PONJI MIR 06
Kwo ucaku nenedi?
Biblia uyero pi Mungu kumae: “Icwiyo piny ceke.” (Lembanyutha 4:11) Nyo iyiyo lembuno? Dhanu moko giparu nia kwo ucaku gire mbwang’ kumeni, nia ng’atu moko mbe m’ucwiye. Ka eno tie lemandha, nwang’u watie i ng’om keni de mi mananu! Re kan andha Yehova re m’ucwiyo kwo, nwang’u ecwiye ngo mi mananu ento ku thelembe moko kokoro. a Wakenen lembe ma Biblia ukoro iwi kite ma kwo ucaku ko, man gin ma copo cwaluwa niyiyo nia Biblia uyero lemandha.
1. Ng’om man nyikaluku ucaku nenedi?
Biblia uyero kumae: ‘Ku kwong’a Mungu cwiyo polo ku ng’om.’ (Thangambere 1:1) Jururieko ma pol mi ng’om de giyiyo nia ng’om ku nyikaluku ma tung’ tung’ gibedo kud acaki migi. Mungu ucwiyo piny maeno nenedi? Etiyo ku “tipo pare,” niwacu tego pare m’etimo ko tic, pi niyiko piny ceke m’i polo ku ng’om, uketho i iye udul nyikaluku ku piny mange bende dupa.—Thangambere 1:2.
2. Pirang’o Mungu ucwiyo ng’omi?
Yehova ‘ucwiyo [ng’om] ni uvuru ngo, ento kara jubed i iye.’ (Isaya 45:18) Ecwiyo ng’om kara ubed ni kabedo ma ber mandha ma dhanu bikwo i iye nja ku nja kud anyong’a. (Som Isaya 40:28 man 42:5.) Jururieko bende giyero nia ng’om mwa eni utie kabedo ma cuu magwei nisagu piny mange ceke ma ve ng’om m’ecwiyo. M’uweko ng’om ci, ginwang’u ngo kabedo mange m’utie ku piny ceke ma dhanu copo kwo ko.
3. Dhanu ukoc nenedi ku lei?
I ng’ei cwiyo ng’om, Yehova udok ucwiyo bende piny mange ma kwo ni igi man ekethogi iwi ng’ombe. Ecwiyo kwond lum ku lei ma tung’ tung’. I ng’eye, ‘Mungu dok ucwiyo dhanu i ayine gire.’ (Som Thangambere 1:27.) Dhanu ukoc nenedi ku giracwiya mange? Calu Mungu cwiyowa i ayine gire, watie ku copo mi nyutho kite kunoke kurayung pare, calu ve mer man bedopwe. Ecwiyowa bende ku copo mi ponjo dhok mange, mi foyo ku piny ma beco, man mi maru mizik. Wa dhanu watie tung’ ku lei, pilembe wan wacopo woro Mungu man nitimo ire.
MED NYANG’ PERI
Wakenen gin m’unyutho nia andha Mungu ucwiyo kwo acwiya, man nia lembe ma Biblia ukoro iwi cwic utie lemandha. Wanen bende nia kite kunoke kurayung ma beco ma wa dhanu wabenyutho ubeponjowa ku lembang’o iwi Mungu.
4. Jucwiyo kwo acwiya
Dhanu gibecuku nwang’u yung ceke pi piny ma gibeyiko, ma ke gibeporo kwa ba piny moko ma Mungu re m’ucwiyo. I andha ca, ng’a m’ucikere ninwang’u yung maeno? Nen VIDEO, man i ng’eye wuwec iwi penji m’ulubo e.
-
Dhanu giporo ba piny ma kani ma Mungu ucwiyo pi niyiko piny mange?
Ot ceke m’unuti, ng’atu moko nuti kokoro m’ugiero. Ka ng’a ke m’utuc nigiero kunoke m’ucwiyo piny ceke m’udhokowa e? Som Juebrania 3:4, man i ng’eye wuwec iwi penji m’ulubo e:
-
I kind piny ma Mungu ucwiyo, ma kani m’ubewang’u ii? Pirang’o?
-
Nyo wacopo yiyo nia andha jucwiyo ng’om ku polo ku piny ceke m’i igi acwiya? Pirang’o wacopo yiyo?
Nyo ing’eyo?
