YESU ubino jarwei lembanyong’a ma won amora man eweko lapor ma ber ni julub pare. Ebed ecidho i bang’ dhanu pi niweco kugi man niponjogi i pacu migi man i kabedo ma dhanu benwang’iri lee i ie. (Mat. 9:35; 13:36; Lk. 8:1) Yesu ubed uweco ku dhanu ma tung’ tung’, ebed eponjo julub pare i saa ma gitie kendgi, man ebed eponjo udul dhanu ma wendgi lee. (Mk. 4:10-13; 6:35-44; Yoh. 3:2-21) Ebed etio ku kaka ceke m’unen pi niyero lembe ma tielo cwinyjo man ma mio genogen. (Lk. 4:16-19) Kadok saa m’ebino ku yeny mi yom man mi camu piny moko de, ebed eweko ngo kaka mi mio lembatuca ukadh mananu. (Mk. 6:30-34; Yoh. 4:4-34) Kinde ma wabesomo pi tic pa Yesu i Biblia, m’umbe jiji lembene cwaluwa nilubo lapor pare calu m’ugam ucwalu jukwenda.​—Mat. 4:19, 20; Lk. 5:27, 28; Yoh. 1:43-45.

² Wakenenu yo ma tung’ tung’ ma Jukristu gibetio ko tin eni pi nirweyo lembanyong’a ma Yesu Kristu ucaku there oro kago 2 000 kawoni.

³ Wa Jumulembe pa Yehova, wang’eyo nia pire tie tek dit nirweyo lembanyong’a ot kubang’ ot m’umbe nikalu ot moko. Wadaru tio ku yo maeno lee dit, uketho edoko ni ayi ma jung’io kowa. Adwogi ma cuu mandha ma wanwang’u, unyutho nia etie lembe mi rieko nitio  ku yo maeno pi niweco ku dhanu milioni dupa pi saa ma nok. (Mat. 11:19; 24:14) Ubenen kamaleng’ nia lembanyong’a ma ot kubang’ ot, utie yo ma cuu ma wanyutho ko nia wamaru Yehova man bende wedi mwa.​—Mat. 22:34-40.

⁴ Lembanyong’a ma ot kubang’ ot ucaku ngo kende kende i kum Jumulembe pa Yehova mi rundi ma tin. Bende, jakwenda Paulo unyutho nia ebed ecidho i udi mi dhanu pi niponjogi. Ekoro pi tic pare ni juliew mi cokiri mir Efeso kumae: ‘Ugambre i ceng’ ma tienda lar unyono i Asia, . . . alworo ngo niyero iwu gin ceke m’ubedo ni kuloka, ku ponjowu kele . . . udi ku ba udi.’ I yo maeno man mange bende, Paulo ‘ubed utuco mii ni Juyahudi ku Juyunani bende ya gilok cwinygi ba Mungu, man gibed ku yioyic yo ba Rwoth mwa Yesu Kristu.’ (Tic. 20:18, 20, 21) I saa maeca, jubim mi Roma gibed gicwalu dhanu niworo mungu m’araga man dupa gibino “yenyo ka mungu.” Pire bino tek nia dhanu giyeny m’umbe galu “Mungu m’ucwio ng’om ku gin ceke ma ni i ie,” man ‘m’ung’olo ni dhanu ceke ku kaka ceke ya gilok cwinygi.’​—Tic. 17:22-31.

⁵ Tin eni, yeny mi rweyo lembanyong’a ni dhanu utie lee nisagu zoo. Ajiki mi ng’om maeni ma rac udong’ ceng’ini magwei. Pieno, kwayu wamed amora mwa ameda i ticne. Yo mange mbe ma ber nisagu maeni ma wacaku tio ko niai con, niwacu niwotho ot kubang’ ot pi niyenyo dhanu ma kec mi lemandha ubenegogi. Yoje tie kud adwogi ma ber tin eni, calu m’ubino i rundi pa Yesu ku jukwenda pare.​—Mk. 13:10.

 ⁶ Nyo ibed idikiri lee i rweyo lembanyong’a ot kubang’ ot? Ka eyo, ng’ei nia ibenyayu mutoro i Yehova. (Eze. 9:11; Tic. 20:35) Re saa moko rweyo lembanyong’a ot kubang’ ot copo bedo yot ungo iri. Nyo itie ku twoyo, kunoke iberweyo i kabedo ma dhanu dupa gibed gimaru ngo niwinjo lemandha i ie. Nyo judong ng’om ucero tic mwa, kunoke nyo itie jalewic man ibed inwang’u nia etie tek dit iri nicaku wec ku ng’atu m’ing’eyo ngo. Pieno, saa ceke kan iberweyo ot kubang’ ot, lworo moko bemondo i ii. Cwinyi kud utur. (Ai 4:10-12) Umego ku nyimego dupa mi ng’om mange bende gibenwang’iri ku peko ma rom ku peri.

