PONJI MI 47

Nyo lembe moko ubeceri ku limo batizo?

NG'II DHOK M'IMARU

Ma jiji mbe, idaru ng’eyo lembe dupa dit iwi Yehova nikadhu kud i ponji mi Biblia. Copere nia idaru timo bende alokaloka moko nimakere ku gin m’ibecuku ponjo. Re nyo fodi asu lembe moko nuti m’ubeceri ku thiero kwo peri ni Yehova man nilimo batizo. Ponji maeni biweco tap iwi lembe moko ma wang’ ma pol becero dhanu ku limo batizo. Wabineno bende kite m’iromo voyo ko macerone ceke.

1. Ubekwayu ing’ey lembe thorukani i wang’ nilimo batizo?

I wang’ nilimo batizo, ubekwayu ibed ku “ng’eyong’ec ma tap mi lemandha.” (1 Timoteo 2:4) Nyo eno nyutho nia icikiri ning’eyo lembe ceke mi Biblia man dwokowang’ penji ceke ma dhanu romo penji ko? Ungo. Kadok Jukristu m’ulimo oro daru kadhu lee de, gimediri asu niponjo lembe mi Biblia. (Jukolosai 1:9, 10) Ubekwayu kende kende nia ing’ey kokoro lembe ma pigi tek mir ukungu ma Biblia ubeponjo. Judong cokiri giromo konyi ning’eyo ka nyo itie ku ng’eyong’ec maeno mir ukungu.

2. Lembe moko ma kani ma pigi tek m’icikiri nitimo i wang’ nilimo batizo?

I wang’ nilimo batizo, ubekwayu kokoro ‘ilok cwinyi man ilokiri.” (Som Tic mi Jukwenda 3:19.) Niloko cwinyi utie nibedo kud apidacwiny man can ma lee mandha iwi dubo moko ci m’itimo i wang’e man nikwayu Yehova kud adundeni ceke nia ewek iri. Bende ubekwayu ilokiri, niwacu, iwek timo ceke ma reco man imak yub mi caku wotho kwa i yo ma foyo i Mungu. M’umedo maeno, ubekwayu icak dikiri i lembe ma tung’ tung’ m’i cokiri, calu ve nibecidho nja i coko man nirweyo lembanyong’a calu jarwey ma fod’ulimo ngo.

3. Pirang’o ukwayu ngo ilwori?

Dhanu moko gibed gilworo nithiero kwo migi ni Yehova pilembe giparu nia gibituc ungo niworo lembe ma ging’olo ire. Andha saa moko iromo timo kosa. Kadok weg bedopwe dupa ma co ku ma mon ma Biblia uweco pigi, gigam gitimo bende kosa saa moko. Ento ng’ey nia Yehova ubekwayu ngo ya jutic pare gibed leng’ dak wi dak, niwacu m’umbe dubo. (Som Zaburi 103:13, 14.) Gin m’emaru man m’ebekwayu utie nia itim kero peri ceke nitimo lembe m’atira! Bende, ebikonyi. Ebetielo cwinywa nia gin moko mbe ma ‘bicere ku maruwa.’—Som Jurumi 8:38, 39.

MED NYANG’ PERI

Kawoni wabineno nia icopo voyo lembe ceke m’ubeceri ku limo batizo nwang’u ibeponjo ning’eyo Yehova cuu mandha man ibejengiri iwi kony pare.

4. Ponj ning’eyo Yehova cuu mandha

Ubekwayu ing’ey Yehova rukani i wang’ nilimo batizo? Ubekwayu ing’eye cuu nitundo m’imare ko man icak timo lembe ma foyo iye. Nen VIDEO pi ning’eyo kite ma dhanu moko mi ng’om ma tung’ tung’ ma giponjo bende Biblia gitimo ko kumeno. I ng’eye, wuwec iwi penji m’ulubo e:

VIDEO: Yo ma terojo i batizo (3:56)

I video maeni, ang’o m’ukonyo dhanu maeno niyikiri pi batizo?

Som Jurumi 12:2, man i ng’eye wuwec iwi penji m’ulubo e:

Nyo fodi itie ku jiji moko iwi lembe ma Biblia ubeponjo kunoke iwi ponji moko mi Jumulembe pa Yehova?
Ka eyo, iromo timo ang’o pi nidaru jijine?

5. Voy lembe ma nyo ubeceri ku limo batizo

Ka ng’atini umaku yub nithiero kwo pare ni Yehova man nilimo batizo, ecopo nwang’ere ku peko kunoke macero moko. Pi ning’eyo laporne moko, nen VIDEO, man i ng’eye wuwec iwi penji m’ulubo e:

VIDEO: Nimaru Yehova konyojo nivoyo macero (5:22)

I video maeni, nyamego Narangerel uvoyo macero ma kani kara etim ni Yehova?
Maru Yehova ukonye nenedi nivoyo lembe m’ubino cere?

Som Lembrieko 29:25 man 2 Timoteo 1:7, man i ng’eye wuwec iwi penji m’ulubo e:

Wacopo nwang’u tegocwiny kani pi nivoyo lembe ma romo cerowa?

6. Gen kony pa Yehova

Yehova bibedo kudi saa ceke man ebikonyi kara inyay mutoro i iye. Nen VIDEO, man wuwec iwi penji m’ulubo e:

VIDEO: Yehova Mungu bikonyi (2:50)

I video maeni, pirang’o japonj Biblia eno ubino lworo nilimo batizo?
Lembang’o m’eponjo m’utuc nikonye kara ebed ku genogen nia Yehova bikonye?

Som Isaya 41:10, 13, man i ng’eye wuwec iwi penji m’ulubo e:

Pirang’o ukwayu cwinyi bed tek nia ibituc niworo lembe m’ing’olo ni Yehova kinde m’ibethiero kwo peri ire?

7. Med foyofoc peri ni Yehova pi mer pare

Kan ibemediri niparu pi mer ma lee ma Yehova meri ko, adundeni bimedere nipong’ ku foyofoc, man ibimediri bende nibedo kud ava ma lee mi timo ire rondo ku rondo. Som Zaburi 40:5, man i ng’eye wuwec iwi penji m’ulubo e:

Itie ku foyofoc asagane pi lembe ma kani ma ber ma Yehova utimo?

Jabila Yeremia ugam umaru Yehova man lembe pare, uketho ebedo ku foyofoc lee pi rwom m’ebedo ko mi timo ni Yehova. Ewacu kumae: “Lembe peri bedo ni mutoro man ni anyong’a mir adundena: kum julwong’a ku nyingi, e Yehova Mungu.” (Yeremia 15:16) Kedwok wang’ penji m’ulubo e: