PONJI MI 39
Kite ma Mungu neno ko rimo
Rimo tie gin ma pire tek lee. Kan embe, ng’atu moko mbe acel de ma romo kwo. Calu ma Mungu re m’ucwiyowa, etie ku twero mi nyutho kite m’atira ma wacikara nitiyo ko ku rimo. Dong’ nyo eyero ang’o iwi rimo? Nyo waromo came kunoke nicike i kumwa? Man waromo timo ang’o kara wamak yub m’atira iwi lembe m’uneno rimo?
1. Kite ma Yehova neno ko rimo
Yehova ugam uyero ni jurutic pare ma con kumae: “Kwo mi ring’kum ceke en e rimone.” (Lembe mi Julawi 17:14) I wang’ Yehova, rimo ubenyutho kwo. Pieno calu kwo tie leng’, Yehova neno rimo bende ni gin ma leng’ akeca.
2. Mungu ukwero nitiyo ku rimo i yo ma kani?
Yehova ugam ukwero jurutic pare m’i wang’ nyoliri pa Yesu ku camu rimo. (Som Thangambere 9:4 man Lembe mi Julawi 17:10.) Kadok i ng’ei nyoliri pa Yesu de, eketho cik maeno udwogo kendo kinde ma Guriri m’utelowic umiyo telowic ma e ni Jukristu: “Wukoyuru cen . . . kud i kum rimo.”—Som Tic mi Jukwenda 15:28, 29.
Nikoyiri cen kud i kum rimo kunoke niceriri i kume thelembene tie ang’o? Wakemak lapor: Ka munganga moko ung’olo nia ikoyiri cen ku kong’o, m’umbe jiji ibimadhu ngo kendo kong’o. Re nyo icopo camu cam ma tie ku kong’o i iye kunoke niketho jucike i kumi? Ungo. Kumeno bende, cik pa Mungu m’ung’olo nia wakoyara cen kud i kum rimo, nyutho nia wacikara ngo nimadhu rimo, kadi nicamu ring lei ma jucwiro rimbe ngo. Bende, wacikara ngo nicamu cam ceke ma jumedo rimo i iye.
Kadong’ ubekwayu jutii ku rimo pi nithiedho ng’atini ke? Ayi thiethne moko nuti m’uturo cik pa Mungu kamaleng’ kamaleng’. Ku lapor, niciko rimo i kum ng’atini. Ecopo bedo rimo ma zoo, kunoke acel m’i kind thenge ang’wen ma dongo ma e: rimo ma kwar (globules rouges), rimo ma tar (globules blancs), thenge ma konyo pi poto pa rimo (plaquettes), man pii rimo (plasma). Wacopo yiyo ngo kit thieth maeno nyanok de. Re ayi thiethne mange nuti ma nyutho ngo nia jubeturo cik pa Mungu. Ku lapor, bodho ma jutiyo ko ku nyithi thenge ma poto poto mi theng rimo ma dongo ma waai wakwanu. M’uweko maeno, wacopo kwanu bende bodho mange ma jutiyo i iye ku rimb ng’atini en gire. Pi bodhone ario maeno, ng’atuman ucikere niyaru i lembe cuu man ning’iyo gire, ka nyo ebiyiyo kunoke ngo. a—Jugalatia 6:5.
MED NYANG’ PERI
Wakenen kawoni lembe mange iwi gin m’iromo timo pi nimaku yub m’atira iwi kit thieth m’ubebanju rimo.
3. Mak yub ma foyo i Yehova i lembe m’uneno yath
Icopo maku nenedi yub ma foyo i Mungu i kum thieth m’ubekwayu rimo? Nen VIDEO, man i ng’eye wutii ku penji ma e pi niweco iwi lembe ma jurieyo: Lembang’o m’icikiri nitimo kokoro i wang’ nimaku yub m’uneno yathi?
-
Kway Yehova umii iri rieko.—Yakobo 1:5.
-
Say cik mir ukungu mi Biblia man nen kite m’iromo tiyo ko kugi.—Lembrieko 13:16.
-
Lar inyang’ nia ayi thieth ma tung’ tung’ ma kani m’unuti kaka m’ibekwo i iye.
-
Lond ayi thiethne m’inwang’u nia icopo yiyo yot yot m’umbe jiji acel de.
-
Penjiri nia nyo ayi thieth m’ing’iyone biweki ku pidocwiny ma leng’ kunoke ngo.—Tic mi Jukwenda 24:16. b
-
Ng’ey nia i lembe m’uneno pidocwiny, ng’atu moko mbe acel de m’ucikere ninyutho iri ng’iyong’ic m’ukwayu itim, nik’ebed won ot peri, dhaku peri, jadit cokiri, kadi japonjo peri mi Biblia.—Jurumi 14:12.