⁷ Yesu ung’olo ni julubne kumae: “Nen, wanuti wakudu thiri thiri, cil i kajik mi ng’om.” (Mat. 28:20) Lembang’ola maeno medo amora i kumwa pi nitimo tic mi ketho dhanu gidok julub. Wawinjara bende calu jakwenda Paulo m’uyero kumae: “Acopo timo gin ceke ni kume m’emio ira tego.” (Flp. 4:13) Pieno, dik cingi i kum yub ceke m’umakere i cokiri pi nirweyo ot kubang’ ot. Kan iberweyo karacelo kud umego ku nyimego, gibitielo cwinyi man gibimio iri kony m’itie ku yenyne. Rwo pi ninwang’u tego mi voyo macero ceke m’icopo bedo ko, man tim kero peri zoo nirweyo lembanyong’a kud amora.​—1 Yoh. 5:14.

⁸ Kan iberweyo lembanyong’a ni dhanu, ibinwang’u kaka mi nyutho igi “thelembe mi genogen” peri. (1 Pet. 3:15) Ibicaku neno ma ber mandha tung’ tung’ m’utie i kind ju ma gitie ku genogen mi Ker pa Mungu man ju ma gimbe ku genogen. (Isa. 65:13, 14) Ibibedo kud anyong’a ning’eyo nia ibeworo cik ma Yesu umio, ya wuwek ‘der mwu urieny,’ man ibibedo ku rwom ma dit mi  konyo dhanu gituc ning’eyo Yehova man lemandha ma terojo i kwo ma rondo ku rondo.​—Mat. 5:16; Yoh. 17:3; 1 Tim. 4:16.

⁹ Jubed jupangu lembanyong’a ma ot kubang’ ot i thum pa yenga man bende i kind yenga. Kaka ma nwang’u dhanu tie tek i ie i saa mi dieceng’ ke, cokiri moko bepangu nirweyo i mwony pa ceng’. I kabedo ma kumeno dhanu beyenyo maru nijolo welo asagane i saa mi reto kunoke uthieno kakare nijologi i saa mi kugweno.

¹⁰ Yesu ung’olo ni julub pare nia ‘giyeny’ ju m’uromo. (Mat. 10:11) Pi niyenyo ju m’adundegi bedo ayika, Yesu ujik ungo kende kende nirweyo ot kubang’ ot. I andha, ebed emio lembatuca i saa moko ci, kadok i saa m’epangu ku m’epangu ngo bende. (Lk. 8:1; Yoh. 4:7-15) Jakwenda Paulo bende ubed urweyo lembanyong’a ni dhanu i kabedo ma tung’ tung’.​—Tic. 17:17; 28:16, 23, 30, 31.

¹¹ Tin bende, lembakeca mwa utie nitundo kororo i bang’ dhanu ceke ku lembkwenda mi Ker. Pien, ubekwayu nia walub kite ma Yesu man jukwenda pare gibed gitimo ko tic mi ketho dhanu gidok julub, man bende waketh bodho mwa urombi ku lembe mi ng’om maeni m’ubecikulokere man kwo mi dhanu mi kabedo mwa. (1 Kor. 7:31) Ku lapor, jurwei dupa benwang’u adwogi ma cuu ka giberweyo i kabedo mi tic man mi kuloka. Nirweyo lembanyong’a i ngudu, kaka ma juyiko pi nambu man bende i parking’, utie kud adwogi ma cuu i ng’om ma dupa. Cokiri moko beketho meza man prezantwar  i teritwar migi mi lembanyong’a. M’umedo maeno, bethel copo pangu pi rweyo lembanyong’a ma segi i kaka ma dhanu becidho akeca i ie i adhura ma dongo, man gilwong’o umego ku nyimego mi cokiri ma tung’ tung’ nidikiri i ie. Lembuno konyo dhanu ma benwang’iri ngo i pacu migi pi niwinjo lembanyong’a kaka moko ci ma gini ie.

¹² Tekene warombo ku dhanu m’ufoyo ponji mi Biblia i kabedo ma dhanu bepong’ i ie, wacopo mio igi girasoma m’urombo ku yeny migi. Kara ma cen idok imed lembe ma wuweco i wie ku ng’atini, icopo mio ire adres peri, nyingi man namba peri mi telefon. Icopo bende nimoko kude nindo mi liew, ninyutho ire kusika mwa jw.org, kunoke ninyutho ire kaka ma jutimo i ie coko ceng’ini kude. Ibinwang’u nia nirweyo kaka ma dhanu bepong’ i ie utie yo ma ber mandha m’iromo medo ko tic peri.

