PONJI MI 21
Jukani m’ubetimo tic mi rweyo lembanyong’a?
Ceng’ini eni, Yehova bitiyo ku Ker pare pi nidaru peko ceke ma wabekadhu kud i iye tin. Eno tie lembe mir anyong’a lee dit ma wacikara ngo nigwoko iwa kendwa. Yesu ubemito nia julub pare ginyuth lembene ni dhanu ceke! (Matayo 28:19, 20) Jumulembe pa Yehova gibetimo tap kumeno. Nenedi?
1. Lembe mi Matayo 24:14 ubepong’o nenedi tin eni?
Yesu ular uyero kumae: “Man lembanyong’a maeni mi Ker jubirweyo i ng’om zoo.” (Matayo 24:14) Wa Jumulembe pa Yehova wabetimo tic maeno ma pire tek lee ku mutoro man kud amora. Waberweyo lembanyong’a i ng’om zoo, ke i dhok ma tung’ tung’ elufu acel (1 000) ku wiye! Calu etie tic ma dwong’, ebecuku kwayu saa ku kero ma lee man pangulembe ma cuu. Bende, ka ku kony pa Yehova ngo, nwang’u tije romo timere ngo.
2. Wabetimo kero rukani pi nirweyo ni dhanu?
Warweyo kaka moko ci ma waromo nwang’u dhanu i iye. Mi kwong’o zoo, warweyo “ot kubang’ ot,” calu ma Jukristu mi rundi ma kwong’a gibed gitimo. (Tic mi Jukwenda 5:42) Ku yo maeno ma wakalu ko ngo ot moko, wabetuc nirweyo lembanyong’a ni dhanu milion ma swa kubang’ oro. Re calu dhanu moko benwang’iri ngo i pacu migi saa mange, warweyo bende kakare dupa ma dhanu benwang’iri i iye lee. Eyo, saa ceke wasayu kaka moko ci mi nyutho ni dhanu pi Yehova man pi gin m’ebitimo.
3. Ng’a m’ucikere nirweyo lembanyong’a?
Jukristu mandha ceke gicikiri nirweyo lembanyong’a ni dhanu mange. Etie tic ma pire tek lee man ma waneno ngo ku tuko. Warweyo saa moko ci kan ecopere iwa, pilembe wang’eyo nia tije re m’ubebodho kwo mi dhanu. (Som 1 Timoteo 4:16.) Juculowa ngo acula pi tije, pilembe Biblia uyero kumae: “Wunwang’u mananu, wun de wumii mananu.” (Matayo 10:7, 8) Dhanu ceke ngo re ma jolo lemkwenda ma wabetero igi. Ento wamedara mwa asu nirweyo pilembe tije tie thenge acel mi thier ma wabetimo ni Yehova, man pilembe tije nyayu mutoro i iye.
MED NYANG’ PERI
Wabineno kawoni lembe mange iwi kero ceke ma Jumulembe pa Yehova gibetimo pi nirweyo lembanyong’a i ng’om zoo, man wabineno kite ma Yehova ubekonyo kowa i tije.
Waberweyo lembanyong’a i ng’om ma tung’ tung’: (A) Costa Rica, (B) États-Unis, (C) Benin, (D) Thaïlande, (E) Cula mi Yap, (F) Suède
4. Wabeii lee mandha nirweyo ni dhanu ceke
Jumulembe pa Yehova gibeii ku tego migi zoo pi nirweyo lembanyong’a ni dhanu moko ci man kakare ceke. Nen VIDEO, man i ng’eye wuwec iwi penji m’ulubo e:
-
Jumulembe pa Yehova gibetimo kero ma rukani pi nirweyo lembanyong’a? Kekor.
Som Matayo 22:39 man Jurumi 10:13-15, man i ng’eye wuwec iwi penji m’ulubo e:
-
Tic mwa mi lembanyong’a ubenyutho nenedi nia wamaru dhanu wadwa?
