PONJI MI 28
Nyuth foyofoc pi gin ma Yehova giku Yesu gitimo iri
Iwinjiri nenedi ka jarimbi moko umiyo iri giramiya ma leng’ lee man m’unyeng’i? M’umbe jiji, anyong’a negi lee man imito inyuth ire foyofoc pi giramiyane. Yehova giku Yesu bende gimiyo giramiya ma ber m’usagu mange zoo ma waromo nwang’u. Etie jamgony. Dong’ waromo nyutho nenedi nia wafoyo giramiyane? Wakenen.
1. Yo moko ma kani ma wacopo nyutho ko foyofoc mwa pi gin ma Mungu giku Kristu gitimo iwa?
Biblia ung’olo nia “kubang’ dhanu ceke ma tek ubenyutho yiyoyic i [Yesu]” copo kwo rondo ku rondo. (Yohana 3:16) Ninyutho yiyoyic thelembene tie ang’o? Etie ngo kende kende niyiyo Yesu. Wacikara bende ninyuthe nikadhu kud i ng’iyong’ic ma wabemaku man lembe ceke ma wabetimo i kwo mwa. (Yakobo 2:17) Ka wabenyutho yiyoyic nikadhu kud i timo man wec mwa, eno biketho mer m’i kindwa ku Yesu man Won ma Yehova bidoko tek.—Som Yohana 14:21.
2. Coko moko ma kani ma segi ma konyowa ninyutho foyofoc mwa pi gin ma Yehova giku Yesu gitimo?
Uthieno m’i wang’ tho pare, Yesu unyutho ni julub pare kite mange ma gicopo nyutho ko foyofoc migi pi lam m’ethiero. Ecaku the lembe moko ma segi ma Biblia ulwong’o nia “Cemo mir uthieno pa Rwoth” ma julwong’o bende ‘Poy pi tho pa Kristu’ man ewacu igi nia gibed gicokiri karacelo pi lembene. (1 Jukorintho 11:20) Yesu ucaku the coko maeno kara jukwenda pare man Jukristu mandha ceke ma biwok i ng’eygi gibed gipoy nia ethiero kwo pare pigi. Pi coko ma segi maeno, Yesu ung’olo kumae: “Wumeduru nitimo kumeni, wupoy ko pira.” (Luka 22:19) Pieno, kan ibecidho i Poy pi tho pa Yesu, nwang’u ibenyutho foyofoc peri pi mer ma yawe mbe ma Yehova giku Yesu ginyutho iwa.
MED NYANG’ PERI
Wakenen kawoni yo mange ma waromo nyutho ko foyofoc mwa pi mer ma yawe mbe ma Yehova giku Yesu ginyutho iwa. Wanen bende nia pirang’o Poy pi tho pa Yesu tie lembe ma pire tek akeca.
3. Wacopo timo ang’o pi ninyutho foyofoc mwa?
Kepar nia ng’atu moko ubodho kwo peri kinde m’ibecithung’. Nyo wii copo wil yot yot pi lembe m’etimo iri? Ungo. Ma jiji mbe, icopo sayu yo ceke mi nyutho ire foyofoc pi lembe m’etimo iri.
Yehova re m’ucwiyowa, man wabekwo de nikum bero pare. Som 1 Yohana 4:8-10, man i ng’eye wuwec iwi penji m’ulubo e:
-
Pirang’o lam ma Yesu uthiero utie giramiya ma segi?
-
Ibewinjiri nenedi i kum lembe ma Yehova giku Yesu gitimo iri?
Wacopo nyutho foyofoc mwa nenedi pi gin ma Yehova giku Yesu gitimo iwa? Som 2 Jukorintho 5:15 man 1 Yohana 4:11; 5:3. I ng’ei somo verseman, wuwec iwi penji m’ulubo e:
-
Nimakere ku giragora maeni, wacopo timo ang’o pi ninyutho foyofoc mwa?
4. Lub lapor pa Yesu
Yo mange ma wacopo nyutho ko foyofoc mwa utie nilubo lapor pa Yesu. Som 1 Pethro 2:21, man i ng’eye wuwec iwi penji m’ulubo e:
-
Wacopo nyutho nenedi i kwo mwa nia wabekwanyu batiend Yesu tap tapi?
Yesu umaru Lembe pa Mungu, ebed erweyo lembanyong’a, man ebed ekonyo dhanu mange
5. Bed icidh i Poy pi tho pa Kristu
Pi ning’eyo lembe m’ugam utimere i saa mi cemo mir uthieno pa Rwoth ma jutimo wang’ ma kwong’a, som Luka 22:14, 19, 20. I ng’eye, wuwec iwi penji m’ulubo e:
-
Lembang’o m’ugam utimere i saa mi cemo mir uthieno pa Rwoth?
-
Mukathi ku divai ubenyutho ang’o?—Nen verse mir 19 ku 20.
Yesu umito nia julub pare gibed gicokiri pi Cemo mir uthieno pa Rwoth wang’ acel kubang’ oro, tap i nindo m’etho i iye. Pieno, Jumulembe pa Yehova gibed gicokiri karacelo nja kubang’ oro pi nipoy pi tho pa Kristu i ayi m’eng’olo man m’eweko en gire. Pi ninyang’ lee iwi coko maeno ma pire tek lee, nen VIDEO. I ng’eye, wuwec iwi penji m’ulubo e:
-
Poy pi tho pa Yesu bekadhu nenedi?
Mukathi ku divai tie lanyuth. Mukathi ubenyutho kum Yesu m’ubino mbe ku dubo m’ethiero piwa. Divai ke ubenyutho rimbe
DHANU MOKO BEYERO KUMAE: “Kan iyiyo Yesu ci, ibiboth.”
-
Icopo tiyo nenedi ku Yohana 3:16 man Yakobo 2:17 pi ninyutho ni ng’atini nia niyiyo Yesu ayiya kende uromo ngo?
I ADUNDO
Wanyutho foyofoc mwa pi gin ma Yesu utimo iwa nwang’u wabenyutho yiyoyic i iye, man nwang’u wabecokara i Poy pi tho pare.
Penji mi poyowic
-
Ninyutho yiyoyic i Yesu thelembene tie ang’o?
-
Icopo maru itim ang’o pi ninyutho foyoyoc peri pi gin ma Yehova giku Yesu gitimo iri?
-
Pirang’o pire tie tek lee nicidho i Poy pi tho pa Kristu?
TIM SAYUSAC
Tho pa Kristu ucikere nicwaluwa watim ang’o?
Nen lembe mange iwi yiyoyic man iwi kite ma wacopo nyuthe ko.
“Nyuth yiyoyic i lembang’ola pa Yehova” (Otkur ma Wiw, dwi mir 10, 2016)
Kenen kite ma kwo pa dhaku moko uyikere ko kinde m’eponjo lembe iwi lam ma Kristu uthiero piwa. Som lembene i kpawa mi kwo ma thiwie tie “Anwang’u nia kwo para zoo udoko ma leng’ man atie kud anyong’a.”
Nen nia pirang’o wend dhanu ma nyanok kende re ma camu mukathi man madhu divai i saa mi Poy pi tho pa Yesu.