¹³ Tic ma Jukristu gicikiri nitimo tin eni utie ngo kende kende nirweyo lembanyong’a ni ng’atini wang’ acel kumeni. Pi nikonyo ng’atini cuu nitundo emok i kum lemandha ma terojo i kwo ma rondo ku rondo, romo kwayu ibed idok i bang’e kendo kendo kara etuc nimedere man edok Jakristu m’uteng’ini.

¹⁴ Yesu uyero ni julub pare kumae: “Wubibedo jumulembe para . . . cil i tung’ ng’om bende.” (Tic. 1:8) Re eng’olo igi bende kumae: “Wucidhi, wuketh [dhanu m’i kind] thek ceke dok julub, . . . wuponjgi ya giwor gin ceke m’ang’olo iwu.” (Mat. 28:19, 20) Ka wabetimo liew ma tung’ tung’, wacopo nwang’u anyong’a i tic  pa Yehova. Dhanu ma gifoyo ku lemandha kinde ma warombo kugi wang’ ma kwong’a, gicopo maru bende nia wadok waliewgi kendo. Kan ibecikudok i bang’ ng’atini pi nimedo tok lembe mi Biblia ma wular wuweco i wie, ibituc nitielo yioyic pare i Mungu man nikonye kara eng’ei yeny pare mi tipo. (Mat. 5:3) Kan ibed iyikiri ma ber man ibed ipangu nidok liewo ng’atini i saa m’icopo nwang’e i ie i pacu, iromo tuc nicaku kude ponji mi Biblia. Wang’ ma pol kan ibedok i liew ma tung’ tung’, kwayu ibed ku lembakeca maeno. Wabed wapidho ngo kende kende kodhi mi lemandha, ento wakwoyo bende pii iwi kodhine.​—1 Kor. 3:6.

¹⁵ Saa moko jumoko copo nwang’u nia etie yot ungo nidok liewo dhanu. Nyo fodi ing’iyo peri nirweyo i adundo kumeni, man ibefoyo ku kit lembanyong’a maeno. Re kan ibeparu nia kwayu idok iliew dhanu pi niweco kugi kendo iwi lembe mi Biblia, icopo nwang’u nia ve ibiromo ngo. Ento tek iyikiri ma ber, ibinwang’u tegocwiny lee. Tim kero nitio ku paru ma beco ma wabed wanwang’u i coko m’i kind yenga. Iromo bende nikwayu jarwei moko m’udaru ng’iyo ma ber kara wucidh wukude.

¹⁶ Kinde ma Filipo ubino weco ku ng’atu moko m’ujolo yioyic mi Juyahudi man m’ubino somo Lembe pa Mungu, egam epenje kumae: “Ing’eyo gin m’isomo no?” Ng’atune dwoko ire kumae: “Acopo nenedi, tek ng’atu  moko kutelo wia ngo?” Biblia unyutho i Tic mi Jukwenda thek 8 nia Filipo ucaku koro ire lembanyong’a iwi Yesu niai i theng Lembagora maeno m’ebino somo. (Tic. 8:26-36) Wang’eyo ngo nia Filipo utimo saa ma rukani ku ng’atuno, ento ekoro ire lembe cuu nitundo ng’atune uyio man ekwayu nia elim batizo. E egam edoko jalub pa Yesu Kristu.

¹⁷ Dhanu dupa tin eni ging’eyo ngo cuu lembe mi Biblia, pieno ecopo kwayu idok iliewogi wang’ dupa man iponj kugi Biblia cuu mandha pi yenga moko, dwi moko kunoke kadok oro acel kadi oro dupa kara yioyic migi udok tek man gituc niromo pi nilimo batizo. Re cirocir man mer m’ibenyutho pi nikonyo dhanu m’adundegi tie atira gidok julub, bimio iri mugisa calu ma Yesu uyero nia, “mio en e mugisa ma sagu gamu.”​—Tic. 20:35.

¹⁸ M’umbe jiji, ibimito itel wi ponji mi Biblia ku dhanu man ibitio ku girasoma ma juyiko athothi pi ponjine. Kan ibetio ku telowic ma wabed wanwang’u i coko m’i kind yenga, man iberweyo karacelo ku jurwei m’ung’iyo ma ber, ibituc nitelo cuu wi ponji mi Biblia ku dhanu man ibikonyo gin de gidok julub pa Yesu Kristu.

