PONJI MI 34

Wacopo nyutho nenedi nia wamaru Yehova?

NG'II DHOK M'IMARU

Niai m’icaku ponjo Biblia, nyo ibeneno ngo nia mer m’imaru ko Mungu ubemedere ameda kawoni? Nyo icopo maru ngo nia kindwu wukude umedere nibedo ceng’ini ma sagu? Kan imaru, tie ber. Ng’ey nia ka Yehova ubeneno nia mer m’imare ko ubemedere ameda, en bende ebimedere kumeca nimeri man nidieng’ piri. Dong’ icopo nyutho ire nenedi nia imare?

1. Wacopo nyutho nenedi ni Yehova nia wamare?

Wanyutho nia wamaru Yehova nwang’u wabeworo cik pare. (Som 1 Yohana 5:3.) Ebediyowa ngo adiya nia wawore, ento ebemito ng’atuman m’i kindwa ung’ii en gire kan ecopo wore kunoke ngo. Pirang’o? Pilembe Yehova maru ka ‘wabewore kud adundewa.’ (Jurumi 6:17) Niwacu, ebemito ngo iwore pilembe nia jubediyi adiya, ento iwore pilembe imare. Thenge mir 3 ku mir 4 mi buku maeni bikonyi kara inyuth ni Yehova nia imare, nwang’u ibetimo lembe ma foyo iye man ibeuro lembe ceke m’edagu.

2. Pirang’o eromo bedo yot ungo ninyutho mer mwa ni Yehova?

“Masendi pa won bedopwe gi dupa.” (Zaburi 34:19) Wan ceke wabenyego anyega ku dubo ma walagu. Wabekadhu bende i peko mange, calu ve can sente, masendi, lembe ma wotho ngo atira, man peko mange de. Ka wabenwang’ara i peko, ecopo bedo tek iwa niworo cik pa Yehova. Kakare nitimo lembe ma foyo iye, eromo bedo yot lundo nitimo gin m’edagu. Ento saa maeno kan ijenjiri asu man itimo peri gin ma Yehova maru, ibinyutho kamaleng’ nia imare nisagu lembe mange ceke. Ibinyutho bende nia imoko kikiki i kume. En bende, ebigam meri man ebiweki ngo nyanok de.—Som Zaburi 18:25.

MED NYANG’ PERI

Wakenen kawoni nia pirang’o kan ibeworo Mungu, lembene foyo iye. Wanen bende gin ma romo konyi kara imediri ninyutho ire woro.

3. Sitani udoti

Buku pa Yob unyutho nia Sitani ukelo adote moko i wang’ Mungu i kum Yob. Re edoto ngo Yob kende ento bende dhanu mange ceke m’ubetimo ni Yehova. Som Yob 1:1, 6–2:10, man i ng’eye wuwec iwi penji m’ulubo e:

paru pa Sitani, pirang’o Yob ubino woro Yehova?—Nen Yob 1:9-11.
Sitani uyero lembang’o i kum dhanu ceke, uketho i iye in bende?—Nen Yob 2:4.

Som Yob 27:5b, man i ng’eye wuwec iwi penji m’ulubo e:

Yob unyutho nenedi nia emaru Yehova andhandha?

Yob umedere nitimo lembe m’atira i wang’ Yehova, enyutho ko nia emare

Wanyutho nia wamaru Yehova nwang’u wabetimo kwa lembe m’emaru

4. Nyay mutoro i Yehova

Som Lembrieko 27:11, man i ng’eye wuwec iwi penji m’ulubo e:

Yehova winjere nenedi kan ibenyutho rieko man ibewore? Pirang’o ewinjere kumeno?

5. Mediri nitimo kwa lembe ma foyo i Yehova

Mer mandhandha ma wamaru ko Yehova cwaluwa ninyutho pire ni dhanu mange. Ecwaluwa nitimo kumeno kadok i saa ma lembe tie yot ungo de. Nen VIDEO, man i ng’eye wuwec iwi penji m’ulubo e:

VIDEO: Cer ba yiyoyic peri kadok jai unuti de (5:09)

Nyo nindo moko idaru nwang’u de nia etie yot ungo nikoro pi Yehova ni dhanu mange?
I video maeni, ang’o m’ukonyo Grayson nibayu lworo pare?

Ebibedo iwa yot nitimo kwa lembe ma foyo i Yehova tekene wamaru gin m’emaru man wadagu gin m’edagu. Som Zaburi 97:10, man i ng’eye wuwec iwi penji m’ulubo e:

Nimakere ku gin m’idaru ponjo, kekwan lembe moko ma Yehova umaru, man bende lembe moko m’edagu.
Icopo ponjo nenedi nimaru gin ma ber man nidagu gin ma raci?

6. Woro Yehova miyo iwa bero kwa

Woro Yehova miyo iwa bero saa ceke. Som Isaya 48:17, 18, man i ng’eye wuwec iwi penji m’ulubo e:

Nyo iyiyo nia gin ceke ma Yehova ubekwayu watim utie pi bero mwa? Pirang’o iyero kumeno?
Niai m’icaku ponjo Biblia man m’icaku ng’eyo Mungu mandha ma Yehova, bero ang’o m’idaru nwang’u?

DHANU MOKO BEYERO KUMAE: “Mungu kwanu ngo ku lembe moko ci m’abetimo.”