Lembe ma reco ucaku iwi ng’om kinde ma Jok ugam ucwayu ndra ma kwong’a. I acaki, Jok ubino malaika maleng’, ento “ecungo ngo i lemandha.” (Yohana 8:44) Nok nok etundo nibedo kud awanya ma rac ma nia jutim ire kit thier m’umaku jutim ni Mungu kende. Jok uwondo ng’atu ma dhaku ma kwong’a, Eva man ethoke nitundo eworo dwande kakare niworo dwand Mungu. Adamu bende ugam ulubo tok cege, en de eworo ngo dwand Mungu. Adamu utimo ng’iong’ic m’uroyo dhanu i can man i tho.—Som Thangambere 3:1-6, 19.

Kinde ma Jok ucwalu Eva nituro cik pa Mungu, egam ecaku the jai i kum dwong’ pa Mungu, niwacu dito pare ma malu ngbir. Dhanu ma pol ulubo tok jai pa Jok, gikwero Mungu nibedo jabim migi. Pieno, Jok udoko ubimo mi ng’om.”—Som Yohana 14:30; 1 Yohana 5:19.

Tic ceke pa Mungu tie leng’. Dhanu man jumalaika ma Mungu ucwio, gibino ku copo mi wore ma leng’ mandha. (Poi mi Cik 32:4, 5) Mungu ucwiowa ku bed’agonya mi ng’io wan giwa nitimo gin maber kunoke gin marac. Bed’agonya eno tie iwa kakare mi nyutho maru mwa ni Mungu.—Som Yakobo 1:13-15; 1 Yohana 5:3.

Yehova uweko jai i kum dwong’ pare pi nindo moko. Pirang’o? Kara jung’ei nia bimobim moko mbe m’uweko ma pare, ma copo nikelo bero ni dhanu. (Eklizia 7:29; 8:9) Niai eca nitundo tin, oro kadhu doko 6 000 kumeni. Pi oro maeno zoo, udaru ninen kamaleng’ nia  m’umbe vupo, lembe udaru nivoyo Jubim ma dhanu. Ni daru lwiny, nek ma dongo dongo, koso woro cik, man twoyo uvoyogi magwei.—Som Yeremia 10:23; Jurumi 9:17.

Tung’ ku bimobim pa dhanu, bimobim pa Mungu kelo bero ni dhanu ceke m’ujole. (Isaya 48:17, 18) Ceng’ni eni, Yehova bikabu bimobim ceke pa dhanu, man ebijigo wigi. Dhanu m’ung’io nibedo i the loc pa bimobim pa Mungu kende, re ma gibibedo i ng’om.—Isaya 11:9.—Som Daniel 2:44.

Jok uloko nia ng’atu moko acel de mbe ma copo nitimo ni Yehova ku maru pare en gire, m’umbe nisayu bero moko i bang’ Mungu. Nyo icopo maru nituco wi Jok nia en e javupo? Icopo! Cirocir pa Mungu mio iwa wan ceke kakare mi ng’io bimobim ma wamaru ubed i wiwa, i kind pa Mungu ku pa dhanu. Wanyutho ngbeng’ nia wang’io bimobim makani, ni kadhu kud i ayi kwo mwa.—Som Yob 1:8-12; Lembrieko 27:11.

Wacopo nyutho nia wabeng’io Mungu re m’ubed jabim mwa, nang’u wayenyo dini mandha ma ponji mi ie zoo ucungo iwi lembe pa Mungu, Biblia. (Yohana 4:23) Wacopo nyutho nia wakwero Jok ubed jabim mwa nang’u wabemondo ngo i lembgamba, man i lwiny calu Yesu de ugam utimo.—Som Yohana 17:14.

Jok ubetio ku kero pare pi nicwalu dhanu unen timo mir acidi man ma nyayu peko, ni timo maber. Ka wabekoc cen ku timo ma kumeno, jurimo mwa man wat mwa moko copo caku nicayuwa kuno ke nidoko judogwa. (1 Petro 4:3, 4) Pieno, wan re m’ukwayu watim ng’iong’ic. Nyo wabiribra ku dhanu m’umaru Mungu? Nyo wabiworo cik pare m’upong’ ku rieko man maru i ie? Ka watimo kumeno, wanyutho nia Jok ucwayu ndra kinde m’egam eloko nia ng’atu moko mbe ma copo woro Mungu kan enwang’ere ku peko kunoke abidhe.—Som 1 Jukorinto 6:9, 10; 15:33.

Maru pa Mungu ibang’ dhanu ketho wabed m’umbe jiji nia lembe ma reco man can bithum. Dhanu ceke m’unyutho nia giyio lembe maeno, gibikwo nja ku nja kud anyong’a iwi ng’om.—Som Yohana 3:16.