PONJI MIR 10
Icopo Ng’io Dini Mandha Nenedi?
1. Nyongo kusoma mandha utie acel kende?
“Wukuru ni jubila mi ndra.”
Yesu uponjo julubne ku dini acel kende, dini mandha. Eporo kusoma maeno ku yo ma terojo i kwo ma rondo ku rondo. Eyero kumae: “Ju ma lam (ma nok) de e ma ginwang’e”. (Matayo 7:14) Mungu jolo thier mi dini ma ponji mi ie ucungo iwi lembe pare Biblia man iwi lemandha kende. Jutimthier mandha ceke gidikiri i yioic acel.
2. Yesu uyero ang’o iwi jukristo mi ndra?
“Gituco nia ging’eyo Mungu; enke ku tic migi gikwere.”
Yesu ular upoyo nia jubila mi ndra biwok man gibinyotho Jukristo mandhandha. Yowoko, ginen ni jutimthier mandha. Giloko nia kanisa migi kunoke ot ma gicokri i ie tie ot mi jukristo. Ento icopo ng’io nia i andha gitie jukani. Icopo ng’iogi nenedi? Ng’ei nia dini mandha kende re ma tie ku Jukristo mandha ma jucopo ng’iogi ke nikadhu kud i kite man timo migi.
3. Icopo ng’io Jutimthier mandha nenedi?
Icopo ng’iogi ni kadhu kud i ayi abic mae:
-
Jutimthier mandha woro Biblia man ginene ni Lembe pa Mungu. Gitimo kero nikwo ni makre ku cik mir ukungu mi Biblia. Pieno, dini mandha ukoc ku dini mi ndra ma ponji mi ie ucungo iwi paru pa dhanu. (Matayo 15:7-9) Jurutimthier kunoke jururwo mandha tiyo ku gin ma gicikuponjo i kwo migi.
—Som Yohana 17:17; 2 Timoteo 3:16, 17. -
Julub’Yesu mandha woro nying Mungu, Yehova. Yesu uworo nying Mungu e egam eketho nying ne ung’eyere. Ekonyo dhanu ni ng’eyo Mungu man eponjogi nirwo nia nyinge bed leng’. (Matayo 6:9) Kakare ma ikwo i ie, dini ma kani m’ucikuketho nying Mungu ung’eyere?
—Som Yohana 17:26; Jurumi 10:13, 14. -
Jukristo mandha rweyo pi Ker pa Mungu. Mungu oro wode iwi ng’om kara ebin erwei lembanyong’a mi Ker. Ker pa Mungu kende re m’utie genogen mandha pi dhanu. Yesu medre niyero pi Ker maeno cil i tho pare. (Luka 4:43; 8:1; 23:42, 43) Eyero nia julubne bende gibirweyo pi Kerne. Ka ng’atu moko ubino i beng’i niyero iri pi Ker pa Mungu, icopo yero nia etie i dini ma kani?
—Som Matayo 24:14. -
Julub’Yesu gitie ngo thenge mi ng’om maeni marac. Icopo ng’io julub yesu mandha pilembe gidikri ngo i lembgamba mi ng’om kadok i lwiny. (Yohana 17:16; 18:36) Bende, gilubo ngo kot kura kadok paru ma reco mi dhanu mi ng’ombuni.
—Som Yakobo 4:4. -
Jukristo mandha nyutho maru mandha i kindgi. Lembe pa Mungu ponjogi niworo dhanu mi thek ceke. Kadok dini ma tung’ tung’ mi ndra diko cing’gi wang’ mapol i lwiny i kind thek ma tung’tung’, jutimthier mandha gikwero migi nitimo kumeno. (Mika 4:1-3) Ento, jukristo mandha tio ku saa migi man jambcing’gi pi nikonyo man ni kethocwiny jumange.
—Som Yohana 13:34, 35; 1 Yohana 4:20.
4. Icopo yero nia dini mandha tie makani?
Dini makani ma ponji mi ie ucungo iwi lembe pa Mungu? Dini makani ma ubeworo Mungu man uberweyo pi Ker pa Mungu nia Ker maeno kende re m’utie genogen mandha pi dhanu? Dini makani m’unyutho mer i andhandha man udiko ngo cinge i lwiny? Iparu nenedi?
