes. 2:3-12) Calu ma Yesu ular uyero i lembabola m’emio iwi nganu ku ngoli, jadegi ucoyo ngoli (Jukristu mi vupo) i kind nganu (Jukristu ma juwiro ku tipo). Pi rundi ma dupa i ng’eye, juweko kodhi ario maeno zoo udongo karacelo nitundo i saa mi  kayucam, niwacu i nindo mi kajik ceng’. (Mat. 13:24-30, 36-43) I kind rundi maeno ma dupa, Jakristu acel acel ma juwiro ku tipo umedere asu ninwang’u bero i wang’ Yesu, re guriri m’utelowic, niwacu yo m’anzilo ma Yesu ubed utio ko i ng’om keni pi nimio telowic ni julub pare ubino mbe. (Mat. 28:20) Ento Yesu ular ung’olo nia alokaloka bibedo nuti i saa mi kayucam.

³ ‘Ng’a dhe ma jamiru mandha man ma riek?’ Yesu ugam utio ku penji maeno i wang’ niwodho lembabola, kunoke lapor moko ma tie acel m’i kind “giranyutha” mi “kajik mi ng’om.” (Mat. 24:3, 42-47) Yesu unyutho nia jamiru mandha eno bibedo ku tic ma lee mi mio cemo ni dhanu pa Mungu “i nindone.” I rundi ma kwong’a, Yesu ugam utio kud ungu mi dhanu moko ma co pi nitelo wi cokiri, kakare nitio ku ng’atu acel kende. I nindo maeni mi kajik ceng’ bende, jamiru mandha ma Yesu ubetio ko utie ngo ng’atu acel kende.

⁴ Ng’a ma Yesu ung’io pi nimio cemo ni julub pare? M’umbe jiji, eromo tio ku Jukristu ma juwiro ku tipo ma gitie iwi ng’om keni. Biblia ulwong’ogi nia ‘julam mi ker’ ma Mungu umio igi tic mi ‘nyutho bero pare m’elwong’o kogi kud i mudho i der pare ma wang’uic.’ (1 Pet. 2:9; Mal. 2:7; Nyu. 12:17) Nyo Jukristu ceke ma juwiro ku tipo ma gini wi ng’om gitie jamiru mandha eno? Ungo. Kinde ma Yesu ugam unyayu cam i ayi mir udu ni udul dhanu ma co 5 000 kumeni, ma jukwanu ngo mon kud awiya i kindgi, epoko camne i cing’ julub pare, julub ke gilund gipoko ni udul dhanu. (Mat. 14:19) Etio  ku dhanu ma nok kende pi nimio cam ni dhanu dupa. Tin de, ebemio cemo mi tipo i ayi ma rom eno.

⁵ Pieno, ‘jakurpiny mandha man ma riek’ tie ungu ma nok mir umego ma juwiro ku tipo, ma gibeyiko man gibemio cemo mi tipo i nindo maeni mi bedonuti pa Kristu. (Lk. 12:42) I kind nindo maeni mi kajik ceng’, umego maeno ma juwiro ku tipo gibetimo karacelo i kabedo mwa ma dit, man gin re ma gitie ‘jamiru mandha man ma riek.’ Tin eni, ungu mir umego maeno ma juwiro ku tipo, utie Guriri m’utelowic mi Jumulembe pa Yehova.

⁶ Kristu ubetio ku guriri maeno pi ninyutho kite ma lembila mi Biblia ubepong’o ko, man nimio telowic i saane iwi kite ma waromo tio ko ku cik mir ukungu mi Biblia i kwo mwa ma kubang’ ceng’. Wabenwang’u cam maeno mi tipo nikadhu kud i cokiri ma tung’ tung’ mi Jumulembe pa Yehova. (Isa. 43:10; Gal. 6:16) I rundi ma con, jamiru kunoke jakurpiny ma jugeno, ubino ku rwom mi neno wi piny ceke mi ot. Kumeno bende, jumio rwom mi neno wi juot mi yioyic ni jamiru mandha man ma riek. Pieno jamiru mandha ubeneno bende wi lim ku piny mange, wi tic mi lembanyong’a, program mi coko ma dongo, ng’io ju m’ubetelo wi tic ma tung’ tung’ m’ubetimere i dilo, man tic mi wodho girasoma m’ujengere iwi Biblia. Lembe maeno ceke utie pi bero mi “juot” pa Rwoth.​—Mat. 24:45.

