PONJI MI 44
Nyo foc ceke foyo i Mungu?
Yehova ubemito nia wabed wanjoy kwo, man saa mange watim kadok foc kunoke feth bende. Ento nyo foc ceke foyo iye? Wacopo nyutho nenedi nia wamaru Yehova i lembe maeno?
1. Pirang’o foc ma pol ma dhanu betimo foyo ngo i Yehova?
Nyo ing’eyo? Karaman foc kunoke feth dupa ma dhanu gibecuku timo tin eni ujengere ngo iwi ponji mi Biblia, man ju m’ugam ucaku thegi de utie ju m’ubed uworo mungu m’araga. Pieno, focne gitie mi dini mi vupo man gitie ku winjiri ku tipo m’ucido kunoke gijengiri iwi paru ma nia ng’eyong’ec tho ngo. Focne moko ke ujengere iwi yiyoyic mi vupo kunoke yiyoyic ma jubedo ko iwi lembe mi thangu kunoke mi bati. (Isaya 65:11) Yehova neno lembe maeno nenedi? Ebecimo wang’ jurutic pare kumae: “Wukoyuru giwu . . . man kud wumul gin m’ucido.”—2 Jukorintho 6:17. a
2. Yehova neno nenedi foc kunoke ceng’ ma dit m’ubemiyo yung m’umakere ngo ni dhanu?
Yehova ubecimo wang’wa nia kud waketh genogen mwa iwi dhanu ma dhanu e. (Som Yeremia 17:5.) Lundo ke foc kunoke ceng’ ma dit moko bebedo tap pi niyungo jubim kunoke juaskari. Mange bebedo pi niyungo ayi mi ng’om (calu ve drapo) kunoke pi niparu pi bedagonya ma ng’ombe unwang’u. (1 Yohana 5:21) Focne mange ke bebedo pi niyungo ungu mi lembgamba kunoke dikiri moko. Yehova copo winjere nenedi ka wabemiyo ni ng’atini kunoke ni dilo moko kit yung m’eromo ko ngo, asagane ke ng’atu kunoke dilo m’ubemewo paru m’ukoc ku yeny pare en e Mungu?
3. Timo ma kani ma romo dwoko foc ni gin m’uyiyere ngo?
Biblia ukwero “mer ku kong’o, foc ma reco, [man] kwaya mi meth.” (1 Pethro 4:3) Ento i feth kunoke ceng ma dit moko, dhanu gitimo kwa lembe ma reco man mir acidi m’umbe nikweriri gigi. Kara wamedara nibedo jurimb Yehova, ubekwayu wakoyara cen ku kit timo maeno ceke ma reco.
MED NYANG’ PERI
Wakenen kawoni kite m’icopo maku ko yub mi rieko iwi lembe m’uneno foc man ceng’ ma dit ma tung’ tung’ kara inyay mutoro i Yehova.
4. Kwer cen foc ceke m’ubemiyo ngo yung ni Yehova
Som Juefeso 5:10, man i ng’eye wuwec iwi penji m’ulubo e:
-
Pi ning’eyo ka nyo wacopo timo foc moko kunoke ngo wacikara ning’iyo lembang’o?
-
Kekwan kit foc kunoke ceng’ ma dit moko ma dhanu ma pol betimo kaka m’ikwo i iye.
-
Iparu nia focne giromo nyayu mutoro i Yehova de?
Ku lapor, nyo idaru penjiri de nia paru pa Mungu tie ang’o iwi timo foc mi nyoliri? Biblia unyutho ngo wang’ acel de nia jaratic pa Yehova moko utimo foc mi nyoliri; re eweco pi foc moko ario mi nyoliri, man dhanu m’utimogi ubino zoo jurutic pa Yehova ngo. Som Thangambere 40:20-22 man Matayo 14:6-10. I ng’eye, wuwec iwi penji m’ulubo e:
-
Lembang’o m’urombo i foc mi nyoliri ario maeno ceke?
-
Nimakere ku lembe ma Biblia ukoro, iparu nia Yehova winjere nenedi ka jubetimo foc mi nyoliri?
Re saa moko nyo ibepenjiri asu kumae: ‘Nyo andha Yehova romo dieng’ kan abedikara i foc mi nyoliri kunoke i focne mange ma Biblia ucwaku ngo?’ Som Ai 32:1-8. I ng’eye, nen VIDEO man wuwec iwi penji m’ulubo e:
-
Pirang’o wacikara nitimo kero ning’iyo gin ma foyo i Yehova?
-
Wacopo timo kumeno nenedi?
Wacopo ng’eyo nenedi nia foc moko foyo ngo i Mungu?
-
Nwang’u focne ujengere iwi ponji ma Biblia ucwaku ngo. Pi ning’eyo lembuno, say niyang’ nia focne ugam ucaku nenedi.
