WA JUTIC pa Mungu ma wathiero kwo mwa ire, wacikara ninyutho dwong’ pa Yehova i wec man i timo mwa ceke. Jakwenda Paulo umio cik mir ukungu pi nitelo wiwa; eyero kumae: “Kadok wucamu, kadi wumadhu, kadi gin ceke ma tek wutimo, wutim ceke ni dwong’ pa Mungu.” (1 Kor. 10:31) Pieno, kwayu wamok kikiki i kum cik ma pwe pa Yehova, pilembe cikne ubenyutho kite pare ma leng’. (Kol. 3:10) Wacikara nikwanyu koth Mungu, niwacu, wabed leng’.​—Ef. 5:1, 2.

² Pi nitelo nen mi Jukristu iwi lembe maeno, jakwenda Petro ugoro kumae: ‘Calu nyithindho mi woro, kud wuporu giwu kud awanya ma rac mwu ma kwong’a mi cobo mwu; ento calu ng’atu m’ulwong’owu e leng’, wun giwu bende wubed leng’ i kura ceke mi bedo mwu; kum egore kumae, wubibedo leng’; kum an a leng’.’ (1 Pet. 1:14-16) Calu i Israel ma con, dhanu ceke mi cokiri gicikiri nibedo leng’; niwacu, kwayu gimediri nibedo m’umbe cilo, ma gibevukiri ngo ku dubo man lembe ma reco mi ng’om maeni. I ayi maeno re ma ginyutho nia gibedo akoya pi tic ma leng’.​—Ai 20:5.

³ Wacopo nyutho nia watie leng’ nwang’u wabeworo cik pa Yehova man cik pare mir ukungu ma jukiewo ngbeng’ i Lembagora ma leng’. (2 Tim. 3:16) Nikadhu kud i ponji mi Biblia, wang’eyo lembe iwi Yehova man iwi yo pare, e kindwa doko ceng’ini kude. Ponjine uketho  wanyang’ cuu nia pire tie tek niyenyo ma kwong’a Ker pa Mungu man niketho yeny pare i kabedo ma kwong’a i kwo mwa. (Mat. 6:33; Rum. 12:2) Pieno, ugam ukwayu warony ng’atu ma nyen pi nitimo lembuno.​—Ef. 4:22-24.

⁴ Etie yot ungo niworo cik ma pwe pa Yehova saa ceke. Sitani Wonabali tie jadhogwa man ebeyenyo ewing wiwa i kum lemandha. Atelatela ma reco mi ng’om maeni man dubo ma walagu bende dwoko iwa lembe tek saa moko. Pieno, kwayu wanyeg anyega kara watuc nikwo nimakere ku thieriri mwa. Lembagora unyutho iwa nia mito ngo wazungi ka wabenwang’ara ku ragedo kunoke amulaic. Wabed ma wang’eyo nia wabinwang’ara be ku ragedo pi bedopwe mwa. (2 Tim. 3:12) Wacopo bedo ku mutoro ka jubenyayu ragedo i kumwa kum wang’eyo nia eno nyutho kamaleng’ nia wabetimo yeny pa Mungu.​—1 Pet. 3:14-16; 4:12, 14-16.

⁵ Kadok Yesu bino leng’, re eponjo nibedo wor ni kum masendi m’enwang’u. Epodho ngo nyanok de i abidhe pa Sitani man eyenyo ngo yung mi ng’om maeni. (Mat. 4:1-11; Yoh. 6:15) Wang’ acel de mbe ma Yesu uparu nia enyoth bedopwe pare. Kadok ng’om udage pi bedopwe pare de, emoko i kum cik ma pwe pa Yehova. Nindo ma nok i wang’ tho pa Yesu, etwong’o julub pare nia gin bende ng’om bidagugi. Niai eca, julub pa Yesu gibenwang’iri ku ragedo, ento cwinygi tek kum ging’eyo nia Wod Mungu uvoyo ng’om.​—Yoh. 15:19; 16:33; 17:16.