 ⁷ “Juot” ne ke gitie jukani? I adundo, juot utie dhanu ceke ma jubemio igi cam. Ku kwong’a, juot maeno gibino kende kende Jukristu ma juwiro ku tipo. Ento i ng’eye, juotne utuc niketho i ie udul ma dit mi “rombe mange” de. (Yoh. 10:16) Ungu ario maeno zoo gibenwang’u cam mi tipo ma jamiru mandha ubemio.

⁸ I saa mi masendi ma dit, kinde ma Yesu bikelo pokolembe iwi ng’om maeni ma rac, ebiwoketho jamiru mandha “wi gin ceke m’ebedo ko.” (Mat. 24:46, 47) Ju ma gibetimo calu jamiru mandha, gibinwang’u sukulia migi i polo. Gibibimo karacelo ku Kristu man dong Jukristu 144 000. Kadok i saa maeno jamiru mandha man ma riek bibedo mbe iwi ng’om de, Yehova giku Yesu gibimediri nimio telowic ni lwak dhanu mi Ker pa Masiya nikadhu i bang’ “judongomawijo” ma gibiketho.​—Zab. 45:16.

⁹ Thelembe tie dupa m’ucikere nicwaluwa nipoi pi ju m’ubetelo wiwa man ninyutho nia wagenogi. Nitimo kumeno tie pi bero mwa giwa. Pirang’o? Jakwenda Paulo uyero kumae: ‘Gikuro kum ng’eyong’ec mwu calu ju ma biwodho wel; kara gitim maeni ku mutoro, ku can re ngo: kum maeni kuloka ngo iwu.’ (Ebr. 13:17) Pire tie tek nia wawor man wajwigara i the telowic mi ju m’ubetelo wiwa, pilembe gibemediri nineno wiwa pi nigwokowa i thenge mi tipo.

¹⁰ Paulo uyero kumae i 1 Jukorinto 16:14: “Wek gin ceke ma wutimo utimbre i mer.” Pieno yub ceke ma jutelwic gibemaku pi dhanu pa Mungu ujengere iwi kite maeno ma pire tek mi mer. 1 Jukorinto 13:4-8 uyero pi  mer kumae: “Mer ciro lembe hai, man ebedo ber; mer kumira nege ngo; mer yungre gire ngo, etingre ngo, etimbre rac ungo, eyenyo gin ma pare gire ngo, lembe ton i ie ngo, ekwanu dubo ngo; anyong’a nege ngo i gondri, ento anyong’a nege karacelo ku lemandha; emule ku gin ceke, eyio gin ceke, egeno gin ceke, eciro gin ceke. Mer jik i yo ki ngo.” Calu ma telowic ceke ma jubed jumaku pi jutic pa Yehova ujengere iwi mer, wacopo lubo telowicne m’umbe lworo moko acel de. Bende, telowic maeno utie lanyuth mi mer pa Yehova.

¹¹ Calu m’ubino i rundi ma kwong’a, umego ma Yehova ubetio kugi pi nitelo wi dhanu pare tin eni bende gitie leng’ ungo. Con, Yehova ubed utio ku dhanu ma gileng’ ungo pi nitimo yeny pare. Ku lapor, Noa ugiero avur man etwong’o pi nyoth m’uwok i rundi pare. (Tha. 6:13, 14, 22; 2 Pet. 2:5) Yehova ung’io Musa pi nitelo wi dhanu pare niai kud i Misiri. (Ai 3:10) Etelo bende wi dhanu ma gileng’ ungo ku tipo pare pi nigoro Biblia. (2 Tim. 3:16; 2 Pet. 1:21) Tin de, kadok Yehova ubetio ku dhanu ma gileng’ ungo pi nitelo wi tic mi lembanyong’a man mi ketho dhanu dok julub, asu lembuno ubejwigo ngo genogen mwa i kum dilo pa Mungu. Ento, ubetielo yioyic mwa pilembe wang’eyo nia ka ku kony pa Yehova ngo, dilo maeni copo timo ngo nyanok de lembe ceke m’ebetimo kawoni. Kadok kud i peko ma tung’ tung’ de, jamiru mandha utuc ninyutho nia tipo maleng’ re m’ubetelo wie. Mugisa ma lee ubemedere nikonjere iwi thenge ma nen mi dilo pa Yehova tin eni. Pieno, ubekwayu wadik cingwa i kume man wagene kud adunde mwa ceke.

