Ka wat mwa kunoke jarimbwa moko utho, lembuno nyayu can ma lee i iwa. Eno re m’uketho Biblia ulwong’o tho nia jakwor. (1 Jukorintho 15:26) I Ponji mi 27, waneno nia Yehova bikabu jakwor maeno cen. Ka dong’ ju ma nwang’u gidaru tho ke? I ponji maeni, wabiweco akeca iwi lembe mange ma ber ma Yehova ung’olo pi dhanu ma wendgi lee dit maeno ma gidaru tho. Eng’olo nia ebicerogi kara gidogikwo kendo kud anyong’a rondo ku rondo. Re nyo gibicer andha? Kan andha, nyo gibicer pi nicikwo i polo kunoke i ng’om keni?

1. Gin ma Yehova bitimo ni wedi mwa man jurimbwa ma githo

Yehova ubekuro kud ava ma lee dit saa m’ebicero iye dhanu ceke m’utho. Won yiyoyic moko ma nyinge Yob ubino ku tegocwiny nia kinde m’ebitho, Mungu biwil kude ngo. Uketho eyero ni Mungu kumae: “Ibilwong’o, e abiyii [kud i kabuli].”​—Som Yob 14:13-15, NWT.

2. Wang’eyo nenedi nia ju m’utho gibiceri?

Kinde ma Yesu ubino i ng’om, Mungu ugam umiyo ire copo mi cero dhanu m’utho. Ku lapor, ecero nyaku moko mi oro apar ario (12) man bende wod dhatho moko. (Marko 5:41, 42; Luka 7:12-15) Nindo moko i ng’eye, jarimbe ma Lazaru de utho. Re Yesu ucere, kadok nwang’u dong’ edaru timo ceng’ ang’wen i liel. Yesu urwo i bang’ Mungu man i ng’eye ekok i wang’ kabuli kumae: “‘Lazaru, wok woko!’ E ng’atu ma nwang’u utho uwok woko.” Lazaru ucer andha! (Yohana 11:43, 44) Kepar kit anyong’a ma wedi pa Lazaru man jurimbe gibino ko!

3. Genogen ma kani m’iromo bedo ko pi wedi peri man jurimbi ma githo?

Biblia ung’olo kumae: “Cer bibedo nuti.” (Tic mi Jukwenda 24:15) Dhanu ceke ma Yesu ugam ucero con, gicidho ngo i polo. (Yohana 3:13) Ecerogi gidogikwo kendo iwi ng’om keni man gibedo kud anyong’a pi lembene. Ceng’ini eni bende, Yesu bicero dhanu ma wendgi lee dit man gibidokwo i paradizo iwi ng’om keni. Eyero nia “dhanu ceke ma gin’i kabuli” gibicer. Kadok nyo jumoko nuti ma dong’ wi dhanu uwil pigi de, Mungu re uwil pigi ngo.​—Yohana 5:28, 29.

 MED NYANG’ PERI

4. Yesu unyutho kamaleng’ nia etie ku copo mi cero ju m’utho

Wakedok kendo iwi lembe ma Yesu utimo ni jarimbe ma Lazaru. Som Yohana 11:14, 38-44, man i ng’eye wuwec iwi penji m’ulubo e:

• Ang’o m’unyutho nia nwang’u Lazaru utho andha?​—Nen verse mi 39.

• Ka nwang’u Lazaru ucidho i polo, iparu nia nwang’u Yesu copo cere andha pi nidwoge kendo iwi ng’om keni?

Nen VIDEO.

5. Dhanu ma wendgi lee gibicer!

Som Zaburi 37:29, man i ng’eye wuwec iwi penji m’ulubo e:

• Udul dhanu ma bicer gibikwo kani?

M’uweko jurutic pa Yehova, Yesu bicero bende dhanu mange dupa ma gibino mbe ku kaka mi woro Yehova. Som Tic mi Jukwenda 24:15, man i ng’eye wuwec iwi penji m’ulubo e:

• Ng’a m’ibekuro cer pare kud ava ma lee?

• Genogen mi cer ukonyo junyodo pa Phelicity nenedi?

 I ADUNDO

Biblia ung’olo nia dhanu ma wendgi kwanere ngo ma githo, gibicer. Yehova ubemito nia gidwog gikwo kendo, man emiyo ni Yesu copo mi cerogi.

Penji mi poyowic

• Yehova giku Yesu gibekuro kud ava nitimo lembang’o ni dhanu m’utho?

• Udul dhanu ma bicer gibikwo kani, nyo i polo kunoke i ng’omi? Pirang’o ibeyero kumeno?

• Ang’o m’uketho iyiyo nia wedi peri ma githo gibicer andha?