⁶ Kara kud wabed i thenge mi ng’om maeni, kwayu wamok kikiki i kum cik ma pwe pa Yehova, calu ma Rwoth  mwa de timo. Wacikara ngo nimondo i lembgamba kadi i teliri m’i kind dhanu mi ng’om maeni. M’umedo maeno, wacikara bende nicerara i kum kura ma reco mi ng’ombe m’ubemedere ameda ninyothere. Wamaku ngo ku tuko juk ma nwang’ere i Yakobo 1:21, m’uyero kumae: ‘Wucor lembsasa ceke cen ku dubo m’udhir, man wujol lembe ma jupidho i iwu ku molcwinywu, ma copo bodho ng’eyong’ec mwu.’ Ponji man coko mwa copo konyowa ‘wapidh’ lemandha i rieko man i adundewa, ma dong’ kadok ava lembe mi ng’om maeni de copo caku negowa ngo. Jalub ma nyinge Yakobo ugoro kumae: “Wung’eyo ngo nia bedo jarimb ng’om en e adegi ni Mungu? Kumeno ng’atu ma tek uyenyo ebed jarimb ng’om nwang’u ekethre gire ni jadegi pa Mungu.” (Yak. 4:4) Pi thelembe maeno, Biblia ubecimo wang’wa nia wakoyara cen ku ng’om maeni man wamok kikiki i kum cik ma pwe pa Yehova.

⁷ Lembe pa Mungu ubecimo wang’wa nia kud wamond i timo mi lewic man i lembsasa. Ewacu kumae: ‘Ento tarwang’, ku sasa ceke, ku kethocwiny hai kum piny, dong’ kud ulwongre i kindwu ki, calu m’umaku jumaleng’.’ (Ef. 5:3) Pieno, wacikara ngo niweko paru mi lembe m’ucido, lembe mi lewic kunoke ma rac ubed i wiwa man wabiyio ngo lembe maeno umond kadok nok nok i wec mwa. I ayi maeno re ma wanyutho ngbeng’ nia wabeii nimoko i kum cik ma leng’ man ma pwe pa Yehova iwi kurajo.

⁸ M’umedo nibedo leng’ i tipo man i kurajo, Jukristu ging’eyo bende nia pire tie tek nibedo leng’  i kum. Mungu umaru leng’o, uketho egam eng’olo ni nyithindho mir Israel con nia gigwok kagonjo migi ubed ma leng’. Wan bende wacikara nibedo leng’ kara Yehova ‘kud unen gin m’ucido’ i bang’wa.​—Poi. 23:14.

⁹ I Biblia, wec ma nia leng’o man leng’o mi kum giyenyo wotho karacelo. Ku lapor, Paulo ugoro kumae: ‘Jumer, wan ma wabedo ku lembang’ola maeni, dong’ walwokra giwa ni cilo ceke mi kum ku mi tipo, ma wadwok ko leng’o udok ndhu cuu i lworo pa Mungu.’ (2 Kor. 7:1) Pieno, Jukristu ceke, ma co kadi ma mon, gicikiri nitimo kero pi nigwoko kumgi ubed ma leng’, nwang’u gibejom nja man gibelwoko kendi migi de ubed ma leng’. Kadok lembe ubed ukoc kubang’ ng’om de, re wacopo nwang’u sabuni man pii ma romo konyowa pi nigwoko kumwa ubed ma leng’ man kum awiya mwa de ubed ma leng’.

¹⁰ Tic mwa mi lembanyong’a, uketho jung’eyowa lee i kabedo ma wabekwo i ie. Ka wabegwoko udi mwa yo woko ku yor i ie ubed ma leng’ man ma piny unyamere ngo swa i ie, nwang’u wabemio bende lembatuca acel ma zoo ni judhugola mwa. Ketho leng’o tie tic ma dhanu ceke mi ot gicopo nyoko anyoka. Umego gicikiri nidieng’ akeca pi leng’o mi kum ot man mi ng’et ode, pilembe lela man pacu ma juyiko ma leng’ ketho dhanu mange bedo ku paru ma cuu iwi won ode. Ka jawiot ubetimo tic maeno man bende tic mi telo wi juot pare i thenge  mi tipo, enyutho nia ebebimo wi juode ma ber. (1 Tim. 3:4, 12) Nyimego bende gitie ku tic mi ketho leng’o, asagane i ot. (Tit. 2:4, 5) Awiya ma juponjo ma ber gidiko cing’gi pi niketho leng’o nwang’u gibegwoko kumgi man kusika migi ubed ma leng’. I ayi maeno re ma juruot gitimo karacelo pi niponjo kit leng’o ma bibedo i ng’om ma nyen i the Ker pa Mungu.

¹¹ Tin eni, umego ku nyimego dupa gitio ku mutukari, moto, kunoke gari pi nicidho i coko. I kabedo moko, jambwotho maeno pigi tek dit pi rweyo lembanyong’a. Wacikara nigwoko jambwotho mwa ubed ma leng’ man m’unyothere ngo. Udi man jambwotho mwa ucikere ninyutho andha nia watie leng’ man waromo nibedo dhanu pa Yehova. Wacikara nigwoko bende sakoc man Biblia mwa mi lembanyong’a ubed ma leng’.