¹⁹ Tekene itie ku yeny mi kony pi nicaku man nitelo wi ponji mi Biblia, kwai jadit cokiri moko kunoke Jamulembe moko ma tie ku bodho mi telo wi ponji mi Biblia ukonyi. Paru ma jubed juwodho i Buku mi coko mi Kwo man tic man lanyuth ma tung’ tung’ ma jubed jutimo i coko, romo bende nikonyi. Keth genogen peri iwi Yehova man kor ire pi yeny peri nikadhu i rwo. (1 Yoh. 3:22) Pieno kan ecopere, keth lembakeca mi telo wi ponji mi Biblia ku dhanu mange bende m’uweko juruot peri. Kan  ibed itelo wi ponji Biblia, mutoro peri i tic mi lembanyong’a bigam medere.

²⁰ Ka wabekonyo dhanu kara ging’ei Yehova Mungu man gidok julub pa Yesu Kristu, gibimondo bende i cokiri mi Jukristu. Japonj Biblia bitimo mediri man ebiteng’ini i tipo kan enyang’ nia dilo maeni utie pa Yehova man ebediko cinge ku dilone. Pieno, pire tie tek niponjogi kara gitim kumeno. Juyiko video ma tung’ tung’ man bende nyathibuku Jukani m’Ubetimo Yeny pa Yehova Tin? pi thelembe maeno. M’umedo maeno, lembe moko ma nwang’ere i wic mir 4 mi buku maeni romo bende nikonyo.

²¹ Niai m’icaku ponjo Biblia ku ng’atini ci, konye enyang’ nia Yehova utie ku dilo m’ebetio ko kara tic mi lembanyong’a utimere ma ber iwi ng’om tin eni. Nyuth ire bero mi girasoma ma tung’ tung’ ma konyowa pi niponjo Biblia, man kor ire kite ma tic mi wodho man mi poko girasomane ubetimere ko i ng’om zoo ku kony mi dhanu m’umiiri ku berocwinygi ni Mungu. Lwong’ ng’atu m’iponjo kude Biblia ubin bende i coko mwa i Ot Ker. Kor ire kite ma cokone timere ko man nyuthe ni umego ku nyimego. Icopo bende nikonye kara etuc ning’iyo ma ber kud umego ku nyimego mange i coko mwa ma dongo. I saa maeno man mange de, keth ng’atu ma nyen unen en gire ayi ma dhanu pa Yehova gibenyutho ko mer, ma tie kite m’anzilo ma jung’io ko Jukristu mandha. (Yoh. 13:35) Tekene ng’atu ma nyen ubemedere  nifoyo ku dilo pa Yehova, mer pare ku Yehova de bituc nimedere.

²² Jukristu mi rundi ma kwong’a gibed girweyo Lembe pa Mungu kud amora. Gibed gigoro Lembagora ku cing’gi pi ninyayu wende pi ponji migi gigi man pi ponjo cokiri bende. Gibed gitielo cwiny dhanu mange nia gisom Lembe pa Mungu. Lembagora ma giloko ku cing’gine wende bino nok, pieno pigi bino tek lee dit. (Kol. 4:16; 2 Tim. 2:15; 3:14-17; 4:13; 1 Pet. 1:1) Tin eni, Jumulembe pa Yehova gibetio ku bodho mi rundi maeni pi niwodho milioni dupa mi Biblia man bende girasoma ma tung’ tung’ m’ukoro i Biblia. Eno uketho i ie trakt, nyithibuku, buku man gazeti i dhok dupa dit.

²³ Kinde m’iberweyo lembanyong’a ni dhanu, tim kero nitio ku girasoma ma tung’ tung’ ma dilo pa Yehova uwodho pi niponjo Biblia. M’umbe jiji, iromo bedo kud ava mi koro ni jumange lembe m’isomo man m’iponjo i girasoma mi Jumulembe pa Yehova, pilembe idaru ng’eyo bero m’inwang’u in giri i igi.​—Ebr. 13:15, 16.

²⁴ Tin eni, wend dhanu m’ubetio kud Internet calu yo ma kwong’a mi nwang’u lembang’eya ubemedere ameda. Pieno, m’umedo girasoma mwa ma tung’ tung’ m’ukoro i Biblia, kusika mwa m’anzilo mir Internet, jw.org, tie yo ma cuu mandha mi mewo lembanyong’a. Dhanu dupa dit i wang’ ng’om zoo betio ku ordinater pi nisomo man niwinjo som mi Biblia ku mi girasoma mwa m’ukoro ie ma jumaku i dhok ma tung’ tung’. Jumoko ma bebedo ku jiji mi weco kudwa kunoke ma gicopo  nwang’u ngo kaka mi weco ku Jumulembe yot yot, gicopo tio ku jw.org, i pacu migi pi ning’eyo lembe iwi yioyic mwa.