-
Nwang’u focne ubemiyo yung m’umakere ngo ni dhanu, ni dilo, kunoke ni ayi mi ng’om moko. Wan wayungo Yehova nisagu zoo man wageno nia En re m’ebidaru peko mi ng’om maeni.
-
Nwang’u lembe man timo mi iye ukoc ku ma cik mi Biblia ubekwayu. Wan wacikara nibedo ku kura ma leng’ saa ceke.
5. Kony dhanu mange kara giwor yiyoyic peri
Ecopo bedo tek niceriri ka dhanu mange gibecego mac i kumi nia idikiri kugi i foc kunoke lembsuru moko ma foyo ngo i Yehova. Saa maeno iromo timo ang’o? Kor igi pi ng’iyong’ic peri ku rieko man ku woro. Bed bende ku cirocir. Pi nineno lapor moko mi lembe m’iromo timo, nen VIDEO.
Som Matayo 7:12, man i ng’eye wuwec iwi penji m’ulubo e:
-
Nimakere ku verse maeni, nyo ubekwayu nia iyer ni jupewu m’utie ngo Jumulembe nia gicikiri ngo nitimo foc kunoke ceng’ ma dit moko?
-
Icopo timo ang’o pi niyomo cwiny wedi peri man kara ging’ey nia kadok ibidikiri ngo kugi i foc migi de, re asu imarugi man ibedieng’ pigi?
6. Yehova ubemito wabed kud anyong’a
Yehova ubemito nia wabed wanambi man wanjoy kwo karacelo ku wedi mwa man jurimbwa. Som Eklizia 8:15, man wuwec iwi penji m’ulubo e:
-
Verse maeni ubenyutho nenedi nia Yehova ubemito wabed kud anyong’a?
Yehova umaru ka dhanu pare gibenambu ma ber man gibenjoyo kwo karacelo. Nen VIDEO pi ning’eyo kite ma lembuno unyuthere ko kamaleng’ i coko mwa ma dit ma diko ng’om dupa.
Som Jugalatia 6:10, man i ng’eye wuwec iwi penji m’ulubo e:
-
Nyo ubekwayu nia wakewadikara i foc ma dhanu ma pol gibetimo pi ninyutho nia wabenyutho “bero ni dhanu” mange?
-
I kind nimiyo giramiya pilembe judiyi adiya i saa mi foc, man nimiyo giramiya ku berocwinyi, ma kani ma romo nyayu anyong’a i ii?
-
Jumulembe pa Yehova dupa gibed giyiko nambu saa moko ni awiya migi man bende gimiyo igi giramiya rek kumeni. Kan itie kud awiya, lembang’o ma segi m’iromo timo igi?
DHANU MOKO BEYERO KUMAE: “Sayu ning’eyo kite ma foc moko ucaku ko pire tie tek ungo. Gin ma pire tek utie kende kende ninambu karacelo ku wedi man jurimo.”
-
In ke icopo yero ang’o?
I ADUNDO
Yehova ubemito nia wabed wanambi man wanjoy kwo karacelo ku wedi mwa man jurimbwa. Re ebemito bende nia waur cen foc man nambu ceke ma foyo ngo iye.
Penji mi poyowic
-
Wacopo ng’eyo nenedi nia foc moko foyo ngo i Yehova?
-
Wacopo konyo nenedi wedi mwa man jurimbwa kara ginyang’ i kum ng’iyong’ic mwa mi timo ngo foc man ceng’ ma dit moko?
-
Ang’o m’unyutho nia Yehova umaru ka wabenambu ma ber man watie kud anyong’a?
TIM SAYUSAC
Kenen kwond foc man ceng’ ma dit moko ma Jukristu gitimo ngo.
“Pirang’o Jumulembe pa Yehova gitimo ngo foc moko?” (Thiwiwec mi jw.org)
Nen thelembe ang’wen m’uketho wayiyo nia foc mi nyoliri foyo ngo i Mungu.
“Pirang’o Jumulembe pa Yehova gitimo ngo foc mi nindo mi nyoliri?” (Thiwiwec mi jw.org)
Nen kit rieko m’aradu moko utuc nitiyo ko kinde ma juwagi ucaye i darasa pi yiyoyic pare m’etimo ko ngo foc mi Noeli.
Jukristu ma wendgi lee dit ging’iyo nitimo ngo foc mi Noeli. Nyo ang’eyang’o umondo i igi pi ng’iyong’ic migine?
“Ginwang’u lembe ma ber m’usagu zoo” (Otkur ma Wiw, nindo 1, dwi mir 12, 2012)
a Nen Thenge ma jumedo, mir 5 pi ning’eyo gin m’iromo timo ka dhanu m’i ng’eti gibetimo foc moko kunoke ceng’ ma dit.