¹² Kendi man ruko mwa ucikere ninyutho nia wabeworo cik pa Mungu. Waromo cidho ngo i wang’ ng’atu ma tie ku dito ka wakendara nya kumeno kumeno kunoke ku bongu mi riyo. Pieno, ka wacungo kaka Yehova i tic mi lembanyong’a kunoke iwi bop, wacikara nidieng’ lee dit pi leng’o mwa. Ruko man kendi mwa romo ketho dhanu mange bedo ku paru ma ber kunoke ma rac iwi thier pa Yehova. Pieno, etie cuu ngo nikendo kunoke nirukiri nikadhu mukero kadi nikendo i ayi ma nyutho nia wambe ku woro. (Mik. 6:8; 1 Kor. 10:31-33; 1 Tim. 2:9, 10) Dong’ ka wabeyikara pi nicidho i lembanyong’a kunoke i coko mwa man i coko ma dongo mi twodiri ku mir adhura, wiwa ucikere ngo niwil i kum juk ma Biblia umio nia kumwa ucikere nibedo ma leng’ man ruko mwa kud ukadh mukero. Wabemito saa ceke wamii woro man yung ni Yehova.

 ¹³ Juk ma rom eno ucikere nitelo wiwa ka wabecidho niliewo kabedo mwa ma dit kunoke Bethel mi Jumulembe pa Yehova. Poi nia Bethel thelembene tie “Ot pa Mungu.” Pieno, kwayu kendi man timo mwa ubed rom rom ku kite ma wabedo ko ka watie i coko i Ot Ker.

¹⁴ Kadok kinde ma watie i nambu, kwayu wanen nia wakendo man warukara ma ber. Wacopo penjara kumae: ‘Nyo lewic romo nega nirweyo i saa m’apangu ngo pilembe kendi para tie cuu ngo?’

¹⁵ Yom man galuwang’ pigi tie tek pi leng’kum mwa man pi kabu olo. Nindo moko, Yesu ukwayu julub pare gicidh kugi kaka ma ting’ pi ‘niyom’ nyanok. (Mk. 6:31) Yom, nambu man bende galuwang’ ma beco copo nyayu anyong’a i iwa, man romo mio iwa tego ma nyen kara wamedara ku tic mwa i wang’wa.

¹⁶ Calu kit galuwang’ unyai lee akeca tin eni, kwayu Jukristu gilond galuwang’ migi alonda man gitii ku rieko m’uai i bang’ Mungu i lembe ma gibetimo. Kadok galuwang’ utie ku kakare i kwo mwa de, re etie ngo lembe ma pire tek akeca. Biblia utwong’owa nia i nindo mi ‘kajik ceng’,’ dhanu bibedo “ju ma gimaru migi anyong’a mananu ma sagu mer ma gimaru ko Mungu.” (2 Tim. 3:1, 4) Tin eni, nambu man galuwang’ ma pol umaku piny ungo ni dhanu ma gibemaru giwor cik ma pwe pa Yehova.

¹⁷ Pire bino tek nia Jukristu mi rundi ma kwong’a giceriri i kum lembe ma reco mi ng’om ma gibino kwo i ie i kind dhanu ma yenyo migi kwa anyong’a. I the bimobim  mi Roma, katuko ma dongo ubino nuti, man dhanu ubed ufoyo nicidho i igi pi nineno kite ma jubetimo ko jumange rac. Jubed junyutho kamaleng’ rop, cwiro rimo, man lembsasa mi tarwang’ pi ninyayu anyong’a i dhanu, ento Jukristu mi rundi ma kwong’a gibed gimondo ngo i lembene. Tin bende, galuwang’ ma pol mi ng’om maeni utie ku lembe ma rom man gibenyang’u dhanu lee dit. Wacikara ‘nibedo ku wang’wa’ i kum wotho mwa, man waur cen galuwang’ man nambu ma cuu ngo. (Ef. 5:15, 16; Zab. 11:5) Kadok galuwang’ man nambune romo bedo rac ungo de, re kaka ma lembene ubekadhu i ie romo bedo cuu ngo.​—1 Pet. 4:1-4.

¹⁸ Kit galuwang’ man nambu ma beco unuti ma copo bedo ber ni Jukristu. Nitio ku juk mi Lembagora man paru ma beco ma jucopo nwang’u i girasoma mwa ma tung’ tung’ utuc nimio bero ni ju ma dupa.

