PONJI MI 41
Biblia uyero lembang’o iwi ribiri?
Dhanu ma pol gibed gibedo ku lewic mi weco iwi lembe m’uneno ribiri. Ento ka Biblia ubeweco iwi lembene, eweco thwolo thwolo, re bende ku woro. Lembe m’eyero tie ku kony ma lee iwa. Wacopo zungo ngo lembuno, pilembe won Bibliane tie Yehova, Mungu m’ucwiyowa. Eng’eyo ma ber gin ma romo miyo iwa bero. Bende, enyutho gin ma waromo timo pi nifoyo iye man gin ma romo ketho wakwo kud anyong’a rondo ku rondo.
1. Paru pa Yehova tie ang’o iwi ribiri?
Ribiri tie giramiya ma cuu dit ma Yehova uyiko piwa wa dhanu. Eyike pi nimiyo anyong’a ni nico ku dhaku ma gigamiri i kindgi. Nikadhu kud i giramiya maeno, ju m’ugamiri gicopo nyolo awiya, man bende gicopo nyutho mer i kindgi gin ario i ayi ma cuu man ma foyo i ng’atuman. Eno re m’uketho Lembe pa Mungu uyero kumae: “Anyong’a negi [i] kum dhaku mir aradu peri.” (Lembrieko 5:18, 19) Yehova ubemito nia Jakristuman m’ugamere ubed kende kende ku jadhoge mi gamiri, niwacu, etim ribiri kude kende ento kud etim abor.—Som Juebrania 13:4.
2. Lembsasa mi tarwang’ utie ang’o?
Biblia uyero nia “ju ma gitimo lembsasa mi tarwang’ . . . gibimondo ki ngo i Ker pa Mungu.” (1 Jukorintho 6:9, 10) Pi niweco iwi lembsasa mi tarwang’ eno, jugor Biblia m’ukiewo ku dhu Jugiriki gitiyo ku wec ma porneia. Wec maeno uketho i iye (1) ribiri i kind dhanu ario ma gigamiri ngo, a (2) ribiri m’ikind co ku co kunoke mon ku mon, man (3) ribiri ma jutimo ku lei. Kara wanyay anyong’a i i Yehova man wan giwa de wanwang’ bero, wacikara ‘nicerara i kum lembsasa mi tarwang’.’—1 Juthesaloniki 4:3.
MED NYANG’ PERI
Wakenen kawoni kite m’icopo uriri ko i kum lembsasa mi tarwang’ man bero m’ibinwang’u kan ibegwokiri pi nibedo leng’ saa ceke i kurajo.
3. Ring lembsasa mi tarwang’
Yosefu m’ubino jatic pa Yehova ugam ucerere ku kero kara egwokere leng’; eringo aringa cen ni dhaku m’umito nia evut kude. Som Thangambere 39:1-12, man i ng’eye wuwec iwi penji m’ulubo e:
-
Ang’o m’ucwalu Yosefu niringo?—Nen verse mir 9.
-
Iparu nia Yosefu utimo lembe m’atira? Pirang’o iparu kumeno?
Aradu ma tin giromo lubo lapor pa Yosefu nenedi kara kud gipodh i lembsasa mi tarwang’i? Nen VIDEO.
Yehova ubemito nia wan ceke wacerara acera i kum lembsasa mi tarwang’. Som 1 Jukorintho 6:18, man i ng’eye wuwec iwi penji m’ulubo e:
-
Lembang’o ma tung’ tung’ ma copo telo ng’atini nitimo lembsasa mi tarwang’i?
-
Icopo ringo lembsasa mi tarwang’ nenedi?
4. Ceriri i kum abidhe
Ang’o ma copo ketho ebedo tek niceriri i kum abidhe mi timo lembsasa mi tarwang’i? Nen VIDEO, man i ng’eye wuwec iwi penji m’ulubo e:
-
Kinde m’umego mi video maeni unyang’ nia lembe m’ebecuku paru man m’ebetimo copo cwale nipodho i abor, etimo ang’o?
Kadok Jukristu ma pwe de ginyego anyega saa moko pi nigwoko paru migi ubed ma leng’. Dong’ ang’o ma copo konyi kara kud ibed iketh paru peri iwi lembe m’ucido? Som Jufilipi 4:8, man i ng’eye wuwec iwi penji m’ulubo e:
-
Wacikara niketho paru mwa iwi lembe ma nenedi?