²⁵ Pieno, wabed wayawu pi kusika mwa jw.org saa moko ci m’ukwayere. Ka ng’atu moko upenjo penji iwi yioyic mwa, wacopo tio ku telefon, tablet, kunoke ordinater pi nidwoko wang’ penjine keca keca. Ka warombo ku ng’atu ma weco dhok mange, kadok dhok mi babuba, wacopo nyutho ire kusika mwa mir Internet kara enwang’ Biblia man girasoma i dhokne. Jurwei dupa betio ku video moko ma tie i kusika mwa mir Internet pi nicaku wec ku dhanu iwi Biblia.

²⁶ Yesu uyero ni dhanu m’ubino winje kumae: ‘Wun wu der m’i ng’om. . . . Wek der mwu urieny i wang’ dhanu; kara ginen tic mwu ma ber, giyung Wegwu de ma ni i polo.’ (Mat. 5:14-16) Julub maeno ginyutho nia giworo cik pa Mungu pilembe gilubo lapor pa Yesu, m’uyero pire gire kumae: “An a der m’i ng’om.” Andha, Yesu uketho “der mi kwo” urieny pi nikonyo dhanu ceke m’ubino winje, man eweko lapor ni Jukristu ceke.​—Yoh. 8:12.

²⁷ Jakwenda Paulo bende uweko lapor ma cuu ma wacikara nilubo. (1 Kor. 4:16; 11:1) Kinde m’ebino i Athene, ebed erweyo i soko kubang’ ceng’ ni dhanu m’ubino keca. (Tic. 17:17) Jukristu mi Filipi gilubo lapor pare. Pieno, Paulo ugoro igi nia kadok gibino kwo ‘i kind dhanum’utuk m’ugondri ma gi juco de, kud i kind joca gibino rieny calu der i ng’om.’ (Flp. 2:15) Wan de tin wacopo ketho lemandha mi Ker rieny nikadhu kud i wec man i  timo mwa, kinde ma wanwang’u kaka mi weco ku dhanu iwi lembanyong’a. Andha, ka watie dhanu m’atira man ma pwe, lapor mwa kende ci biketho dhanu bituc nineno ngbeng’ nia watie tung’ ku ng’om maeni. Ento ka warweyo igi lembanyong’a, gibituc ninyang’ nia pirang’o watie tung’.

²⁸ Jumulembe pa Yehova dupa tin eni gibed girweyo ni dhanu ma girombo kugi i tic, i somo, i mutukari, i jambwotho ma tung’ tung’, kunoke saa moko ci ka gibecidho i tic migi ma kubang’ ceng’. Ka watie i wotho de, wacopo nwang’u kaka mi weco ku dhanu ma wabewotho kugi. Ng’atuman m’i kindwa ucikere nisayu yo ceke mi loko wec m’ebeweco ku ng’atini pi nimio ire lembatuca. Dong’ saa moko ci, wabed ayika nirweyo ni dhanu.

²⁹ Wabituc nitimo kumeno yot yot, ka wang’eyo nia ticne ubepaku Jacwic mwa man ubeyungo nyinge. Bende, wabikonyo dhanu m’adundegi tie atira gituc ning’eyo Yehova, gitim bende ire man gibed ku genogen mi kwo ma rondo ku rondo ka giyio Yesu Kristu. Yehova foyo dit ku kero maeno ma wabetimo man ekwane ni tic ma leng’.​—Ebr. 12:28; Nyu. 7:9, 10.

³⁰ Yehova ubemito nia jurwei lembkwenda mi Ker i ng’om zoo, i adhura man i kiaru bende. Pieno, biro mi filial bemio teritwar mi lembanyong’a ni cokiri man ni jurwei ma ginwang’iri i kaka ma bor ku cokiri. (1 Kor. 14:40) I rundi ma kwong’a bende Mungu ugam utelo wi yub m’urombo ku maeno. (2 Kor. 10:13; Gal. 2:9) Calu ma tic mi Ker ubemedere pio pio i kajik ceng’ maeni,  cokiri copo timo tic lee ka gipangu program ma ber pi nirweyo i teritwar migi.