-
Kiew yub m’imakune akiewa kara dhanu mange de ging’ey pire.
4. Jumulembe pa Yehova giyenyo ginwang’ thieth ma cuu magwei
Etie lembe ma copere niworo cik pa Mungu iwi rimo man ninwang’u thieth ma cuu, ma re jutiyo ngo ku rimo i iye. Nen VIDEO.
Som Tito 3:2, man i ng’eye wuwec iwi penji m’ulubo e:
-
Pirang’o wacikara ninyutho woro ku molo saa ceke ka wabeweco ku munganga kunoke dokter?
|
M’uyiyere ngo |
Ma Jakristuman romo ng’iyo en gire |
|---|---|
|
A. Pii rimo |
Nyithi theng pii rimo |
|
B. Rimo ma tar |
Nyithi theng rimo ma tar |
|
C. Thenge ma konyo pi poto pa rimo |
Nyithi theng thenge ma konyo pi poto pa rimo |
|
D. Rimo ma kwar |
Nyithi theng rimo ma kwar |
5. Kan ubekwayu nia jutii ku theng rimo moko
Rimo tie ku thenge ang’wen ma dongo dongo ma e: rimo ma kwar, rimo ma tar, thenge ma konyo pi poto pa rimo, man pii rimo. Thenge ang’wen ma dongo dongo eno bende utie i igi ku thenggi mange dupa ma poto poto magwei, ma julwong’o nyithi theng rimo. c I kind nyithi theng rimo eno, moko nuti ma jubed jutiyo ko i yath pi nikiedo i kum twoyo kunoke pi ning’olo dhu rimo m’ubecwir.
Ento kan ubekwayu nia jutii ku nyithi theng rimone ma poto poto, Jakristuman ucikere ning’iyo en gire calku pidocwiny pare m’eponjo ku Biblia ka nyo ebiyiyo kunoke ngo. Jumoko copo ng’iyo nikwero thieth ma jutiyo i iye ku nyithi theng rimo eno. Ento jumange giromo nwang’u nia pidocwiny migi uyiyo igi nitiyo ku nyithi theng rimone.
Re kinde m’ibemaku yub peri, penjiri ku penji ma e:
-
Pirang’o ayiyo kunoke akwero nitiyo ku nyithi thenge moko mi rimo? Acopo koro nenedi thelembe mi ng’iyong’ic para ni dokter?
NG’ATU MOKO ROMO PENJI KUMAE: “Pirang’o ibekwero kud jucik rimo i kumi? Ing’eyo ngo nia rimo bodho kwo?”
-
Iromo dwoko nenedi?
I ADUNDO
Yehova ubemito wanen rimo ni gin ma leng’ akeca man kud watii kude i ayi ma rac.
Penji mi poyowic
-
Pirang’o Yehova neno rimo ni gin ma leng’ akeca?
-
Wang’eyo nenedi nia cik pa Mungu m’ung’olo nia wakoyara cen kud i kum rimo uneno bende ciko rimo i kumjo?
-
Icopo timo ang’o kara imak yub ma cuu iwi thieth m’ubebanju nitiyo ku rimo?
TIM SAYUSAC
Lembang’o m’ukwayu inyam iye kokoro mandha i wang’ ning’iyo ka nyo ibiyiyo kunoke ngo ayi thieth moko m’ubekwayu nia jutii ku rimo peri giri?
Lembang’o m’ukwayu inen iye cuu kinde m’ibeng’iyo ka nyo ibiyiyo kunoke ngo nia jutii ku nyithi theng rimo ni yath i kumi?
Nen gin m’ucwalu jararieko moko nicwaku paru pa Mungu iwi rimo.
“Acwaku paru pa Mungu iwi rimo” (Cew!, nindo 8, dwi mir 12, 2003, mi français)
Nen video ma e pi ning’eyo kite ma judong cokiri ma gitimo i Komite mi diko kind umego ku odiyath gibekonyo ko umego ku nyimego migi.
a Nen Ponji mi 35, “Lembe m’iromo timo kara imak yub ma cuu.”
b Nen nyathi thiwiwec mir 5 m’ubeyero, “Kan ubekwayu nia jutii ku theng rimo moko,” man Thenge ma jumedo mir 3 m’uyero, “Thieth ma jutiyo i igi ku rimo pa jaratwoyo.”
c Badokter moko gineno thenge ang’wen ma dongo dongo mi rimo ni nyithi theng rimo. Pieno, eromo kwayu nia ikor igi in pi yub m’imaku, nia icopo yiyo ngo nyanok de jucik rimo ma zoo i kumi, kadi thengene ang’wen ma dongo dongo.
