Mungu mandha utie jacwic mi piny ceke. Ecaku ngo man ebithum de ngo. (Zaburi 90:2) Enre ma etie won lembanyong’a ma nwang’ere i Biblia. (1 Timoteo 1:11) Wacikra ni timo thier ire kunoke niworo en kende kum enre m’emiyo iwa kwo.—Som Lembanyutha 4:11.

Ng’atu moko acel de mbe m’udaru neno Mungu kum ene Tipo, niwacu ayi kwo pare tie kit kwo ma malu lir, kajupore ku kwo mi giracwiya mange mi ng’om, m’utie ku kum manen. (Yohana 1:18; 4:24) Ento wacopo nyang’ i kum kite kunoke kura pare ni kadhu kud i piny m’ecwiyo. Ku lapor, nying yen man thiwe ma tung’tung’ nyutho iwa pi maru man rieko pare. Dwong’ pa ng’om ku giracwiya mange ma calu ng’om nyutho iwa pi tego pare.—Som Jurumi 1:20.

Bende, wacopo ponjo ni ng’eyo akeca iwi kite kunoke kura mange pa Mungu nwang’u wabesomo Biblia. Ku lapor, Biblia nyutho iwa gin ma Mungu maru man gin m’edagu, lembe ma ebed etimo ni dhanu, man kite ma enyutho kura pare i lembe ma tung’tung’ mawok.—Som Zaburi 103:7-10.

Yesu uyero warwo kumae: “Wegwa ma ini i polo, nyingi bed leng’.” (Matayo 6:9) Kadok Mungu tie ku nying dupa mi dito, nyinge utie acel kende. I dhokman, julwong’o nying ne i ayi ma tung’tung’. I dhog Alur, wang’ ma pol Julwong’o nying maeno “Yehova.” Ento Jumange lwong’e “Yahweh.”—Som Zaburi 83:18.

I Biblia mapol, juwodho nying Mungu man juwile ku nying mi dito ma calu ve Rwoth kunoke Mungu. Ento, saa  ma jugam jukiewo Biblia, nying Mungu unwang’ere i ie wang’ maromo 7 000. Yesu uketho nying Mungu ung’eyere kinde ma ebed eponjo dhanu ku lembe pa Mungu.—Som Yohana 17:26.

Nyo wacopo yero nia can m’upong’ akeca i ng’om nyutho nia Yehova Mungu dieng’ ungo piwa? Jumoko loko nia Mungu ketho wanen can kara emul kunoke epim kudo iwa, ento eno tie ndra.—Som Yakobo 1:13.

Mungu mio iwa twero mi ng’io wan giwa gin ma wacopo timo i kwo mwa. Eno nyutho nia enenowa ni dhanu ma zoo. Pieno, wang’io wan giwa ni timo ni Mungu, nyo eno tie ber ungo? (Yocuwa 24:15) Ento dhanu mapol ng’io migi nitimo lembe ma reco ni juwagi, uketho can unyai i ng’om. Yehova foyo ngo ku timo ma reco eno.—Som Thangambere 6:5, 6.

Yehova tie Mungu ma dieng’ piwa. Emito wanwang’ anyong’a i kwo mwa. Pieno, ceng’ni eni ebikabu can man dhanu ceke m’ubenyayu can ne. Re, wang’ei nia thelembe tie m’uketho Mungu weko can i kum dhanu pi nindo moko. I ponji mir 8 mi nyathibuku maeni, wabinwang’u thelembe ne.—Som 2 Petro 2:9; 3:7, 13.

Yehova kwayu wabed wawec kude nikadhu kud i rwo kara wacor ceng’ni i vute. Edieng’ pi ng’atuman acel acel i kindwa. (Zaburi 65:2; 145:18) Etie ayika ni timo kisa iwa. Kadok saa moko wabed wakier de, eneno kite ma wa ii kudo pi ninyayu anyong’a i ie. Pieno, kadok waleng’ ungo de, wacopo bedo ku ribri ma ceng’ni ku Mungu.—Som Zaburi 103:12-14; Yakobo 4:8.

Calu Yehova re m’ucwio kwo mwa, ukwayu wamare ni kadhu maru ma wamaru kudo kadok ng’a de. (Marko 12:30) Kan ibenyutho maru peri ni Mungu man ibetimo gin ceke m’ekwayu itim, ibicoro ceng’ni ceng’ni kude.—Som 1 Timoteo 2:4; 1 Yohana 5:3.