-
Somo Biblia man bedo ku lembe lee i tic pa Yehova copo konyowa nenedi nicerara i kum abidhe mi timo dubo?
5. Cik pa Yehova utie pi bero mwa
Yehova ung’eyo gin ma copo miyo iwa bero man kony. Pieno enyutho iwa kite ma waromo gwokara ko leng’ i kurajo, man enyutho bende bero ma lembuno romo miyo iwa. Som Lembrieko 7:7-27 kunoke nen VIDEO, man i ng’eye wuwec iwi penji m’ulubo e:
-
Ang’o m’uketho jalawobi maeno umondo i abidhe?—Nen Lembrieko 7:8, 9.
-
Nimakere ku Lembrieko 7:23, 26, timo lembsasa mi tarwang’ copo kelo matoke ma rac dit. Ento ka wagwokara, wabiuro peko ma kani?
-
Ka wagwokara i kum lembsasa mi tarwang’, wabinwang’u bero ma kani i nindo m’ubino?
Dhanu moko paru nia Yehova ubediyowa adiya man nia emaruwa ngo uketho ekwero iwa nitimo ribiri co ku co kunoke mon ku mon. Ento i andha, Yehova umaruwa lee dit man ebemito nia wan ceke wakwo rondo ku rondo. Re kara watuc nikwo kumeno, wacikara niworo cik pare. Som 1 Jukorintho 6:9-11, man i ng’eye wuwec iwi penji m’ulubo e:
-
Nyo Mungu ukwero kende kende ribiri ma jutimo co ku co kunoke mon ku mon?
Pi ninyayu mutoro i Mungu, wan ceke wacikara nitimo alokaloka. Nyo bero moko nuti ma waromo nwang’u ka wabetimo kumeno? Som Zaburi 19:8, 11, man i ng’eye wuwec iwi penji m’ulubo e:
-
Iparu nia cik pa Mungu tie pek akeca? Pirang’o iparu kumeno?
Yehova ukonyo dhanu ma dupa dit kara gicak woro cik pare. Ecopo konyo in bende kara ilokiri
DHANU MOKO BEYERO KUMAE: “Etie rac ungo nitimo ribiri ku ng’atu moko ci ma ii uyenyo tekene wumeruru ci.”
-
Icopo dwoko nenedi?
I ADUNDO
Ribiri tie giramiya ma cuu dit ma re Yehova uketho pi nico ku dhaku pare kende, kara umii anyong’a i kindgi.
Penji mi poyowic
-
Lembsasa mi tarwang’ uketho i iye lembang’o?
-
Wacopo timo ang’o pi niuro lembsasa mi tarwang’i?
-
Bero ang’o ma wacopo nwang’u ka wabeworo cik pa Yehova iwi kurajo?
TIM SAYUSAC
Nen thelembe m’uketho Mungu ubemito nia nico ku dhaku ma gibemaru nikwo karacelo, kwayu gilar gigamiri i yo m’atira.
“Biblia uyero lembang’o iwi nikwo karacelo m’umbe nigamiri?” (Thiwiwec mi jw.org)
Kadok Biblia uponjo nia ribiri m’ikind co ku co kunoke mon ku mon utie rac, nyo eno ubenyutho nia wacikara nidagu dhanu ma gicuku timo kit ribiri ma kumeno? Kenen.
“Nyo timo ribiri co ku co man mon ku mon utie raci?” (Thiwiwec mi jw.org)
Nen kite ma cik pa Mungu iwi lembsasa mi tarwang’ mi kwonde ceke ubegwoko kowa.
“Nyo ribiri ma jutimo ku dhogjo utie andha ribiri?” (Thiwiwec mi jw.org)
I kpawa ma thiwie tie “Ginyutho ira woro,” nen gin m’ucwalu jalwo moko m’ubed utimo ribiri ku co wagi niloko kura pare pi ninyayu mutoro i Mungu.
“Biblia loko kwo” (Otkur ma Wiw, nindo 1, dwi mir 4, 2011, mi français)
a Ribiri maeno m’uyiyere ngo uketho i iye timo ma tung’ tung’ ma reco, calu ve ribiri i kind dhanu ario, ribiri ma jutimo ku dhogjo, kud adhik, man nyobo watkum pa ng’atu mange pi nimiyo ava mi tarwang’ i kume.