-
Yehova neno ju m’uberweyo lembanyong’a nenedi?—Nen verse mir 15.
5. Wabetimo tije karacelo ku Mungu
Lembe tie lee dit m’unyutho nia Yehova re m’ubetelo wi tic mwa eni. Ku lapor, i ng’om mi Nouvelle-Zélande, umego moko ma nyinge Paul utundo yo pa dhaku moko kinde m’ebino rweyo ot kubang’ ot ceng’ moko ku reto. Kugweno mi nindo ma rom eca, dhakune ular urwo nia cika Mungu uor ng’atu moko kokoro ubin uliewe pi nikonye kara eng’ey Mungu. I rwo pare, etiyo ku nying’ Mungu ma Yehova. Umego Paul ukoro nia ‘etundo yo pa dhakune saa adek kende i ng’ei rwo pare.’
Som 1 Jukorintho 3:9, man i ng’eye wuwec iwi penji m’ulubo e:
-
Lembe ma ve m’utimere i Nouvelle-Zélande no ubenyutho nenedi nia Yehova ubetelo en wi tic mi lembanyong’a?
Som Tic mi Jukwenda 1:8, man i ng’eye wuwec iwi penji m’ulubo e:
-
Pirang’o watie ku yeny mi kony pa Yehova kara watuc nitimo tic mwa mi lembanyong’a?
Nyo ing’eyo?
Nja i coko mwa m’i kind yenga, wabed waponjo bodho ma tung’ tung’ mi rweyo lembanyong’a. Tekene idaru cidho i cokone moko, kekor gin m’ineno man paru peri i wiye.
6. Waberweyo pi niworo cik pa Mungu
I rundi mi jukwenda, judhu tic maeni mi rweyo lembanyong’a gitimo kero migi ceke kara gijig dhoge. Pieno kara tije umedere asu, Jukristu mi rundi maeca gigam ‘gicero bang’ lembanyong’ane . . . i wang’ cik.’ (Jufilipi 1:7) Tin bende, Jumulembe pa Yehova gibetimo kumeno. a
Som Tic mi Jukwenda 5:27-42, man i ng’eye wuwec iwi penji m’ulubo e:
-
Pirang’o wabiweko ngo nirweyo lembanyong’a?—Nen verse mi 29, 38, man 39.
NG’ATU MOKO ROMO PENJI KUMAE: “Pirang’o Jumulembe pa Yehova gibed giwotho ot kubang’ ot i pacu mi dhanu?”
-
Icopo dwoko nenedi?
I ADUNDO
Yesu uoro julub pare nia gicidh girwey lembanyong’a ni dhanu mi thek ceke. Yehova re m’ubekonyo dhanu pare uketho gibetimo tije ma ber.
Penji mi poyowic
-
Jukani m’ubetimo tic mi rweyo lembanyong’a i ng’om zoo?
-
Tije ubenyutho nenedi nia wamaru dhanu wadwa?
-
Nyo tic mi rweyo lembanyong’a copo dwokowa jumutoro? Pirang’o iparu kumeno?
TIM SAYUSAC
Nen kite ma Jumulembe pa Yehova giberweyo ko ni dhanu i adhura ma dongo.
Nirweyo kaka ma dhanu pong’ i iye i adhura ma dongo: Paris (5:11)
Jumulembe pa Yehova gitimo ang’o pi nikonyo dhanu m’uringo lwinyi?
Ng’atu moko ubekoro anyong’a m’ebenwang’u i tic mi rweyo lembanyong’a. Lube i video ma e:
Lembe ma odipido moko ung’olo utuc niyabu iwa yo kara tic mi lembanyong’a umew lee. Som pi lembene i thiwiwec ma e.
a Mungu re m’ung’olo nia warwey. Pieno, wa Jumulembe pa Yehova wambe ku yeny mi kenwang’u rusa i bang’ jubim ma dhanu pi nirweyo lembanyong’a.