1, 2. Wacopo timo ang’o kara wamedara nibedo i mer pa Mungu?

WAN ceke wamito wabed ma tek man ku leng’kum. Pieno, waii nicamu cam ma cuu, nitimo jimnastik wang’ mapol man nigwoko kumwa. Kadok eyot ungo nitimo lembe maeno de, re matoke m’emio iwa ketho wanwang’u mutoro, pieno ukwayu ngo wavoci. Ento ukwayu wabed ma tek man ku leng’kum i lembe mange bende.

² Kadok wacaku ning’eyo Yehova ma ber de, re ukwayu wamedara asu niketho winjiri mwa kude udok ma tek. Kinde ma Yuda utielo cwiny Jukristu nia ‘gikuriri gigi i mer pa Mungu,’ ekoro igi kite ma gicopo kuriri ko. Eyero igi kumae: “Wugombru giwu wi yioyic.” (Yuda 20, 21) Pieno wacopo gomo yioyic ma tek nenedi?

3-5. (a) Sitani ubemito inen cik pa Yehova nenedi? (b) Itie ku nen makani iwi cik pa Yehova man iwi cik pare mir ukungu?

³ Pire tie tek akeca nia iyi in giri nia yo pa Yehova tie ber nisagu. Sitani ubemito ipar nia nikwo nimakere ku cik pa Mungu tie lembe ma tek akeca man nia ibibedo ku mutoro nisagu, kan ing’io in giri gin  ma ber ku gin ma rac. Niai i podho mir Eden, Sitani ubemedere asu niketho dhanu giyii lembuno. (Thangambere 3:1-6) Tin bende, ebemedere nitimo kero nisagu.

⁴ Nyo eno Sitani uyero lemandha? Nyo cik pa Yehova tie tek akeca? Ungo. Ku lapor, kepar nia ibewotho i podho moko ma leng’ ma jugwoko lei i ie. Ineno jugiero gang’ m’ucero ku jumond i thenge moko. Icopo paru kumae: ‘Pirang’o juketho gang’ i yo maeni?’ Ento saa maeca, iwinjo umvor ubeywak i ng’et gang’ne. Kawoni icopo bedo ku nen ma nenedi iwi gang’ maeno? Inyang’ nia kara gang’ne ubegwoki kara kud umvor ucemi! Cik mir ukungu pa Yehova utie ve gang’ man Wonabali tie ve umvor. Lembe pa Mungu ucimo wang’wa kumae: “Wubed nger, wuki de; jakwojwu ma wonabali, calu umvor m’ubeywak, ubewotho ku ku ku, m’ebeyenyo ko ka ng’atu m’ecam.”​—1 Petro 5:8.

⁵ Yehova ubemito wakwo ma ber ku mutoro. Ebemito ngo Sitani uwondwa. Eno re m’uketho emio iwa cik man cik mir ukungu pi nigwokowa man niketho wabed ku mutoro. (Juefeso 6:11) Yakobo uyero kumae: “Ng’atu m’ubeneno i cik ma ndhu cu, cik mi gony, m’ebetimo kumeno de asu . . . bibedo jamugisa kum tic m’etimo.”​—Yakobo 1:25.

6. Ang’o ma bikonyowa niyio andha nia yo pa Mungu tie ber akeca?

⁶ Ka wabelubo telowic pa Yehova, wanwang’u alokaloka i kwo mwa man winjiri mwa kude doko ma tek. Ku lapor, wanwang’u bero ka wajolo lwong’o  pare mi rwo i bang’e areri. (Matayo 6:5-8; 1 Jutesaloniki 5:17) Wanwang’u mutoro ka wabelubo telowic pare mi cokara karacelo pi niwore, pi nitielo cwinywa i kindwa man ka wadikara cuu mandha i tic mi rweyo lembanyong’a man mi ponjo dhanu. (Matayo 28:19, 20; Jugalatia 6:2; Juebrania 10:24, 25) Ka waparu iwi kony ma lembuno umio iwa, eno bikonyowa nidwoko yioyic mwa udok ma tek man wabiyio andha nia yo pa Yehova utie ber akeca.

7, 8. Ang’o ma bikonyowa kara kud wadieng’ pir amulaic ma copo bino?

⁷ Wacopo caku nidieng’ nia yioyic mwa binwang’ere i wang’ amulaic ma tek i nindo m’ubino ma cire bibedo tek. Kan ibed iwinjiri kumeno, poi i kum wec pa Yehova ma e: “An a Yehova Mungu peri, m’aponji ni kuloka, m’atelo wii kud i yo ma maku iwoth  i ie. A tek iwinjo lembang’ola para mire! kuno di kwiocwiny peri bedo calu kulo ma dit, man kuno di bedopwe peri bedo calu mukura mi nam.”​—Isaya 48:17, 18.

⁸ Ka wabeworo Yehova, kwiocwiny mwa bibedo calu kulo ma dit ma dwono ngo man bedopwe mwa bibedo calu mukura mi nam kunoke mujanga ma dhongo dhu wat thiri thiri. Kadok wabenwang’ara ku lembang’o i kwo mwa de, wacopo gwoko bedoleng’ mwa. Biblia ung’olo kumae: “Redh ter peri wi Yehova, man ebijengi: Ebiyio ki ngo ya cwiny weg bedopwe ringi.”​—Zaburi 55:22.

