I Biblia junwang’u lembanyong’a ma nia dhanu bikwo rondo ku rondo iwi ng’om. (Zaburi 37:29) I Biblia, junwang’u buku ma thindo thindo 66. Mungu tio ku dhanu ma romo 40 ma weg yioic pi nikiewogi. Musa re m’ukiewo buku abic ma kwong’a, oro kadhu doko 3 500 kumeni. Buku matokcen ke Jakwenda Yohana re m’ukiewo, oro daru kadhu 1 900. Jugor Biblia eno gigoro paru pa ng’a? Mungu uweco kugi ni kadhu kud i tipo ma leng’. (2 Samwil 23:2) Gigoro paru pa Mungu ento migi ngo. Pieno, Yehova re ma won Biblia.—Som 2 Timoteo 3:16; 2 Petro 1:20, 21.

Wang’eyo nia Biblia uai i bang’ Mungu pilembe ekoro taptap pi nindo m’ubino. Ng’atu moko acel de mbe ma copo timo kumeno ku copo pare gire. (Yocuwa 23:14) Mungu ma Jacopo ceke kende re macopo ng’eyo kite ma kwo mi dhanu bibedo ko nindo m’ubino.—Som Isaya 42:9; 46:10.

Biblia tie buku m’ukoc ku mange ceke, pilembe eai i bang’ Mungu. Milioni dupa mi Biblia nwang’ere i bang’ dhanu ke i dhok dak swa. Lembe ma Biblia yero urombo ku lembe ma rieko mi ng’om unwang’u. Bende, dhanu 40 m’ugore, gigoro ngo paru m’upiemere ku wagi. * M’umedo maeno, lembe ma Biblia yero iwi mer nyutho ngbeng’ ngbeng’ nia eai i bang’ Mungu ma ene Mungu ma jamer, man Biblia tie asu ku copo mi loko kwo mi dhanu udok maber. Lembe ceke ma wakwanu eno ketho dhanu dupa giyio nia Biblia tie lembe pa Mungu.—Som 1 Jutesaloniki 2:13.

Biblia uweco akeca iwi lembanyong’a ma ber ma nia Mungu tie ku lemb’akeca ma ku maru i ie pi dhanu. Giragora dupa koro kite ma dhanu ugam ubayu kudo bero madit mi kwo iwi ng’om paradiso man kite ma paradiso eno bidok ko kakare.—Som Lembanyutha 21:4, 5.

I lembe pa Mungu junwang’u bende cik, cik mir ukungu man juk. Kendo, i Biblia junwang’u korolembe iwi kite ma Mungu ubed ukwo kudo ku dhanu—koro lembe nino nyutho kite kunoke kura pa Mungu. Pieno, Biblia copo konyi kara ing’ei Mungu. Ekoro kite ma icopo doko kudo jamer pare.—Som Zaburi 19:7, 11; Yakobo 2:23; 4:8.

Nyathibuku maeni bikonyi kara inyang’ i lembe mi Biblia. Etio ku bodho ma Yesu ugam utio kudo pi nikonyo dhanu kara ginyang’. Yesu ubed ulwong’o giragora mi Biblia man ebed ekoro “thelembe mi giragorane.”—Som Luka 24:27, 45.

Piny mange mbe ma copo nyayu anyong’a nikadhu lembanyong’a m’uai i bang’ Mungu. Ento, dhanu moko gidieng’ kudo ngo, jukurucel ke lembene nyayu kwinyo i igi. Kadok kumeno de, kudi cwinyi tur. Ng’ei nia genogen peri mi kwo ma rondo ku rondo, ucungo iwi tundo ning’eyo Mungu.—Som Yohana 17:3.