Icipo nwang’u girasoma man video ma tung’ tung’ iwi thiwiwec maeni i jw.org, kaka ma jukiewo nia “Nyo gin maeni uwok gire?” man “Paru ma tung’ tung’ iwi kite ma kwo ucaku ko.”
“I andha, kubang’ ot ceke ng’atu moko giero en, ento ng’atu m’ugiero piny ceke utie Mungu”
5. Thelembe m’ubecwaluwa niyiyo nia lembe ma Biblia ukoro iwi cwic utie lemandha
I buku mi Thangambere thek 1, Biblia ukoro kite ma ng’om ku kwo ceke mi iye ucaku ko. Nyo wacopo yiyo lembe m’ekorone kunoke nyo etie uda moko ma juthungo athunga? Nen VIDEO, man i ng’eye wuwec iwi penji m’ulubo e.
-
Nyo Biblia ubeponjo nia jucwiyo ng’om ku kwo mi iye pi nindo abusiel ma nindoman utie ku saa 24?
-
Nimakere ku paru peri, nyo lembe ma Biblia ukoro iwi cwic utie lemandha? Ka eyo, pirang’o? Kan ungo, pirang’o?
Som Thangambere 1:1, man i ng’eye wuwec iwi penji m’ulubo e:
-
Jururieko mi ng’om giyero nia andha ng’om ubedo kud acakine. Lembe ma giyerone urombo nenedi ku m’iai isomo i Biblia?
Dhanu moko beparu nia Mungu uyiko kende kende nyathipiny moko ma kwo ni iye, man nia nyathipinyne re m’udok ulokere aloka pi niwodho piny mange ceke m’unuti kawoni. Som Thangambere 1:21, 25, 27, man i ng’eye wuwec iwi penji m’ulubo e:
-
Biblia ubeponjo lembe ma kani?: Nyo eponjo nia Mungu uyiko nyathipiny moko m’udok ulokere aloka pi nidoko rec, lei man dhanu? Kunoke nyo nia ecwiyo acwiya piny ceke ma kwo ni igi “ku kite ku kite”?
6. I kind giracwiya ceke pa Mungu, dhanu re ma tie giracwiyane ma segi
Yehova ucwiyo dhanu man ecwiyo bende lei. Ento wa dhanu ecwiyowa i ayi m’ukoc ku pa lei. Som Thangambere 1:26, man i ng’eye wuwec iwi penji m’ulubo e:
-
Calu Yehova ucwiyowa i ayi pare gire, mer man kisa ma wabed wanyutho i kindwa wa dhanu ubenyutho bende lembang’o i wiye?
DHANU MOKO BEYERO KUMAE: “Lembe ma Biblia ukoro iwi cwic utie uda ma juthungo athunga.”
-
In ke paru peri tie ang’o? Pirang’o iparu kumeno?
I ADUNDO
Yehova ucwiyo ng’om, polo man piny ceke ma kwo ni igi.
Penji mi poyowic
-
Biblia ubeponjo nia ng’om ku polo ku piny mi igi ucaku nenedi?
-
Nyo Mungu uweko kwond piny ma kwo ni igi ulokiri aloka niai kud i nyathipiny moko m’eyiko kunoke nyo ecwiyogi ceke acwiya?
-
Dhanu ukoc nenedi ku giracwiya mange?
TIM SAYUSAC
Nen lapor mi giracwiya moko m’ubenyutho nia Jacwic unuti andha.
“Giracwiya ubeponjowa ku lembang’o?” (Cew!, dwi mir 9, 2006)
Nen kite ma junyodo copo nyutho ko ni awiya migi gin ma Biblia ukoro iwi cwic.
Kenen nyo andha ponji ma nia piny ulokere aloka urombo ku gin ma Biblia ubeponjo.
“Nyo Mungu utiyo ku piny ma lokere aloka pi nicwiyo kwond piny ceke ma kwo?” (Thiwiwec mi jw.org)
Nen ka nyo dong piny ma con ma junwang’u kunoke sayusac ma jururieko gitimo ubenyutho nia jucwiyo kwo acwiya kunoke nyo ewok gire mbwang’ kumeni.
Penji abic m’ukwayu jupenjiri ko iwi kite ma kwo ucaku ko (nyathibuku mi français)
a Ponji mi 25 biweco iwi thelembe m’uketho Mungu ucwiyo dhanu.