¹⁹ Saa moko, juruot mi Jukristu gicopo rombo karacelo pi nambu moko, kunoke juromo lwong’o umego ku nyimego i nambu mi nyom kadi i nambu mange. (Yoh. 2:2) Ju m’uyiko nambune gicikiri ning’eyo nia lembe m’ubekadhu zoo ucungo i wigi. Ma jiji mbe, kwayu nibedo ku wang’jo i saa ma dhanu dupa ucoko dhoggi karacelo i nambu. Anyong’a mi nambu ma kumeno, ugam ucwalu jumoko nitimo lembe m’uromo ngo ku Jukristu; gicamu man gimadhu nikadhu mukero man jumoko upodho kadok i dubo mange ma pek. Lembuno uketho Jukristu moko ginwang’u nia etie lembe mi rieko nijwigo wend dhanu man wend saa pi kit nambu ma kumeno. Tekene kong’o utie, jucikiri nitio kude i mukero m’uromo.  (Flp. 4:5) Ka jutimo kero pi niketho nambune ubed ma cuu man ma tielojo i tipo, cam man kong’o bibedo ngo gin ma pire tek akeca.

²⁰ Etie lembe ma ber dit nibedo jajol. (1 Pet. 4:9) Kinde ma wabelwong’o Jukristu wadwa i ot mwa pi nibilo piny moko, pi ninambu karacelo kunoke niweco i kindwa, kwayu wapoi pi ju ma gicopo bedo ku yeny. (Lk. 14:12-14) Tek julwong’owa i nambu ma kumeno, timo mwa ucikere nirombo ku juk ma nwang’ere i Marko 12:31. Wang’ ma pol etie ber nijolo berocwiny ma jumange ubenyutho iwa.

²¹ Anyong’a nego Jukristu i kum giramia ma beco pa Mungu man ging’eyo nia gicopo ‘camu man gimadhu man anyong’a negogi i tic mi muli migi ceke.’ (Ekl. 3:12, 13) Tekene ‘watimo gin ceke ni dwong’ pa Mungu,’ ng’atu m’uyiko nambu ku ju ma julwong’o bende, gicopo bepoi kud anyong’a pi nambune ni kum tielocwiny mi tipo ma ginwang’u.

²² Awiya mi Jumulembe pa Yehova giyenyo ginwang’ ng’eyong’ec moko mir ukungu i dharaza. Kinde ma gibesomo, gitimo kero niponjo somo piny man kiewo piny ma ber. Ponji moko m’aradu ginwang’u i somo romo konyogi kinde ma gibelubo lembakeca ma tung’ tung’ mi tipo. Re kinde ma gibesomo, kwayu gitim kero migi ceke ‘nipoi i kum Jacwic migi,’ niwacu giketh lembe mi tipo i kabedo ma kwong’a.​—Ekl. 12:1.

²³ Kan itie aradu ma Jakristu man ibesomo dharaza, bed ku weng’i kara kud ibed idikiri swa kud aradu ma  gitie ngo Jumulembe. (2 Tim. 3:1, 2) Yehova mio iwa gwok ma watie ku yenyne, pieno lembe tie dupa m’icopo timo pi nikoyiri i kum lembe ma reco mi ng’om. (Zab. 23:4; 91:1, 2) Dong’ pi nigwokiri, nwang’ kony i kum yub man juk ma tung’ tung’ pa Yehova.​—Zab. 23:5.

²⁴ Kara gikoyiri cen ku ng’om maeni saa ma gibesomo, aradu ma pol ma Jumulembe ging’io nia gibidikiri ngo i nambu ma tung’ tung’ ma jupangu i saa m’uweko mi somo. Awiya wedu man juponji peri gicopo nyang’ ungo nia pirang’o ibetimo kumeno. Ento, ninyayu mutoro i Yehova uloyo zoo. Pieno, kwayu itii ku pidocwiny peri ma Biblia uponjo man icung ma tek kara kud idikiri i kwaya mi ng’om maeni man kud iroy mer mi ng’om ma thugijo i ii. (Gal. 5:19, 26) Aradu, tekene wubewinjo juk m’ujengere iwi Lembagora ma junyodo mwu ma Jukristu gibemio iwu man wubeng’io jurimo ma beco i cokiri, ma jiji mbe wubimoko kikiki i kum cik ma pwe pa Yehova.