³¹ Janen wi tic mi lembanyong’a re ma telo wi yub maeno. Jucopo mio tic mi poko teritwar mi lembanyong’a ni jakony tic. Kwond teritwar mi lembanyong’a tie ario, acel tie mir ungu mi lembanyong’a, m’ucelo ke pa ng’atini. I cokiri ma teritwar mi lembanyong’a utie nok i ie, jucopo mio moko ni ungu kara gibed girwei i ie i the telowic pa janen wi ungune. Ento, ka teritwar mi lembanyong’a utie lee, jarweiman copo bedo ku ma pare gire.

³² Jarwei ma tie ku teritwar pare mi lembanyong’a copo ng’io nicirweyo kadok i saa ma cokiri upangu ngo coko mi lembanyong’a, kunoke kan ecopere ngo ire nicidho i coko mir ungu migi. Ku lapor, jurwei moko gibed gikwayu jumii igi teritwar mi lembanyong’a ceng’ini ku kaka tic migi kara gibed girwei i ie i saa mi yom kunoke i ng’ei tic. Juruot moko bekwayu teritwar migi mi lembanyong’a ubed ceng’ini kugi kara gibed girwei i ie i saa mir uthieno. Ka teritwar mi lembanyong’a utie ceng’ini ku jarwei, ecopo tio cuu ku saa m’epangu pi tic mi lembanyong’a. Saa moko, jurwei dupa gicopo cirweyo bende i teritwar mi lembanyong’a ma jumio ni ng’atu acel. Kan ibemito jumii iri teritwar mi lembanyong’a, icopo kwayu i bang’ jakony tic ma tio iwi lembene.

³³ Ka jumio teritwar mi lembanyong’a ni ungu kunoke ni jarwei moko, janen wi ungu kunoke jarweine ucikere nitimo kero m’ukwayere pi niweco ku ng’atu moko kokoro kubang’ ot. Yub ceke ma jubemaku pi nirweyo mii i teritwar moko ucikere nirombo ku lembe ma cik ubekwayu.  Ungu kunoke jarwei ma jumio ire teritwar mi lembanyong’a ucikere nitimo kero nirweyo i ie zoo man nidare i kind dwi ang’wen. Kan ethum, janen wi ungu kunoke jarweine ucikere ninyutho ni jakony tic ma neno wi teritwar mi lembanyong’a. Nimakere ku lembe ma tung’ tung’, janen wi ungu kunoke jarweine copo gwoke pi nidok timo i ie kendo kunoke ecopo dwoke i bang’ jakony tic ma neno wi lembene.

³⁴ Ka dhanu ceke mi cokiri gibediko cing’gi adika, jucopo timo tic i teritwar mi lembanyong’a m’umbe nikalu ot moko acel de. Bende jurwei dupa gicopo berweyo ngo i teritwar ma rom i saa de ma rom, kum eno copo nyayu ng’ecwiny i dhanu ma warweyo igi. Kumeno re ma wabinyutho nia wabeworo umego ku nyimego mwa man bende dhanu mi teritwar mwa.

³⁵ Dhanu ceke gitie ku yeny mi ng’eyo lembe iwi Yehova Mungu, Wode man iwi Ker pa Mungu. (Nyu. 14:6, 7) Watie kud anyong’a nikonyo dhanu ma weco dhok ma tung’ tung’ kara gilwong’ nying’ Yehova pi ninwang’u both man gikwo nimakere ku kura mi Jukristu. (Rum. 10:12, 13; Kol. 3:10, 11) Peko ma kani ma wabed wanwang’u ka waberweyo i kabedo ma dhanu weco i ie dhok ma tung’ tung’? Jucopo timo ang’o pi nidaru peko maeno man nimio kaka ni dhanu dupa kara giwinj rwonglembe mi Ker i dhok ma ginyang’ i ie ma ber?​—Rum. 10:14.

³⁶ Jubed jumio teritwar mi lembanyong’a ni cokiriman nimakere ku dhok mi cokirine. Pieno, i kaka ma juweco  dhok dupa i ie, cokiri mi dhok ma tung’ tung’ berweyo i teritwar ma rom. Kaka ma kumeno, pire tie tek nia jurwei mi cokiriman giketh wigi asagane pi nirweyo ni dhanu ma weco dhok mi cokiri migi. Jucikiri nitimo bende kumeno i saa mi kampany ma tung’ tung’ mi lwong’o dhanu kubang’ oro. Ento ka waberweyo kaka ma dhanu bepong’ i ie man i saa ma jupangu ngo, wacopo niweco ku dhanu ceke man nimio girasoma i dhok moko ci.