¹² Dhanu ma jumio igi rwom mi telo wi lembe moko i cokiri ginyutho nia gigeno Yehova man dilo pare, nwang’u gibejolo kud anyong’a tic ma jubemio igi, man gibetimo tije kakare kakare. (Tic. 20:28) Watie jurwei lembanyong’a mi Ker; pieno wamiara pi nirweyo ot kubang’ ot, wadok i liew, man watelo wi ponji mi Biblia i pacu mi dhanu kud amora. (Mat. 24:14; 28:19, 20) Kara wanwang’ kony lee i kum cam ma cuu mi tipo ma jamiru mandha ubemio, kwayu wabed wayikara pi coko mwa ma tung’ tung’, uketho i ie coko ma dongo, man wabed wacidh i igi. Watielo cwinywa lee i kindwa kud umego ku nyimego mange nwang’u wabedikara karacelo kugi i coko maeno mi Jukristu.​—Ebr. 10:24, 25.

¹³ Wanyutho nia wageno dilo pa Yehova nwang’u wabemio giramia pi nitiele. (Rie. 3:9, 10) Ka waneno umego ku nyimego mwa gitie ku yeny mi piny moko, wakonyogi m’umbe galu. (Gal. 6:10; 1 Tim. 6:18) Mer mir umego re ma cwaluwa nitimo kumeno, saa ceke nwang’u watie ayika ninyutho foyofoc mwa ni Yehova man ni dilo pare pi bero ma wabenwang’u.​—Yoh. 13:35.

¹⁴ Wanyutho bende nia wageno dilo pa Yehova nwang’u wabediko cingwa i kum yub ceke ma dilone ubemaku. Pieno, wajwigara pi nilubo telowic mi ju m’ubetelo wiwa, calu ve juliew mi twodiri man judong cokiri. Umego maeno gitie i kind ju m’ubetelo wiwa, ma wacikara niworo man nijwigara igi. (Ebr. 13:7, 17) Kadok wanyang’ ungo cuu i thelembe m’uketho gimaku yub moko de, wang’eyo nia nidiko cingwa kugi tie pi bero mwa ma nja.  Ka watimo kumeno, Yehova poko mugisa i wiwa pi woro ma wabenyutho i kum Lembe pare man dilo pare. I ayi maeno, wanyutho bende nia wabeworo Rwoth mwa Yesu Kristu.

¹⁵ Eyo, watie ku thelembe dupa m’ucikere nicwaluwa nigeno jamiru mandha man ma riek. Sitani, ma tie mungu mi ng’om maeni, ubetimo kero pare ceke pi nicido nying’ Yehova man nying’ dilo pare. (2 Kor. 4:4) Kud iwek Sitani umeki i awic pare ma reco! (2 Kor. 2:11) Eng’eyo “nia nindo dong’ ire nyanok kende” i wang’ ma jubin jubole i longoro ma there mbe, pieno ebetimo kero pare ceke pi niwingo dhanu ceke m’ecopo wingo kara giwek Yehova. (Nyu. 12:12) Dong’, calu ma Sitani ubemedo kero pare pi niwingo dhanu, kwayu wamedara nicoro ceng’ini magwei i kum Yehova. Kwayu bende waketh genogen mwa iwi Yehova man iwi yo m’ebetio ko pi nitelo wi dhanu pare tin eni. Ka watimo kumeno, wabibedo i acel kud umego ku nyimego mwa mi ng’om zoo.