Ka wabenwang’ara i kind umego ku nyimego mwa, wawinjara ma ber mandha, tap calu m’ubimo Daudi ubed uwinjere ko. Eyero kumae: “Nen, maram e ber e mit de ni umego ya gibed karacelo i [acel]” (Zaburi 133:1) Re bedo i acel mwane etie ngo lembe ma timere gire kumeni. Ng’atuman m’i kindwa ucikere nidiko cinge pi nigwoke kara emedere i wang’e.

1. Lembang’o ma ber akeca i kind dhanu pa Mungu?

Kan icidho i coko mwa i ng’om mange, kadok nyo ibiwinjo ngo dhok ma kuca cu de, re i lembe ma pol ibiwinjiri ma ber man ibinweng’iri nia itie ajola. Pirang’o? Pilembe i ng’om zoo, wabed watiyo ku girasoma ma rom pi niponjo Biblia. Bende, watimo kero ninyutho mer i kindwa. Kadok wakwo kakani de, wan ceke ‘wabelwong’o nying’ Yehova man wabetimo ire i acel.’​—Zefania 3:9.

2. Icopo timo ang’o pi nigwoko bedo i acel mi cokiri?

Biblia uwacu kumae: “Wumeruru i kindwu lee mandha niai kud i adunde.” (1 Pethro 1:22) Icopo tiyo nenedi ku juk maeno? Kakare nibeketho wii kwa iwi ng’ico kunoke kosa mi jumange, tim kero nibeneno kwa kite man kura migi ma beco. Kud ibed idikiri kwa ku ju ma lembe migi rombo ku peri, ento tim kero ning’iyo bende kud umego ku nyimego ma suru, thek, rangi kunoke kit kwo migi ukoc ku peri. Ukwayu watim bende kero nikabu cen adegi man akoyakoya kud i iwa.​—Som 1 Pethro 2:17. a

3. Ka teliri moko wok i kindwu kud umego kunoke nyamego mange, ukwayu itim ang’o?

Kadok watie i acel de, re watie ngo leng’ calu Mungu. Saa moko waromo timo lembe ma ton i jumange. Pieno Lembe pa Mungu uwacu nia ‘wumeduru . . . niweko lembe m’i kindwu,’ man emedo kumae: “Tap calu ma Yehova bende uweko lembe mwu yot yot, wun de wucikuru nitimo kumeno.” (Som Jukolosai 3:13.) Wadaru koso ni Yehova wang’ udul ma lee dit, re asu eweko iwa. Ebemito nia wan de watim kisa ni umego ku nyimego mwa. Dong’ kan inwang’u nia idaru yero kunoke itimo lembe m’uton i ng’atu moko, mak ndhu ndhu yub mi yiko kindwu udok ma ber.​—Som Matayo 5:23, 24. b

 MED NYANG’ PERI

4. Kab cen adegi man akoyakoya kud i ii

Wabemito wamar umego mwa ceke. Ento saa mange ecopo bedo yot ungo iwa niyiyo ng’atu ma suru, rangi kunoke kit kwo pare ukoc ku ma mwa. Saa maeno, ang’o ma romo konyowa? Som Tic mi Jukwenda 10:34, 35, man i ng’eye wuwec iwi penji m’ulubo e:

• Yehova ubejolo kwond dhanu ceke i kind Jumulembe pare. Lapor pare ucikere nicweli nineno nenedi dhanu mi suru kunoke mi kit kwo m’ukoc ku peri?

• Kit paru ma kani mir akoyakoya m’upong’ akeca kaka m’ibekwo i iye? Pirang’o ukwayu iur kwond parune ceke?

Som 2 Jukorintho 6:11-13, man i ng’eye wuwec iwi penji m’ulubo e:

• Iparu nia icopo timo ang’o pi niketho kindwu ubed ceng’ini magwei kud umego ku nyimego mi suru man mi kit kwo m’ukoc ku peri?

5. Bed itim kisa yot yot man keth kwiyocwiny

Yehova beweko iwa lembe yot yot ma ke wan, wabibedo mbe nyanok de ku yeny mi weko lembe moko ire. Som Zaburi 86:5, man i ng’eye wuwec iwi penji m’ulubo e:

• Verse maeni ubenyutho ang’o iwi kisa pa Yehova?

• Nyo itie ku foyofoc i kum kisa parene? Pirang’o?

• Lembe moko ma kanigi ma copo nyayu teliri i kindwa ku jumange?

Waromo lubo lapor pa Yehova nenedi kara wamedara nibedo i acel kud umego ku nyimego mwa? Som Lembrieko 19:11, man i ng’eye wuwec iwi penji m’ulubo e:

• Ka ng’atu moko ukoso iri, icopo timo ang’o pi niyiko lembe m’i kindwune?

 Saa moko, wan de watimo lembe ma kiero jumange. Saa maeno, wacikara nitimo ang’o? Nen VIDEO, man i ng’eye wuwec iwi penji m’ulubo e:

• Nyamego mi video maeni utimo ang’o pi nidwoko kwiyocwiny i kindgi ku nyamego ma kucelo?

 I ADUNDO

Icopo diko cingi pi nigwoko bedo i acel mi cokiri nwang’u ibetimo kisa man ibenyutho mer ni umego ku nyimego ceke m’umbe akoyakoya.

Penji mi poyowic

• Icopo timo ang’o pi nikabu cen adegi man akoyakoya kud i ii?

• Ibitimo ang’o tekene teliri moko uwok i kindwu kud umego kunoke nyamego moko?

• Pirang’o ukwayu ilub lapor mi kisa pa Yehova?