³⁷ Saa moko, ecicopere ngo ni cokiri mi dhok moko niwotho ku lembanyong’a nja i theng teritwar migi ma tie bor kugi. I saa ma kumeno, kwayu ju ma neno wi tic mi lembanyong’a i cokiri ceke ma nwang’ere i kabedone giwec i kindgi pi ning’io karacelo yo ma cuu ma juromo rweyo ko ni dhanu ceke mi teritwar. Eno bimio kaka ni dhanu ceke niwinjo rwonglembe mi Ker, man jurwei gibinyotho ngo saa migi mananu niberweyo i kabedo ma rom man i saa de ma rom.​—Rie. 15:22.

³⁸ Wacikara nitimo ang’o ka ng’atu m’ujolowa weco dhok m’ukoc ku mwa? Kwayu kud wapar nia jurwei mi dhok pare bitundo i bang’e. Jurwei moko giponjo ayi ma yot mi caku wec i dhok ma gibed ginwang’u wang’ ma pol i teritwar migi mi lembanyong’a. Wacopo nyutho ni ng’atu ma weco dhok mange yo m’eromo somo kunoke m’eromo toko ko girasoma i dhok pare kud i kusika mwa mir Internet jw.org, kunoke wacopo yero nia wabikelo ire girasoma i dhok pare.

³⁹ Ka waneno nia ng’atu moko ufoyo andha ku ponji mwa, kwayu watim kero ninwang’u umego kunoke nyamego ma romo medere nikonye i dhok m’enyang’ i ie.  Wacopo bende ninyutho ire kaka ma jutimo i ie coko i dhok pare. Kan ebemito emedere niweco ku ng’atu moko m’ung’eyo dhok pare, wacopo konye etii ku jw.org pi ninyuthere. E biro mi filial bitimo kero ninwang’u jarwei moko, ungu mi cokiri, kunoke cokiri moko ma romo medere nikonye.

⁴⁰ Wacikara nimedara asu nikonyo ng’atu m’ufoyo ku ponji mwa nitundo ma ng’atu ma weco dhok pare binwang’ere. Saa moko biro mi filial romo nyutho ni judong cokiri nia ng’atu ma weco dhok pare unwang’ere ngo. I saa maeno, kwayu waii nikonyo ng’atune asu kara emedere nifoyo ku lemandha. Kan ecopere, wacopo ponjo Biblia kude, ma nwang’u wabetio ku girasoma mi dhok pare. Ka watio ma ber ku cal man waketho ewoth somo giragora ma junyutho, ng’atune romo tundo ninwang’u ng’eyong’ec moko mir ukungo iwi Biblia. Tekene wat pare moko nuti m’ung’eyo dhok pare ku dhok peri, saa moko ecopo bedo ayika niwotho loko wec mwune.

⁴¹ Kara watel ng’atu m’ujolo lemandha umond i dilo pa Mungu, kwayu walwong’e i coko mwa ma tung’ tung’, kadok eromo wok nyang’ ceke ceke ngo i program de. Kinde ma jubesomo giragora moko, wacopo konye enwang’ giragorane i Biblia mi dhok pare, tekene moko nuti. Nidikere kud umego ku nyimego kende kende ci copo konye niteng’ini man nitimo mediri i thenge mi tipo.

⁴² Nyathin ungu mi cokiri: Nyathin ungu mi cokiri bebedo ku wend jurwei moko ma nok ma rweyo i dhok mange m’uweko dhok mi cokiri, kadok nwang’u jadit cokiri  kunoke jakony tic m’uromo ma copo betelo wi coko kubang’ yenga umbe i dhokne de. Bethel copo yio nia cokiri moko ubed ku nyathin ungu mi cokiri tekene lembe ma jurieyo piny e upong’o:

1.  (1) I kabedo maeno, wend dhanu ma weco dhok mange m’uweko dhok mi cokiri utie lee.

2.  (2) Wend jurwei moko nuti kadok nyanok ma ging’eyo dhokne kunoke ma gitie ayika niponjo dhokne.

3.  (3) Guriri mi judong cokiri utie ayika nitelo wi tic mi lembanyong’a i dhok maeno.

 Ka guriri mi judong cokiri ubemito nicaku nyathin ungu moko mi cokiri, gibiweco ku jaliew mi twodiri. Copere nia eng’eyo cokiri mange ma gibeii bende nirweyo ni dhanu ma weco dhokne, man ecopo ng’eyo lembe moko ma pire tek ma romo konyo pi ning’io nia cokiri ma kani dhe m’ucikere nibedo ku nyathin ungune. Ka judaru nwang’u cokirine, judong cokiri bioro barua i bethel pi nikwayu nia cokiri migi ung’eyere nia etie ku nyathin ungu moko mi cokiri.

⁴³ Ungu mi cokiri: Bethel copo yio nia cokiri moko ubed kud ungu moko mi cokiri tekene lembe ma jurieyo piny e upong’o:

1.  (1) Dhanu tie lee ma gibefoyo ku lemandha man ubenen ngbeng’ nia mediri copo bedo nuti i dhokne.

2.  (2) Wend jurwei moko nuti kadok nyanok, ma giweco dhokne kunoke ma gibeponje.

3.  (3) Jadit cokiri kunoke jakony tic moko m’uromo utie kokoro ma romo betelo wi coko kadok acel kunoke  theng coko moko, calu ve korolembe mi dhanu ceke, kunoke ponji mi Otkur ma Wiw kubang’ yenga i dhokne.

 Tekene lembe maeno upong’o i mukero m’ukwayere, guriri mi judong cokiri bikiewo i barua lembe ceke iwi ungune man gibiore i bethel pi nikwayu nia cokiri migi ung’eyere thwolo thwolo nia etie kud ungu mi cokiri. Umego m’ubetelo wi lembe i ungu maeno, jubilwong’e “janen wi ungu” kan etie jadit cokiri, man “jakony mir ungu” kan etie jakony tic.

⁴⁴ Ka judaru caku ther ungu mi cokiri, guriri mi judong cokiri m’ucaku ther ungune bing’io ka nyo gicikiri nimedo bende theng coko mange, man nyo giromo betimo cokone wang’ adi i kind dwi acel. Jucopo bepangu bende coko mi tic mi lembanyong’a pir ungu maeno. Umego ku nyimego ceke mir ungune gitimo i the telowic mi guriri mi judong cokiri. Judong cokiri gibimio telowic m’ukwayere man gibitimo kero ceke nipong’o yeny mir ungune. Kinde ma jaliew mi twodiri ubeliewo cokiri ma tie kud ungu, ebitimo bende karacelo kud ungune, man ebikiewo rapor moko i adundo ni biro mi filial iwi mediri man iwi yeny moko ci mir ungune. I ng’ei nindo, ungu maeno romo doko bende cokiri acel ma zoo. Ka dhanu ceke gibetio ku telowic mi theokrasi, Yehova bibedo kud anyong’a.​—1 Kor. 1:10; 3:5, 6.

⁴⁵ Jakristuman m’uthiero kwo pare ni Yehova ucikere nirweyo lembanyong’a ni dhanu mange. Yo tie dupa dit ma waromo timo ko kumeno, ento dupa m’i kindwa  wabed wafoyo nicirweyo karacelo kud umego ku nyimego mange. (Lk. 10:1) Pi thelembe maeno re ma cokiri berombo karacelo i kind yenga man i thum pa yenga pi nitimo coko mi lembanyong’a. Nindo mi yom mi ng’om bende tie saa ma ber mi rweyo lembanyong’a karacelo, kum nwang’u umego ku nyimego dupa gicidho ngo i tic mi kum. Komite mi tic mi cokiri pangu program mi coko ma tung’ tung’ mi lembanyong’a i saa man i kabedo m’ukwayere, dieceng’ kunoke reto dhu uthieno.

⁴⁶ Rweyo lembanyong’a ku jurwei mange konyo umego ku nyimego nitimo tic karacelo man nitielo cwinygi i kindgi. (Rum. 1:12) Juromo poko jurwei ma nyen karacelo ku ju m’udaru ng’iyo ma ber kara ginwang’ bodho man bende ponji. I kabedo moko ecibedo ber nia jurwei ario kunoke nisagu girwei karacelo i ungu pi bedomoth migi. Kadok ipangu nirweyo ini kendi de, re nicidho i coko mi lembanyong’a copo tielo cwiny dhanu ceke. Kan ing’eyo nia jumange de giberweyo i teritwar ma cokiri mwu berweyo lembanyong’a i ie, eno ci copo mio iri tegocwiny. Etie ngo cik nia juyab yo man jurwei mange gibed gidikiri i coko ceke mi rweyo lembanyong’a ma cokiri upangu, asagane ka cokone betimere kubang’ ceng’. Re ecibedo ber igi nicidho kokoro kadok i cokone moko kubang’ yenga.

⁴⁷ Dong’ wan ceke walubu batiend Yesu ku jukwenda pare! Wang’eyo andhandha nia Yehova bimio mugisa iwi kero ma wabetimo pi nidikara kud amora i tic maeni ma pire tek mi rweyo lembanyong’a mi Ker.​—Lk. 9:57-62.