Yehova ubemito nia ing’eye cuu mandha. Pirang’o? Pilembe eng’eyo nia kan ibemediri niponjo lembe iwi kite kunoke kurayung pare, iwi tic pare, iwi ayi m’edieng’ ko pi dhanu, man iwi bero m’ebeyiko pi dhanu, lembuno bicweli kara idok bende jarimbe. Re nyo andha ecopere nidoko jarimb Mungu? (Som Yakobo 2:23.) Iromo timo ang’o kara idok jarimbe? Biblia udwoko wang’ penji maeno, man enyutho bende nia pirang’o bedo jarimb Mungu tie ber nisagu bedo jarimb ng’atu moko ci mange.

1. Yehova ubekwayu itim ang’o?

“Wucor ceng’ini i vut Mungu, man en de ebicoro ceng’ini i vutwu.” (Yakobo 4:8) Lwong’o maeno thelembene ang’o? Yehova ubekweyi nia idok jarimbe. Dhanu moko benwang’u nia etie lembe ma tek dit nibedo jarimb Mungu, pilembe kume nen ungo. Ento, i Lembe pare Biblia, Yehova unyutho iwa gin ceke ma waromo ng’eyo i wiye, kara ukonywa wadok jurimbe. Pieno, kadok wacopo neno ngo Mungu de, re ka wabesomo lembe m’eyero iwa i Biblia, mer mwa kude medere ameda man kindwa doko ceng’ini.

2. Pirang’o Yehova tie Jarimo ma ber m’usagu zoo?

Ng’atu moko mbe acel de m’umeri nisagu ma Yehova meri ko. Ebemito ibed kud anyong’a man ikwaye saa moko ci kan itie ku yeny mi kony. Iromo ‘bolo adieng’acwiny peri ceke i kore, pilembe ebedieng’ piri.’ (1 Pethro 5:7) Yehova tie ayika saa ceke pi nikonyo jurimbe, nijuko cwinygi, man niwinjogi.​—Som Zaburi 94:18, 19.

3. Yehova ubemito watim ang’o kara wabed jurimbe?

Yehova maru dhanu ceke. Ento jurimbe ma ceng’ini tie “ju m’atira.” (Lembrieko 3:32) Pieno, kara wabed jurimbe, ebemito nia wabed waii nitimo lembe ma ber i wang’e, man waur lembe ceke m’eneno nia tie rac. Dhanu moko paru nia giromo tuc ungo nitimo lembe ceke ma Yehova ubekwayu gitim man niuro lembe ceke m’edagu. Re, Yehova benyang’ kudwa. Ejolo dhanu ceke m’umare andhandha man m’ubeii ku kero migi ceke pi nitimo gin ma foyo iye.​—Zaburi 147:11; Tic mi Jukwenda 10:34, 35.

 MED NYANG’ PERI

4. Abraham ubino jarimb Yehova

Lembe ma Biblia ukoro iwi kwo p’Abraham (ma julwong’e bende Abram) ubeponjowa iwi gin ma waromo timo pi nibedo jarimb Mungu man mugisa ma wabinwang’u. Som gin ma Biblia ukoro iwi Abraham i Thangambere 12:1-4. I ng’eye, wuwec iwi penji m’ulubo e:

• Yehova ukwayu Abraham utim ang’o?

• Yehova ung’olo nia ebitimo ang’o ni Abraham?

• Nyo Abraham utimo lembe ma Yehova ukwayu etim? Kekor.

5. Gin ma Yehova ubekwayu jurimbe gitim

Wang’ ma pol, wabed wamito jurimbwa gitim lembe moko iwa.

• In, ibed imaru jurimbi gitim iri lembang’o?

Som 1 Yohana 5:3, man i ng’eye wuwec iwi penji m’ulubo e:

• Yehova ubemito jurimbe gitim ang’o?

Pi ninyutho woro ni Yehova, saa moko kwayu walok kura kunoke timo mwa. Som Isaya 48:17, 18, man i ng’eye wuwec iwi penji m’ulubo e:

• Pirang’o Yehova ubekwayu nia jurimbe gitim alokaloka i kwo migi?

 6. Lembe ma Yehova ubetimo ni jurimbe

 I ADUNDO

Yehova ubemito ebed Jarimbi, man ebikonyi kara kindwu bed ceng’ini kude.

Penji mi poyowic

• Yehova bekonyo jurimbe nenedi?

• Yehova ponjo jurimbe nenedi kara gitim alokaloka i kwo migi?

• Nyo etie lembe ma tek lee nibedo jarimb Yehova? Pirang’o iyero kumeno?