²⁵ Biblia ung’olo nia juwiot gitie ku tic mi pong’o yeny mi juruot migi. (1 Tim. 5:8) Ento calu ma gitie jutic pa Mungu, ging’eyo nia gicikiri niketho yeny mi Ker pare i kabedo ma kwong’a man tic migi mi kum ke i kabedo mir ario. (Mat. 6:33; Rum. 11:13) Tekene gibemoko kikiki i kum Mungu man gibefoyo ku cam man kendi ma gitie ko, gibiuro koo koo man awic mi yenyo jukupiny.​—1 Tim. 6:6-10.

²⁶ Jukristu ceke ma gidaru thiero kwo migi man ma gibetimo tic mi kum gicikiri nigwoko cik mir ukungu mi Lembagora i wigi. Pi nipong’o yeny mwa i yo m’atira,  kwayu waur nimondo i timo m’uturo cik pa Mungu kunoke cik mi ng’om. (Rum. 13:1, 2; 1 Kor. 6:9, 10) Wang’eyo nia dikiri ku jurimo ma reco tie ariti. Wan ma watie askari pa Kristu, wacerara nimondo i kuloka ceke m’uturo cik pa Mungu, kunoke ma romo royowa i lembgamba mi ng’om, kadi ma ketho thenge mwa mi tipo i ariti. (Isa. 2:4; 2 Tim. 2:4) Bende, wadikara ngo nyanok de ku “Babeli ma dit,” niwacu dini ma jadhu Mungu.​—Nyu. 18:2, 4; 2 Kor. 6:14-17.

²⁷ Nimoko i kum cik ma pwe pa Mungu biketho wabiyawu ngo pi kuloka kunoke pi yeny mwa mange kaka mi coko mwa. Ka wacokara kud umego ku nyimego i Ot Ker, i coko mi twodiri man mir adhura, lembakeca mwa bebedo kende kende nitimo thier ni Yehova. Wacidho pi nicamu i dhu meza pare mi tipo man kara “wajukra,” niyero, watiel cwinywa i kindwa. (Rum. 1:11, 12; Ebr. 10:24, 25) Kaka ma kumeno utie kende kende pi lembe mi tipo.

²⁸ Cik ma pwe pa Yehova ubekwayu bende nia dhanu pare ‘gibed i acel i tipo kud amora i twic mi kwiocwiny.’ (Ef. 4:1-3) Ng’atuman ucikere niyenyo bero mi jumange, kakare niyenyo bero pare gire. (1 Tes. 5:15) Ma jiji mbe, pidoic maeno utie i cokiri peri. Nik ebed rangi mwa, ng’om kadi thek mwa, man kadok watie ku sente kunoke ngo, kadi wasomo kunoke ngo de, wan ceke cik ma rom re m’ubetelo wiwa. Kadok dhanu mi ng’om de gibeneno kamaleng’ bedo i acel mi dhanu pa Yehova.​—1 Pet. 2:12.

 ²⁹ Pi niketho nwoc nia bedo i acel utie gin ma pire tek, jakwenda Paulo ugoro kumae: ‘Kum acel, tipo de acel, cil calu julwong’owu i genogen acel mi lwong’o mwu; Rwoth acel, yioyic de acel, batizo de acel; Mungu de acel ma ceke e Wego, ma ceke ebedo i wie, ma ceke de timbre ni kume, man ke ceke ebedo i ie.’ (Ef. 4:4-6) Lembuno ubekwayu wan ceke wanyang’ i ayi ma rom iwi ponji mir ukungu mi Biblia man ponji mange m’alili mi Biblia pi ninyutho nia wajolo Dito ma malu ngbir pa Yehova. Andhandha, Yehova umio dhok ma leng’, niwacu lemandha ni dhanu pare pi nikonyogi kara gitim ire gok ku gok.​—Zef. 3:9.

³⁰ Bedo i acel man kwiocwiny mi cokiri mi Jukristu mio yomcwiny ni dhanu ceke m’ubeworo Yehova. Wabeneno wan giwa ayi ma Yehova ubepong’o ko lembang’ola pare m’uyero kumae: “Abikethogi karacelo calu rombe mi [dwol].” (Mik. 2:12) Kwayu wamok kikiki i kum cik ma pwe pa Yehova kara wagwok bedo i acel man kwiocwiny mwa.

³¹ Dhanu ma gidaru mondo i cokiri ma leng’ pa Yehova gitie ku mutoro ma yawe mbe! Nilwong’iri ku nying’ Yehova uloyo lembe mange ceke ma wacopo miara pire i kwo mwa. Tekene wabemito wamedara nigwoko winjiri mwa ku Yehova, wabitimo kero mwa ceke nimoko kikiki i kum cik pare ma pwe man wabinyutho pi bero mi cikne ni dhanu mange bende.​—2 Kor. 3:18.