9, 10. Nibedo ng’atu m’uteng’ini, thelembene tie ang’o?

⁹ Kan ibeketho winjiri peri ku Yehova udok tek, ‘ibicweliri i teng’ini.’ (Juebrania 6:1) Nibedo ng’atu m’uteng’ini, thelembene tie ang’o?

¹⁰ Wadoko ngo Jukristu m’uteng’ini pilembe oro mwa ulwar. Kara wateng’ini, wacikara niketho Yehova udok jarimbwa ma ceng’ini man nitimo kero nineno lembe i kite m’eneno. (Yohana 4:23) Paulo ugoro kumae: “Ju ma gi mi kum igi pido pi gin mi kum; ento ju ma gi mi tipo re igi pido pi gin mi tipo.” (Jurumi 8:5) Ng’atu m’uteng’ini i tipo ketho ngo wie zoo i kum anyong’a kunoke i kum giki mi kum. Ento, eketho wie zoo i kum timo ni Yehova man emaku yub mi rieko i kwo pare. (Lembrieko 27:11; Som Yakobo 1:2, 3.) Eweko ngo juwond wang’e nitimo lembe ma rac. Ng’atu m’uteng’ini i tipo ung’eyo gin ma ber man ebedo ayika nitime.

11, 12. (a) Paulo uyero ang’o iwi “ng’eyong’ec” ma Jukristu gitie ko mi ng’io i lembe? (b) I ayi makani ma nidoko Jakristu m’uteng’ini urombo ku nidoko jaringng’wec?

 ¹¹ Ukwayu nitimo kero lee pi niteng’ini i tipo. Jakwenda Paulo ugoro kumae: “Cam m’alili en e ni dhanu m’uteng’ni, gi ju ma ni kum timo ma gitimo ng’eyong’ec migi bedo ayika mi ng’io gin ma ber ku gin ma rac.” (Juebrania 5:14) Wec “ayika” copo ketho wapoi i kum kite ma jaringng’wec ng’iyo ko kume pi ng’wec.

¹² Ka waneno jaringng’wec moko ma ringo lee, wang’eyo nia eting’o ire nindo man ebed eng’iyo kume kara ering lee. Junyole ngo ni jaringng’wec. Saa ma nyathin unyolere, eng’eyo ngo kite ma tap m’ecopo tio ko ku cinge man ku tiende. Ento nok nok, eponjo nimaku piny man niwotho. Ku ng’iyo m’ebetimo, ecopo doko jaringng’wec. Kumeno bende, eting’o nindo man ng’iyo pi nidoko Jakristu m’uteng’ini.

13. Ang’o ma bikonyowa nibedo ku paru m’urombo ku pa Yehova?

¹³ I buku maeni, waponjo kite ma wacopo bedo ko ku paru m’urombo ku pa Yehova man nibedo ku nen de m’urombo ku pare. Waponjo kite mi neno cik pa Yehova ni gin ma pire tek man nimare. Kinde ma wabemaku yub ukwayu wapenjara kumae: ‘Cik kunoke cik mir ukungu makani mi Biblia ma jucopo tio ko i lembe maeni? Acopo tio kugi ke nenedi? Yehova copo mito atim ang’o?’​—Som Lembrieko 3:5, 6; Yakobo 1:5.

14. Kara wagier yioyic mwa, wacikara nitimo ang’o?

¹⁴ Waweko ngo kadok nyanok de nigiero yioyic mwa i Yehova. Tap calu ma camu cam ma gierokum konyowa nibedo ma tek, niponjo lembe iwi Yehova  bende konyowa nigiero yioyic mwa ubed ma tek. Kinde ma wacaku niponjo Biblia, waponjo lemandha mir ukungu iwi Yehova man iwi yo pare. Ento ku nindo m’ubekadhu, wacikara ninyang’ i lembe ma thuc. Eno lembe ma Paulo umito yero kinde m’ekiewo kumae: “Cam m’alili en e ni dhanu m’uteng’ni.” Ka wabetio ku lembe ma wabeponjo i kwo mwa, wanwang’u rieko. Biblia uyero nia “rieko en e gin m’usagu.”​—Lembrieko 4:5-7; 1 Petro 2:2.

15. Pirang’o pire tie tek nia wamar Yehova lee man umego ku nyimego mwa?

¹⁵ Ng’atini copo bedo tek man ma kume leng’, ento kara ebed asu kumeno, eng’eyo nia ecikere nimedere nigwoko kume. Kumeno bende, ng’atu m’uteng’ini ung’eyo nia kara egwok winjiri pare ku Yehova ubed ma tek, ecikere nitimo kero lee mandha. Paulo upoyo wiwa kumae: “Wumulu giwu, tek wuni i yioyic; wuponjru giwu.” (2 Jukorinto 13:5) Re, nibedo ku yioyic ma tek kende uromo ngo. Mer ma wamaru ko Yehova man ma wamaru ko umego ku nyimego ucikere nimedere ameda. Paulo uyero kumae: “Tek . . . ang’eyo giramung’a ceke ku girang’eya de ceke; man tek a won yioyic ceke, m’acopo ketho ko gudi ai cen, ento mer umbe kuda, meca an a mananu.”​—1 Jukorinto 13:1-3.

