PONJI MIR 17

Yesu tie Ng’atu ma nenedi?

NG'II DHOK M'IMARU

Ka wabeponjo lembe ma tung’ tung’ ma Yesu uyero man m’etimo iwi ng’om keni, wabinwang’u nia ebino Ng’atu ma ber dit, man eno bicwaluwa kara watim kero nibedo jurimbe man jurimb Won ma Yehova. Yesu ubino ku kite kunoke kura moko ma kani ma beco? Man wacopo lupo lapor pare nenedi i kwo mwa?

1. Yesu tie ve Won i ayi ma kani?

Kinde ma Yesu ubino i polo, ekwo ku Won pi oro milion ma lee man eponjo lembe dupa dit i bang’e. Ku lapor, enwang’u nia Won utie Mungu ma jamer. Gin m’eneno ku m’eponjo uketho paru man timo pare bende urombo tap ku pa Won. (Som Yohana 5:19.) Yesu ukwanyu kite pa Won tap tap, uketho eyero kumae: “Ng’atu m’uneno an nwang’u eneno Wego bende.” (Yohana 14:9) Kan ibemediri niponjo lembe iwi kite kunoke kura pa Yesu, ibigam ng’eyo Yehova cuu mandha. Ku lapor, kisa ma Yesu uneno i kum dhanu, ubenyutho nia Yehova ubedieng’ piri lee akeca.

2. Yesu unyutho nenedi nia emaru Yehova?

Yesu uwacu kumae: “Kara ng’om ung’ey nia amaru Wego, abetimo tap calu ma Wego ung’olo ira nia atim.” (Yohana 14:31) Kinde m’ebino i ng’om, Yesu unyutho nia emaru Won lee mandha. Nenedi? Ewore ku cwinye ceke kadok kinde m’ebino i lembe ma tek. Bende, mer ma Yesu umaru ko Won uketho ebed eweco pire akeca, man ebed ekonyo dhanu mange de kara gidok jurimb Won ma ceng’ini.—Yohana 14:23.

3. Yesu unyutho nenedi nia emaru dhanu?

Biblia uyero nia ‘anyong’a pa [Yesu] ni ba dhanu,’ niwacu emaru dhanu lee dit. (Lembrieko 8:31) Enyutho andha nia emaru dhanu kinde m’ebed etielo cwinygi man emiyere pi nikonyogi. Etimo udu dupa m’ugam unyutho nia etie ku tego man bende kisa mi dhanu ubenege. (Marko 1:40-42) Enyutho bero ni dhanu ceke man ebedo mbe kud akoyakoya. Wec pare ubed ujuko cwiny dhanu m’adundegi bino atira man umiyo igi genogen. Yesu ubino ayika nisendere man nitho athoa zoo pilembe emaru dhanu ceke. Ento ju m’emaru nisagu zoo, utie ju m’ubetimo calku ponji pare.—Som Yohana 15:13, 14.

MED NYANG’ PERI

Wakenen kawoni lembe mange m’ubenyutho nia Yesu ubino Ng’atu ma ber dit, man wanen ayi ma wacopo nyutho ko bende mer man berocwiny calu en.

4. Yesu umaru Won

Lapor pa Yesu ubeponjowa ku kite ma wan bende waromo nyutho ko nia wamaru Mungu. Som Luka 6:12 man Yohana 15:10; 17:26. I ng’ei somo verseman, wuwec iwi penji m’ulubo e:

Nimakere ku verse maeni, wacopo nyutho nenedi nia wamaru Yehova calu Yesu?

Yesu umaru Won mi polo lee dit man ebed erwo i bang’e nja

5. Yesu udieng’ pi dhanu ma gibino ku yeny mi kony

Yesu ubed udieng’ pi yeny mi dhanu mange i wang’ yeny pare gire. Kadok kinde m’eol, etiyo ku saa man tego pare pi nikonyo dhanu. Som Marko 6:30-44, man i ng’eye wuwec iwi penji m’ulubo e:

Lembang’o ma tung’ tung’ m’ubenyutho nia Yesu udieng’ pi dhanu mange?—Nen verse mi 31, 34, 41, man 42.
Ang’o m’ucwalu Yesu nikonyo dhanu?—Nen verse mi 34.
Calu Yesu ukwanyu koth Yehova, gin ceke m’etimo ubeponjowa ku lembang’o iwi Yehova?
Kekwan yo moko ma wan bende wacopo nyutho ko nia wabedieng’ pi dhanu mange calu Yesu.

6. Yesu tie won berocwiny

Kadok Yesu ubino ngo ku piny dupa de, re ebed emiyo ma nok m’etie ko ni dhanu mange de. Ekwayu nia wan bende wanyuth berocwiny. Som Tic mi Jukwenda 20:35, man i ng’eye wuwec iwi penji m’ulubo e:

Nimakere ku Yesu, ukwayu wabed watim ang’o kara wanwang’ anyong’a?

Nen VIDEO, man i ng’eye wuwec iwi penji m’ulubo e:

VIDEO: “Nimiyo nyayu anyong’a lee”—Thenge (4:00)

Kadok piny mwa mbe akeca de, waromo miyo m’unuti i yo ma kani ma tung’ tung’i?

Nyo ing’eyo?

Biblia ubeponjowa nia wabed warwo i bang’ Yehova, re ku nying’ Yesu. (Som Yohana 16:23, 24.) Ka waberwo kumeno, nwang’u wabenyutho foyofoc mwa pi lembe ceke ma Yesu utimo pi nikonyowa kara wadok jurimb Yehova.

DHANU MOKO BEYERO KUMAE: “Mungu ubedieng’ ungo pi masendi mwa.”