Yesu uponjo nia julub pare gicikiri ngo nibedo i thenge “mi ng’om.” (Yohana 15:19) Eno uketho i iye nicwaku ngo thenge moko mi ng’om maeni, niwacu nimondo ngo i lembgamba kadi i lwiny. Re ku lemandha, saa moko etie lembe ma yot ungo nibedo kumeni m’umbe nicwaku thenge moko. Dhanu moko copo caku cayuwa man ning’ierowa bende pi ng’iyong’ic mwane. Dong’ wacopo nyutho nenedi nia wabecwaku ngo thenge moko mi ng’om maeni ento nia watie kende kende i thenge pa Yehova Mungu?

1. Jukristu mandha gineno gavmenti mi dhanu nenedi?

Jukristu mandha giworo gavmenti. Tap calu ma Yesu ugam uyero, ‘wamiyo piny pa Kaisari ni Kaisari,’ niwacu, waworo cik mi ng’om maeni, calu ve cik m’ubekwayu niculo palatha man karathasi ma tung’ tung’ pa Leta. (Marko 12:17) Biblia uwacu nia ka dhanu ubebimo, etie kende kende pilembe Yehova re m’uweko nia gikegibim wiwa. (Jurumi 13:1) Pieno wanyang’ nia bimobim mi dhanu utie ku dito mi kadhiri moko kende, ento pa Mungu re ma dit nisagu. Wabekuro Mungu man Ker pare mi polo re m’ubin udar peko ceke mi dhanu.

2. Wacopo nyutho nenedi nia wabecwaku ngo thenge mi ng’omi?

Calu Yesu, wan bende wamondo ngo i lembgamba. Kinde ma dhanu uneno udu moko ma Yesu utimo, gimito gikethe ni Rwoth migi iwi ng’om keni, ento eyiyo ngo. (Yohana 6:15) Pirang’o ejay? Pilembe calu m’edok eyero i ng’eye, “Ker [pare] tie ngo mi ng’om maeni.” (Yohana 18:36) Wa julub pa Yesu bende, wanyutho nia wabediko ngo cingwa i thenge mi ng’om maeni i yore dupa. Ku lapor, wadikara ngo i lwiny. (Som Mika 4:3.) Waworo ayi mi ng’om, calu ve bendela (drapo), ento watimo ngo ire thier, niwacu wamiyo ngo ire kit woro man yung ma wamiyo ni Mungu kende. (1 Yohana 5:21) Bende, wacwaku ngo ungu moko mi gamba kadi won gamba m’ubekwayu jubol kwir i wiye, man wabedo de ngo jadhoge. I yo maeno man mange, wanyutho nia wamoko mwa kende kende i kum bimobim pa Mungu, niwacu Ker pare.

 MED NYANG’ PERI

3. Jukristu mandha gicwaku ngo thenge mi ng’om maeni

Yesu ku julub pare giweko iwa lapor ma ber mir aluba. Som Jurumi 13:1, 5-7 man 1 Pethro 2:13, 14. I ng’eye, nen VIDEO man wuwec iwi penji m’ulubo e:

• Pirang’o wacikara niworo judongo pa gavmenti?

• Wacopo nyutho nia wabeworogi i yo moko ma kani?

I saa mi lwiny, thek kunoke ng’om moko romo loko nia gibecwaku ngo thenge moko, ento i andha nwang’u gilund gibekonyo thenge ario zoo. Dong’ nicwaku ngo thenge moko thelembene tie ang’o i andha? Som Yohana 17:16. I ng’eye, nen VIDEO man wuwec iwi penji m’ulubo e:

• Nicwaku ngo thenge mi ng’om thelembene tie ang’o?

Waromo timo ang’o ka judongo pa Leta gibekwayu nia watim lembe ma cik pa Mungu ulund ukwero? Som Tic mi Jukwenda 5:28, 29. I ng’eye, nen VIDEO man wuwec iwi penji m’ulubo e:

• Tekene dhanu umiyo cik m’ukoc ku pa Mungu, wacikara niworo cik ma kani?

• Kenyuth lembe moko ma romo wok man ma romo kwayu nia Jukristu kud giwor cik mi judongo pa gavmenti.

 4. Kud icwak thenge mi ng’om i paru kadi i timo peri

Som 1 Yohana 5:21. I ng’eye, nen VIDEO man wuwec iwi penji m’ulubo e:

• I video maeni, pirang’o Ayenge ukwero nimondo i lembgamba kadi nidikere i seremoni mi motho bendela?

• Nyo emaku yub mi rieko? Pirang’o iparu kumeno?

Eromo bedo tek iwa nicwaku ngo thenge mi ng’om i lembe mange ma kani? Nen VIDEO, man i ng’eye wuwec iwi penji m’ulubo e:

• Ka tuko moko ubethubo kind ekip mi ng’om ario, wacopo nyutho nenedi nia watie ngo i thenge moko?

• Ka weg gamba gimaku yub m’utie ku matoke ma ber kunoke ma rac i wiwa, wacopo nyutho nenedi asu nia wabecwaku ngo thenge mi ng’omi?

• Ka wang’ ma pol wabed walubo lembang’eya mi politik man jurimbwa de beweco kwa iwi lembene, lembuno copo bedo ku matoke ma kani i wiwa?

 I ADUNDO

Jukristu gitimo kero migi ceke pi nimondo ngo i lembgamba man nicwaku ngo thenge moko mi ng’om maeni, n’ikebed i paru, i wec, man i timo migi.

Penji mi poyowic

• Wacikara nitimo ang’o ni judongo pa gavmenti?

• Pirang’o wacikara ngo nicwaku thenge moko mi lembgamba?

• Eromo bedo tek iwa nicwaku ngo thenge mi ng’om i lembe moko ma kani?