16. Sitani ubemito wabed ku paru ma nenedi?

¹⁶ Sitani ubemito wapar nia wacopo ngo nyanok de ninyayu anyong’a i Yehova. Emito cwinywa utur man wapar nia peko mwa copo thum ungo. Ebemito ku wagen Jukristu wadwa man ku wabed ku mutoro.  (Juefeso 2:2) Sitani ung’eyo nia paru ma cuu ngo copo timowa rac man copo nyotho winjiri mwa ku Mungu. Ento Yehova umio iwa gin ma copo konyowa ninyego ku paru ma cuu ngo. Emio iwa genogen.

17. Pirang’o pi genogen tie tek?

¹⁷ I 1 Jutesaloniki 5:8, Biblia uporo genogen mwa ku sabu ma gwoko wii askari i lwiny man elwong’o sabune “genogen mi both.” Genogen mwa i lembang’ola pa Yehova copo gwoko paru mwa man ecopo konyowa nicerara i kum paru ma cuu ngo.

18, 19. Genogen umio tego nenedi ni Yesu?

¹⁸ Genogen ma Yesu ubino ko umio ire tego. I uthieno ma tokcen mi kwo pare iwi ng’om, eciro peko m’ulwobere alwoba. Jarimbe ma ceng’ini ucibe. Mange ke ukwere nia eng’eye ngo. Jumange ke uweke man giringo. Dhanu mi ng’om pagi gicokiri i kume, man gikwayu ya junege ku tho mi masendi.  Ang’o m’ukonye niciro lembe maeno mi litho? “Pi mutoro ma juketho i wang’e eciro yen [mi can], m’ecayu ko lewicne acaya man ejany yo ku cing’ ma yor acwic mi komker pa Mungu.”​—Juebrania 12:2.

¹⁹ Yesu ung’eyo nia nikum gwoko bedoleng’ pare, ecopo mio yung ni Won man ecopo nyutho nia Sitani utie javupo. Genogen maeno umio ire anyong’a ma dit mandha. Eng’eyo bende nia i ng’ei nindo ma nyanok, ebinwang’ere ku Won i polo. Genogen maeno ukonye niciro. Calu Yesu, wan de wacikara niketho wiwa i kum genogen. Ebikonyowa niciro kadok wanwang’ara i wang’ lembe ma nenedi de.

20. Ang’o ma copo konyi nibedo ku nen ma ber?

²⁰ Yehova neno yioyic ku cirocir peri. (Isaya 30:18; som Malaki 3:10.) Eng’olo nia “ebimio iri yeny ma adundeni yenyo.” (Zaburi 37:4) Pieno, keth paru  peri zoo iwi genogen peri. Sitani ubemito ibai genogen peri man inwang’ nia lembang’ola pa Yehova bitimere ngo nyanok de. Ento kud imond i paru ma rac! Kan ibeneno nia genogen peri ubejwik, kwai Yehova ukonyi. Poi i kum wec ma nwang’ere i Jufilipi 4:6, 7 m’uwacu kumae: “Cwinywu kud uring kum gin moko ki; ento i gin ceke ku rwo man kwayukwac ku foyofoc wuwek penji mu ung’eire ni Mungu; man kwiocwiny pa Mungu, ma sagu ng’eyong’ec ceke, bikuro adundewu ku pidoiwu i Kristu Yesu.”

21, 22. (a) Lembakeca pa Yehova utie ang’o pi ng’om? (b) Ikeco nitimo ang’o?

²¹ Bed inwang’ wang’ mapol saa mi nyamu i lembe ma beco mi nindo m’ubino. Ceng’ini eni, dhanu ceke ma kwo biworo Yehova. (Lembanyutha 7:9, 14) Kepar pi kwo mi ng’om ma nyen. Ebibedo ber nisagu gin moko ci ma wacopo paru kawoni! Sitani ku pajogi pare man lembe mareco ceke bibedo mbe. Ibiremo ngo man athoa de ibitho ngo. Ento, kubang’ nindo ibibecew m’itie ku kero man kud anyong’a pilembe itie kwo. Ng’atuman bitimo tic karacelo pi nidwoko ng’om udok ni paradiso. Dhanu ceke bibedo ku cam ma beco man gibikwo i kabedo ma beco. Dhanu bibedo ngo weg rop man gibibedo ngo kwiny ento gibibedo ma ber i kindgi. I ng’eye, dhanu ceke mi ng’om bibedo kud anyong’a pi “gony mi dwong’ mi nyithindho pa Mungu.”​—Jurumi 8:21.

²² Yehova ubemito idok jarimbe ma ceng’ini. Pieno, tim tego niworo Yehova man nicoro ceng’ini i vute kubang’ nindo. Dong’ wek wan ceke, wamedara nibedo i mer pa Mungu rondo ku rondo!​—Yuda 21.